နမော တဿ ဘဂဝတော အရဟတော သမ္မာသမ္ဗုဒ္ဓဿ

မဟာရဟနီတိ

ပဏ္ဍိတကထာ

၁.

မဟာရဟရဟံ [Pg.1] သကျ,မုနိံ နီဝရဏာ တဏှာ;

မုတ္တံ မုတ္တံ သုဒဿနံ,ဝန္ဒေ ဗောဓိဝရံ ဝရံ.

၂.

မုနိနာ [Pg.2] မုနိနာဂေန,ဒုဋ္ဌပဗ္ဗဇ္ဇိတာ ဇိတာ;

ယထာ ယထာအသဒ္ဓမ္မ-ပုရဏာ ပုရဏာဒယော.

၃.

တထာ တထာဂတောဝါဒါ,နုဂတေ လောကနီတိယံ;

ကတယောဂေန ဝိဒူနာ,ဇေယျောဝါနတ္ထ ကာရိနော.

၄.

နိတီဓ [Pg.3] ဇန္တုနံ သာရော,မိတ္တာစရိယာစ ပီတရာ;

နီတိမာ သုဗုဒ္ဓိ ဗျတ္တော,သုတဝါ အတ္ထဒဿိမာ.

၅.

ကဝိဟေရညကာ ကတွာ,သုတ္တတ္တံ သတ္ထကဉ္စနံ;

ဂဇ္ဇပဇ္ဇာဒျာလင်္ကာရံ,ကရောန္တီဓ မနောရမ္မံ.

၆.

ဝုတျံ [Pg.4] ဝိသဒဉာဏဿ,ဉာတော အတ္ထောတရဿ န;

သုရပ္ပဘာယ အာဒါသော,ဆာယံ ဒိဿေ န မာကရေ.

၇.

မဟာတေဇောပိ တေဇောယံ,မတ္တိကံ နမုဒုကံကရော;

အာပေါ အာပေတိ မုဒုကံ,သာဓုဝါစာစ ကက္ခဠံ.

၈.

မုဒုနာဝ [Pg.5] ရိပုံ ဇေတိ,မုဒုနာ ဇေတိ ဒါရုဏံ;

နောသိဒ္ဓံ မုဒုနာ ကိဉ္စိ,ယတွတော မုဒုနာ ဇယေ.

၉.

စန္ဒနံ သီတလံ လောကေ,တတော စန္ဒံဝ သီတလံ;

စန္ဒနစန္ဒသီတမှာ,ဝါကျံ သာဓုသုဘာသိတံ.

၁၀.

ပတ္တကလ္လောဒိတံ [Pg.6] အပ္ပံ,ဝါကျံ သုဘာသိတံ ဘဝေ;

ခုဒ္ဒိတဿ ကဒန္နံပိ,သုတ္တံ သာဒုရသော သိယာ.

၁၁.

သတ္ထကာပိ ဗဟူဝါစာ,နာဒရာ ဗဟုဘာဏိနော;

သောပကာရမုဒါသီနံ,နနုဒိဋ္ဌံ နဒီဇလံ.

၁၂.

သံသာရဝိသရုက္ခဿ[Pg.7],ဒွယမေဝါမတံဖလံ;

သုဘာသိတဿသာရာဒေါ,သာဓူဟိရသမာဂမော.

၁၃.

ပါသာဏဆတ္တံ ဂရုကံ,တတော ဒေဝါနစိက္ခနာ;

တတော ဝုဍ္ဎာနမောဝါဒေါ,တတော ဗုဒ္ဓဿ သာသနံ;

၁၄.

တုလံ [Pg.8] သလ္လဟုကံ လောကေ,တတော စပလဇာတိကော;

တတောနောဝါဒိကော တတော,ယတိ ဓမ္မေပမာဒကော.

၁၅.

အဟ ဂစ္ဆတိ ဟာယန္တီ,သတ္တာနမိဓ ဇီဝိတံ;

တသ္မာဟိ မာပမတ္တတွံ,ဂစ္ဆန္တု ဇိနသာသနေ.

၁၆.

ပဏ္ဍိတဿ ပသံသာယ,ဒဏ္ဍောဗာလေန ဒီယတေ;

ပဏ္ဍိတော ပဏ္ဍိတေနေဝ,ဝဏ္ဏိတောဝ သုဝဏ္ဏိတော.

၁၇.

သတေသု [Pg.9] ဇာယတေ သူရော,သဟဿေသုစ ပဏ္ဍိတော;

ဝုတ္တာ သတသဟဿေသု,ဒါတာ ဘဝတိဝါ နဝါ.

၁၈.

ဘူပတ္တံစ ပဏ္ဍိတတ္တဉ္စ,နေဝတုလျံ ကဒါစိပိ;

သဒေသေပူဇိတော ရာဇာ,ဗုဒ္ဓေါ သဗ္ဗတ္ထပူဇိတော.

