နမော တဿ ဘဂဝတော အရဟတော သမ္မာသမ္ဗုဒ္ဓဿ

စတုရာရက္ခဒီပနီ

ကာယပစ္စဝေက္ခဏာ

၁. ဒုဿီလကထာ,

၂. သီလာနိသံသကထာ,

၃. အနူသာသနကထာ,

၄. အာဝါသိကာစာရကထာ,

၅. ပစ္စယနိဿဂ္ဂကထာ,

၆. ပါတိမောက္ခကထာ,

၇. ဒါယကောဝါဒကထာ,

ပဏာမပဋိဉာ

၁.

စက္ကဝါဠ [Pg.1] နဟုတာ ဂ, ဒေဝါလိ ဂဏ စုမ္ဗိတော;

ဗုဒ္ဓ ပါဒမ္ဗုဇော ဌာတု, သီသေ ဒယာ တိဂန္ဓဇော.

၂.

နန္တ [Pg.2] စက္ကဝါဠ ဗ္ဘုဂ္ဂ, ဂုဏ သန္နိစ္စိတံ ဇိနံ;

ဝန္ဒေ တပ္ပူဇိတံ ဓမ္မံ, တဇ္ဇံ သံဃဉ္စ နိမ္မလံ.

၃.

ဝက္ခာမိ [Pg.3] စတုရာရက္ခံ, သမ္ဗုဒ္ဓ ဝစန နွယံ;

အပ္ပမာဒါဝဟံ ဧတံ, သောတ္တဗ္ဗံ ဘဝဘီရုဟိ.

၄.

ဗုဒ္ဓါနုဿတိ [Pg.4] မရဏာ, ဘုဘာ မေတ္တာစ ဘာဝနာ;

အပ္ပမာဒါယ အာရက္ခာ, စတဿော မာနိတာ သတံ.

၁. ဗုဒ္ဓါနူဿတိ ဘာဝနာ,

၂. မရဏဿတိ ဘာဝနာ,

၃. အသုဘ ဘာဝနာ,

၄. မေတ္တာ ဘာဝနာ,

၅.

ဗုဒ္ဓေါဝါဒံ [Pg.5] သရိတွာဝ, မစ္စုဗ္ဗိဂ္ဂါ သုခေသိနော;

သီတာ သီတတရံ ယန္တိ, သုဘမေတ္တမ္ဗုသိ-ဋ္ဌိတာ.

၆.

မရဏဂ္ဂိ ဝါရဏမ္ဗု, သမ္ဗုဒ္ဓဝစနံ ယိဒံ;

ဗဟူ တဒဂ္ဂိ သန္တတ္တာ, သီတာဝါသုံ တဒမ္ဗုနာ.

၇.

သဒ္ဓံ [Pg.6] ဗုဒ္ဓေန တေဇေတွာ, မာနံ မရဏစိန္တယာ;

အသုဘာယ ဟနေ ရာဂံ, ဒေါသံ မေတ္တာယ ပညဝါ.

၁. ဗုဒ္ဓါနုဿတိ နိဒ္ဒေသ

၁.

အရဟံ [Pg.7] သမ္မာသမ္ဗုဒ္ဓေါ, ဝိဇ္ဇက္ခိ စရဏပ္ပဒေါ;

သုဂတော သုဂဒေါ သတ္ထာ, သဗ္ဗညူ ဘဂဝါဒမော.

၂.

အာရကတ္တာရိဟန္တတ္တာ[Pg.9], ပါပါကာရကတောရဟော;

ဟတ စက္ကာရတော ပူဇာ, ရဟတ္တာ စာရဟံ နမေ.

၃.

သမုတ္တေ [Pg.11] ဇိယ ဂိဟီနံ, အနုပုဗ္ဗိကထော ဇိနော;

အဒါသိ ပရမံ တုဋ္ဌိံ, သစ္စာနိ ဒဿယံ ဒိဝါ.

၄.

ဘိက္ခူနံ [Pg.12] ပဌမေ ယာမေ, ပါယေသိ အမတာဂဒံ;

ဇာတိခေတ္တာဂ ဒေဝါနံ, ကင်္ခစ္ဆေဒေါ သ မဇ္ဈိမေ;

၅.

အာဒေါ ဖလသုခံ ဝေဒိ, မဇ္ဈေ သေယျ မကာ ဇိနော;

ဝေနေယျော လောကနံ အန္တေ, ပစ္ဆိမေပိ တိဓာ ကတေ.

၆.

ခေဒံ [Pg.14] အဂဏယံ နာထော, ပဉ္စ ဗုဒ္ဓကတံ ဝဟံ;

သတ္ထသိဒ္ဓေါ ပရတ္ထံဝ, ဗျာဝဋော သုမဟာဒယော.

၇.

စင်္ကမိတွာ နိသီဒိတွာ, ရတ္တိံဒိဝဉ္စ ဈာယိတုံ;

သုပိတုံ မဇ္ဈယာမေဝ, ဗုဒ္ဓေါ ဘိက္ခူန မောဝဒိ.

၈.

နာလ [Pg.15] မာလသိတုံ တဿ, မဟာဝီရဿ သာသနေ;

ပမာဒါယ မုနိန္ဒဿ, ကတညူ သာဓု သမ္မတော.

၉.

အနညာတဿ ဉာတာယ, အပတ္တဿစ ပတ္တိယာ;

အာရဘေတုံဝ နော ယုတ္တော, အပ္ပမတ္တော ရဟောဂတော.

၁၀.

အာရဗ္ဘထ [Pg.16] နိက္ကမထ, ယုဉ္ဇထ ဗုဒ္ဓသာသနေ;

ဓုနာထ မစ္စုနော သေနံ, နဠာဂါရံဝ ကုဉ္ဇရော.

၁၁.

ယော [Pg.17] ဣမသ္မိံ ဓမ္မဝိနယေ, အပ္ပမတ္တော ဝိဟိဿတိ;

ပဟာယ ဇာတိ သံသာရံ, ဒုက္ခဿန္တံ ကရိဿတိ;

၁၂.

ဣတိ [Pg.18] ဥယျောဇနံ မှာကံ, မုတ္တဿ မုတ္တိယာ သရံ;

နယုတ္တောဝ ပမာဒါယ, မဟာဒယဿ သတ္ထုနော.

၁၃.

သုတ္တေန ဒုဗ္ဗိတက္ကေန, အကိစ္စ ကရဏေနဝါ;

မောဃ ကာလက္ခယော မန္ဒော, ဒုက္ခဿန္တံ ကထံကရေ.

၁၄.

အာကာသံ [Pg.19] စက္ကဝါဠဉ္စ, သတ္တာ ဗုဒ္ဓဂုဏာ ပိစ;

အနန္တာနာမ စတ္တာရော, ပရိစ္ဆေဒေါ နဝိဇ္ဇတိ.

၁၅.

ယထာပိ နဘ မာကာသံ, အင်္ဂုလရဇ္ဇုယဋ္ဌိဘိ;

မိနေတုံ နေဝ သက္ကောတိ, ဧဝံ ကေနစိ တဂ္ဂုဏံ.

၂. မရဏဿတိနိဒ္ဒေသ

၁.

မရဏဿတိ [Pg.23] မိစ္ဆန္တော, တာဝ ဗုဒ္ဓဝစော သုဏ;

အဝိက္ခိတ္တေန စိတ္တေန, သမ္ဗုဒ္ဓ ဝစနံ ဟိဒံ.

၂.

အနိမိတ္တ [Pg.24] မနညာတံ, မစ္စာနံ ဣဓ ဇီဝိတံ;

ကသိရဉ္စ ပရိတ္တဉ္စ, တဉ္စ ဒုက္ခေန သံယုတံ.

၃.

န ဟိ သော ပက္ကမော အတ္ထိ, ယေန ဇာတာ နမိယျရေ;

ဇရမ္ပိ ပတွာ မရဏံ, ဧဝံဓမ္မာ ဟိ ပါဏိနော.

၄.

ဖလာန [Pg.25] မိဝ ပက္ကာနံ, ပါတော ပတနတော ဘယံ;

ဧဝံ ဇာတာန မစ္စာနံ, နိစ္စံ မရဏ တော ဘယံ.

၅.

ယထာပိ ကုမ္ဘကာရဿ, ကတာ မတ္တိကဘာဇနာ;

သဗ္ဗေ ဘေဒပရိယန္တာ, ဧဝံ မစ္စာန ဇီဝိတံ.

၆.

ဒဟရာစ [Pg.26] မဟန္တာစ, ယေဗာလာ ယေစ ပဏ္ဍိတာ;

သဗ္ဗေ မစ္စုဝသံ ယန္တိ, သဗ္ဗေ မစ္စုပရာယနာ.

၇.

တေသံ မစ္စုပရေတာနံ, ဂစ္ဆတံ ပရလောကတော;

နပိတာ တာယတေ ပုတ္တံ, ဉာတိဝါပန ဉာတကေ;

၈.

ပေက္ခတညေဝ [Pg.27] ဉာတီနံ, ပဿ လာလပ္ပတံ ပုထု;

ဧကမေကောဝ မစ္စာနံ, ဂေါ ဝဇ္ဈောဝိယ နိယျတိ.

၉.

ဧဝ မဗ္ဘာဟတော လောကော, မစ္စုနာစ ဇရာယစ;

တသ္မာ ဓီရာ နသောစန္တိ, ဝိဒိတွာ လောက ပရိယာယံ.

၁၀.

အညေပိ [Pg.28] ပဿ ဂမနေ, ယထာ ကမ္မုပဂေ နရေ;

မစ္စုနော ဝသမာဂမ္မ, ဖန္ဒန္တေဝိဓ ပါဏိနော.

၁၁.

ယေန ယေနဟိ မညန္တိ,တတောတဿ ဟိ အညထာ;

ဧတာဒိသော ဝိနာဘာဝေါ,ပဿ လောကဿ ပရိယာယန္တိ.

[သုလ္လ သုတ္တေ ဝုတ္တံ.]

၁၂.

ယထာပိ [Pg.29] သေလာ ဝိပုလာ,နဘံ အာဟစ္စ ပစ္စတာ;

သမန္တာ အနုပရိ ယေယျုံ,နိပ္ပောထေန္တာ စတုဒ္ဒိသာ.

၁၃.

ဧဝံ ဇရာစ မစ္စုစ,အဓိဝတ္တန္တိ ပါဏိနေ;

ခတ္တိယေဗြာဟ္မဏေ ဝေဿေ,သုဒ္ဒေ စဏ္ဍာလ ပက္ကုသေ;

နကိဉ္စိ ပရိဝဇ္ဇေတိ,သဗ္ဗမေဝါ ဘိမဒ္ဒတိ.

၁၄.

န [Pg.30] တတ္ထ ဟတ္ထိ နံ ဘုမ္မိ, န ရထာနံ နပတ္တိယာ;

န စာပိ မန္တယုဒ္ဓေန, သက္ကာ ဇေတုံ ဓနေနဝါ.

၁၅.

တသ္မာဟိ [Pg.31] ပဏ္ဍိတော ပေါသော,သမ္ပဿံ အတ္ထ မတ္တနော;

ဗုဒ္ဓေ ဓမ္မေ စ သံဃေစ,ဓီရော သဒ္ဒံ နိဝေသယေ.

၁၆.

ယော ဓမ္မစာရီ ကာယေန, ဝါစာယ ဥဒ စေတသာ;

ဣဓေဝနံ ပသံသန္တိ, ပစ္စသဂ္ဂေ ပမောဒတီတိ.

[ပဗ္ဗတူ မမ သုတ္တေ ဝုတ္တံ.]

၁၇.

ယထာ [Pg.32] ဝါရိဝဟော ပူရော, ဝဟေ ရုက္ခေ ပကူလဇေ;

ဧဝံ ဇရာမရဏေန, ဝုယှန္တေ သဗ္ဗ ပါဏိနော.

၁၈.

ဒဟရာပိ ဟိ မိယျန္တိ,နရာစ အထနာရိယော;

တတ္ထ ကော ဝိသာသေပေါသော,ဒဟရော မှီတိဇီဝိတေ.

၁၉.

သာယ [Pg.33] မေကေ နိဒိဿန္တိ, ပါတော ဒိဋ္ဌာ ဗဟုဇ္ဇနာ;

ပါတော ဧကေ နဒိဿန္တိ, သာယံ ဒိဋ္ဌာ ဗဟုဇ္ဇနာ.

၂၀.

အဇ္ဇေဝ ကိစ္စံ အာတပ္ပံ, ကော ဇညာ မရဏံ သုဝေ;

နဟိ နော သင်္ကရံ တေန, မဟာသေနန မစ္စုနာတိ.

[ဇာတကေသုဝုတ္တံ.]

၂၁.

နတ္ထေတ္ထညော [Pg.34] နုသာသန္တော, သယံဝတ္တာန မောဝဒ;

ဇိနေရိတာ နုသာရေန, ဘိက္ခု သံသာရ ဘီရုကော.

၂၂.

အဟိဝါပိ [Pg.35] မံ ဍံသေယျ, အညေပိ ဝိသဓာရိနော;

အပိယာပိစ ဃာတေယျုံ, ဥပ္ပဇ္ဇေယျုံ ရုဇာပိမေ.

၂၃.

မစ္စုသေနာ ဝုဓာသင်္ချာ, ဗာဟိရဇ္ဈတ္တု ပဒ္ဒဝါ;

တေဟာယု ပီဠိတံဆေဇ္ဇံ, မရိဿ မဇ္ဇဝါ သုဝေ.

၂၄.

အဠက္ကာ [Pg.36] ဟိ ဂဝါဒီဟိ, စောရာဒီဟိ အရီဟိပိ;

အဘိဏှ သန္နိပါတေဟိ, ရုဇာ ဆနဝုတီဟိပိ.

၂၅.

ဗဟူန မုပကာရေဟိ, အန္နောဒကာဒိကေဟိပိ;

မရိဿံ ပီဠိတော နိစ္စံ, နိရုဇ္ဈေယျာယု အဇ္ဇဝါ.

၂၆.

ဗဟွာဝုဓေ [Pg.37] ဝိသဇ္ဇေတိ, နိလ္လေဏံ မစ္စုနိဒ္ဒယော;

ဝသန္တံ ဘဝသင်္ဂါမေ, နမုတ္တော ကောစိ အာဝုဓာ;

၂၇.

မဟဗ္ဗလာ မဟာပညာ, မဟိဒ္ဓိကာ မဟဒ္ဓနာ;

နမုတ္တာ သမ္မာသမ္ဗုဒ္ဓေါ, သဗ္ဗလောကာဓိပေါ အပိ;

၂၈.

မယာ [Pg.38] သမာ နဝါ ဝုဒ္ဓါ, တဒါဝုဓေဟိ တေ မတာ;

တထာ ဟမ္ပိ မရိဿာမိ, လေဏံ ပုညံဝ မေ ကတံ.

၂၉.

ပထဗျာပါဒယော ဓာတ္ထူ,အာဟာရာ ဘောဇနာဒယော;

သီတုဏှ မုတုနာမေတံ,ဒေါသာ ပိတ္တသေမှာနိလာ.

၃၀.

ဓာတွာဟာရု [Pg.39] တုဒေါသာနံ, သမတ္တေ ဝါယု တိဋ္ဌတိ;

ဝိသမေ တင်္ခဏညေဝ, ဆေဇ္ဇ မပ္ပံ ပရာဓိနံ.

၃၁.

ဓာတွာ ဟာရုတု ဒေါသာနံ, ဝိသမာ သွေပျကလ္လကော;

ဥဿာဟေ ကလ္လကာလေဝ, ကိံကရေယျအကလ္လကော;

၃၂.

ဥပ္ပဇ္ဇေယျုံ [Pg.40] ရုဇာ သွေပိ, အသာတော ဒုက္ခမာ ခရာ;

ပုရေတရံဝ အာရဗ္ဘေ, မာပစ္ဆာ အနုတာပနံ.

၃၃.

သတ္တာနံ [Pg.41] နီစကမ္မာနံ, သရဏောပိ ဘယင်္ကရော;

နီစာနီစံ နဇာနာမိ, မရဏာသန္နတမ္ပိစ.

၃၄.

ကမ္မ ပီဠိတ သတ္တာနံ, တင်္ခဏမ္ပိ ဘယုဗ္ဘဝေါ;

မရေယျ မဇ္ဇဝါ သွေဝါ, နယုတ္တောဝ ပမဇ္ဇိတုံ.

၃၅.

ပုညက္ခီဏာ ပဇာ ခိပ္ပံ, အဟေတုနာပိ နဿယေ;

သုဒ္ဓစိတ္တော မရိဿာမိ, န ကိလိဋ္ဌေန စေတသာ.

၃၆.

ဥပစ္ဆေဒါပိ [Pg.42] မေ သန္တိ, ဘဝါဘဝစိတာ ဗဟူ;

ဆေဇ္ဇံ တေဟာယု အဇ္ဇာပိ, သာဓွာသုမာရဘေ မတံ;

၃၇.

ကမ္မာ ပရာဓ သတ္တာနံ, ဝိနာသေ ပစ္စုပဋ္ဌိတေ;

အနယော နယရူပေန, ဗုဒ္ဓိမာကမျ တိဋ္ဌတိ.

၃၈.

မရဏာသန္န [Pg.43] တညေဝ, စိန္တေယျ ပညဝါ သတော;

ဧဝံ စိန္တယန္တော သန္တော, နပါပံ ကတ္တု မုဿဟေ.

၃၉.

မရဏာသန္န တညေဝ, စိန္တေယျ ဗုဒ္ဓသာဝကော;

ဧဝံ စိန္တယန္တော သန္တော, ကဒါစိပိ အနုဏ္ဏတော.

၄၀.

အဒ္ဓါဂ [Pg.44] မရဏံ ပညော, ပုရေတရံဝ စိန္တယေ;

ကရေ ကာတဗ္ဗ ကမ္မဉ္စ, ဧဝံ သော နာနုသောစတိ.

၄၁.

မရဏာသန္န သညီ သော, အပ္ပမတ္တော ဝိစက္ခဏော;

ပတ္တေပိ မရဏေ ကာလေ, န သမ္မုဠှော နသောကဝါ.

၄၂.

မရဏာ [Pg.45] သန္နသညီ သော, သောဓေတိ အတ္တနော မလံ;

နိမ္မလေန စုတော ဘိက္ခု, နတွေဝါ ပါယ ဂါမိကော.

၄၃.

သတိ အာသန္န မရဏေ,ဒူရသညီ ပမာဒ ဝါ;

ယော ကရောတိ အကာတဗ္ဗံ,တဒါ သော အတိသောစတိ.

၄၄.

သတိ [Pg.46] အာသန္နမရဏေ, ဒူရသညီ ပမာဒဝါ;

အာကိဏ္ဏော ပါပဓမ္မေဟိ, ပဇ္ဈာယိ ဒုမ္မနော တဒါ.

၄၅.

သတိ အာသန္န မရဏေ, ဒုဋ္ဌော ဒေါသောတိ ထဒ္ဓဝါ;

အဘိနန္ဒတိ သာဒေတိ, တဒါသော အတိဒုက္ခိတော.

၄၆.

သတိ [Pg.47] အာသန္နမရဏေ, တုဝဋံ န စိကိစ္ဆတိ;

သဉ္စိစ္စာပတ္တိ မာပန္နော, တဒါ သော ပရိဒေဝတိ.

၄၇.

သတိ အာသန္န မရဏေ, ဂိဟီဟိ နဝကေဟိစ;

သံသဋ္ဌော န နုလောမေဟိ, သွတိဝဿု မုခေါ တဒါ.

၄၈.

သတိ [Pg.48] အာသန္န မရဏေ, ကုဟကော ကုလဒူသကော;

မိစ္ဆာဇီဝ သမာပန္နော, ဒုန္နိမိတ္တောဝ သော စုတော.

၄၉.

သသောကီ [Pg.49] သဟနန္ဒီစ, ဒုက္ခေ ဒုက္ခော သုခေ သုခေါ;

ဂိဟိကမ္မေသု ဥဿုက္ကော, ပဿံ ဂိဇ္ဈကူဋံ စုတော.

၅၀.