၁၉.

ကွာတိဘာရော [Pg.10] သမတ္ထာနံ,ကိံဒူရော ဗျဝဟာရိနံ;

ကောဝိဒေသော သဝိဇ္ဇာနံ,ကောပရော ပိယဝါဒိနံ.

၂၀.

နနု တေ ယေဝသန္တာ နော,သာဂရာ နကုလာစလာ;

အပ္ပမ္ပိ မရိယာဒံ ယေ,သံဝဋ္ဋေဝိ ဇဟန္တိနော.

၂၁.

ပလယေတီတမရိယာဒါ[Pg.11],ဘဝန္တိကိရ သာဂရာ;

မရိယာဒါတိကံ သာဓု,နဣစ္ဆန္တိ ပလယေပိ.

၂၂.

သတံ ဒီဃာယုကံ သဗ္ဗ,သတ္တာနံ သုခကာရဏံ;

အသတံပန သဗ္ဗေသံ,ဒုက္ခဟေတု နသံသယော.

၂၃.

ပါမောက္ခေ [Pg.12] သုဇနေ သန္တေ,သဗ္ဗေပိ သုဇနာ ဇနာ;

ဇာတေကသ္မိံသာရဂန္ဓေ,သဗ္ဗေ ဂန္ဓမယာ ဒုမာ.

၂၄.

အတ္တနာ ယဒိ ဧကေန,ဝိနတေန မဟာဇနာ;

ဝိနယံ ယန္တိ သဗ္ဗေပိ,ကော တံ နာသေယျ ပဏ္ဍိတော.

၂၅.

သရီရဿ [Pg.13] ဂုဏာနဉ္စ,ဒူရမစ္စန္တ မန္တရံ;

သရီရံ ခဏဝိဒ္ဓံသိ,ကပ္ပန္တိဋ္ဌာယိနော ဂုဏာ.

၂၆.

ယဒိ နိစ္စမနိစ္စေန,နိမလံ မလဝါဟိနာ;

ယော သော ကာယေန လဘေထ,ကိံနလဒ္ဓံ ဘဝေ နုကိံ.

၂၇.

ဓမ္မတ္ထကာမမောက္ခာနံ,ပါဏံ သံသိဒ္ဓိကာရဏံ;

တန္နိဃာတာ ကိန္နဟတံ,ရက္ခနာ ကိန္နရက္ခိတံ.

၂၈.

အတ္တာ [Pg.14] ဗန္ဓု မနုဿဿ,ရိပု အတ္တာဝ ဇန္တုနံ;

အတ္တာဝ နိယတော ဉာတိ,အတ္တာဝ နိယတော ရိပု.

၂၉.

အတ္တနောပရိစာဂေန,ယံသိတမနုရက္ခနံ;

ကရောန္တိ သဇ္ဇနာယေဝ,န တံ နီတိမတာ မတံ.

၃၀.

တိဏာနိ [Pg.15] ဘူမိရုဒကံ,စတုတ္ထီ ဝါကျသုဋ္ဌုတာ;

ဧတာနိ ဟိ သတံဂေဟေ,နောဆိန္ဒန္တေ ကဒါစိပိ.

၃၁.

အမ္ဗုံ ပိဝန္တိနော နဇ္ဇော,ရုက္ခော ခါဒတိနော ဖလံ;

မေဃော ကွစိပိ နော သဿံ,ပရတ္ထာယ သတံဓနံ.

၃၂.

သတံ ဖရုသဝါစာဟိ,နယာတိ ဝိကတိံ မနော;

တိဏုက္ကာဟိ နသက္ကာဝ,တာပေတုံ သာဂရေ ဇလံ.

၃၃.

သမ္ပတျံ [Pg.16] မဟတ္တံစေတော,ဘဝတျုပ္ပလကောမလံ;

ဝိပ္ပတျဉ္စ မဟာသေလေ,သိလာသံဃာဒကက္ကသော.

၃၄.

အတ္ထံ မဟန္တမာပဇ္ဇ,ဝိဇ္ဇံ သမ္ပတ္တိမေဝစ;

စရေယျာမာနထဒ္ဓေါယော,ပဏ္ဍိတော သော ပဝုစ္စတိ.

၃၅.

နာလဗ္ဘမဘိပတ္ထေန္တိ[Pg.17],နဋ္ဌမ္ပိ နစသောစရေ;

ဝိပ္ပတျဉ္စ နမုယှန္တိ,ယေနရာ တေဝ ပဏ္ဍိတော.

၃၆.

ဂဏ္ဌိဋ္ဌာနေ ဧကပဒေ,နာတိမညေယျ ပဏ္ဍိတော;

ကိံ အက္ကော ဝေဠုပဗ္ဘာရော,တိမဟာဒီပဘာနုဒေါ.