မရိဿန္တိ အနာဝဇ္ဇ, ကိလေသာတုရ ပီဠိတော;

ကိမိခဇ္ဇဝဏော သာဝ, ဘန္တော ကိံ သုဂတိံ ဝဇေ.

၅၁.

မရိဿန္တိ [Pg.50] အနာဝဇ္ဇ, ဓုရဒွယံ န ပူရတိ;

ဂန္ထံ ဝိပဿနံ တန္ဒီ, ကာရုညောယေဝ သော စုတော.

၅၂.

မရိဿန္တိ အနာဝဇ္ဇ, ကိလေသာနံ ဝသာနုဂေါ;

သမ္ဗုဒ္ဓါ-ဏံ ဝီတိက္ကန္တော, ကာရုညော နတ္ထိ တဿမော.

၅၃.

မရိဿန္တိ [Pg.51] အနာဝဇ္ဇံ, ဓနမေသီ အဓမ္မတော;

ပုညေ စိန္တာပိ နုပ္ပဇ္ဇိ, နိရယံ သော မနံ ဂတော.

၅၄.

မရေယျန္တိ အနာဝဇ္ဇံ, ဓနံ စိနိ အဓမ္မတော;

စိတံ စိတံ ဣဟေဝေတံ, တသ္မိံဂိဒ္ဓေါ သ ပေတ္တိကော.

၅၅.

အတ္ထာ [Pg.52] ဂေဟေ နိဝတ္တန္တေ, သုသာနေ မိတ္တဗန္ဓဝါ;

သုကတံ ဒုက္ကတံ ကမ္မံ, ဂစ္ဆန္တ မနုဂစ္ဆတိ.

၅၆.

မရေယျန္တိ အနာဝဇ္ဇံ, ဣဟတ္ထံ ဝါ နုယုဉ္ဇတိ;

သမ္ပရာယ မနပေက္ခော, သုဇုံ ဝါ ပါယဂါမိကော.

၅၇.

မရေယျန္တိ [Pg.53] သမာဝဇ္ဇ, ဓမ္မတော ဓန မေသတိ;

ပုညကာရီ သုလဒ္ဓေန, မရဏေပိ သ မောဒတိ.

၅၈.

ပဉ္စသီလ သဒါရက္ခော, ယထာဗလဉ္စ ဒါယကော;

ကာလေ ဥပေါသထာဝါသော, သော နိစ္စံ သုဂတိံ ဝဇ္ဇေ.

၅၉.

ဓောဝါပတ္တိမလံ [Pg.54] ခိပ္ပံ, မစ္စု အဒ္ဓါ ဂမိဿတိ;

မိစ္ဆာဝိတက္က မုစ္ဆိဇ္ဇ, ကရ ကာတဗ္ဗဘာဝနံ.

၆၀.

အတိက္ကန္တာ ဗဟူ ရတျော, ခေပေတွာ မမ ဇီဝိတံ;

မန္ဒာယုနာ ပမာဒေန, ယုတ္တော ဝိဟရိတုံ ကထံ.

၆၁.

ဟာသန္တံ [Pg.55] နန္ဒိ မတ္တာနံ, မစ္စုသန္ဓီဟိ တစ္ဆယေ;

ကုစ္ဆိ မေယျစုတော အဇ္ဇ, ကော ဟာသနန္ဒိတဗ္ဗကော.

၆၂.

မစ္စုသေနာဝုဓာ သင်္ချာ, မရဏာဘိမုခေါ အဟံ;

အစ္စာယိတဗ္ဗ ကာလော ယံ, ဣက္ခိတဗ္ဗ မုဒိက္ခတု.

၆၃.

ပုရေမရာမိ [Pg.56] ဒဋ္ဌဗ္ဗံ,ဒက္ခေယျံ မစ္စု ဧဿတိ;

အစ္စာယိတဗ္ဗ ကာလော ယံ,နောကာသော ဟာသတုဋ္ဌိယာ.

၆၄.

အာကိဏ္ဏမစ္စုသေနာနံ[Pg.57], အဇ္ဇ သွေဝါ ဝိနာသိနံ;

အဒ္ဓါ ပဟာယ ဂါမီနံ, ကိံ ပမာဒ ဝိဟာရိနာ.

၆၅.

ခဏမတ္တောဝ ပစ္စက္ခော, အဇ္ဇ သွေဝါ အတိဿတိ;

သမ္ပရာယော အတိဒီဃော, ပရမ္ပရော အနန္တိကော.

၆၆.

ခဏမတ္တောဝ [Pg.58] ပစ္စက္ခော, မစ္စုနာ တံ ဇဟိဿတိ;

ပဟာယ ဂမနီယေ-သ္မိံ, မဟုဿာဟော နိရတ္ထကော.

၆၇.

သမ္ပရာယော အတိဒီဃော, အပါထေယျေ သုဒုတ္တရော;

မဟုဿာဟေန ကာတဗ္ဗော, တဒတ္ထော ဒီဃဒဿိနာ.

၆၈.

သဒ္ဓါ [Pg.59] ဗန္ဓတု ပါထေယျံ, တဒေသနံ ဣဟေဝ ဟိ;

ဘဝန္တရေ နလဗ္ဘေယျ, အပါထေယျ တိဒုက္ခိတော.

၆၉.

သံသာရ တရဏတ္ထာယ, မဟောလုမ္ပာနိ ဗန္ဓထ;

ဘာဝနာ ဒါန သီလေဟိ, တိဝိတ္တိဏ္ဏော ဘဝဏ္ဏဝေါ.

၇၀.

ဘုဉ္ဇံ [Pg.60] ဘုဉ္ဇံ ဇနံ ကာမေ,ကာလာကာလာ-ဗုဓောန္တကော;

ကန္တေကန္တေတိ မံသာသော,ပိဝံပိဝံဝ ကံ မိဂံ.

၇၁.

ကာမေ ကာမေသနာယေယျ,ကာလောကာလော မတေဋ္ဌိယာ;

ပူရေ ပူရေတဗ္ဗံ ဓမ္မံ,အဒ္ဓါ အဒ္ဓါန သံသရံ.

၇၂.

မရေယျန္တိ [Pg.61] အနုဗ္ဗိဂ္ဂေါ, ပါပကံ ကတ္တုမုဿဟေ;

ကရေယျ ဟာသနန္ဒိဉ္စ, စာပလ္လဉ္စ ပမာဒ ဝါ.

၇၃.

မရေယျမိတိ [Pg.62] သံဝိဂ္ဂေါ, လေဏမေဝ ဂဝေသတိ;

န ဟာသိ နေဝနန္ဒီစ, န စာပလ္လော ကဒါစိပိ.

၇၄.

အစ္စုဋ္ဌိတ ရုဇဂ္ဂီဟိ, အစ္စာယာသေ ဘယာနကေ;

နောသဓေ မရဏာသန္နေ, ကတပုညံဝ သာတ-ဒံ.

၇၅.

ဉာတိသံဃာ [Pg.63] ဝိယောဇေန္တာ, မရဏန္တ ဘုသာတုရာ;

သဗ္ဗံ ပဟာယ ဂန္တာပိ, နန္ဒိတဗ္ဗာနိ ပုညိနော.

၇၆.

ပဿန္တာ သုနိမိတ္တာနိ, ပါကဋာနိ သကမ္မုနာ;

သုခန္တိ မရဏေ ကာလေ, နုမောဒန္တာ ကတာနိစ.

၇၇.

သာတ-ဒါတာနိ [Pg.64] ပုညာနိ, ဧဝံ မဟဗ္ဘယေ အပိ;

သုဂတိံ လဟုနေတာနိ, ကာတဗ္ဗာနိ ပုရေတရံ.

၇၈.

ဒေဝဒူတေ [Pg.65] ပကာသေတွာ, ယမပုဋ္ဌော သယံကတံ;

ပုညံ သရတိ စေ သတ္တော, တဒေဝ သုဂတိံ ဝဇေ.

၇၉.

ပါပ [Pg.66] ကဍ္ဎမ္ပိ နိရယေ, မနံ ဒုက္ခဂတံ ပဇံ;

ဒုက္ခာ မောစေတိ ယံပုညံ, သဒါ ကာတဗ္ဗမေဝ တံ.

၈၀.

ပဟာယကံဝ ပုညဉှိ, ပဟာတဗ္ဗံဝ ပါပကံ;

တံ ပဒီပန္ဓကာရံဝ, ဒွယံ ဩတွာ ခုကံ ဝိယ.

၈၁.

ဉာတိသံဃာ [Pg.67] ဝိယောဇေန္တာ, မရဏန္တ ဘုသာတုရာ;

သဗ္ဗံ ပဟာယ ဂန္တာရော, ဘယာနကာနိ ပါပိနော.

၈၂.

ပဿန္တာ ဒုန္နိမိတ္တာနိ, ပါကဋာနိ သကမ္မုနာ;

မရဏေ အတိဒုက္ခန္တိ, နုတာပေန္တာ ကတာနိစ.

၈၃.

ပဋိပီဠာနိ [Pg.68] ပါပါနိ, ဧဝံ မဟဗ္ဘယေ သတိ;

ဒုဂ္ဂတိံ လဟုနေတာနိ, ယုတ္တောဝ ပရိဝဇ္ဇိတုံ.

၈၄.

ဒေဝဒူတေ [Pg.69] ပကာသေတွာ, ယမရာဇေန ပုစ္ဆိတော;

ပမာဒဿန္တိ စိက္ခန္တော, မဟဂ္ဂိမှိ တုရံ ပတိ.

၈၅.

ပုညံ အကရိဝါ မာဝါ, ယမရာဇိန္ဒ ပုစ္ဆိတော;

ပမာဒဿန္တိ စိက္ခန္တော, မဟာဒုက္ခံ တုရံ ဂမိ.

၈၆.

ပါပံ [Pg.70] အကရိဝါ မာဝါ, ပုစ္ဆိတော ယမသာမိနာ;

ပမာဒဿန္တိ စိက္ခန္တော, တတ္တံ ဂုဠံ တုရံ ဂိလိ.

၈၇.

ဇာတမတ္တာ တိဇိဏ္ဏာစ, အာတုရာစ မတာ ဝုဓာ;

ဒေဝဒူတေ ဣမေ ပဉ္စ, ဒိသွာ သံဝိဂ္ဂတံ ဝဇေ.

၈၈.

စောဒိတာ [Pg.71] ဒေဝဒူတေဟိ, ယေ ပမဇ္ဇန္တိ မာနဝါ;

တေ ဒီဃရတ္တံ သောစန္တိ, ဟိန ကာယူ ပဂါနရာ.

၈၉.

ဓုရဒွယ [Pg.72] မနာရဗ္ဘ, ဂိဟိကမ္မာဒိကေ ရတော;

ကထံ ဂိဇ္ဈကူဋံ သေသံ, ပေတာဝါသံ အတိဿတိ.

၉၀.

ပရိယတ္တိ မသိက္ခန္တော,နာရဒ္ဓေါ ပဋိပတ္တိယံ;

အလသော ဒုဗ္ဗိတက္ကော သော,ကိံ တံသေလံ အတိဿတိ.

၉၂.

မောစနတ္ထာယ [Pg.73] ပဗ္ဗဇ္ဇ, သံကိလိဋ္ဌာ ပမာဒိနော;

သုဂတျာပိစ တေ ဘဋ္ဌာ, အတိဒူရာဝ မုတ္တိတော.

၉၃.

သီဒန္တေဝ [Pg.74] ဇလေ ခိတ္တာ, သိလာ မဟာဝ ခုဒ္ဒကာ;

ပတန္တိ ခုဒ္ဒကေနာပိ, အပါယံ ပါပ ကမ္မုနာ.

၉၄.

ပတန္တာ ခုဒ္ဒကေနေဝ, ဗဟူဟိ ပုန ပီဠိတာ;

မောက္ခောကာသံ နဝိန္ဒန္တိ, ပါပံ ခုဒ္ဒမ္ပိ နာစရေ.

၉၅.

ဇေဂုစ္ဆိတ္ထူဒရာဂမ္မ[Pg.75], ပုနာပိ တတ္ထ နိစ္စဂူ;

ဒုက္ခာတိ ဒုက္ခ သံကိဏ္ဏော, ဟဋ္ဌုံ တုဋ္ဌုံ နသက္ကုဏေ.

၉၆.

အတိဗျာပိဂုဏော [Pg.76] ပုညော,မဟာယသော သိရိန္ဓရော;

ကုစ္ဆိယံ ရေတသိ ဝါသော,အတီဝ လဇ္ဇိတဗ္ဗကော.

၉၇.

မစ္စုဒုက္ခံ ခဏံယေဝ, အတိဒုက္ခံ တဒုတ္တရိ;

မာတုဂါမုဒရေ သန္ဓိ, ပတိဋ္ဌာနံ ဘယာနကံ.

၉၈.

မစ္စုဒုက္ခံ [Pg.77] ခဏံယေဝ, အတိဒုက္ခံ စိရတ္တနံ;

အာမ ပက္ကန္တရေ သန္ဓိ, ပတိဋ္ဌာနံ ဘယာနကံ.

၉၉.

ဒုဂ္ဂတျံဌာတု တံဒုက္ခံ, သုဏ ဥစ္စကုလေအပိ;

ကုစ္ဆိယံ အတိသမ္ဗာဓေ, ဇလာဗုမှိ ဇိဂုစ္ဆိတေ.

၁၀၀.

မိဠှ သေမှာဒိ သံကိဏ္ဏေ, အတိ ဒုဂ္ဂန္ဓ ဝါသိတေ;

ဂူထကူပေ ကိမီဝိယ, တမေဇာ မူလကမ္မတော.

၁၀၁.

ပရမာဏုကာယော ဌာတိ, ဒုက္ခီ နေရယိကော ဝိယ;

ဓုဝါတုရော သုခါမိဿော, အာမ ပက္ကာသယန္တရေ;

၁၀၂.

ဝေဒနဋ္ဋောဝ သံဝဍ္ဎော, အစိတ္တောဝိယ နိစ္စလော;

ဒသမာသန္တရေ ကစ္စေ, ဗဟူ မရန္တိ ပါဏိနော.

၁၀၃.

ပရိပက္ကော [Pg.79] ပမုဉ္ဆော သော,အတိသမ္ဗာဓ ယောနိတော;

မလာကိဏ္ဏေန ဂတ္တေန,အစ္စာယာသော ဝိဇာယတိ.

၁၀၄.

ဧဝံ [Pg.80] မစ္စုဉ္စ သန္ဓိဉ္စ, ဝိဇာယနဉ္စ ဘေရဝံ;

ပဿံ နိဗ္ဗိန္ဒန္တော သန္တော, ဝိရဇ္ဇေယျ ဘဝန္ဒုကေ.

၁၀၅.

ဧဝံ မစ္စုဉ္စ သန္ဒိဉ္စ, အနုဿရ မဘိဏှသော;

ရာဇသေဋ္ဌိ ဘဝါဒိမ္ပိ, နဣစ္ဆေယျ တဒနွိတံ.

၁၀၆.

ဘဝေ [Pg.81] ဒုက္ခ မစိန္တေတွာ, ဘဝါသာယ ပဝတ္တိတံ;

ပုညံ ပုနပ္ပုနံ ဒေတိ, သန္ဓိံ န နိဗ္ဗုတိံ ဝရံ.

၁၀၇.

ဘဝေ ဒုက္ခံ ဝိဘာယိတွာ, နိဗ္ဗိန္ဒေန ပဝတ္တိတံ;

ပုညံ ဘဝ မတိက္ကမ္မ, နိဗ္ဗာနံ ဒေတိ နိဗ္ဗုတိံ.

၁၀၈.

ဘဝေ [Pg.82] ဒုက္ခံ သရိတွာန, မစ္စုသန္ဓိ သယာဒိကံ;

တိဘဝေသု ဝိရဇ္ဇေယျာ, ဒိတ္တ ဂေဟေဝ သာမိကော.

၁၀၉.

သန္တော ပုညာနိ ကရောန္တော, သန္ဓိဒုက္ခ မနုဿရံ;

နိဗ္ဗိန္ဒ ယုတ္တ စိတ္တေန, ဝဇ္ဇေယျ ဘဝသာတ တော.

၁၁၀.

ပုည [Pg.83] နိဗ္ဗတ္တ ဌာနေပိ, ဇေဂုစ္ဆေ သန္ဓိသမ္ဘဝေါ;

ဘဝ သာတ ဝသာ တသ္မာ, ဓီရော တံ လဂ္ဂနံ စဇေ.

၃. အသုဘဘာဝနာ နိဒ္ဒေသ

၁.

သိရိမံ [Pg.84] ဂဏိကံ ဒိသွာ, ဒမေတုံ ရတ္တစေတသံ;

ဒဿေတွာ မတသာရီရံ, တဿာ ဇိနော ဣဒံ ဗြဝိ.

၂.

စရံဝါ [Pg.89] ယဒိဝါ တိဋ္ဌံ, နိသိန္နော ဥဒဝါ သယံ;

သမဉ္ဆေတိ ပသာရေတိ, ဧသာ ကာယဿ ဣဉ္ဇနာ.

၃.

အဋ္ဌိ နှာရူဟိ သံယုတ္တော, တစ မံသာဝ လေပနော;

ဆဝိယာ ကာယော ပဋိစ္ဆန္နော, ယထာဘူတံ နဒိဿတိ.

၄.

အန္တပူရော [Pg.90] ဒရပူရော, ယကန ပေဠဿ ဝတ္ထိနော;

ဟဒယဿ ပပ္ဖာသဿ, ဝက္ကဿ ပိဟကဿစ.

၅.

သိင်္ဃာနိကာယ ခေဠဿ, သေဒဿစ မေဒဿစ;

လောဟိတဿ လသိကာယ, ပိတ္တဿစ ဝသာယစ.

၆.

အထဿ [Pg.91] နဝဟိ သောတေဟိ, အသုစိ သဝတိ သဗ္ဗဒါ;

အက္ခိမှာ အက္ခိဂူထကော, ကဏ္ဏမှာ ကဏ္ဏဂူထကော.

၇.

သိင်္ဃာနိကာစ နာသတော, မုခတော ဝမတိ ဧကဒါ;

ပိတ္တံ သေမှဉ္စ ဝမတိ, ကာယမှာ သေဒဇလ္လိကာ.

၈.

အထဿ [Pg.92] သုသိရံ သီသံ,မတ္ထလုင်္ဂဿ ပူရိတံ;

သုဘတော နံ မညတိ ဗာလော,အဝိဇ္ဇာယ ပုရက္ခတော.

၉.

ယဒါစ သော မတော သေတိ,ဥဒ္ဓုမာတော ဝိနီလကော;

အပဝိဒ္ဓေါ သုသာနသ္မိံ,အနပေက္ခာ ဟောန္တိ ဉာတယော.

၁၀.

ခါဒန္တိ [Pg.93] နံ သုဝါနာစ, သိင်္ဂါလကာစ ကိမိယော;

ကာကာ ဂိဇ္ဈာစ ခါဒန္တိ, ယေစညေ သန္တိ ပါဏကာ.

၁၁.

သုတွာန [Pg.94] ဗုဒ္ဓဝစနံ, ဘိက္ခု ပညာဏဝါ ဣဓ;

သောခေါ နံ ပရိဇာနာတိ, ယထာဘူတဉှိ ပဿတိ.

၁၂.

ယထာဣဒံ တထာဧတံ, ယထာဧတံ တထာဣဒံ;

အဇ္ဈတ္တဉ္စ ဗဟိဒ္ဓါစ, ကာယေ ဆန္ဒံ ဝိရာဇယေ.

၁၃.

ဆန္ဒ [Pg.95] ရာဂ ဝိရတ္တော သော, ဘိက္ခု ပညာဏဝါ ဣဓ;

အဇ္ဈဂါ အမတံ သန္တိံ, နိဗ္ဗာနံ ပဒ မစ္စုတံ.

၁၄.

ဒွိပါဒကော ယံ အသုစိ, ဒုဂ္ဂန္ဓော ပရိဟာရတိ;

နာနာကုဏပ ပရိပူရော, ဝိဿဝန္တော တတောတတော.

၁၅.