၃၇.

ဂုဏဒေါသေသုမေကေန,နတ္ထိ ကောစိ ဝိဝဇ္ဇိတော;

သုခုမာလဿ ပဒုမဿ,နဠာ ဘဝတိ ကက္ကသာ.

၃၈.

သုမဟန္တာနိ [Pg.18] သတ္ထာနိ,ဓာရယန္တော ဗဟုဿုတာ;

ဆေတ္တာရော သံသယာနန္တု,ကိလန္တေ လောဘမောဟတာ.

၃၉.

ဒေါသမ္ပိ သဂုဏေ ဒိသွာ,ဂုဏဝါဒီ ဝဒန္တိနော;

န လောကော ဝိဇ္ဇမာနမ္ပိ,စန္ဒေ ပဿတိ လဉ္ဆနံ.

၄၀.

နိပုဏေ [Pg.19] သုတမေသေယျ,ဝိစိနိတွာ သုတတ္ထိကော;

ဘတ္တံ ဟုက္ခလိယံ ပက္ကံ,ဘာဇနံပိ တထာ ဘဝေ.

၄၁.

ဂုဏာ ကုဗ္ဗန္တိ ဒူတတ္တံ,ဒူရေပိ ဝသတံ သတံ;

ကေတကေ ဂန္ဓ ဃာသာယ,ဂစ္ဆန္တိ ဘမရာ သယံ.

၄၂.

ပဏ္ဍိတော သုတသမ္ပန္နော,ယတ္ထအတ္ထီတိ စေသုတော;

မဟုဿာဟေန တံဌာနံ,ဂန္တဗ္ဗံ သုတရေသိနာ.

၄၃.

သဗ္ဗသုတံ [Pg.20] မဓီယေထ,ဟီနမုက္ကဋ္ဌ မဇ္ဈိမံ;

သဗ္ဗဿအတ္ထံ ဇာနေယျ,နစ သဗ္ဗံ ပယောဇယေ;

ဟောတိ တာဒိသကောကာလော,ယတ္ထ အတ္ထာဝဟံ သုတံ.

၄၄.

ဌိတော စိရတ္တနံ နီရေ,သက္ခရော နန္တရံသုတော;

ဒဗ္ဘော နီရန္တိကေ ဇာတော,သဗ္ဗကာလန္တရံသုတော.

၄၅.

ဝသုံ [Pg.21] ဂဏှန္တိ ဒူရဋ္ဌာ,ပဗ္ဗတေ ရတနောစိတေ;

န မိလက္ခာ သမီပဋ္ဌာ,ဧဝံ ဗာလာ ဗဟုဿုတေ.

၄၆.

ဟိရညေန မိဂါနံဝ,သုသီလံပိ အသီလိနော;

အဓမ္မိကဿ ဓမ္မေန,ဗာလာနံပိ သုတေန ကိံ.

၄၇.

သုတေန [Pg.22] ဟဒယဋ္ဌေန,ခလော နေဝသုသီလဝါ;

မဓုနာ ကောဋရဋ္ဌေန,နိမ္ဗော ကိံ မဓုရာယတေ.

၄၈.

သကိံပိ ဝိညု ဓီရေန,ကရောတိ သဟသင်္ဂမံ;

အတ္တတ္ထဉ္စ ပရတ္ထဉ္စ,နိဗ္ဗာနန္တံ သုခံ လဘေ.

၄၉.

ဟံသော မဇ္ဈေ နကာကာနံ,သီဟော ဂုန္နံ နသောဘတိ;

ဂဒြဘာနံ တုရင်္ဂေါနော,ဗာလာနဉ္စ နပဏ္ဍိတော.

၅၀.

အာကိဏ္ဏောပိ [Pg.23] အသဗ္ဘီဝ,အသံသဋ္ဌောဝ ဘဒ္ဒကော;

ဗဟုနာ သန္နဇာတေန,ဂစ္ဆေ နုမ္မတ္တကေနိဓ.

၅၁.

နဒီတိရေ ခတေကူပေ,အရဏီတာလဝဏ္ဋကေ;

နဝဒေ အာပါဒိ နတ္ထီတိ,မုခေစ ဝစနံ တထာ.

၅၂.

သုတသန္နိစ္စယာ [Pg.24] ဓီရာ,တုဏှိဘူတာ အပုစ္ဆိတာ;

ပုဏ္ဏာ သုဘာသိတေနာပိ,ဃဏ္ဍာဒျဃဋိတာယထာ.

၅၃.

အပုဋ္ဌော ပဏ္ဍိတော ဘေရီ,ပဇ္ဇုန္နော ဟောတိ ပုစ္ဆိတော;

ဗာလော ပုဋ္ဌော အပုဋ္ဌောစ,ဗဟုံ ဝိကတ္တတေ သဒါ.