ဧတာဒိသေန [Pg.96] ကာယေန, ယော မညေ ဥန္နမေတဝေ;

ပရံဝါ အဝဇာနေယျ, ကိမညတြ အဒဿနာတိ;

ကာယ ဝိစ္ဆန္ဒနီယသုတ္တံ, ဝိဇယသုတ္တန္တိပိ ဝတ္တဗ္ဗံ.

၁၆.

ရ-အက္ခရော [Pg.97] သိယာဂ္ဂိမှိ, ရောဝ အဂ္ဂိဝ အာဂတော;

တသ္မာ ရာဂေါတိ ဝတ္တဗ္ဗော, တဏှာဝ နိစ္စတာပိကာ.

၁၇.

အဘိဏှမေဝ ရာဂဂ္ဂိ, ဒယှတေ သုဘသညိနံ;

ကိမိခဇ္ဇဝဏော သာဝ, ဒုက္ခီ ရာဂီ သ သဗ္ဗဒါ.

၁၈.

ဒုက္ခီ [Pg.98] ပိယ မလဒ္ဓါန, လဒ္ဓါပျ ပရိပုဏ္ဏတော;

နတ္ထိ ရာဂဂ္ဂိခန္ဓဿ, ပိယိန္ဓေန ဟိ ပုဏ္ဏတာ.

၁၉.

နတ္ထိ [Pg.99] ရာဂသမော အဂ္ဂိ,ဣတိ ဝုတ္တံ မဟေသိနာ;

တေန ရာဂဂ္ဂိနာ ဒဍ္ဎော,သဗ္ဗော လောကော တိဒုက္ခိတော.

၂၀.

ဧကဿ ပိဝိတံ ခီရံ, စတူ ဒဓိ ဇလာ ဗဟု;

ရာဂဟေတု ဘဝေ သန္ဓိ, ဋ္ဌာနံ အနမတဂ္ဂိကံ.

၂၁.

စတူဒမိ [Pg.100] ဇလာ ဘိယျော, သီသစ္ဆေဒန လောဟိတံ;

ရာဂဟေတု ဘဝေ မစ္စ, ဘယံ အနမတဂ္ဂိကံ.

၂၂.

ဧကဿ ရုဒတော အဿု, စတူ ဒဓိ ဇလာ ဗဟု;

ဒုက္ခံ အနမတဂ္ဂံဝ, တံဟေတု ပရိဒေဝနံ.

၂၃.

တတ္တာယော [Pg.101] ဂုဠ ဂိလိတ, ဝဓဂ္ဂိ ဒယှနာ ဒိကံ;

အသင်္ချေယျံ မဟာဒုက္ခံ, တံဟေတု နိရယေ လဘိ.

၂၄.

ဧက ဒွိတ္တိ စတု ပဉ္စ, ဗုဒ္ဓုပ္ပာဒေပျ မောစိတံ;

ခုပ္ပိပါသိတ နိဇ္ဈာမံ, လဘိ တံဟေတု ပေတ္တိကံ.

၂၅.

တိရစ္ဆာနေ [Pg.102] အသူရေစ, ဒုက္ခံ နာနာဝိဓံ လဘိ;

နမတဂ္ဂိက သံသာရေ, သဗ္ဗန္တံ ရာဂဟေတုကံ.

၂၆.

ဧကဿေကေန ကပ္ပေန, ပုဂ္ဂလဿဋ္ဌိ သဉ္စယော;

သစေ သံဟာရိတော အဿ, ဝေပုလ္လ ပဗ္ဗတာဓိကော.

၂၇.

ဧက ကပ္ပေ ဣဒံ ဒုက္ခံ, နာဒိကပ္ပေသု ကာကထာ;

ရာဂေါ နနု မဟာဝေရီ, ဗာလော ဇနော တ မိစ္ဆတိ.

၂၈.

ရာဂသုဒ္ဓိ [Pg.103] အသောကောစ, နိဒ္ဒုက္ခော ဉာယပတ္တိစ;

နိဗ္ဗာနံ ပဉ္စ ပစ္စက္ခာ, အသုဘာယ ဖလာ မတာ.

၂၉.

အသုဘဂ္ဂဟဏံ [Pg.104] ဈာယီ, မိတာ သိန္ဒြိယ သံဝရော;

သောမိတျ မုက္ကဋ္ဌာဝါစာ, ဆဠိမေ ရာဂ သုဒ္ဓိယာ.

၃၀.

နိစ္စုဂ္ဂရာဂ ရောဂီနံ, အသုဘာ ဝါတုလောသဓာ;

ရာဂယက္ခာဘိ ဂယှာနံ, အသုဘာ မန္တ မုတ္တရံ.

၃၁.

သဇီဝကာစ [Pg.105] နိဇ္ဇီဝါ, အသုဘာ ဒုဝိဓာ မတာ;

သဇီဝါ ကေသလောမာဒိ, ဒသေဝိမေ အဇီဝကာ.

၃၂.

ဥဒ္ဓုမာတက [Pg.106] ဝီနီလံ, ဝိပုဗ္ဗကံ ဝိဆိဒ္ဒကံ;

ဝိက္ခာယိတက ဝိက္ခိတ္တံ, ဟတိဝိက္ခိတ္တ လောဟိတံ.

၃၃.

ပုဠုဝ ဋ္ဌိက မိစ္စေသု, လဒ္ဓါ အညတရံ သတော;

ရတန ဝါနပဿေယျ, ယထာ စေတသိ ပါကဋံ.

၃၄.

မတံ [Pg.107] ခဇ္ဇံ သ မံသဉ္စ, နိလောဟိတံ နိမံသကံ;

ဝိက္ခိတ္တံ သေတ ပုဉ္ဇဋ္ဌိံ, နဝဓာ ပုတိမိက္ခယေ.

၃၅.

မစ္စုတော [Pg.108] ပရိမုစ္စာမိ, ပဋိဝတ္တိ ယိမာ ယိတိ;

ပယောဇန သမာဝဇ္ဇ, မောဒိတဗ္ဗံ ဇိဂုစ္ဆကေ.

၃၆.

သဇီဝကေ ဇိဂုစ္ဆတ္ထံ, နိဇ္ဇီဝါ သုဘ မီရိတံ;

တထူပမော အယံကာယော, ဧဝမေဝ ဘဝိဿတိ.

၃၇.

ဧဝံဓမ္မော [Pg.109] အယံကာယော, ဧဝံဘာဝီ နတိက္ကမော;

ဣစ္စုပ သံဟရေ ဒိသွာ, ဧကဒွိဟ မတာဒိကံ.

၃၈.

ယထာ [Pg.110] ဣဒံ တထာဧတံ, ယထာဧတံ တထာ ဣဒံ;

ဇေဂုစ္ဆံ ပဋိကူလျဉ္စ, ကာယေ ဣစ္စုပ သံဟရေ.

၃၉.

ဥဒ္ဓုမာတ ဝိနီလာဒိ,ပဋိကူလျော ဇိဂုစ္ဆိတော;

တထေဝါယမ္ပိ မေ ကာယော,ဝိသေသော နာယု-သာယုဝ.

၄၀.

ဥဒ္ဓုမာတ [Pg.111] ဝိနီလာဒေါ, သောဘဏံ နတ္ထိ ကိဉ္စိပိ;

ဣမသ္မိံပိ မေ ကာယေ, ဂဝေသန္တောပိ သဗ္ဗသော.

၄၁.

ပဋိကူလဝသာ ဓာတု, ဝသာစ ဒွိပ္ပကာရတော;

ပစ္စဝေက္ခေယျိမံ ကာယံ, ဣစ္ဆံ ဝိရာဂ မတ္တနိ.

၄၂.

ဝဏ္ဏ [Pg.112] သဏ္ဌာန ဂန္ဓေဟိ, အာသယော ကာသတောပိစ;

ဇေဂုစ္ဆ ပဋိကူလျာစ, ကေသာ န တုဋ္ဌမာနိတာ.

၄၃.

ဣတိ ကေသေသု ဣက္ခေယျ,လောမာ ဒီသုပျယံ နယော;

ဒွတ္တိံသေဝဉှိ ကောဋ္ဌာသေ,ပစ္စဝေက္ခေ ဝိသုံဝိသုံ.

၄၄.

ကာယတော [Pg.113] ဗဟိနိက္ခန္တံ, ပဋိကူလျံ ဇိဂုစ္ဆိတံ;

အနိက္ခန္တမ္ပိ ဇေဂုစ္ဆံ, ပဋိကူလျံဝ တဿမံ.

၄၅.

သင်္ခတမ္ပိ ယထာ ဝစ္စံ, မနုညတံ န ပါပုဏေ;

ဥပက္ကမ သဟဿေဟိ, ဧဝံ ကေသာဒိကမ္ပိစ.

၄၆.

သဘာဝ [Pg.114] ပဋိကူလျံဝ, ဧကမ္ပိ ဝစ္စ ပုဉ္ဇကံ;

နနု ဇေဂုစ္ဆိတာ ဘိယျော, ဒွတ္တိံသ ဝစ္စပုဉ္ဇကာ.

၄၇.

ပစ္စေကမ္ပိ [Pg.115] ပဋိကူလျံ, ကေသာဒိကံ သဘာဝတော;

ကေသာဒိဒွတ္တိံသ ပုဉ္ဇော, ဘိယျော ဇေဂုစ္ဆိတော နနု.

၄၈.

ပုဉ္ဇိတေသွေဝ ကန္တေသု, ကန္တောဟောတိ သ ပုဉ္ဇကော;

ပုဉ္ဇိတေသု အကန္တေသ, အကန္တောဝ သ ပုဉ္ဇကော.

၄၉.

ပစ္စေကံ [Pg.116] ဝိနိဘုတ္တေသ, ကေသ လောမ နခါဒိသု;

နတ္ထိ တညာ ကုမာရီဝါ, မုခဟတ္ထာဒိကာနိဝါ.

၅၀.

သမ္ပိဏ္ဍိ တေသု တေသွေဝ,ကုတော တာ တာနိ အာဂတာ;

ပညတ္တိ မတ္တ မေဝေသာ,ဇိဂုစ္ဆညာ န ကာစိပိ.

၅၁.

သန္တံ [Pg.117] စိန္တေယျ နာသန္တံ, သန္တ စိန္တယတော သုခံ;

အသန္တံ ပရိကပ္ပေန္တော, နာနာဒုက္ခေဟိ တပ္ပတိ.

၅၂.

နာဝဇ္ဇ သန္တဇေဂုစ္ဆံ, သညံ အသတိ ကာတုန;

သုဘာ ဣတ္ထီတိ ဂါရဂ္ဂိ, ဥပ္ပဇ္ဇိ သုဘသညိနော.

၅၃.

အသန္တံဝ [Pg.118] အဘူတံဝ, ပဿေ ရာဂဂ္ဂိဇောတိယာ;

တာယ သန္တဉ္စ ဘူတဉ္စ, န ပဿတိ ကဒါစိပိ.

၅၄.

ဧကဿ [Pg.119] ပိဝိတံ ခီရံ, သီသစ္ဆေဒန လောဟိတံ;

ရုဒတော အဿု တံဟေတု, စတူဒဓိ ဇလာ ဗဟု.

၅၅.

အာယတိမ္ပိ အတီတေဝ, သံသရန္တဿ ဟေဿတိ;

ရာဂံ ဟန္တု မနီဟောစေ, ခီရံ အဿုစ လောဟိတံ.

၅၆.

သုဘသညာယ [Pg.120] သော ဝဍ္ဎော,တဒဘာဝေ သ နဿတိ;

ထိရံ ဟန္တုံ န တံသညံ,သက္ကာ သိထိလ ဝီရိယော.

၅၇.

ဥဿောဠှိ [Pg.121] ဝီရိယော ဟုတွာ, ဗြူဟေယျာသုဘ ဘာဝနံ;

သုဘသညာပ္ပ ဟာနာယ, ပရိစ္စဇ္ဇာပိ ဇီဝိတံ.

၅၈.

အညကိစ္စ မုပေက္ခာယ, ဗြူဟေယျာသုဘ ဘာဝနံ;

မန္ဒိ ဟုတွေဟ ရာဂဂ္ဂိ, နိဗ္ဗာယိဿတိ အာယတိံ.

၅၉.

ကိစ္စံ မေ ဣဒမေဝေတိ, ဗြူဟေယျာသုဘ ဘာဝနံ;

ဒါနိ မန္ဒဂ္ဂိ ဟုတွာန, ပါမောဇ္ဇံ ဝေ လဘိဿတိ.

၆၀.

ကာယေ [Pg.122] ဒဋ္ဌဗ္ဗ ဇေဂုစ္ဆံ, အပဿန္တော ပမာဒဝါ;

အလဒ္ဓါ ကိဉ္စိ ပါမောဇ္ဇံ, ပဗ္ဗဇ္ဇမ္ပိ န မောဒတိ.

၆၁.

ပုရေ မရာမိ ကာယေ သ္မိံ, ပဿာ မိ ပဿိတဗ္ဗကံ;

ဣစ္စာ ရဒ္ဓေါ ဝီတိံလဒ္ဓါ, ပဗ္ဗဇ္ဇံ အတိမောဒတိ.

၆၂.

ကာယေ [Pg.123] ဒဋ္ဌဗ္ဗ ဇေဂုစ္ဆံ, အပဿန္တော ပမာဒ ဝါ;

မောဃံဝ ဒုလ္လဘာတီတော, မဟာဇာနီယတံ ဂတော.

၆၃.

သန္တံ ဘူတဉ္စ ဇေဂုစ္ဆံ, ရာဂဂ္ဂိနာ အပဿိယံ;

ပညာပဒီပဇောတေန, သမိက္ခေယျ အဘိဏှသော.

၆၄.

သန္တံ [Pg.124] ဘူတဉ္စ ကာယေ သ္မိံ, ဒဋ္ဌုကာမော သဒါသတော;

ပညာပဒီပကေနေဝ, ဒက္ခေ န ရာဂီသီခိနာ.

၆၅.

ဇေဂုစ္ဆိတေန ကာယေန, နိက္ခန္တေန ဇိဂုစ္ဆတော;

အဇ္ဇ သွေဝါ ဝိနဋ္ဌေန, နာလ မုန္နမိတုံ သတော.

၆၆.

ကီဒိသံ [Pg.125] မံ တုဝံ မညိ, အဟံ သဗ္ဗ ဇေဂုစ္ဆကော;

ဇေဂုစ္ဆတောစ နိက္ခန္တော, ဣစ္စေဝ ဝတ္တု မရဟတိ.

၆၇.

ကာယေ ဇေဂုစ္ဆသညံဝ, ကရေ သဗ္ဗိရိယာ ပထေ;

တသ္မိံ တုဋ္ဌဗ္ဗကံ နတ္ထိ, ပိယာယိတံ မမာယိတံ.

၆၈.

သုဘာယ [Pg.126] နဝ မတ္တာနံ, အသုဘာ ပရိပါစယေ;

သန္တော ပက္ကဿ သံသာရော, နန္တော နဝဿ ရာဂိနော.

၆၉.

ကာယေ အသုဘ သညာယ, ပရိပက္က သဘာဝိနော;

အာလမ္ဗေသု အစာပလ္လာ, ထိရာ သမ္ဗုဒ္ဓ သာသနေ.

၇၀.

အန္တော [Pg.127] ဂေါစရိကာ ပက္ကာ, ဗဟိ ဂေါစရိကာ နဝါ;

ပက္ကာ နာသာယ ဥစ္စာ တေ, နီစာယေဝ နဝါ သိနော.

၇၁.

နဝါနဝါ [Pg.128] သုဘာဘောဂီ, နီစာနီစာ ဘိဂါမိနော;

ပက္ကာ ပက္ကာဝ ဓီဈာယီ, သန္တာသန္တာ ဝိရာဂိနော.

၇၂.

သက္ကာ သက္ကာ န ဒဿေတုံ, သုဘံသုဘံ သတံသတံ;

ဓီရာဓီရာဂ မုဇ္ဈန္တိ, ကာယေ ကာယေ ကြိယေကြိယေ.

၇၃.

သက္ကာ [Pg.129] သက္ကာပိ တံ ကာတုံ, သုဘံသုဘံ န ဓီမယံ;

သန္တောသန္တောဇိဂုစ္ဆညူ, န ဝါနဝါ သုဘေသကော.

၇၄.

ဒုကာယံ [Pg.130] သုတိ စိန္တေတွာ, မမာယန္တာ မဟာတပါ;

တပံ နိဗ္ဗာယိတုံ ဣစ္ဆံ, ဒုကာယံ ဒုတိ စိန္တယေ.

၇၅.

ယွာသုဘံ သုဘတော မညိ, ကောနုဗာလောတဒုတ္တရိ;

အန္ဓော ဥမ္မတ္တကောဝါ သော, နတ္တာနံ မညတေ တထာ.

၇၆.

သရိတဗ္ဗက [Pg.131] မေဝေတံ, ကာယေ ဇေဂုစ္ဆ ပုဉ္ဇတံ;

မန္ဒရာဂေါ မနောသီတံ, လဘေယျ တမနုဿနံ.

၇၇.

ဂိဟိဘာဝေ အပါယေစ, ရာဂယက္ခန္ဓ နိန္နိတာ;

မံပိ နေဿတိ သောယက္ခော, သာဒေမိစေ တဒါဂတံ.

၇၈.

အဘိဏှ [Pg.132] ဂါဟိနံ ရာဂ, ယက္ခံ အနန္တ ဒုက္ခ ဒံ;

အသုဘာ တုလ မန္တေန, ဝါရေဟိ တံ သ ဘာယတိ.

၇၉.

ရာဂယက္ခော ဗဟုမာယော, သဒ္ဓါမေတ္တာ ဒိဝေသဝါ;

ရာဂမ္ပိ ကုသလံ မညိ, ဇနော တေနေဝ ဝဉ္စိတော.

၈၀.

အာတုရံ [Pg.133] အသုစိံ ပုတိံ, ပဿ နန္ဒေ သမုဿယံ;

ဥဂ္ဃရန္တံ ပဂ္ဃရန္တံ, ဗာလာနံ အဘိပတ္ထိတံ.

၈၁.

သုဘတော နံ မညတိ ဗာလော, အဝိဇ္ဇာယ ပုရက္ခတော;

ဣစ္စာဟ ဘဂဝါ နိန္ဒိ, ဗာလောတိ သုဘသညိနံ.

၈၂.

နှာရုဋ္ဌိ [Pg.134] တစ မံသာနိ, သရံ သတံ န နိန္ဒိတော;

ဗုဒ္ဓနိန္ဒာယ မောစေတုံ, တာနာရဗ္ဘ အနုဿရေ.

၈၃.

မညိတွာ အတ္တနော ဗာလျံ, အသုဘေ သုဘဒဿိနော;

ဝါယာမေယျ အဗာလာယ, ကာယံ အသုဘတော သရံ.

၈၄.

အတ္တာနံ [Pg.135] ဂရဟိတွာန, ဗာလံ ဝိပရိဒဿိနံ;

သုဘသညံ ပဟိန္နေယျ, ကရေယျာသုဘ သညိတံ.

၈၅.

ဝိသ ဘေသဇ္ဇရုက္ခဋ္ဌော, အဟိ ဍံသေယျသောသတော;

ယထာ တဿေဝ ပဏ္ဏာဒိံ, ခါဒေတွာ ဝိသ မုဇ္ဇဟေ.

၈၆.

ဧဝံ ရာဂေါ သမုပ္ပဇ္ဇေ, ကာယေ ဂန္ဓာဒိ ဝါသိတေ;

အန္တော တဿေဝ ဇေဂုစ္ဆံ, စိန္တေတွာ ရာဂ မုဇ္ဇဟေ.

၈၇.

ဇိဂုစ္ဆိတေန [Pg.136] ကာယေန, အပဿန္တော ဇိဂုစ္ဆတံ;

ဥန္နမေတိ အဝညာတိ, အဝိဇ္ဇာယ ပုရက္ခတော.

၈၈.

အာယတိံ [Pg.137] မဂ္ဂလာဘာယ, ဗီဇံ ကရေယျ ဘာဝနံ;

ဗီဇာ ဘာဝေ ကုတော မဂ္ဂေါ, မဂ္ဂဗီဇာ ဟိ ဘာဝနာ.