၅၄.

သမ္ပန္နဂုဏာ လင်္ကာရော,သဗ္ဗသတ္တ ဟိတာဝဟော;

နစရေယျ ပရတ္တတ္ထံ,ကုတော သော ပဏ္ဍိတော ဘဝေ.

၅၅.

သပရတ္ထံ [Pg.25] စရေ ဓီရော,အသက္ကောန္တော သကံ စရေ;

တထာပိစ အသက္ကောန္တော,ပါပါတ္တာနံ ဝိယောဇယေ.

၅၆.

ဗာလေစုမ္မတ္တကေ ဘူပေ,ဂုရုမာတာပိတူသွပိ;

နဒေါသံ ကရိယာ ပညော,သံဃေစ ဇေဋ္ဌဘာတရိ.

၅၇.

အတ္ထနာသံ [Pg.26] မနောတာပံ,ဃရေဒုစ္စရိတာနိစ;

ဝဉ္စနံ အဝမာနဉ္စ,မတိမာ နပကာသယေ.

၅၈.

ပရဒါနံ ဇနေတ္တီဝ,လေဋ္ဋုဝ ပရဒဗ္ဗကံ;

အတ္တာဝ သဗ္ဗဘူတာနိ,ယော ပဿတိ သော ပဿတိ.

၅၉.

ပရူပဝါဒေ ပဓိရော,ပရဝဇ္ဇေသွလောစနော;

ပင်္ဂုလော အညနာရီသု,ဒုဿကပ္ပေသွစေတနော.

၆၀.

သဗ္ဗံ သုဏာတိ သောတေန,သဗ္ဗံ ပဿတိ စက္ခုနာ;

နစဒိဋ္ဌံ သုတံ ဓီရော,သဗ္ဗံ ဥစ္စိတုမရဟတိ.

၆၁.

စက္ခုမဿ ယထာအန္ဓော,သောတဝါ ပဓိရောယထာ;

ပညာဝါဿ ယထာမူဂေါ,ဗလဝါ ဒုဗ္ဗလောရိဝ;

အထ အတ္ထေသမုပ္ပန္နေ,သယေထ မတသာယိတံ.

၆၂.

ပါပမိတ္တေ [Pg.28] ဝိဝဇ္ဇေတွာ,ဘဇေယျု တ္တမပုဂ္ဂလံ;

ဩဝါဒေစဿ တိဋ္ဌေယျ,ပတ္ထေန္တော အစလံသုခံ.

၆၃.

သုသုသာ သုတဝဍ္ဎနံ,သုတံ ပညာယဝဍ္ဎနံ;

ပညာယ အတ္ထံ ဇာနာတိ,ဉာတော အတ္ထော သုခါဝဟော.

၆၄.

ပါမောဇ္ဇ [Pg.29] ကရဏံ ဌာနံ,ပသံသာဝဟနံသုခံ;

ဖလာနိသံသော ဘာဝေတိ,ဝဟန္တော ပေါရိဿံဓုရံ.

၆၅.

အတိသီတံ အတိဥဏှံ,အတိသာယ မိဒံအဟု;

ဣတိ ဝိသဋ္ဌ ကမ္မန္တေ,ခဏာ အစ္စန္တိ မာဏဝေ.

၆၆.

ယောစ [Pg.30] သီတဉ္စ ဥဏှဉ္စ,တိဏာတိယော နမညတိ;

ကရံ ပုရိသ ကိစ္စာနိ,သော သုခါ နဝိဟာယတိ.

၆၇.

ယသလာဘံ ဇိဂီသန္တံ,နရံ ဝဇ္ဇေန္တိ ဒူရတော;

အပတ္ထေတွာန တေ တသ္မာ,တံမဂ္ဂံ မဂ္ဂယေ ဗုဓော.

၆၈.

ဒေသမောသဇ္ဇ ဂစ္ဆန္တိ,သီဟာ သပ္ပုရိသာ ဂဇာ;

တတ္ထေဝ နိဓနံ ယန္တိ,ကာကာ ကာပုရိသာ မိဂါ.

၆၉.

ယသ္မိံဒေသေ [Pg.31] နသမ္မာရော,နပိတိ နစဗန္ဓဝါ;

နစဝိဇ္ဇာဂမော ကောစိ,နတတ္ထ ဝသတီ ဝဿေ.

၇၀.

ဓနဝါ ဂဏကော ရာဇာ,နဒီ ဝေဇ္ဇာ ဣမေဇနာ;

ယတ္ထ ပဉ္စ နဝိဇ္ဇန္တေ,န တတ္ထဝသတီ ဝသေ.

၇၁.