၈၉.

မဂ္ဂဗီဇော အပါယေပိ, နိမ္မုဂ္ဂေါ သမယေ ဂတေ;

ဥမ္မုဇ္ဇိတွာဝ ဗုဒ္ဓါနံ, မဂ္ဂံ လဘေယျ သန္တိကေ.

၉၀.

အဇီဇဿ [Pg.138] တု သံသာရော, ဒီဃောယေဝ အနန္တိကော;

တသ္မာဟိ ဘာဝနာဗီဇံ, ကရေယျ မောစနတ္ထိကော.

၉၁.

အဘိဏှ ပီဠိတံ ရာဂံ, အသုဘာယ နိဝါရယေ;

မန္ဒီဟုတွာ ပဟီယေယျ, ရာဂေါ အသုဘ ဘီရုကော.

၉၂.

မာဇေဂုစ္ဆံ [Pg.139] မမာယေထ, သာဝ ဇေဂုစ္ဆမာမကော;

အနန္တ ဒုက္ခ မာပါဒိ, ဇေဂုစ္ဆိတ မမာယနာ.

၉၃.

မံသလဂ္ဂေါ တစစ္ဆန္နော,နှာရုဗန္ဓော ဋ္ဌိပုဉ္ဇကော;

မောဟေတိ ဆဝိယာ လောကံ,မဟာဒုက္ခော သ မောဟိတော.

၉၄.

နှာရုဋ္ဌိ [Pg.140] တစ မံသေဟိ, ရာဂဝဍ္ဎကိ သင်္ခတေ;

ဂေဟေ ရောဂါ ပုတီ ပါပါ, ဝသန္တိ ကုစ္ဆိတာ သဒါ.

၉၅.

လုင်္ဂန္တာ ဝီသ ဘူဓာတူ, ပိတ္တာဒီ ဒွါဒသမ္ဗုဝ;

တာပံ ဇိရံ ဒဟံ ပက္ကံ, စတုရဂ္ဂိ ဆဝါယုကာ.

၉၆.

အဓောဒ္ဓံ ကုစ္ဆိ ကောဋ္ဌာသာ,အင်္ဂစာရီစ ပါဏကာ;

ဓာတုယောယေဝ ကာယေသ္မိံ,ဒွိတာလီသ အနညကာ.

၉၇.

ယထာ [Pg.142] ဗဟိ တထာ အဇ္ဈတ္တံ, ဓာတူ ဘွာပါ နလာနိလာ;

နမေ နာဟံ နအတ္တာတိ, သံမသေယျ ပုနပ္ပုနန္တိ.

၄. မေတ္တာဘာဝနာနိဒ္ဒေသ

၁.

မေတ္တာ [Pg.145] ဘာဝန မိစ္ဆမ္ပိ, သုဏ ဗုဒ္ဓဝစော ယိဒံ;

ဒေါသ နိဂ္ဂဟဏတ္ထာယ, ဒေါသော မေတ္တာယဝေရိဟိ.

၂.

အက္ကောစ္ဆိမံ အဝဓိမံ, အဇိနိမံ အဟာသိမေ;

ယေစ တံ ဥပနယှန္တိ, ဝေရံ တေသံ နသမ္မတိ.

၃.

အက္ကောစ္ဆိမံ [Pg.146] အဝဓိမံ, အဇိနိမံ အဟာသိမေ;

ယေစတံ နုပနယှန္တိ, ဝေရံ တေသံ ဥပသမ္မတိ.

၄.

နဟိဝေရေန ဝေရာနိ, သမ္မန္တိဓ ကုဒါစန;

အဝေရေနစ သမ္မန္တိ, ဧသဓမ္မော သနန္တနော.

၅.

ပရေစ [Pg.147] နဝိဇာနန္တိ, မယ မေတ္ထ ယမာမသေ;

ယေစ တတ္ထ ဝိဇာနန္တိ, တတော သမ္မန္တိ မေဓဂါ.

၆.

ကုဒ္ဓေါ အတ္ထံ နဇာနာတိ, ကုဒ္ဓေါ ဓမ္မံ နပဿတိ;

သဒါ အန္ဓတမံ ဟောတိ, ယံကောဓော သဟတေနရံ.

၇.

ဥဘိန္န [Pg.148] မတ္ထံ စရတိ, အတ္တနောစ ပရဿစ;

ပရံ သံကုပ္ပိတံ ဉတွာ, ယော သတော ဥပသမ္မတိ.

၈.

တဿေဝ တေန ပါပိယျော, ယော ကုဒ္ဓံ ပဋိကုဇ္ဈတိ;

ကုဒ္ဓံ အပဋိကုဇ္ဈန္တော, သင်္ဂါမံ ဇေတိ ဒုဇ္ဇယံ.

၉.

ခန္တီ [Pg.149] ပရမံ တပေါ တိတိက္ခာ,နိဗ္ဗာနံ ပရမံ ဝဒန္တိ ဗုဒ္ဓါ;

နဟိ ပဗ္ဗဇိတော ပရူပဃာတီ,နသမဏော ဟောတိ ပရံ ဝိဟေဌယန္တော.

၁၀.

အကောဓေန ဇိနေ ကောဓံ, အသာဓုံ သာဓုနာ ဇိနေ;

ဇိနေ ကဒရိယံ ဒါနေန, သစ္စေနာ လိကဝါဒိနံ.

၁၁.

ယော [Pg.150] ဝေ ဥပ္ပတိတံ ကောဓံ, ရထံ ဘန္တံဝ ဝါရယေ;

တ မဟံ သာရထီ ဗြူမိ, ရသ္မိဂ္ဂါဟော ဣတရောဇနော.

၁၂.

ပုရိသဿ [Pg.151] ဟိ ဇာတဿ, ကုဓာရီ ဇာယတေ မုခေ;

ယာယ ဆိန္ဒတိ အတ္တာနံ, ဗာလော ဒုဗ္ဘာသိတံဘဏံ.

၁၃.

သေလော ယထာ ဧကဂ္ဃနော, ဝါတေန နသမီရတိ;

ဧဝံ နိန္ဒာ ပသံသာသု, နသမိဉ္ဇန္တိ ပဏ္ဍိတာ.

၁၄.

သမာနဘာဂံ [Pg.152] ကြုဗ္ဗေထ, ဂါမေ အက္ကုဋ္ဌ ဝန္ဒိတံ;

မနောပဒေါသံ ရက္ခေယျ, သန္တော အနုဏ္ဏတော သိယာ.

၁၅.

နပရော ပရံ နိကုပ္ပေထ, နာတိမညေထ ကတ္ထစိ နကိဉ္စိ;

ဗျာရောသနာ ပဋိဃသညာ, နညမညဿ ဒုက္ခ မိစ္ဆေယျ.

၁၆.

မာတာ [Pg.153] ယထာ နိယံ ပုတ္တ,မာယုသာ ဧကပုတ္တ မနုရက္ခေ;

ဧဝမ္ပိ သဗ္ဗ ဘူတေသု,မာနသံ ဘာဝယေ အပရိမာဏံ.

၁၇.

သုတွာန ဒုသိတော ဗဟုံ ဝါစံ,သမဏာနံဝါ ပုထုဇနာနံ;

ဖရုသေန ဟိ န ပဋိဝဇ္ဇာ,န ဟိ သန္တော ပဋိသေနိံ ကရောန္တိ.

၁၈.

သစ္စံ [Pg.154] ဘဏေ နကုဇ္ဈေယျ, ဒဇ္ဇာ အပ္ပမ္ပိ ယာစိတော;

ဧတေဟိ တီဟိ ဌာနေဟိ, ဂစ္ဆေ ဒေဝါန သန္တိကေ.

၁၉.

န ပရေသံ ဝိလောမာနိ, န ပရေသံ ကတာကတံ;

အတ္တနောဝ အဝေက္ခေယျ, ကတာနိ အကတာနိစ.

၂၀.

သု [Pg.155] ဒသံ ဝဇ္ဇမညေသံ, အတ္တနော ပန ဒုဒ္ဒသံ;

ပရေသဉှိ သော ဝဇ္ဇာနိ, ဩဖုနာတိ ယထာ ဘုသံ;

အတ္တနော ပန ဆာဒေတိ, ကလိံဝ ကိတဝါ သဋ္ဌော.

၂၁.

နိဓီနံဝ [Pg.156] ပဝတ္တာနံ, ယံ ပဿေ ဝဇ္ဇဒဿိနံ;

နိဂ္ဂယှဝါဒိံ မေဓာဝိံ, တာဒိသံ ပဏ္ဍိတံ ဘဇေ.

၂၂.

တာဒိသံ ဘဇမာနဿ,သေယျောဟောတိ နပါပိယော;

ဣတိ ဝုတ္တံ မုနိန္ဒေန,တိလောကဂ္ဂေန သတ္ထုနာ.

၂၃.

မေတ္တာ [Pg.157] ဂန္ဓေန ဝါသေန္တော,ဒေါသံ ဒူရေကရေ ဗုဓော;

ဒူရာသန္နေသု သဗ္ဗေသု,အတ္တနော ဝေရိကေသုပိ.

၂၄.

ဟနေ ဒေါသူ ပနာဟာနိ, အနတ္ထ ကာရကာနိ ဟိ;

တေသွ သန္တေသု သဗ္ဗေသု, မေတ္တာဟောတိ သုနိမ္မလာ.

၂၅.

သတံ [Pg.158] ဒုဇ္ဇန ဝါကျေဟိ, နမနော ယာတိ ဝိကြိယံ;

နဟိတာပယိတုံ သက္ကာ, ဂင်္ဂါနဒိံ တိဏုက္ကယာ.

၂၆.

နဟိ နိန္ဒာ ပသံသာဟိ, သတံ မနောဝိကာရတာ;

န ကဒါစိပိ ကမ္ပေယျ, ဝါတေဟိ သေလပဗ္ဗတော.

၂၇.

နဒိယံ [Pg.159] ခုဒ္ဒကာ နာဝါ, ဝိစီဟိ ဥန္နတောနတာ;

မဟာနာဝါ နကမ္ပန္တိ, မဟန္တီဟိ ဝိစီဟိပိ.

၂၈.

လောကေ ပသံသ နိန္ဒာဟိ, ဒုဇ္ဇနောဝုန္နတောနတော;

သန္တောပညော နစလတိ, မဟာနိန္ဒာ ထုတီဟိပိ.

၂၉.

သေလောသေလော [Pg.160] နိလေဟေဝ,ဝဏ္ဏာဝဏ္ဏာ အသဿတာ;

လာဘာလာဘာ သုခါဒုက္ခာ,ယသာယသာ နကမ္ပတိ.

၃၀.

ခမာဓဂ္ဂ ကရေတဿ, ဒုဇ္ဇနော ကိံ ကရိဿတိ;

အတိဏေ ပတိတော အဂ္ဂိ, သယမေဝ ပသမ္ဘတိ.

၃၁.

သယမေဝ [Pg.161] သကတ္တာနံ, မစ္စုဗ္ဘယေန တစ္ဆတု;

မာညေ တစ္ဆတု ဒေါသေန, ကိမတ္ထံ အညတစ္ဆနံ.

၃၂.

မာညေ တစ္ဆ တုဒေါသေန, နသေယျော အညတစ္ဆနံ;

မာညော တံ အဟိဗျဂ္ဃေဝ, ဒေါမနဿေန ဘာယတု.

၃၃.

နိဿာယ [Pg.162] ဂရုကာတဗ္ဗံ, ဗဟူနံ ပါပမောစနံ;

အစာပလ္လေန သန္တေန, ဂရုကာတဗ္ဗတံ ဝဇေ.

၃၄.

နိဿာယ ဂရုကာတဗ္ဗံ, ဗဟူနံ ပုညဝဍ္ဎနံ;

ဂရုကာတဗ္ဗတံ ဂစ္ဆေ, ဓီတိယာ သီလ ဂုတ္တိယာ.

၃၅.

သန္တံ [Pg.163] ဟိ သီလဝံ ဓီတိံ, ဟိရောတ္တပ္ပေန ဘာယတိ;

ဒုဇ္ဇနံ ဒေါမနဿေန, အဟိဗျဂ္ဃေဝ ဘာယတိ.

၃၆.

နဖရုသာယ ဝါစာယ, အညေ ဒမေယျ ပဏ္ဍိတော;

အတ္တာနံဝ ဒမေတွာန, အညေ သဏှေန ဩဝဒေ.

၃၇.

စိတ္တေ [Pg.164] သဏှေ အသဏှာပိ, နဝါစာဖရုသာ ဘဝေ;

တသ္မာ ဩဝါ ဒနာဒီသု, ရက္ခေယျ ထဒ္ဓစိတ္တတော.

၃၈.

အတ္တာန မောဝဒတ္ထာယ, သိက္ခေယျ ဗုဒ္ဓဘာသိတံ;

ပရမ္ပိ အနုကမ္ပာယ, ဣစ္ဆန္တော အနုသာသယေ.

၃၉.

အညံ နနိဂ္ဂဟေ ကိဉ္စိ, သုတေန ပဋိပတ္တိယာ;

အတ္တနိဂ္ဂဟဏံ သေယျော, နုန္နမေယျ ဇိနောရသော.

၄၀.

နာဝီကရေယျ [Pg.165] ဒေါသံဝါ, လောဘံ မာနံ သကံမလံ;

မာညေ မညန္တု တံ ဒိသွာ, စိရပ္ပဗ္ဗ ဇိတော နုတိ.

၄၁.

ကကစေန တ္တဆေဒေန္တေ, ဝေရိကေပိနဒေါသယေ;

ဣစ္စောဝါဒံ မုနိန္ဒဿ, သမ္ပဋိစ္ဆ ဇိနောရသော.

၄၂.

ဝေရီ [Pg.166] အစ္စုပနာဟီပိ, ရူပေဝ ဒုက္ခကာရကော;

န တွ တဗ္ဗိသယေ နာမေ, ဒုက္ခံ မာကရိ စေတသိ.

၄၃.

ဝေရီ တိဗန္ဓ ဝေရောပိ, ဣဟေဝ ဒုက္ခကာရကော;

ဘဝန္တရံ နအနွေတိ, သကမ္မုနာ ဂတော ဟိသော.

၄၄.

ဒေါသောတု [Pg.167] ဣဟ ပီဠေတွာ,ဒုက္ခာဝဟော ဘဝေဘဝေ;

မဟာနတ္ထ ကရံ ဒေါသံ,ကသ္မာ ဝဍ္ဎေတိ စေတသိ.

၄၅.

မေတ္တာသီတမ္ဗုသေကေန, ဇိနောဝါဒ မနုဿရံ;

မဟာ နတ္ထ ကရံ ဒေါသံ, နိဗ္ဗာယတု သ စေတသိ.

၄၆.

ဆဒ္ဒန္တော [Pg.168] လုဒ္ဒကံ ပါပံ, ဘူရိဒတ္တောဟိ တုဏ္ဍိကံ;

ဓမ္မပါလော ခမိ တာတံ, ကပိန္ဒော ကန္ဒရော ပတံ.

၄၇.

အသင်္ချေယျ တ္တဘာဝေသု, ပရဝဇ္ဇံ တိတိက္ခတော;

နာထဿ ပါရမိံ ခန္တိံ, သရံ ဓီရော တိတိက္ခတု.

၄၈.

သာသနေ [Pg.169] စိရဝါသေန, ဧဝံ နိဒ္ဒေါသကာ ဣတိ;

တုဝံ ပဋိစ္စ မညန္တု, သာသနေ သပ္ပယောဇနံ.

၄၉.

သာသနေ စိရ ဝါသာပိ, မာဒိသာဝ ဣမေ ဣတိ;

တမာဂမ္မ နမညန္တု, သာသနေ နိပ္ပယောဇနံ.

၅၀.

ဒွေ ဥသေတီတိ ဒေါသော သော, သပရံ ဒယှတေ ဒွယံ;

ပဟာတဗ္ဗော သ သဗ္ဗေသု, ပရတ္ထ သတ္ထ မိစ္ဆတာ.

၅၁.

ပရဒိန္နေဟိ [Pg.170] နောအာယု, တိဋ္ဌတေ နာတ္တနော ဝသာ;

ပရဝဇ္ဇံ ခမေတဗ္ဗံ, နသာဓု အညဝိရောဓိတော.

၅၂.

ဇေဂုစ္ဆ [Pg.171] က္ကောသ နိန္ဒာနိ, ဗာလော ဂဏှာတိ အက္ခမော;

ခမန္တောတု နဂဏှာတိ, ဇာနံ ဇေဂုစ္ဆိတာနိတိ.

၅၃.

ပရဒိန္နာနိ ဝစ္စာနိ, ပါဘတန္တိ နကောစိပိ;

ဂဏှေယျေဝံ ဒုရုတ္တာနိ, အဂဏှန္တော ခမေ သတော.

၅၄.

နဒိ [Pg.172] ကလ္လောလ ဝိစိယော, တီရံ ပတွာ သမန္တိဓ;

သဗ္ဗေ ဥပ္ပတိတာ ဒေါသာ, ခန္တိပတွာ သမန္တိ တေ.

၅၅.

ဒေါသုမ္မတ္တက ဝါစာယ, နုမ္မတ္တော ကိံကရိဿတိ;

ဘဝေ ယျုမ္မတ္တကော သောဝ, တာဒိသံ ဝစနံ ဘဏံ.

၅၆.

ကောဓနော အက္ခမော အည, ဒုဋ္ဌသညီ ဘယာလုကော;

ဂါမမဇ္ဈေ အဠက္ကောဝ, တထာ မာဟောဟိ တံ ဇဟ.

၅၇.

မေတ္တာလုကော [Pg.173] ခမာသီလော,သဗ္ဗဋ္ဌာနေသုနိဗ္ဘယော;

ပရတ္ထ သတ္ထ မိစ္ဆန္တော,ခန္တိ မေတ္တဉ္စ ဘာဝယေ.

၅၈.

ပရက္ကောသာနိ နိန္ဒာနိ, တံဝ ပစ္စေန္တိ နာညဂူ;

ခိတ္တံပံသုဝ ဝါတုဒ္ဓံ, ဂရုကံ ကိံ ခမာယတေ.

၅၉.

အက္ကောသန္တောစ [Pg.174] နိန္ဒီစ, ပီဠိတော သက ကမ္မုနာ;

ဣဓ ပေစ္စစ နီစေယျော, နံနယံ ဂဏှိ အက္ခမော.

၆၀.

အက္ကောသော [Pg.175] မံ နအာဂစ္ဆိ,တဿေဝါ နတ္ထကာရကော;

ဣတိ ဉတွာဝ သပ္ပညော,အက္ကောသံ န ဂရုံ ကရေ.

၆၁.

ဝိကာရာပတ္တိ မိစ္ဆန္တော, ဝေရီ ဗဟု မုပက္ကမိ;

မာမိတ္တဝသ မနွေဟိ, နိဗ္ဗိကာရော တုဝံဘဝ.

၆၂.

မေတ္တမ္ဗုနာ သဒ္ဒေါသောစ, ပရဒေါသောစ သမ္မတိ;

မေတ္တာသေကေန သဗ္ဗေသု, သဗ္ဗတောဂ္ဂိံ နိပါရယေ.

၆၃.

သဒေါသ [Pg.176] ပရဒေါသဂ္ဂိံ, သဗ္ဗတော ဒိသတော ဋ္ဌိတံ;

မေတ္တာ တောယေန ဝါရေယျ, သိယာ နိဗ္ဗုတိ သဗ္ဗဓိ.

၆၄.

နဂမေ အတ္တနော အဂ္ဂိံ, ပရဂ္ဂိံဝါပိ နာဂမေ;

မေတ္တမ္ဗုနာဝ နိဗ္ဗာတု, သပရဂ္ဂိ ဒွယံ ဘုသံ.

၆၅.

ဂုဏီ [Pg.177] ဂုဏီ နန္ဒိန္ဒာယ, ပသံသာယ ဂုဏီ ဂုဏီ;

နိန္ဒံနိန္ဒံ နကုပ္ပေယျ, နသာဒိယေ ထုတိံ ထုတိံ.

၆၆.