အသနံ [Pg.32] ဘယမန္တာနံ,မစ္စာနံ မရဏံ ဘယံ;

ဥတ္တမာနန္တုသဗ္ဗေသံ,အဝမာနံ ပရံ ဘယံ.

၇၂.

အမာနနာ ယတ္ထ သိယာ,သန္တာနံ အဝမာနနာ;

ဟီနသမာနနာဝါပိ,န တတ္ထဝသတိ ဝသေ.

၇၃.

ယတ္ထာလသောစ ဒက္ခောစ,သူရော ဘီရုစ ပူဇိတော;

န သန္တာ တတ္ထ ဝဿန္တိ,အဝိသေသကရေန ကော.

၇၄.

ဒုက္ခော [Pg.33] နိဝါသော သမ္ဗာဓေ,ဌာနေ အသုစိသင်္ကဋေ;

တတော ရိမှိပိယာနန္တေ,တတောစ အကတညုနံ.

၇၅.

သိင်္ဂီနံ ပဉ္စဟတ္ထေန,သတေန ဝါဇိနံ စဇေ;

ဟတ္ထီနန္တု သဟဿေန,ဒေသစာဂေန ဒုဇ္ဇနေ.

၇၆.

စဇေ [Pg.34] ဧကံ ကုလဿတ္ထံ,ဂါမဿတ္ထံ ကုလံ စဇေ;

ဂါမံ ဇနပဒဿတ္ထံ;

အတ္တတ္ထံ ပထဝီ စဇေ.

၇၇.

စလတျေကေနပါဒေန,တိဋ္ဌတျေကေန ပဏ္ဍိတော;

အသမိချပရံဌာနံ,ပုဗ္ဗမာယနံနစဇေ.

၇၈.

ဌာနဘဋ္ဌာ [Pg.35] နသောဘန္တိ,ဒန္တာကေသာန ခါနရာ;

မတိမာ ဣတိဝိညာယ,သဌာနံ နစဇေ လဟုံ.

၇၉.

စဇေ ဓနံ အင်္ဂဝရဿဟေတု,အင်္ဂံ စဇေ ဇိဝိတံ ရက္ခမာနော;

အင်္ဂံ ဓနံ ဇိဝိတဉ္စာပိ သဗ္ဗံ,စဇေ နရော ဓမ္မ မနုဿရန္တော.

၈၀.

သောတံ [Pg.36] သုတေနေဝ န ကုဏ္ဍလေန,ဒါနေန ပါဏီ နတု ကင်္ကဏေန;

အာဘာတိ ကာယော ပုရိသုတ္တမဿ,ပရောပကာရေန န စန္ဒနေန.

သမ္ဘေဒကထာ

၈၁.

သတ္ထ [Pg.37] ကပ္ပဝိစာရေန,ကာလော ဂစ္ဆတိ ဓီမတံ;

ဗျသနေန အသာဓူနံ,နိဒ္ဒါယ ကလဟေနဝါ.

၈၂.

သောကဌာနသဟဿာနိ,ဘယဌာနသတာနိစ;

ဒိဝသေဒိဝသေ မုဠှံ,အာဝီသန္တိ နပဏ္ဍိတံ.

၈၃.

အတိဒီဃော [Pg.38] မဟာမုဠှော,မဇ္ဈိမောစ ဝိစက္ခဏော;

ဝါသုဒေဝံ ပုရက္ခိတွာ,သဗ္ဗေဝါမနကာ သဋ္ဌာ.

၈၄.

န လောကေ သောဘတေ မုဠှော,ကေဝလတ္တပသံသကော;

အပိ သမ္ပိဟိတေ ကူပေ,ကတဝိဇ္ဇော ပကာသတေ.

၈၅.

မဒန္တဒမနံ သတ္ထံ,ခလာနံ ကုရုတေ မဒံ;

စက္ခုသင်္ခါရကံ တေဇံ,ဥလုင်္ကာန မိဝန္ဓကံ.

၈၆.

အတျပ္ပမပိ [Pg.39] သာဓူနံ,သိလာလေခေဝ တိဋ္ဌတေ;

ဇလေလေခေဝ နီစာနံ,ယံ ကတံ တံပိ နဿတိ.

၈၇.

ဒဗ္ဗမပ္ပံပိ သာဓူနံ,ဇလံ ကူပေဝ နိဿယော;

ဗဟုတ္တံပိ အသာဓူနံ,နစ ဝါရိဝ အဏ္ဏဝေ.

၈၈.

ဒုဋ္ဌစိတ္တော [Pg.40] ပနာဟိဿ,ကောဓော ပါသာဏလိက္ခိတော;

ကုဇ္ဈိတဗ္ဗေ သုဇနဿ,ဇလေလေခါ စိရဋ္ဌိတော.