ဂုဏံ နိန္ဒာယ နာသေတုံ, နသက္ကာ ကောစိ ကုဿကော;

ဝဍ္ဎေတုံဝါ ပသံသာယ, ဂရုံကရေ န တံဒွယံ.

၆၇.

ဒေါသဗ္ဘာ [Pg.178] မလ သဉ္ဆန္နော, မေတ္တာစန္ဒော န ရောစတိ;

တံမုတ္တဿ တု ဧတဿ, အတိဿယ ပဘာဝတော.

၆၈.

သု သုတ္တ ဗုဒ္ဓ သုပိနာ, ဒွေပိယာ ဂုတ္တိ နာက္ကမော;

သမာဓိ သုမုခါ မုဠှာ, ဗြဟ္မာ တျေကာ ဒသ ဂ္ဂုဏာ.

၆၉.

သီတံ [Pg.179] ကရောတု မေတ္တာယ, စက္ခုံ လာဘေတု ပညာယ;

မာကာသိနိပ္ပဘေ စညေ, စန္ဒော ဟောဟိ ဂတေဂတေ.

၇၀.

ဒူရာသန္နေသု [Pg.180] သဗ္ဗေသု, မေတ္တံ ပေသေတု ပါဘတံ;

ဓမ္မံ ဒေသေတု ပတ္တာနံ, စန္ဒော ဟောဟိ ဂတေဂတေ.

၇၁.

သမ္ပတ္တာနံ မလံ ဓောဝ, သီတံကရေ သဒါဒယော;

ဥစ္စနီစေ နဝိသေသေ, ဇလဿမော ဂတေဂတေ.

၇၂.

အသအဿတေသု [Pg.181] ဖုဋ္ဌေသု, လောကဓမ္မေသု အဋ္ဌသု;

ပတိဋ္ဌော နိဗ္ဗိကာရော တွံ, ပထဝီသဒိသော ဘဝ.

၇၃.

နာကာသိ ကလဟံ သိလာ, သဒါ ကေနစိ နိစ္စလာ;

မေတ္တာယန္တော ခမာယန္တော, မဟာသိလံ ဂုရုံကရေ.

၇၄.

သိလာဝ [Pg.182] သီလဝါ ဟောတု, ဒုရုတ္တာနိ တိတိက္ခတု;

ပစ္စုတ္တေ ဒေါသသံဝဍ္ဎော, အနုတ္တောဝ ပသမ္ဘတိ.

၇၅.

သဗ္ဗေ အဟံဝ ဣစ္ဆန္တိ, သတ္တာ သုခန္တိ ဉာတုန;

ဘာဝေယျ ကမတော မေတ္တံ, ပိယ မဇ္ဈတ္တ ဝေရိကေ.

၇၆.

သဗ္ဗေ [Pg.183] တသန္တိ ဒဏ္ဍဿ, သဗ္ဗေ ဘာယန္တိ မစ္စုနော;

အတ္တာနံ ဥပမံ ကတွာ, နဟနေယျ နဃာတယေ.

၇၇.

သုခ ကာမာနိ ဘူတာနိ,ယောဒဏ္ဍေန ဝိဟိံသတိ;

အတ္တနော သုခ မေသာနော,ပေစ္စ သော နလဘေသုခံ.

၇၈.

အဝေရာ [Pg.184] ဗျာပဇ္ဇာ နီဃော, သုခီ စဿံ အဟံဝ မေ;

ဟိတကာမာ တထာ အဿု, မဇ္ဈတ္တာ ဝေရိနောပိစ.

၇၉.

မာတရော [Pg.185] ဘာတရော ဉာတီ, ဒါယကော ပါသကာပိစ;

သုခီဟောန္တူတိ ဘာဝေယျ, စဇေ တေသုစ လဂ္ဂနံ.

၈၀.

ဒေါသော မေတ္တာယ ဒူရာရိ, တဏှာ အာသန္န ဝေရိကာ;

တဏှံ ပိယေသု ဝါရေယျ, ဒေါသံ ဝေရီသု မေတ္တိကော.

၈၁.

ဧကုဒ္ဒေသေ [Pg.186] ကကမ္မာစ, သိဿာ အာစရိယာ သုခီ;

ဟောန္တု သဗြဟ္မစာရီစ, တေစ ညောည ဟိတာဝဟာ.

၈၂.

ရာဇာနောစ အမစ္စာစ, ဂါမေ ဣဿရိယာ သုခီ;

ဘဝန္တု ဒေဝတာယောစ, တေဟိ သုရက္ခိတော သုခေါ.

၈၃.

မယံ [Pg.187] ယေန သုဂုတ္တာဝ,သုခိတာ ရဋ္ဌဝါသိနော;

သုခီ ကလ္လ တ္ထု သောရာဇာ,တေဇဝန္တော စိရာယုကော.

၈၄.

ရဋ္ဌ [Pg.188] ပိဏ္ဍေန ဇီဝါမ, ရဋ္ဌဝါသီ သုခန္တုတိ;

ဘာဝေယျေဝံ အမောဃံဝ, ရဋ္ဌပိဏ္ဍံ သုဘုဉ္ဇတိ.

၈၅.

အာပါယိကာ ဗဟူ သန္တိ, မာတာပိတာဒိ ပုဗ္ဗကာ;

တေစညေစ သုခီနီဃာ, ဿွ ဗျာပဇ္ဇာ အဝေရိနော.

၈၆.

သတ္တာ [Pg.189] ဘူတာစ ပါဏာစ, ပုဂ္ဂလာ အတ္တဘာဝိကာ;

ထီ ပူ ရိယာ နရိယာစ, ဒေဝါနရာ နိပါတိကာ.

၈၇.

အဝေရာ ဟောန္တု ဗျာပဇ္ဇာ, အနီဃာစ သုခီ ဣမေ;

အတ္တာနံ ပရိဟာရန္တု, စတုဓာ ဣတိ ဘာဝယေ.

၈၈.

ပုရတ္ထိမာယ [Pg.191] ဒိသာယ, သဗ္ဗေသတ္တာ အဝေရိနော;

အဗျာပဇ္ဇာ သုခီနီဃာ, ဟောန္တူတိ တာဝ ဘာဝယေ.

၈၉.

ပုရတ္ထိမာယ ဒိသာယ, သဗ္ဗေပါဏာတိအာဒိနာ;

ဒွါဒသက္ခတ္တုံ ဘာဝေယျ, သေသာသုပိ အယံနယော.

၉၀.

စတုဒ္ဒိသာ [Pg.192] နုဒိသာ ဓော, ဥဒ္ဓံ သတ္တာစ ပါဏိနော;

ဘူတာစ ပုဂ္ဂလာ အတ္တ, ဘာဝီ သဗ္ဗေ ထိ ပူရိသာ.

၉၁.

အရိယာ အရိယာ ဒေဝါ, နရာစ ဝိနိပါတိကာ;

အဝေရာ ဗျာပဇ္ဇာ နီဃာ, သုခတ္တာစ ဘဝန္တု တေ.

၉၂.

စတုဒ္ဒိသာ [Pg.193] နုဒိသာ ဓော, ဥဒ္ဓန္တိ ဒသကေဒိသိ;

ဒွါဒသေ တေ ပရိစ္ဆိဇ္ဇ, ဘာဝေယျ ပုဂ္ဂလေ ဗုဓော.

၉၃.

မေတ္တာ [Pg.194] ဝဿေန တေမေတု, ပဇ္ဇုန္တောဝိယ သဗ္ဗဓိ;

မာကိဉ္စိ ပရိဝဇ္ဇေဟိ, ဧဝံ မေတ္တာ သုဘာဝိတာ.

၉၄.

ပဉ္စာ နောဓိ သတ္တောဓိသာ, သိယုံ ဒွါဒသပုဂ္ဂလာ;

န္တု စတူဟေသု ဘာဝေတွာ, အဋ္ဌတာလီသကာ သိယုံ.

၉၅.

ဒသကေဒိသိ [Pg.195] တာမေတ္တာ, စတုဿတ အသီတိယော;

အဋ္ဌတာလီသာဟိ ပဉ္စ, သတာ ဋ္ဌဝီသ သာဓိကာ.

၉၆.

ဒုက္ခိတေ [Pg.196] ကရုဏံ ဗြူဟေ, မုဒိတံ သုခိတေ ဇနေ;

မေတ္တာစေဝ ဥပေက္ခာစ, ဥဘော ဥဘောသု ဘာဝိတာ.

၉၇.

ဗြဟ္မဝါသီတိ ဝတ္တဗ္ဗော, တေသွညတရ ဝါသိတော;

ဂန္ဓဘူတေသု သော လောကေ, ဗြဟ္မာဝိယ ဝိရောစတိ.

အပ္ပမာဒါဝဟ ပကိဏ္ဏကနိဒ္ဒေသ

၁.

သံဝိဇ္ဇန္တိ [Pg.200] ဓ လောကသ္မိံ,ဗဟူ ဇီဝိတကပ္ပနာ;

ဂဟေတွာ ပတ္တ မုဉ္ဆော ယော,ဇီဝိကာနံ သ လာမကော.

၂.

သုကုလာစ တဒုပဂါ, ကာမဘောဂါ နပေက္ခိနော;

န ဘယဋ္ဋာ န ဣဏဋ္ဋာ, နေဝ အာဇီဝ ကာရဏာ.

၃.

နာလံဝ [Pg.201] ဂိဟိနာ ဗြဟ္မ, စရိယာယ အခဏ္ဍိတံ;

ဃရာဝါသော တိသမ္ဗာဓော, ပဗ္ဗဇ္ဇာဝ နိရာလယာ.

၄.

ဘဝပင်္ကာ [Pg.202] ပမုစ္စာမ, တိဝိတ္တိဏ္ဏာ ဘယာနကာ;

ပဋိပတ္တိ ယိမာယာတိ, ကတွာ တဒုပဂါ ဣမေ.

၅.

ဥတ္တိဋ္ဌေ နပ္ပမဇ္ဇေယျ, ဓမ္မံ စရိတံ သုစရေ;

ဓမ္မစာရီ သုခံသေတိ, အသ္မိံလောကေ ပရမှိစ.

၆.

သွာဂတာ [Pg.203] ဝတ တေဘိက္ခူ, ပတ္တာ သမ္ဗုဒ္ဓပုတ္တ တံ;

ဂိဟိ ဗန္ဓန ပုစ္ဆိဇ္ဇ, သုခိတာ သာသနေ ရတာ.

၇.

ကတပုည ဝိသေသာဝ, ဧတေ သုလဒ္ဓ ဒုလ္လဘာ;

ဆဋ္ဋေတွာပိ မဟာရဇ္ဇံ, နေဒိသံ လဒ္ဓ မညဒါ.

၈.

သွာဂတာ [Pg.204] သုဂတီ ဟောန္တု, မာဒုဂ္ဂတီ ပမာဒိနော;

ဒုဿီလာ စေ ဂမိဿန္တိ, အပါယံ တိဘယာနကံ.

၉.

ဂိဟိဘောဂါ [Pg.205] ပရီဟိန္နော, သာမညတ္တဉ္စ ဒူဘတော;

ပရိဓံသမာနော ပကိရေတိ, ဆဝါလာတံဝ နဿတိ.

၁၀.

ကုသော ယထာ ဒုဂ္ဂဟိတော, ဟတ္ထမေဝါ နုကန္တတိ;

သာမညံ ဒုပ္ပရာမဋ္ဌံ, နိရယာ ယုပ ကဍ္ဎတိ.

၁၁.

ယံကိဉ္စိ [Pg.206] သိထိလံ ကမ္မံ, သံကိလိဋ္ဌဉ္စ ယံကတံ;

သင်္ကဿရံ ဗြဟ္မစရိယံ, နတံဟောတိ မဟပ္ဖလံ.

၁၂.

ကရိယာစေ ကရိယာ ဝေနံ, ဒဠှမေနံ ပရက္ကမေ;

သိထိလောဟိ ပရိဗ္ဗဇော, ဘိယျော အာကိရတေ ရဇံ.

၁၃.

ဣတိ [Pg.207] ဝုတ္တံ မုနိန္ဒေန, နုဿရံ အနိ ဝတ္တိတော;

သဒါ အလိန စိတ္တေန, စရေယျ ဗုဒ္ဓသာဝကော.

၁၄.

ရာဂံ အသုဘစိန္တာယ, ဒေါသံ မေတ္တာယ ဝါရယေ;

မရဏေန ဓဇံမာနံ, သမ္ဗုဒ္ဓေ တိက္ခ သဒ္ဓိကော.

၁၅.

အသုဘာ ကာမဝိတက္ကံ, မေတ္တာ ဗျာပါဒ တက္ကိတံ;

ဝိဟိံသံ ကရုဏာယေဝ, နိဝါရေယျ သဒါသတော.

၁၆.

ဗုဒ္ဓါဏတ္တိ [Pg.208] သဒါတီတော, မိစ္ဆာဝိတက္က ပီဠိတော;

ပါပဓမ္မေဟိ သံကိဏ္ဏော, သောနိစ္စာပါယ ဂါမိကော.

၁၇.

ဓောဝိတွာ ပတ္တိမလာနိ, ပုနာတိက္ကမ သံဝုတော;

မိစ္ဆာဝိတက္က သဉ္ဆေဒီ, ဒူရော အပါယ ဂါမိတော.

၁၈.

ခီဏာသဝတ္တ [Pg.209] ဗုဒ္ဓတ္တံ, နိယျာနိက န္တရာ ယိကံ;

သီဟနာဒံ စတုဋ္ဌာနေ, ဝေသာရဇ္ဇော ဇိနော နဒိ.

၁၉.

သီလံ [Pg.210] နိယျာနိကံ နာမ, အာပတ္တိ အန္တရာယိကံ;

အန္တရာယ မနာပဇ္ဇ, နိယျာနေဝ ပတိဋ္ဌတု.

၂၀.

နိယျာနိကာစ [Pg.211] အသုဘာ, သုဘသညာ န္တရာယိကာ;

အန္တရာယ မနာပဇ္ဇ, နိယျာနေဝ ပတိဋ္ဌတု.

၂၁.

နာနာပတ္တိ [Pg.212] ပကိဏ္ဏောပိ, ပါရာဇိကာ ဝသေသကော;

သော မိတျတ္တ ပဏီဓီဟိ, လဇ္ဇီယေဝ ဝိသောဓကော.

၂၂.

အလဇ္ဇီကမ္မ ကိဏ္ဏောပိ,သံဝေဇေတွာ သုမိတ္တိကော;

လဇ္ဇီယေဝ ဝိသောဓေန္တော,မတကောဝ အသောဓကော.

၂၃.

ယော [Pg.213] ပုဗ္ဗေဝ ပမဇ္ဇိတွာ, ပစ္ဆာသော နပ္ပမဇ္ဇတိ;

သောမံ လောကံ ပဘာသေတိ, အဗ္ဘာမုတ္တောဝစန္ဒိမာ.

၂၄.

ဓုရံကတွာ [Pg.214] ဓိပတယော, ယော ပုညေသု ပရက္ကမေ;

တဿ နိယျာနိကံ ကမ္မံ, ကိံနာမကံ နသိဇ္ဈတေ.

၂၅.

ပစ္စတေ [Pg.215] မုနိနော ဘတ္တံ, ထောကံထောကံ ဃရေဃရေ;

ပိဏ္ဍိကာယေဝ ဇီဝန္တု, မာပဇ္ဇန္တု အနေသနံ.

၂၆.

ဓောဝေယျာ ပတ္တိမဂါနိ, ဝုဋ္ဌာန ဒေသနမ္ဗုဟိ;

သံဝရိဿန္တိ စိတ္တေန, သီလံ ဓောတဿ နိမ္မလံ.

၂၇.

ဗုဒ္ဓါဏာတိက္ကမာပတ္တိ[Pg.216], နိဂ္ဂဟေ ရာဂဒေါသကေ;

နတ္ထိ သဉ္စိစ္စ အာပတ္တိ, လဇီဝ သော ပဝုစ္စတိ.

၂၈.

ဝါဏိဇ္ဇ ကသိကာဒီဟိ, နာဟာရေဋ္ဌိ ဓသာသနေ;

ဓုရ ဒွယံဝ ကိစ္စံ တံ, နာညကိစ္စေဟိ ဟာပယေ.

၂၉.

နိဂ္ဂဏှေယျ [Pg.217] သကံစိတ္တံ, ကိဋ္ဌာဒိံ ဝိယ ဒုပ္ပသုံ;

သတိမာ သမ္ပဇာနောစ, စရေ သဗ္ဗိရိယာပထေ.

၃၀.

ယထာ [Pg.218] ထမ္ဘေ နိဗန္ဓေယျ, ဝစ္ဆံ ဒမံ နရော ဣဓ;

ဗန္ဓေယျေဝံ သကံစိတ္တံ, သတိယာ ရမ္မဏေ ဒဠှံ.

၃၁.

အဓိသီလာဓိစိတ္တာနံ, အဓိပညာယ သိက္ခနံ;

ဘိက္ခု ကိစ္စတ္တယံ ဧတံ, ကရောန္တောဝ သုဘိက္ခုကော.

၃၂.

ပဉ္စာဋ္ဌ [Pg.219] ဒသ သီလာနိ, နာဓိသီလံ တဒုတ္တရိ;

ပါတိမောက္ခံ အဓိသီလံ, ပဗ္ဗတာ ဓိက မေရုဝ.

၃၃.

ပါတိမောက္ခံ [Pg.220] ဝိသောဓေန္တော, အပ္ပေဝ ဇီဝိတံ ဇဟေ;

ပညတ္တံ လောကနာထေန, နဘိန္ဒေ သီလသံဝရံ.

၃၄.

သီလေနာ တိက္ကမံ ထုလ္လံ, ပရိယုဋ္ဌံ သမာဓိနာ;

ပညာယာ နုသယံ သဏှံ, ကိလေသံ ဘိက္ခု ဘိန္ဒတိ.

၃၅.

သာသနဿာဒိ [Pg.221] သီလံဝ, မဇ္ဈေ တဿ သမာဓိဝ;

ပညာဝ ပရိယောသာနံ, ကလျာဏာဝ ဣမေတယော.

၃၆.

မဟာပုညေ [Pg.222] ဌိတံ သီလံ, သမာဓိ အပ္ပနာ ဂတံ;

စတုမဂ္ဂ ယုတာ ပညာ, ဧတံ သိက္ခတ္တယံ မတံ.

၃၇.

သီလနလက္ခဏံ သီလံ, ဒုဿီလျ ဓံသနံ ရသံ;

ဟိရောတ္တပ္ပ ပဒဋ္ဌာနံ, သုစိ ပစ္စုပဋ္ဌာနကံ.

၃၈.

သသီလဂုတ္တိ [Pg.223] နာထောစ, ဒုန္နိဂဟော ဝိသာရဒေါ;

ဓမ္မဋ္ဌီတီတိ ပဉ္စေတေ, ဂုဏာ ဝေနယိကေ မတာ.

၃၉.

အာဒိ [Pg.224] ကလြာဏ သံဝေဒီ, သီလမတ္တဋ္ဌ ဘိက္ခဝေါ;

ဥဒ္ဓံ ကလျာဏ လာဘာယ, အလိနော အနိဝတ္တိကော.

၄၀.

ဓောဝိတွာ ပတ္တိမလာနိ, ဝုဋ္ဌာန ဒေသန မ္ဗုဟိ;

သုဒ္ဓသီလေ ဌိတောယေဝ, ဧဝံ စိန္တေယျ ပညဝါ.

၄၁.

သမ္ပုဒ္ဓေါရသ [Pg.225] ပုတ္တာဝ, ဗုဒ္ဓုရောဇာ နုဿာဝနာ;

သမ္ဘူတာ ပိတု ဒါယာဒါ, ပုတ္တာနာမ သဘာဝတော.

၄၂.

ခီရံ ပိတွာဝ ဇီဝန္တိ, ဇာတာပိ ဣဓ ပုတ္တကာ;

ပရိယတ္တိ ဇိနက္ခီရံ, ပိတွာဝ ဇိနပုတ္တကာ.

၄၃.

ဒါယောစ [Pg.226] နာမ ဗုဒ္ဓဿ, ဓမ္မာမိသ ဝသာဒွိဓာ;

မဂ္ဂဉာဏာ ဒယော ဓမ္မော, စတ္တာရော ပစ္စယာမိသာ.

၄၄.

စိရ မာမိသ ဒါယာဒါ, ရာဇပူဇာဒိ ဂါဟိနော;

ဒါယာ မိဿဂ္ဂဟံ နိစ္ဆိ, သဒ္ဓမ္မ ဂရုကော ဇိနော.

၄၅.

လက္ခ [Pg.227] ကပ္ပ စတုဿင်္ချ, ကာလံ ဝိစိတ နိစ္စိတံ;

ဓမ္မဒါယံ နဝိန္ဒမှာ, ဗုဒ္ဓပုတ္တာပိ ယေမယံ.

၄၆.

ဗုဒ္ဓဝါရိတ ဒါယာဒါ, သဒ္ဓမ္မဒါယ ဗာဟိရာ;

ပုတ္တာပိ သတ္ထုဒါသာဘာ, ဘုတ္တမတ္တာ ဟိ ဒါသကာ.

၄၇.

ဘဒ္ဒန္တ [Pg.228] ရာဟုလဿေဝ, ဒါယံ နောပိ အဒါ ဇိနော;

နာဒိယိမှာ ပမာဒါယ, တံ ဒါယံ ကုသလန္တကံ.

၄၈.

ဓမ္မဒါယာဒါ မေဘိက္ခဝေ တုမှေဘဝထ,မာအာမိသ ဒါယာဒါ;

ဣတိ ဝုတ္တံ မုနိန္ဒေန,သာဝကေသု ဒယာဝတာ.

၄၉.

ဣမာယ [Pg.229] ဗုဒ္ဓဝါစာယ, ဗုဒ္ဓသန္တက တံ သရေ;

ဒွိန္နံ အာမိသအ ဒါယာဒ, ဘာဝဿစ နိဝါရဏံ.

၅၀.

ရဇ္ဇေ စဏ္ဍာလပုတ္တာဝ, သဒ္ဓမ္မစက္က ဝတ္တိနော;

ပုတ္တာ ဟောန္တာပိ ဒါယေသ္မိံ, နိရာသာ တိဝ နိန္ဒိတာ.

၅၁.

မိစ္ဆာဇီဝ [Pg.230] သမာပန္နာ, အစ္စာသာ ပစ္စယာမိသေ;

မဟာဇာနီယ သမ္ပတ္တာ, မောဃကတွာ တိဒုလ္လဘံ.

၅၂.

ဂိဟိကာမေ [Pg.231] ပဟာယာဂေါ, ပရဝန္တောသု လဂ္ဂိတော;

ဂင်္ဂါတိဏ္ဏော တဠာကမှိ, နိမုဂ္ဂေါဝါ တိနိန္ဒိတော.

၅၃.

စီဝရေ [Pg.232] ပိဏ္ဍပါတေစ, ပစ္စယေ သယနာသနေ;

ဧတေသု တဏှ မာကာသိ, မာလောကံ ပုနရာဂမိ.

၅၄.

ဣတိဝုတ္တာ နုသာရေန, ပစ္စဝေက္ခဏ သုဒ္ဓိယာ;

အာမိသေသု ဟနေ အာသံ, ပုတ္တမံသု ပမံ သရံ.

၅၅.

သေယျော [Pg.233] အယောဂုဠော ဘုတ္တော,တတ္တော အဂ္ဂိသိခူပမော;

ယဉ္စေ ဘုဉ္ဇေယျ ဒုဿီလော,ရဋ္ဌပိဏ္ဍံ အသညတော.

၅၆.

ဣတိဝုတ္တံ [Pg.234] နုစိန္တေန္တော, ဝဇ္ဇေ ဒုဿီလ ဘာဝတော;

သီလေ ဌိတောဝ ဘုဉ္ဇေယျ, မာဒိတ္တ ဂုဠကံ ဂိလိ.

၅၇.

အန္နာန မထော ပါနာနံ,ခါဒနီယာန မထောပိ ဝတ္ထာနံ;

လဒ္ဓါန သန္နိဓိံ ကရိယာ,နစ ပရိတ္တသေ တာနိ အလဘမာနော.

၅၈.

အညာဟိ [Pg.235] လာဘုပနိသာ, အညာ နိဗ္ဗာန ဂါမိနီ;

သက္ကာရံ နာဘိနန္ဒေယျ, ဝိဝေက မနုဗြူဟယေ.

၅၉.

အကတွာ [Pg.236] အာမိသေ အာသံ,သဒ္ဓမ္မေယေဝ အာသိကော;

အပ္ပမတ္တော သမာရဒ္ဓေါ,ဓမ္မဒါယံ လဘိဿတိ.

၆၀.

ပရိယတ္တိံ ဝိနာ သေယျံ, နလဘန္တိ ဗုဓာအပိ;

သေယျတ္ထိကောဝ သိက္ခေယျ, နေဝ ပူဇာဒိ ကာရဏာ.

၆၁.

ဘဝနိဿရဏတ္ထံဝ[Pg.237], သိက္ခေ နာ လဂ္ဂဒူပမော;

တထူပမာယ သိက္ခန္တော, အပါယေသု ပတိဿတိ.

၆၂.

သိက္ခိတေန အမာနတ္ထံ, နသာဓု မာနထဒ္ဓိကော;

မုဒုဘာဝါယ သိက္ခိတွာ, ဒမေန္တော မုဒုကော ဘဝေ.

၆၃.

ရာဂံ [Pg.238] ဒေါသံ ဓဇံမာနံ, သိက္ခန္တောပိ ဝိဝဇ္ဇယေ;

ဒဟရာပိ ဟိ မိယျန္တိ, နတ္ထိ ဝဿဂ္ဂတော မတံ.

၆၄.

သဒ္ဓံတိက္ခေယျ ဗုဒ္ဓေန, ရာဂံ အသုဘ စိန္တယာ;

မရဏေန ဓဇံမာနံ, ဒေါသံ မေတ္တာယ ဝါရယေ.

၆၅.

ဧတေဟိ [Pg.239] စတုရက္ခေဟိ, ဂန္ထံ သိက္ခေယျ သံ ဝုတော;

သိက္ခန္တဿေဟိ ရက္ခေဟိ, နကောစိ သံကိလေသိကော.

၆၆.

ဗုဒ္ဓဝါစမ္ပိ [Pg.240] သဇ္ဈာယ, ဧတေပိ မနသီကရ;

ဝုတ္တော ဓမ္မဝိဟာရီတိ, ဧဒိသော သာသနေ ဝရော.

၆၇.

ဂရူန မုပဒေသေန,စတုရက္ခော သုသီလဝါ;

အပ္ပဿုတောပိ ပါသံသော,ဘိယျောယေဝ ဗဟုဿုတော.

၆၈.

သာတံ [Pg.241] သေဝက္ခဏေဝပ္ပံ, တံဟေတွာ နန္တာဒုက္ခန္တိ;

ဓီရော အာသံ ဟနေ ကာမေ, ခုရဓာရမဓူပမေ.

၆၉.

ယောဓ ကာမေ သုခံမညိ,န သော ဒုက္ခာ ဝိမုစ္စတိ;

မာတာဟိ ဗျဂ္ဃ မနွေန္တော,ဝဆော မုတ္တော ကထံဘယာ.

၇၀.

တိရစ္ဆာ [Pg.242] ပေတ လဒ္ဓဗ္ဗေ, နာသံ ကာမသုခေ ကရေ;

ဘာယိတဗ္ဗ သုခံ တဉှိ, တသ္မိံ လဂ္ဂါ မဟာတပါ.

၇၁.

လဒ္ဓါ ကာမသုခံ ဗာလာ, ပမောဒန္တိ နပဏ္ဍိတာ;

ပသုပက္ခီဘိ လဒ္ဓဗ္ဗံ, အနန္တဒုက္ခ ကာရဏံ.

၇၂.

လဒ္ဓါ [Pg.243] ဓမ္မရတိံဝိညူ, မောဒန္တိ န အပဏ္ဍိတာ;

အနောမ သတ္တ ပရိဘောဂံ, ဘဂနိဿရဏာဝဟံ.

၇၃.

ဟီနကမ္မံ [Pg.244] ပဋိစ္ဆန္နံ, ကာမဿာဒံ နပတ္ထယေ;

ဓမ္မေ ပီတိဉ္စ ပါမောဇ္ဇံ, ပတ္ထေယျ သာဓုသမ္ပတော.

၇၄.

ပရိဂ္ဂဏှန္တိ ယေကာမေ, ဟိံ သန္တိတေ တဒတ္ထိကာ;

ပရိစ္စတ္တံ န ဟိံ သန္တိ, မုတ္တံ ဝဏ္ဏေန္တိ သာဓဝေါ.

၇၅.

နိစ္စုပက္ကမ္မ [Pg.245] ပုဋ္ဌောပိ, ကာယော ဝေရီဝသာ နုဂေါ;

အစိရံယေဝ ဘူသာယီ, ယုတ္တောဝ တ မုပေက္ခိတုံ.

၇၆.

ရက္ခိတောပိ အဂုတ္တောဝ, ကာယော ဘယမုခေ ဌိတော;

တသ္မာ ကာယ မုပေက္ခိတွာ, စရေဓမ္မ မဆမ္ဘိတော.

၇၇.

ပုဋ္ဌော [Pg.246] ပုဋ္ဌောပိ ယံကာယော, ဘုဝိ ရောဂါသယီသယီ;

ကတံကတံ မုဓာတော န, တဒတ္ထံ ဒုစ္စရေ စရေ.

၇၈.

ပါပံ [Pg.247] ကရောတိ ယောဗာလော,ပုဋ္ဌုံ ကာယံ တိဒုဗ္ဘရံ;

ဘူမျံ ကာယံ ဌပေတွာန,အနာထော သော အပါယိကော.

၇၉.

ဝေရီဝသာ နုဂံ ကာယံ,ဗာလော ပေါသေတိ ဒုစ္စရော;

ပေါသေန္တော နိရယေ ပက္ကော,ကာယော ဘူမျံ ဝိကာရဂူ.

၈၀.

ပါပံ [Pg.248] မာကရ ကာယတ္ထံ, ကာယော ဝေရီ ဝသာနုဂေါ;

ဘူမျံ သေဿတိ ဝေကာရီ, ပါပိကော နိရယံ ဂတော.

၈၁.

အမယှံ မယှသညာယ,ကာယံ ရောဂဝသာနုဂံ;

ပေါသံ ပတ္တော မဟာဇာနိံ,နောကာသော ဓမ္မ မိက္ခိတုံ.

၈၂.

ကာယာပေက္ခာယ [Pg.249] နောကာသော,ဓမ္မံ ဒဋ္ဌုံ ရဟောဂတော;

ဥပေက္ခာယေဝ ဩကာသော,ဒုက္ခိတာ မှ အပေက္ခယာ.

၈၃.

စိတ္တ [Pg.250] သံသောဓကာ ပက္ကာ, ကာယသံသောဓကာ နဝါ;

သောဓေ စိတ္တံဝ ပက္ကတ္ထံ, နကာယံ ဘဝဘီရုကော.

၈၄.

စိတ္တသင်္ခရဏံ [Pg.251] သာဓု, တံ သင်္ခတံ ပဘဿရံ;

နသာဓု ကာယသင်္ခါရော, သင်္ခတောပျသုဘောဝ သော.

၈၅.

သဘာဝ မလိနံ ကာယံ, နိမ္မလာယ ကထံ ကရေ;

အာဂန္တုမလိနံ စိတ္တံ, သက္ကာ ကာတုံ သုနိမ္မလံ.

၈၆.

အာဓိဗျာဓိ [Pg.252] ပရောတာယ, အဇ္ဇသွေဝါ ဝိနာသိနာ;

ကောဟိနာမ သရီရာယ, ဓမ္မာပေတံ သမာစရေ.

၈၇.

သဘာဝဇေဂုစ္ဆံ ကာယံ, သောဘေတုံနေဝသက္ကုဏေ;

စိတ္တံ ဝါ လင်္ကတံ သောဘံ, သီလာဒိ ဂန္ဓဝါသိတံ.

၈၈.

သစေ [Pg.253] ဘာယထ ဒုက္ခဿ, သစေ ဝေါ ဒုက္ခ မပ္ပိယံ;

မာကတ္ထ ပါပကံ ကမ္မံ, အာဝိဝါ ယဒိဝါ ရဟော.

၈၉.

ကိလေသာ ဂန္တုမလံစိတ္တံ, ပဘဿရ သဘာဝိကံ;

တဒါဂန္တုမလံ ဓောဝ, စိတ္တံ ဓောတေ ပဘဿရံ.

၉၀.

ကိလေသာ [Pg.254] ဂန္တုမလံစိတ္တံ, ဥပက္ကမေန သောဓယေ;

သုဝိသုဒ္ဓ မနာယေဝ, ဥတ္တရိံသု ဘဝဏ္ဏဝါ.

၉၁.

ကာယေ မလမုပေက္ခာယ, စိတ္တေ မလံဝ ဓောဝတု;

စိတ္တေ ဟိ နိမ္မလေသန္တော, ပူတိကာယောပိ ပူဇိတော.

၉၂.

ကာယရောဂံ [Pg.255] တိတိက္ခာယ, စိတ္တရောဂံ စိကိစ္ဆတု;

သုခိတော ကာယရောဂီပိ, စိတ္တေ နိရာမယေ သတိ.

၉၃.

ကာယရောဂေ ဗဟူ ဝေဇ္ဇာ, ဗုဒ္ဓုတ္တိဝ မနောဂဒေ;

ဣဓာပိ ကာယိကော သန္တော, အနန္တာဝ မနောရုဇာ.

၉၄.

သီသဒဍ္ဎ [Pg.256] မုပေက္ခာယ, နိဗ္ဗာတု ရာဂပါဝကံ;

ခိပ္ပံ အသုဘ သညာယ, နိစ္စဒဍ္ဎံ ဘဝေဘဝေ.

၉၅.

သုဘာယ ဥဋ္ဌိတံ ရာဂံ, အသုဘာယ နိဝါရယေ;

သောရာဂေါ သာဒိတံ ဇန္တုံ, စတွာပါယံ နယိဿတိ.

၉၆.

ပဏ္ဍိတာနံ [Pg.257] မလံ မာနော, သောတ္တုက္ကံသေန ပါကဋော;

မာခေါ အတ္တာန မုက္ကံသေ, မာဝိဘာဝေ သကံမလံ.

၉၇.

ဂုဏံ ပဋိစ္စ ဂုဏီနံ, အဟံမာနော သမုဋ္ဌဟေ;

မရဏံ အနုစိန္တာယ, ဓဇံမာနံ နိပါတယ.

၉၈.

ဧကော [Pg.258] ကာယဝိဝေကေသီ, ကတွာ ကိလေသနိဂ္ဂဟံ;

ဝသေ စိတ္တဝိဝေကေသီ, ဥဘော ပဓိ ဝိဝေကာဒါ.

၉၉.

အဒိဋ္ဌေ အသုတေ ဌာနေ, ဝသေယျ မောစနတ္ထိကော;

အဿာဒံဟိ နိဝါရေတုံ, ဒိဋ္ဌေ သုတေ တိဒုက္ကရံ.

၁၀၀.

အဒိဋ္ဌေ [Pg.259] အသုတေ ရညေ, ဝသေယျိ န္ဒြိယဂေါပကော;

ဝါရေတုံ ဝိသယာကိဏ္ဏေ, စက္ခုသောတံ တိဒုက္ကရံ.

၁၀၁.

ရာဂံ အသတိ ဥပ္ပန္နံ, သန္တာဘုဇေန ဝါရယေ;

ဗာဟိရေ ရာဂ မုပ္ပန္နံ, အန္တော အသုဘစိန္တယာ.

၁၀၂.

ရာဂံ [Pg.260] ဆိန္ဒာတိ ဗုဒ္ဓါဏံ, သရံ ဘိက္ခု ရဟောဂတော;

ပဿံ ကာယေဓ ဇေဂုစ္ဆံ, လဘေယျာ သိဋ္ဌမောစနံ.

၁၀၃.

ကာယံ အသုဘတောပဿ, ကလ္လကာလေဝ ဒဿနံ;

မောဃံ ကာလံ နခီယေယျ, ဘဝေယျုံသွေပိအာတုရာ.

၁၀၄.

ကာယံ [Pg.261] ဇေဂုစ္ဆတောပဿ, ဗာလျန္တော ပစ္စဝေက္ခိယ;

အာဒေါ ကိဉ္စိ ဇိဂုစ္ဆာယ, ဇိဂုစ္ဆေယျာယတိံ ဘုသံ.

၁၀၅.

ကာယာဒိနဝ မိက္ခေယျ, ဒါနိ ကိဉ္စိပိ ဒဿနံ;

အာယတိံ မဂ္ဂလာဘာယ, ဘဝေယျ ဥပနိဿ ယော.

၁၀၆.

ဣတ္ထီန [Pg.262] မင်္ဂမင်္ဂါနိ, နပဿေယျ နစိန္တယေ;

တဒါသာ ဥဘတော ဘဋ္ဌာ, သုဂတျာ သာသနာပိစ.

၁၀၇.

ဣတ္ထိရူပ သရာကဍ္ဎာ, ဘဋ္ဌာ ဗဟူဝ သာသနာ;

ဣဟာပိ ဒုက္ခိတာ ဟုတွာ, တေ ပေစ္စ အတိဒုက္ခိနော.

၁၀၈.

ပုံမနော [Pg.263] ပရိယာဒါယ, ဣတ္ထိရူပသရာ ဌိတာ;

တဿမ မည မေကမ္ပိ, နဝိဇ္ဇတေဝ သဗ္ဗဓိ.

၁၀၉.

သလ္လပေ [Pg.264] အသိဟတ္ထေန, ပိသာစေနာပိ သလ္လပေ;

အာသဒေ အာသိဝိသေပိ, အဂ္ဂိက္ခန္ဓေပိ အာသဒေ;

နတွေဝ မာတုဂါမေန, ဧကေကာယ သုပေသလော.

၁၁၀.

ကာမံ အသုဘစိန္တာယ, ဗျာပါဒံ သ္နေဟစေတသာ;

ဝိဟိံသံ ကရုဏာယေဟိ, ဝိတက္ကဂ္ဂီ တယောသမေ.

၁၁၁.

အသမေတ [Pg.265] ဝိတက္ကဂ္ဂီ, ထုသရာသိမှိ ခါဏုဝ;

အထိရာ သာသနေ တာပီ, တေပစ္ဆာအတိတာပိနော.

၁၁၂.

အသုဘာ [Pg.266] ပဂမေ လောကာ, တံ မေတ္တာယုပသင်္ကမေ;

သုဘာဝိတာဟိ ဧတာဟိ, ဇဟေလောကေ ပိယာပိယံ.

၁၁၃.

ဂတဋ္ဌိတာဒေါ ဥပ္ပန္နေ, ဝိတက္ကဂ္ဂီ တယော သမေ;

အာတာပီ ပဟိတတ္တောတိ, ဧဝံဘူတော ပဝုစ္စတိ.

၁၁၄.

ဝိဝါဒပ္ပတ္တော [Pg.267] ဒုတီယော, ကေနေကော ဝိဝဒိဿတိ;

တဿတေ သဂ္ဂကာမဿ, ဧကတ္တ မုပရောစိတံ.

၁၁၅.

သိနိဟပ္ပတ္တော ဒုတီယော, ကမေကာ သိနိဟိဿတိ;

တဿတေ မောက္ခကာမဿ, ဧကတ္တ မုပရောစိတံ.

၁၁၆.

ပုရတော [Pg.268] ပစ္ဆတောဝါပိ, အပရော စေ နဝိဇ္ဇတိ;

တဿေဝ ဖာသု ဘဝတိ, ဧကဿ ဝသတော ဝနေ.

၁၁၇.

သုခဉ္စ ကာမ မယိကံ, ဒုက္ခဉ္စ ပဝိဝေကိကံ;

ပဝိဝေကံ ဒုက္ခံ သေယျော, ယဉ္စေ ကာမမယံ သုခံ.

၁၁၈.