၈၉.

ဗာလဿ ဇီဝိတံ ပါပံ,မိတရဿိ တရံ ဘဝေ;

ဇနကာယဿ ရာဇာဝ,ရာဇဓမ္မောဝ ရာဇုနံ.

၉၀.

သပ္ပာဒါနံ ဗလီ သီဟော,ပုဠာဝကော တတော ကိပ္ပီလိကာ,နရာ တတော ဗလီ ရာဇာ,သဗ္ဗေသ မန္တကော ဗလီ.

၉၁.

ဘူပေါဏ္ဏဝ [Pg.41] ဂ္ဂိ ထီ သိပ္ပိ,အဘိဇ္ဈာလုစပုဂ္ဂလော;

ဧတေသံပိ မဟိစ္ဆာနံ,မဟိစ္ဆိတာ အနိစ္စတာ.

၉၂.

နိဒ္ဒါလုကော အသန္တုဋ္ဌော,အကတညူစ ဘီရုကော;

သက္ကုဏန္တိန သာစာရံ,သိက္ခိတုံ တေ ကဒါစိပိ.

၉၃.

နိဒ္ဒါလု [Pg.42] ကာမရာမောစ,သုခိတော ဘောဂဝါလသော;

နိစ္ဆန္တော ကမ္မရာမော စ,သတ္တေတေ သတ္ထဝဇ္ဇိတာ.

၉၄.

သမိဒ္ဓေါ ဓနဓညေန,ကဋ္ဌော ဒကတိဏဂ္ဂိဟိ;

သဗ္ဗတော ဒုဂ္ဂတေနဋ္ဌော,တသ္မာ နဒုက္ကတံ ကရေ.

၉၅.

ပုညပါပဖလံ [Pg.43] ယော စေ,နသဒ္ဓဟတိ သစ္စတော;

သော ဝေ ခိပ္ပံဝ အတ္တာနံ,အာဒါသတလမာနယေ.

၉၆.

သမ္ပရာယိကမတ္ထံ ယော,နသဒ္ဓဟတိ စေပိသော;

အာဝါသေ သဂ္ဂ ဂါမီနံ,မာက္ကဘေ ကိံနပဿတိ.

၉၇.

မဟန္တံ ဝဋ္ဋရုက္ခာဒိံ,ခုဒ္ဒဗီဇံ ဗဟူဖလံ;

သက္ခိကတွာ ဥဒိက္ခေယျ,ပုညပါပကရော နရော.

၉၈.

ယဿ [Pg.44] သလ္လဟုကံ ဟောတိ,ဂုရုသက္ကာရမာနနံ;

တဿ သလ္လဟုကာယေဝ,ဝိဇ္ဇာသမ္ပတ္တိသမ္ပဒါ.

၉၉.

ဥပဇ္ဈာစရိယာနဉ္စ,မာတာပိတူနမေဝစ;

သက္ကစ္စံ ယောနုပဋ္ဌာတိ,သုတော တဿပိတာဒိသော.

၁၀၀.

ဒေသေ ဒေသေ ကုလာနီစ,ဒေသေဒေသေ စ ဗန္ဓဝေါ;

တာဒိသံ သဟဇာ ယတ္ထ,ဒေသံ ပဿာမိနေဝတု.

၁၀၁.

ပုတ္တံဝါ [Pg.45] ဘာတရံ ဒုဋ္ဌံ,အနုသာသေယျ နောဇဟေ;

ကိံနု ဆေဇ္ဇံ ကရံပါဒံ,လိတ္တံ အသုစိနာ သိယာ;

၁၀၂.

ဗဟုပုတ္တေ ပိတာဧကော,အဝဿံ ပေါသေတိ သဒါ;

ဗဟုပုတ္တာ နသက္ကောန္တိ,ပေါသေတုံ ပိတရေကကံ.

၁၀၃.

အတိဇာတမနုဇာတံ[Pg.46],ပုတ္တမိစ္ဆန္တိ ပဏ္ဍိတာ;

အဝဇာတံ နဣစ္ဆန္တိ,ယောဟောတိ ကုလဂန္ဓနော.

၁၀၄.

ပဉ္စဌာနာနိ သမ္ပဿံ,ပုတ္တမိစ္ဆန္တိ ပဏ္ဍိတာ;

ဇာတောဝါ နော ဘရိဿတိ,ကိစ္စံဝါ နော ကရိဿတိ.

၁၀၅.

ကုလဝံသော [Pg.47] စိရံ တိဋ္ဌေ,ဒါယဇ္ဇံ ပဋိပစ္စတိ;

အထဝါပန ပေတာနံ,ဒက္ခိဏံနုပဒဿတိ.

၁၀၆.