ယောစ [Pg.269] ဝဿသတံ ဇီဝေ, အပဿံ ဥဒယဗ္ဗယံ;

ဧကာဟံ ဇီဝိတံ သေယျော, ပဿတော ဥဒယဗ္ဗယံ.

၁၁၉.

သုညာဂါရံ [Pg.270] ပဝိဋ္ဌဿ, သန္တစိတ္တဿ ဘိက္ခုနော;

အမာနုဿီ ရတိ ဟောတိ, သမ္မာဓမ္မံ ဝိပဿတော.

၁၂၀.

ယတောယတော [Pg.271] သမ္မသတိ, ခန္ဓာနံ ဥဒယဗ္ဗယံ;

လဘတိ ပီတိပါမောဇ္ဇံ, အမတံ တံ ဝိဇာနတံ.

၁၂၁.

ဣစ္စုတ္တံ ဓမ္မပါမောဇ္ဇံ, ဝိဝေကဇံ ရသာဓိကံ;

ဣစ္ဆန္တော သီလဝါ ဘိက္ခု, အနိဝတ္တိတ ဝီရိယော.

၁၂၂.

ဝနာ ဝါသေ ဝသိတွာန, အပ္ပိစ္ဆာဒိဂုဏာဝဟော;

ပလိ ဗောဓေ သမုစ္ဆိဇ္ဇ, ဘာဝေယျေဝံရဟောဂတော.

၁၂၃.

ကာယေ [Pg.272] ဇေဂုစ္ဆပုဉ္ဇာနိ, ရူပံ ရုပ္ပနဘာဝတော;

တဿိတာ ဝေဒနာ သညာ, သင်္ခါရာစ တတောပရေ.

၁၂၄.

ဝိညာဏဉ္စ ဣမေပဉ္စ, ခန္ဓာ ရာသတ္ထတော မတာ;

တေစာနိစ္စ ဒုက္ခာ နတ္တာ, ဥပါဒါ ဝယဓမ္မိနော.

၁၂၅.

ဖေဏပိဏ္ဍူ [Pg.274] ပမံ ရူပံ, ဝေဒနာ ပုပ္ဖုဠူပမာ;

မရီစိကူပမာ သညာ, သင်္ခါရာ ကဒလူပမာ.

၁၂၆.

မာယူပမန္တိ ဝိညာဏံ, ဒဿိတေ သဗ္ဗ ဒဿိနာ;

ဥပမာဟိ သမဿေ ယျ, ပဉ္စက္ခန္ဓေ အသာရကေ.

၁၂၇.

ယာဝ [Pg.275] ဗျာတိ နိမ္မိဿတိ,ကောဋိလက္ခာတဟိံခဏေ;

ခန္ဓာ ဘိဇ္ဇန္တိ ဟုတွာန,အနိစ္စာနာမ တေ တတော.

၁၂၈.

ဘယ ပီဠိတတော ဒုက္ခာ, အနတ္တာ အဝိဓေယျတော;

ခန္ဓာဝ ဟောန္တိ ဘိဇ္ဇန္တိ, အညော ကောစိ နလဗ္ဘတိ.

၁၂၉.

ခန္ဓာ [Pg.276] နိစ္စာ ခယဋ္ဌေန, ဘယဋ္ဌေန ဒုခါစတေ;

အနတ္တာ သာရကဋ္ဌေန, ဣတိ ပဿေ ပုနပ္ပုနံ.

၁၃၀.

ဘာဏူဒယေ ကယံ ဧန္တိ, ဟေမန္တေ ပတိတုဿဝါ;

ရာဂါ မာနာစ သဗ္ဗေဝံ, သတျာ နိစ္စာနုပဿနေ.

၁၃၁.

သီဟနာဒံ [Pg.277] ဝနေသုတွာ, သံဝေဇေန္တိ သသောတကာ;

ဝေဟပ္ဖလာပိ လောကေဝံ, ဇိနေရိတ တိလက္ခဏံ.

၁၃၂.

ဝေဒနာဒီနိ [Pg.278] နာမာနိ, နာမရူပဒွယံဝ တေ;

တဏှာဝိဇ္ဇာစ ကမ္မာဒိ, နာမရူပဿ ပစ္စယာ.

၁၃၃.

နာမရူပံ ပရိဂ္ဂယှ, တတော တဿစ ပစ္စယံ;

ဟုတွာ အဘာဝတော နိစ္စာ, ဥဒယဗ္ဗယ ပီဠနာ.

၁၃၄.

ဒုက္ခာ အဝသဝတ္တိတ္တာ, အနတ္တာတိတိလက္ခဏံ;

အာရောပေတွာဝ သင်္ခါရေ, သမ္မသန္တော ပုနပ္ပုနံ.

၁၃၅.

ပါပုဏေယျာ [Pg.279] နုပုဗ္ဗေန,သဗ္ဗသံယောဇန က္ခယံ;

တမ္ပတ္တော အရဟာ ဘိက္ခု,ဘဝတိဏ္ဏော သုနိဗ္ဗုတော.

၁၃၆.

နတုမှံ [Pg.280] ဘိက္ခဝေ ရူပံ, တံ ဇဟေထာတိ ဝုတ္တတော;

မေမေတန္တိ ဥပါဒါနံ, ပဉ္စက္ခန္ဓေ ဝိနာသယေ.

၁၃၇.

ပုတ္တာ မတ္ထိ ဓနာ မတ္ထိ, ဣတိ ဗာလော ဝိဟညတိ;

အတ္တာပိ အတ္တနော နတ္ထိ, ကုတောပုတ္တောကုတောဓနံ.

၁၃၈.

ဣစ္စုတ္တ မနုစိန္တာယ, အတ္တာတိ အတ္ထိမေတိဝါ;

သညံ နာသေယျ ခန္ဓာဝ, အတ္ထီတိ အာဘုဇေ ဗုဓော.

၁၃၉.

ခန္ဓနာသ [Pg.281] မနာဘုဇ္ဇ, မတော မေ ပုတ္တကော ဣတိ;

သောစန္တိ ပရိဒေဝန္တိ ပုတ္တောနတ္ထိ နသောမတော.

၁၄၀.

ဘိဇ္ဇမာနေသု [Pg.282] ခန္ဓေသု, အတ္တသညီ အနတ္တေသု;

နာဒိကာလ ဝိပရိတာ, မဟာဇာနီယတံ ဂတာ.

၁၄၁.

ဘိဇ္ဇမာနေသု ခန္ဓေသု, လဂ္ဂါ ရတ္တာ မမာယိတာ;

နာရီပုမာဒိ သညာယ, ဝိပရေတာ အနာဒိကေ.

၁၄၂.

နာဒိကာလ [Pg.283] ဝိပရိတော, အတ္တသညီ အနတ္တနိ;

ဘိဇ္ဇမာနေသု ခန္ဓေသု, ဇဟ တ္တာတိ မမာယနံ.

၁၄၃.

အဘိဏှုပ္ပတ္တိယာယေဝ, ဘိဇ္ဇမာနော နညယတိ;

အနိစ္စလက္ခဏံ ဆန္နံ, တံ စိန္တေယျ သုပညဝါ.

၁၄၄.

အသန္တေယေဝ [Pg.284] လဂ္ဂန္တာ, နမုစ္စန္တိ ဘဝတ္တယာ;

နတ္ထိ သန္တေသု လဂ္ဂန္တာ, ရူပက္ခန္ဓာ ဒိကေ သွိဓ.

၁၄၅.

တဏှာ ဂိဇ္ဈတိ မေတန္တိ, မာနော အဟန္တိ မညတိ;

ဒိဋ္ဌိ ဂဏှာတိ အတ္တာတိ, ဧတေ ပပဉ္စကာ တယော.

၁၄၆.

မမေ [Pg.285] တ မဟ မတ္တာတိ, ပပဉ္စာနံ ဝသာနုဂေါ;

ဂဏှန္တော ဘဝ ပင်္ကမှိ, နိမ္မုဂ္ဂေါဝ ဘယာနကေ.

၁၄၇.

နမေ နာဟံ နအတ္တာတိ, ဧတေဟိ ဝိဝဒံ ကရေ;

ဝိဝဒန္တာဝ မုစ္စန္တိ, ဘဝပင်္ကာ ဘယာနကာ.

၁၄၈.

နမေ [Pg.286] နာဟံ နအတ္တာတိ, ဒဋ္ဌဗ္ဗန္တိ ဇိနေရိတံ;

တထေဝ သဗ္ဗဒါ မညေ, မာ ပပဉ္စ ဝသာနုဂေါ.

၁၄၉.

လောကော ဝိဝဒိ ဗုဒ္ဓေန, နလောကေန ကဒါစိသော;

အနတ္တာတိ ဇိနုဒ္ဒိဋ္ဌံ, လောကော အတ္တာတိ မညတိ.

၁၅၀.

မော [Pg.287] လောကေန သမော ဟောတု,တဿမော ကိံတဒုတ္တရေ;

အန္ဓိဘူတော အယံလောကော,သမ္ဗုဒ္ဓဿ ဝိရောဓိကော.

၁၅၁.

သမ္ဗုဒ္ဓဿ ဝသံ နွေတု, သန္ဈာဒိ ဘယတဇ္ဇိတော;

တဗ္ဗသံယေဝ အနွေန္တော, ဘဝတိဏ္ဏော ဘဝိဿတိ.

၁၅၂.

အနတ္တာတိ [Pg.288] ဂိရာ သစ္စာ, အတ္တာတိ ဝစနံ မုသာ;

မုသာယ ဝိဝဒေ လောကော, ဗုဒ္ဓေန သစ္စ ဝါဒိနာ.

၁၅၃.

တုရင်္ဂဝဇဂါမမှာ, ပုရိမေ စမကျ ကာနနေ;

ဝသတာ အဂ္ဂဓမ္မေန, ထေရေန ရစိတော အယံ.

၁၅၄.

အရိမတ္တေယျ ဗုဒ္ဓဿ,ဓမ္မ ဿုတက္ခဏေ ဘဝေ;

ခီဏာသဝေါ မဟာပညော,ပုညေန တေန သာဝကောတိ.

ကာယပစ္စဝေက္ခဏာ

၁.

နာဒိကာလ [Pg.291] ဝိပရိတ, ဇန ဘူတတ္ထ ဒဿိနော;

ဒါတုမေ ကန္တိကဿာဒံ, သတ္ထု ပါဒေါ တိမာနိတော.

၂.

သီသေ [Pg.292] ပိလန္ဒိယာ မောဒီ, သမ္ဗုဒ္ဓ စရဏ မ္ဗုဇံ;

သာဓု တုဋ္ဌိကရံ ဗြူမိ, သုကာယ ပစ္စဝေက္ခဏံ.

၃.

ယောနိသော မနသီကတွာ, နာဒါ ဝိရုဒ္ဓ မညိတံ;

သာဓဝေါ တ မုဒိက္ခန္တု, မယာပိ မန္ဒဗုဒ္ဓိနော.

၄.

ဣစ္ဆိတဗ္ဗာန [Pg.293] မာယတ္တာ, တေသဉ္စ စယဘာဝတော;

တဒါကာရေန ဝတ္တိတာ, ကာယော ဇေဂုစ္ဆ ပုဉ္ဇကော.

၅.

ပုနပ္ပုနံဝ ဩက္ကမ, ဉာဏ မန္တော ပဝေသိယ;

ဗာဟိရံဝ အနာလမ္ဗ, ဣက္ခဏာ ပစ္စဝေက္ခဏာ.

၆.

မံသစ္ဆန္န [Pg.294] ဋ္ဌိရူပေဝ, မနောဇ ဝါယု စာလိတေ;

နာရီ ဂတာတိ ယာစိန္တာ, နေဝ သာပစ္စဝေက္ခဏာ.

၇.

သညာဒိဋ္ဌိစ စိတ္တဉ္စ, ဝိပလ္လာသာ ဣမေတယော;

တ ဒါကာရေန ဝတ္တန္တိ, အဝိဇ္ဇော တ္ထရိတာ ဘုသံ.

၈.

အာသာ [Pg.295] ဝိပရိတေ ယေသံ,ဝိပလ္လာသာတိ တေမတာ;

အာသာ အာသိသနာ ဝုတ္တာ,တဏှာယေဝ သဘာဝတော.

၉.

အသုဘေဝ သုဘမိတိ, အနိစ္စေဧဝ နိစ္စတော;

ဒုက္ခေယေဝ သုခံဝါတိ, အနတ္တနိဝ အတ္တတော.

၁၀.

သညာဏံ ဒဿနံ စိန္တာ,ဒွါဒသာ ကာရတော တယော;

ဒိဋ္ဌိသာ စာဒိ မဂ္ဂေန,သေသာ သေသေဟိ ဝဇ္ဈိတာ.

၁၁.

တဏှာ [Pg.297] တဿိ မမေတန္တိ, မာနော မညိ အဟန္တိစ;

ယဿိ ဒိဋ္ဌိစ အတ္တာတိ, ပပဉ္စာ နာမိမေ တယော.

၁၂.

ပပဉ္စန္တိ သံသာရံ, တသ္မာ ပပဉ္စနာမကာ;

ဘဝယန္တေ ပယောဇေန္တာ, မောက္ခံ နာဒံသု တေ စိရံ.

၁၃.

ဘဝပင်္ကေ နိ မုဇ္ဇန္တာ, ပပဉ္စာနံ ဝသာနုဂါ;

စိရဿံ ဒုက္ခိတာ ဟောန္တိ, အာရာ နိဗ္ဗာနတော တိဝ.

၁၄.

နမေ [Pg.298] နာဟံ နအတ္တာတိ, ဧတေဟိ ဝိဝဒံ ကရေ;

ဘဏ္ဍန္တာ ဝိဝဒန္တာ တေ, နိဗ္ဗာနတော အဒူရိနော.

၁၅.

ဝိပလ္လာသေ ပပဉ္စေစ, ဒွေပိဧတေ ပဟာတဝေ;

သောပစ္စဝေက္ခိတဗ္ဗေ ဝံ, ကာယော ဇေဂုစ္ဆပုဉ္ဇကော.

၁၆.

ကေသာ [Pg.299] လောမာ နခါဒန္တာ,တဏှာယာပိစ ဂေါစရာ;

တသ္မာ တေ ဒဋ္ဌုကာမေန,တဏှာ နိဝါရိတာ သဒါ.

၁၇.

လဂ္ဂိကာ ဆဝိယံယေဝ, တဏှာ ဗာဟိရဂေါစရာ;

တသ္မာ ဧတ္ထ တစောဝါဟ, သမ္ဗုဒ္ဓေါ န ဗဟိစ္ဆဝိံ.

၁၈.

ဧသာ [Pg.300] တစပရိယန္တ, ပဒေနာပိ နိဝါရိတာ;

အတော ဆဝိ မနာလမ္ဗ, တစသီဝ မနေကရေ.

၁၉.

ဇိဂုစ္ဆိတာနိ ဆာဒေတိ, အဋ္ဌိ မံသ တစာဒိနိ;

ဉာဏေန ဆိန္ဒိ တဗ္ဗာစ, တသ္မာ ဆဝီတိ ဝုစ္စတိ.

၂၀.

ဆဝိံ [Pg.301] ဆေတွာ တစံ ပဿေ,တံ ဆေတွာ မံသကာဒယော;

ဂဗ္ဘေဝတ္ထူနိ ဒီပေန,ယထာ ပညာပဒီပိကော.

၂၁.

ဇေဂုစ္ဆော ဆဝိယာ ကာယော,အသုဘောဝ သုဘာယတေ;

နိစ္ဆဝါ တစမတ္တေန,ကထံ သုဘာယတေ အယံ.

၂၂.

နှာရုဗန္ဓော [Pg.302] ဋ္ဌိသံဃာတော, မံသလောဟိ တ လိမ္ပိတော;

ဆဝိယာဝ ဝိမောဟေတိ, တစစ္ဆန္နော ဣမံ ပဇံ.

၂၃.

ဝဏ္ဏ သဏ္ဌာန တောစေဝ,ဂန္ဓော ကာသာ သယေဟိစ;

ဇေဂုစ္ဆာ ပဋိကုလျာစ,ကေသာနာမ န မေပိယာ.

၂၄.

ဧကေကံ [Pg.303] မနသီကတွာ, နယေ နိစ္စေဝ မာဒိနာ;

ဘာဝေတဗ္ဗာ သမာရမ္ဘ, ယထာပညာယတေ တထာ.

၂၅.

ပူရိတံ မတ္ထလုင်္ဂဿ, သီသဋ္ဌိပိ ဇိဂုစ္ဆိတံ;

မုခ နာသက္ခိ ကဏ္ဏာဒိ, ဆိဒ္ဒါ ဝဆိဒ္ဒ ဒုဒ္ဒသံ.

၂၆.

ပူတိ [Pg.304] ဝါယု ဝိစရိတ, ကုစ္ဆိဋ္ဌန္တာနိ လောဟိတံ;

ပိတ္တံ သေမှဉ္စ ပပ္ဖာသံ, ဟဒယံ ယကနမ္ပိ ဓီ.

၂၇.

အန္န ပါနံ မနုညမ္ပိ, ခေဠ တိန္တ မဓောပရိ;

ဒန္တေဟိ ပိသိတံ သွာန, ဝမထူဝ ဇိဂုစ္ဆိတံ.

၂၈.

ယာဝတာယု [Pg.305] အဓောတေဝါ, မာသယေ ဂိလိတံ ဌိတံ;

ကိမိကူလ သမာကိဏ္ဏေ, တဟိမေဝါ သိတာသိတံ.

၂၉.

ဧတံ ဥဒရိယံ နာမ, တမှာ ပက္ကာသယံ ဂတံ;

ဒိနစ္စယေ ကရီသန္တံ, သာ သယံ တံဒွယမ္ပိ ဓီ.

၃၀.

ပကာသေတွာ [Pg.306] ပဝေသေတိ, အန္နပါနံ မဟာရဟံ;

ပဋိစ္ဆန္နော နိဟရတိ, တမေဝ န္တော ဌိတံ ဇနော.

၃၁.

ပဝေသေ တံ ပရိဝတော,နိဟရေကော ရဟော လိနော;

မနုညံဝ ပဝီသန္တေ,နိက္ခမန္တေ ဇိဂုစ္ဆိတံ.

၃၂.

ဇေဂုစ္ဆ [Pg.307] ပဋိကုလျာနိ, မံသနှာရု တစဋ္ဌိနိ;

နပိယာနိ န တုဋ္ဌာနိ, နေဝဣတ္ထီ နပူပိသော.

၃၃.

ဟတ္ထ ပါဒ မုခါဒီနိ,နတ္ထညာနိ ဇိဂုစ္ဆိတာ;

တတ္ထာ ကုမာရိကာ ကညာ,မောဟေန အတ္ထိသညိတာ.

၃၄.

ပစ္စေကံ [Pg.308] ဝိနိဘုတ္တေသ, ကေသ လောမ နခါဒိသု;

နတ္ထိကညာ ကုမာရီဝါ, သမ္ပိဏ္ဍိတေသု သာ ကုတော.

၃၅.

အာကာသောယေဝ [Pg.309] ကာယာင်္ချော,တစာဒိ ပရိဝါရိတော;

တထာသီသံ မုခံဟတ္ထော,ပါဒေါရု ကဋိအာဒယော.

၃၆.

ထမ္ဘာဒီသွိဝ ဂေဟောတိ,ပိဏ္ဍိတေ သွေသု သမ္မုတိ;

ကာယောတိ ဣတ္ထိပေါသောတိ,သံမုဠှော တာယရဇ္ဇတိ.

၃၇.

သန္တံ [Pg.310] စိန္တေယျ နာသန္တံ, သန္တံ စိန္တယတော သုခံ;

အသန္တံ အနုစိန္တေန္တော, နာနာဒုက္ခေဟိ တပ္ပတိ.

၃၈.

ဇဝတျာ ဝိဇ္ဇမာနေဝ, နာဝိဇ္ဇာ ဝိဇ္ဇမာနကေ;

တသ္မာတံနာမကော မောဟော, တဏှာပိစ တဒနွိတာ.

၃၉.