အန္တောဇာတော ဓနက္ကီတော,ဒါသဗျောပဂတော သယံ;

ဒါသာကရမရာနီတော,စ္စေဝန္တေ စတုဓာ သိယုံ.

၁၀၇.

ဒါသာ ပဉ္စေဝ စောရယျ-သခဉာတျတ္တသဒိသာ;

တထာ ဝိညူဟိ ဝိညေယျာ,မိတ္တာဒါရာစ ဗန္ဓဝါ.

၁၀၈.

တယောဝ [Pg.48] ပဏ္ဍိတာ သတ္ထေ,အဟမေဝါတိဝါဒီစ,အဟမပိတိ ဝါဒီစ,နာဟန္တိစ ဣမေတယော.

၁၀၉.

ဝိနာ သတ္ထံ နဂစ္ဆေယျ,သူရော သင်္ကာမဘူမိယံ;

ပဏ္ဍိတဒ္ဓဂူ ဝါဏိဇ္ဇော,ဝိဒေသဂမနော တထာ.

၁၁၀.

သမ္မာ [Pg.49] ဥပပရိက္ခိတွာ,အက္ခရေသု ပဒေသုစ;

စောရဃာတော သိယာ သိဿော,ဂုရု စောရဋ္ဋကာရကော.

၁၁၁.

သာဓုတ္တံ သုဇနသမာဂမာ ခလာနံ,သာဓူနံ နခလသမာဂမာ ခလတ္တံ;

အာမောဒံကုသုမဘဝံဒဓာတိဘူမိ,ဘူဂန္ဓံ နစ ကုသုမာနိ ဓာရယန္တိ.

၁၁၂.

သဋ္ဌေန [Pg.50] မိတ္တံ ကလုသေန ဓမ္မံ,ပရောပတာပေန သမိဒ္ဓိဘာဝံ;

သုခေန ဝိဇ္ဇံ ဖရုသေန နာရိံ,ဣစ္ဆန္တိ ယေ တေ နဝပဏ္ဍိတာဝ.

မိတ္တကထာ

၁၁၃.

ကတွာန [Pg.51] ကုသလံကမ္မံ,ကတွာစာ ကုသလံ ပုရေ;

သုခိတဒုက္ခိတာ ဟောန္တိ,သော ဗာလော ယော နပဿတိ.

၁၁၄.

သယံကတေန ပါပေန,အနိဋ္ဌံ လဘတေ ဖလံ;

တေ မေ သော မေ ဇနေန္တီတိ,ပုနာဂုံ ကုရုတေ ဇဠော.

၁၁၅.

ကာလခေပေန [Pg.52] ဟာပေတိ,ဒါနသီလာဒိကံ ဇဠော;

အထိရမ္ပိ ထိရံ မညေ,အတ္တာနံ သဿတီသမံ.

၁၁၆.

ဗာလောဝ ပါပကံ ကတွာ,နတံဆဋ္ဋေတုမုဿဟေ;

ကိံ ဗျဂ္ဃတာဒိ ဂစ္ဆန္တော,ပဒံ မက္ခေတုမုဿဟေ.

၁၁၇.

ပရနဿနတော နဋ္ဌော,ပုရေဝ ပရနာသကော;

သီဃံဝါ ဒဿနံ ယာတိ,တိဏံ ပါသာဒဇ္ဈာပကံ.

၁၁၈.

ဘောဇနာ [Pg.53] မေထုနာ နိဒ္ဒါ,ဂဝေ ပေါသေစ ဝိဇ္ဇတိ;

ဝိဇ္ဇာ ဝိသေသော ပေါသဿ,တတောဟီနော ဂေါသမော ဘဝေ.

၁၁၉.

မုဠှသိဿော ပဒေသေန,ကုနာရီဘရဏေနစ;

ခလသတ္ထူဟိသံယောဂါ,ပဏ္ဍိတောပျဝသီဒတိ.

၁၂၀.

ဒွေစိမေကဏ္ဋကာ [Pg.54] တိက္ခာ,သရီရသောဘိတာ ကာမေ;

နိဓနော ယောစ ကာမေတိ,ယောစကုပ္ပတျနိဿာရော.

၁၂၁.

နိဓနောစာပိ ကာမေတိ,ဒုဗ္ဗလော ကလဟံပိယော;

မန္ဒသတ္ထော ဝိဝါဒတ္ထိ,တိဝိဓံ မုဠှလက္ခဏံ.

၁၂၂.

အပ္ပသုတော သုတေ အပ္ပေ,ဗဟုံမညတိ မာနဝေါ;

သိန္ဓုဒကမ ပဿန္တော,ကူပေတောယံဝ မဏ္ဍုကော.

၁၂၃.

တဒမိနာပိ [Pg.55] ဇာနာတိ,သောဗ္ဘေသု ပဒရေသုစ;

သုနန္တာ ယန္တိ ကုသုမ္ဘာ,တုဏှီယန္တိ မဟောဒဓိ.