ပုံကာယောဝါထီကာယောဝါ[Pg.311], မလာသုစိဇိဂုစ္ဆိတော;

တဿမံ နတ္ထိဂါရယှံ, ယွာမလမ္ပိ မလံကရေ.

၄၀.

နတ္ထိ [Pg.312] ကာယသမောဝေရီ,မဟာနတ္ထကရော စီရံ;

နတ္ထိ ကာယသမော ဝဉ္စော,အသုဘောဝ သုဘာယတေ.

၄၁.

ထီပုံ သပရကာယောတိ, ပဿတိပိ နပဿတိ;

ဇေဂုစ္ဆ ပဋိကုလျောတိ, သမ္မာ ပဿတိ ပဿတိ.

၄၂.

သုဘောသုဘောတိ [Pg.313] မညန္တာ,ဓီတိ ဓီတိ ဇိနေရိတေ;

လောကာလောကာ နဓီယေသံ,ဘဝါ ဘဝါ ဝစာရိနော.

၄၃.

ဘိယျောဘိယျောဝ ရာဂဂ္ဂိ,သုဘောသုဘောတိပဿတော;

မန္ဒောမန္ဒောဝ သောအဂ္ဂိ,ဓီဝဓီဝဝိပဿတော.

၄၄.

ဗဟုဿုတောပိ [Pg.314] ဗာလောဝ, အသုဘေ သုဘမညကော;

အသုဘောတိ ဝိပဿန္တော, အပ္ပဿုတောပိပဏ္ဍိတော.

၄၅.

ယောစ သိပ္ပာနိ ဇာနေယျ, သတာနိ သဟဿာနိပိ;

ကာယေကဇာနနံ သေယျော, ယဉ္စေ အည ဝိဇာနံနံ.

၄၆.

ကာယမေကမ္ပိ [Pg.315] နညာမိ, ဗုဒ္ဓါလဒ္ဓနယော အပိ;

သုတာစ ပဏ္ဍိတာတျမှာ, ယုတ္တောယေဝါ တိလဇ္ဇိတုံ.

၄၇.

သုဘတောယေဝ မညာမိ, ဧဝံ ဇိဂုစ္ဆိတမ္ပိနံ;

မဉ္စ ဉေ ပဏ္ဍိတော တျာဟု, အလမေဝါတိလဇ္ဇိတုံ.

၄၈.

ကာယေ [Pg.316] အသုဘသညံယော, နလဘာမိ ကဒါစိပိ;

သုလဒ္ဓ သုဂတော ဝါဒေါ, သွာရဟောဝါတိလဇ္ဇိတုံ.

၄၉.

ကာယေန သံသရန္တောပိ, တဒါကာရံ ယထာတထံ;

ဘဝေဘဝေ အဇာနန္တော, မမာယိတွာဝ တံ စဇိံ.

၅၀.

ကာယေန [Pg.317] သံသရန္တောပိ, နညာ ကာယ ဇိဂုစ္စတံ;

နိစ္စုပါဒါ မမာယန္တော, ပိယာယိတွာဝ တံ စဇိံ.

၅၁.

ကုဘာရံ သာရသညာယ, ပိယာယိတွာဝ ဟိံသကံ;

အနန္တဒုက္ခ မာပါဒိံ, ဝိပလ္လာသော ဘဝေဘဝေ.

၅၂.

မဟာဇာနီယ [Pg.318] ပတ္တောတိ, သံဝေဇေတွာ သကံမနံ;

ဒိရောကတ ဇိနောဝါဒေါ, အနိဝတ္တိတ ဝီရိယော.

၅၃.

အဒိဋ္ဌပုဗ္ဗ မေတဿ, တထာကာရံဝ ပဿတု;

ကိစ္စ မည မုပေက္ခာယ, သံသာရ ဘယ ဘီရုကော.

၅၄.

ယဉှိကိစ္စံ [Pg.319] အပဝိဋ္ဌံ, အကိစ္စံ ပန ကယိရာ;

ဥန္နဠာနံ ပမတ္တာနံ, တေသံ ဝဍ္ဎန္တိ အာသဝါ.

၅၅.

ယေသဉ္စ သုသမာရဒ္ဓါ, နိစ္စံ ကာယဂတာ သတိ;

အကိစ္စံ တေ နသေဝန္တိ, ကိစ္စေ သာတတ ကာရိနော;

သတာနံ သမ္ပဇာနာနံ, အတ္ထံ ဂစ္ဆန္တိ အာသဝါတိ.

၅၆.

ထောမေန္တာ [Pg.320] သောဏ္ဏံ ကာယောရ,မုခက္ခိ တျာဒိနာ ဣမံ;

ရတ္တေ မုဋ္ဌေ ကရောန္တေတေ,အညေဇနေ သယံဝိယ.

၅၇.

ကာယသောဘျ ပကာသေတာ,ဝါစာ ဝေ မာရဒေသနာ;

တဒသောဘျ ပကာသေတာ,ဝါစာ သမ္မုဒ္ဓ ဒေသနာ.

၅၈.

အသုဘောတိ [Pg.321] ဇိနုဒ္ဒိဋ္ဌံ, ကာယံ သုဘောတိ ဂါဟိနော;

သံမုဠှာတေ န မုစ္စန္တိ, ဘဝါ ဗုဒ္ဓ ဝိရောဓိနော.

၅၉.

အသုဘောတိ ဇိနုဒ္ဒိဋ္ဌံ, ကာယံ တထေဝ ဂါဟိနော;

ပဏ္ဍိတာ တေဝ မုစ္စန္တိ, ဘဝါ ဗုဒ္ဓမတာနုဂါ.

၆၀.

သောဓေန္တေလင်္ကရောန္တေဝ[Pg.322], မလာသဝန္တိကာယတော;

အလံ ကာယဝိသောဓေန, ဗာလောဝ တံ ဂရုံ ကရော.

၆၁.

ဂေါပေန္တေဝ အရောဂါယ,ကာယော ရောဂေနသံဝသေ;

ဂါယဂုတ္တံ မုဓာယေဝ,စိတ္တဂုတ္တံဝ သာတ္ထကံ.

၆၂.

စန္ဒနာဒိ [Pg.323] ဝိလိတ္တောပိ,မုတ္တောမဏိ ဝိဘူသိတော;

တံသဘာဝေါဝ သောကာယော,ဝိဿဝန္တော တတောတတော.

၆၃.

ပတိတေစ [Pg.324] အပတိတေ,ဝိသေသော နတ္ထိ ကိဉ္စိပိ;

ကာယော စေမနုညော တမှာ,ပတိတောပိ တထာသိယာ.

၆၄.

ကာယော မနုဿဇာတီနံ, တိရစ္ဆာန တ္တဘာဝတော;

ဇေဂုစ္ဆိတ တရောဟောတိ, ဒုဗ္ဗိသောဓောစ ဒုဗ္ဘရော.

၆၅.

ယထာဇာတေန [Pg.325] ကာယေန, သက္ကာ ဝိဟရိတုံ နစ;

ပစ္စဟံ သောဓနီယောစ, ဓောဝန မဇ္ဇနာဒိဘိ.

၆၆.

ရတ္တံ ပါတုံ ဆဝိံ ဆေတွာ, သက္ကာ ဍံသာဒယောပိနံ;

ဆေတွာ မံသ ဋ္ဌိကာဒီနိ, ဓီရော နာလမ္ဗိတုံ ကထံ.

၆၇.

လဂ္ဂန္တိ [Pg.326] ဆဝိမတ္တေ ယေ, မက္ခိကာ သေဒပါ ယထာ;

ထီပုံ မုခါဒိ သညာယ, တေ ပမုဠှာ မဟာတပါ.

၆၈.

စာရီ အဂေါစရေ ကာမေ, လဂ္ဂါလေပေ ကပီရိဝ;

ဗဟူဟိ ပီဠိတာ ရီဟိ, မရန္တိ အတိဒုက္ခိနော.

၆၉.

ရာဂါရိံ [Pg.327] ဒုဇ္ဇယံ ဇေယျုံ, ဇယဘုမ္မာသုဘေ စရာ;

သီတာနိဿိတ လဋုကီ, သေနကံဝ မဟဗ္ဗလံ.

၇၀.

ကာယဓိ [Pg.328] ဂ္ဂေါစရော ဝေသော,ဇယဘူဗုဒ္ဓ ဒုတ္တိယာ;

ဧတ္ထေဝ ဂေါစရာ ဟောန္တု,မာဘော ကာမေ ဇယတ္ထိကာ.

၇၁.

ကာယာ [Pg.329] သုဘံ ဝိပဿန္တု, ဒိဗ္ဗ က္ခိနာပျ ပဿိယံ;

အာယတိံ မဂ္ဂလာဘာယ, တံ ဒဿနံ ဘဝိဿတိ.

၇၂.

ဓီစက္ခုနာဝ ဓိက္ကာယံ, ပဿေ န မံသစက္ခုနာ;

ဥမ္မိလိတွာဝ ဓီစက္ခုံ, ဝိဝေကဋ္ဌော ဥဒိက္ခတု.

၇၃.

ပဉ္စင်္ဂါနိ [Pg.330] ယထာ ကုမ္မော, စက္ခာဒီနိ နိဂူဟယေ;

ဝေရီ လဘတု မောကာသံ, ပဉ္စဒွါရာ အရက္ခိတာ.

၇၄.

စက္ခုရူပေန [Pg.331] သံဝါသာ, ရာဂပုတ္တံ ဝိဇာယတိ;

မဟာနတ္ထကရော သောစ, သံဝါသံ တေန ဝါရယေ.

၇၅.

ရူပါဒီသုသဉ္ဇန္တီတိ, သတ္တာ ဣတ္ထျာဒိ သညာယ;

နတွေဝ ခန္ဓသညာယ, တံသညိဟိ ဝိရာဂိနော.

၇၆.

သကာယေပရကာယေစ[Pg.332],အာသံ ဆိန္ဒေယျ ပဏ္ဍိတော;

အာသံ ဆေတွာ သုခံသေတိ,အာသာယ ဒုက္ခိတာ ပဇာ.

၇၇.

ဒဿနေ သဝနေ ကာယ,သံသဂ္ဂေ မေထုနေပိစ;

နိရာသော သုခိတော ဟောတိ,အနိရာသောတိဒုက္ခိတော.

၇၈.

ဗဟီဝ [Pg.333] သောဓိတံ ယဿ, န ဝန္တော ဇေဂုစ္ဆ ပုဉ္ဇကံ;

တံကာယံ အသုတံဇာန, တနုရာဂေါ သိယာတ္တနိ.

၇၉.

ကာယေဝိရာဂ မိစ္ဆန္တော, နုပဿေယျ တဒန္တရံ;

အန္တောဒဿီ အတပ္ပန္တော, လဘေ သံသာရမောစနံ.

၈၀.

သတ္တာ [Pg.334] သတ္တာ ဗဟိဋ္ဌေဝါ, သာရံသာရံ မမာယိနော;

သန္တောသန္တော ဝိပဿန္တော, နဝါနဝါယတိံဘဝေ.

၈၁.

အလံ [Pg.335] အလံ ကတွာ ကာယံ, မလာမလာသဝန္တိတော;

သောဘံ သောဘံ နယေ ဌာနံ, မနံ မနံ ပျလံ ကတံ.

၈၂.

သံသဂ္ဂဇာတဿ ဘဝန္တိ သ္နေဟာ,သ္နေဟာနွယံ ဒုက္ခ မိဒံ ပဟောတိ;

အာဒိနဝံ သ္နေဟဇံပေက္ခ မာနော,ဧကော စရေခဂ္ဂ ဝိသာဏ ကပ္ပော.

၈၃.

ခိဋ္ဋာ [Pg.336] ရတိ ဟောတိ သဟာယ မဇ္ဈေ,ပုတ္တေသုစ ဝိပုလံ ဟောတိ ပေမံ;

ပိယဝိပ္ပယောဂံ ဝိဇိဂုစ္ဆမာနော,ဧကော စရေ ခဂ္ဂဝိသာဏ ကပ္ပော.

၈၄.

ဝံသော [Pg.337] ဝိသာလောယထာ ဝိသတ္တော,ပုတ္တေသု ဒါရေသုစ ယာအပေက္ခာ;

ဝံသကဠိရောဝ အသဇ္ဇမာနော,ဧကော စရေ ခဂ္ဂဝိသာဏ ကပ္ပော.

၈၅.

ကာမံ [Pg.338] ကာမယ မာနဿ, တဿစေတံ သမိဇ္ဈတိ;

အဒ္ဓါ ပီတိမနော ဟောတိ, မစ္စော လဒ္ဓါ ယဒိစ္ဆတိ.

၈၆.

တဿစေ ကာမယာနဿ, ဆန္ဒဇာတဿ ဇန္တုနော;

တေကာမာ ပရိဟာယန္တိ, သလ္လဝိဒ္ဓေါဝ ရုပ္ပတိ.

၈၇.

ယောကာမေ [Pg.339] ပရိဝဇ္ဇေတိ, သပ္ပဿေဝ ပဒါ သိရော;

သောမံ ဝိသတ္တိကံ လောကေ, သတော သမတိဝတ္တတိ.

၈၈.

ခေတ္တံ ဝတ္ထုံ တဠာကံဝါ, ဂဝဿံ ဒါသပေါရိသံ;

ထိယော ဗန္ဓူ ပုထုကာမေ, ယောနရော အနုဂိဇ္ဈတိ.

၈၉.

အဗလာ နံ ဗလီယန္တိ, မဒ္ဒန္တေနံ ပရိဿယာ;

တတောနံ ဒုက္ခမနွေတိ, နာဝံ ဘိန္န မိဝေါဒကံ.

၉၀.

တသ္မာဇန္တု [Pg.340] သဒါသတော, ကာမာနိ ပရိဝဇ္ဇယေ;

တေ ပဟာယ တရေ ဩဃံ, နာဝံ သိတွာဝ ပါရဂူ.

၉၁.

ကာမတော [Pg.341] ဇာယတေ သောကော,ကာမတော ဇာယတေ ဘယံ;

ကာမတော ဝိပ္ပမုတ္တဿ,နတ္ထိ သောကော ကုတော ဘယံ.

၉၂.

သုဘာနုပဿိံ [Pg.342] ဝိဟရန္တံ, ဣန္ဒြိယေသု အသံဝုတံ;

ဘောဇနမှိ အမတ္တညုံ, ကုသိတံ ဟီန ဝီရိယံ;

တံဝေ ပသဟတိ မာရော, ဝါတော ရုက္ခံဝ ဒုဗ္ဗလံ.

၉၃.

အသုဘာနုပဿိံ ဝိဟရန္တံ, ဣန္ဒြိယေသု သုသံဝုတံ;

ဘောဇနမှိစ မတ္တညုံ, သဒ္ဓံ အာရဒ္ဓ ဝီရိယံ;

တံဝေ နပ္ပသဟတိ မာရော, ဝါတော သေလံဝ ပဗ္ဗတံ.

၉၄.

ယထာ [Pg.343] အဂါရံ ဒုစ္ဆန္နံ, ဝုဋ္ဌိ သမတိ ဝိဇ္ဈတိ;

ဧဝံ အဘာဝိတံ စိတ္တံ, ရာဂေါ သမတိဝိဇ္ဈတိ.

၉၅.

တဒေဝံ [Pg.344] ပစ္စဝေက္ခန္တိ, ယေ တေ ရာဂဂ္ဂိဒုဗ္ဗလာ;

ပတိဋ္ဌံ သာသနေ လဒ္ဓါ, နုက္ကဏ္ဌာ နလသာ ရတာ.

၉၆.

ဗုဒ္ဓါဝါဒံ [Pg.345] လဘိတွာပိ, နာဟံသက္ကာ နဝေါမှိတိ;

ဒေါသံ တဏှံ အနာသေန္တော, ပရိပက္ကော ကဒါဘဝေ;

ပုညကမ္မံ အကရောန္တော, ပရဝဇ္ဇံ အခမန္တော.

၉၇.

ကာယ သင်္ခါရိကာ တဏှာ, နီစာနီစကရာစ သာ;

စိတ္တသင်္ခါရိကာ သဒ္ဓါ, ဥစ္စာ ဥစ္စကရာစ သာ.

၉၈.

ဒဿနီယေ [Pg.346] ရတာ တဏှာ, သဒ္ဓါသွာစာရဘတ္တိကာ;

ဝိကိဏ္ဏစာရိကာ တဏှာ, သဒ္ဓါ ဝိသဒစာရိနီ.

၉၉.

မနောကိလေသိကာ တဏှာ, သာနုဂါနန္တ ဒုက္ခဒါ;

စိတ္တပ္ပသာဒိကာ သဒ္ဓါ, အတ္တာနုဂ သုခါဝဟာ.

၁၀၀.

တဏှာ [Pg.347] သဒ္ဓါန မိစ္စေဝံ, ဝိသေသံ ဇာန တတွတော;

ဉတွာ တဏှံ ဝိနာသေယျ, သဒ္ဓံဘာဝေယျ စေတသိ.

၁၀၁.

ဥစ္ဆုကံ ယန္တပတ္တမ္ပိ, သဉ္စုဏ္ဏိတမ္ပိ စန္ဒနံ;

မဓုရံဝ သုဂန္ဓံဝ, မေတ္တိဝ ဟိံသိတောပိ သံ.

၁၀၂.

အတ္တစ္ဆေဒမ္ပိ [Pg.348] ဝါသေတိ, သုဂန္ဓေနိဝ စန္ဒနံ;

သန္တော မေတ္တာသုဂန္ဓေန, အတ္တဟိံသမ္ပိ ဝါသယေ.

၁၀၃.

ကဒါစိပိ န ဒုဂ္ဂန္ဓိ, သုက္ခံ စုဏ္ဏမ္ပိ စန္ဒနံ;

တထေဝ ဒုက္ခပတ္တောပိ, န သန္တော ပါပကာရကော.

၁၀၄.

ခမေ [Pg.349] ဝဇ္ဇံ ကရေယျတ္ထံ, ဗုဒ္ဓခန္တိ မနုဿရံ;

မေတ္တာတိန္တေန ဝေရီပိ, နုပနာဟော သိယတ္တနိ.

၁၀၅.

နဂစ္ဆတိ တ မက္ကောသော, မမေဝါ နတ္ထကာရကော;

ဣတိ ဉတွာဝ သပ္ပညော, နေဝ က္ကောသေယျ ကိဉ္စနံ.

၁၀၆.

အက္ကောသော [Pg.350] မံ နအာဂစ္ဆေ,တဿေဝါ နတ္ထကာရကော;

ဣတိ ဉတွာ တိတိက္ခေယျ,န ပစ္စက္ကောသနံ ကရေ.

၁၀၇.

အက္ကောသက နယံ ဂဏှိ,ပစ္စက္ကောသော န သော ဝရော;

ဗုဓော တံ နာနုဂါဟေယျ,မာ သောဝ ပါပိယော ဘဝေ.

၁၀၈.

တဏှာဝိဇ္ဇာစ [Pg.351] မူလာဒွေ, သံသာရဝိသပါဒပေ;

သဗ္ဘတ္တိ သဒ္ဓမ္မဿုတံ, ဒွေယေဝ မဓုရာ ဖလာ.

၁၀၉.

သောဓေ စိတ္တ မုပက္ကမ္မ, သုဒ္ဓံ ဥပက္ကမေန တံ;

ဝဟေ သုခံ အသင်္ခေယျံ, ဒုက္ခံ အသောဓိတံ မလိ.

၁၁၀.

သောဓိတံ [Pg.352] သုဂတိံနေတိ, ဒုဂ္ဂတိံဝ အသောဓိတံ;

စိတ္တံ သောဓေတု မာလိမ္ပေ, ရာဂဒေါသ မလေဟိ တံ.

၁၁၁.

ဒေါသေဇာ နာသိတာ ယေန,သာသနေဝတ္ထိ သောနယော;

နတ္ထညတ္ထ တမာဒါယ,ဗုဓော နာသေတု တံဒွယံ.

၁၁၂.

ရနကုနဝါသိ [Pg.353] ကတာဝါသေ, ဒဂုံစေတီ ပုရတ္ထိမေ;

ဝသတာ အဂ္ဂဓမ္မေန, ထေရေန ရစိတော အယန္တိ.