၁၂၄.

ယံ ဦနကံ တံ သုနတိ,ယံ ပူရံ သန္တမေဝ တံ;

အဍ္ဎကုမ္ဘူပမော ဗာလော,ရဟတော ပူရောဝ ပဏ္ဍိတော.

၁၂၅.

ဗုဓေဟိဘာသမာနောပိ[Pg.56],ခလော ဗဟုတကေတဝေါ;

ဃံသိယမာနော အင်္ဂါရော,နိလမတ္တံ နဂစ္ဆတိ.

၁၂၆.

စာရုတာ ပရဒါရာယ,ဓနံ လောကတပ္ပတိယာ;

ပသုတံ သာဓုနာသာယ,ခလေ ခလတရာ ဂုဏာ.

၁၂၇.

ဣတော [Pg.57] ဟဿတရံ လောကေ,ကိဉ္စိ တဿ နဝိဇ္ဇတိ;

ဒုဇ္ဇနောတိစ ယံအာဟ,သဇ္ဇနံ ဒုဇ္ဇနော သယံ.

၁၂၈.

ရောဂဏ္ဍစင်္ကုရော တေဇော,ဝိသမဿတရော ဃဏော;

အဝိနာသိယ သမန္တိ,န ခလောစ သနိဿယံ.

၁၂၉.

နဝိနာ [Pg.58] ပရဝါဒေန,ရမန္တေ ဒုဇ္ဇနာ ခလု;

န သာ သဗ္ဗရသေ ဘုတွာ,ဝိနာ ဝစ္စေ နတုဿတိ.

၁၃၀.

တပ္ပတေ ယာတိ သန္ဓာနံ,ဒဝေါ ဘဝတိ ဝနတံ;

မုဒုံ ဒုဇ္ဇနစိတ္တံ ကိံ,လောဟေန ဥပမီယတေ.

၁၃၁.

တသ္မာ ဒုဇ္ဇနသံသဂ္ဂံ,အာသီဝိသ မိဝေါရဂံ;

အာရကာ ပရိဝဇ္ဇေယျ,ဘူတိကာမော ဝိစက္ခဏော.

၁၃၂.

ဒုဇ္ဇနေန [Pg.59] ဟိ သံသဂ္ဂေါ,သတ္တုတာပိ နယုဇ္ဇတေ;

တတ္တော ဒဟတိ အင်္ဂါရော,သန္တာတု ကာလတံကရော.

၁၃၃.

ဒုဇ္ဇနော ဝဇ္ဇနီယောဝ,ဝိဇ္ဇာယာလင်္ကတောပိ စေ;

မဏိနာ လင်္ကတော သန္တော,သပ္ပော ကိံ နဘယင်္ကရော.

၁၃၄.

အဂ္ဂိနော [Pg.60] ဒဟတော ဒါယံ,သခါဘဝတိ မာလုတော;

သောဝ ဒီပံတု နာသေတိ,ခလေ နတ္ထေဝ မိတ္တတာ.

၁၃၅.

နသ္မသေ ကတပါပမှိ,နသ္မသေ အလိကဝါဒိနိ;

နသ္မသေတ္တတ္ထပညမှိ,အတိသန္တေပိ နသ္မသေ.

၁၃၆.

မာရေတုံ ကိတ္တကာ သက္ကာ,ဒုဇ္ဇနာ ဂဂဏူပမာ;

မာရိတာ ကောဓစိတ္တေတု,မာရိတော ဟောန္တိ ဒုဇ္ဇနာ.

၁၃၇.

ဘူမိ [Pg.61] ကဏ္ဋကသံကိဏ္ဏာ,ဆာဒိတုံ နေဝသကျတေ;

ဥပါဟန မတ္တကေန,ဆန္နာ ဘဝတိ မေဒနီ.

၁၃၈.

သတ္တာ သဒါပသေဝန္တိ,သောဒကံ ဝါပိအာဒိကံ;

သဘောဂံ သဓနဉ္စေဝံ,တုစ္ဆာစေ တေ ဇဟန္တိ တေ.

၁၃၉.

ဓနဟီနံ [Pg.62] စဇေ မိတ္တော,ပုတ္တဒါရာ သဟောဒရာ;

အတ္ထဝန္တံဝ သေဝန္တိ,အတ္ထော လောကေ မဟာသခါ.

၁၄၀.

န ရူပိနီ န ပညာဏော,နကုလီနော ပဓာနတာ;

ကာလေ ဝိပတ္တိသမ္ပတ္တေ,ဓနိမာဝ ဝိသေသတာ.

၁၄၁.

ကလျာဏမိတ္တံ [Pg.63] ကန္တာရံ,ယုဒ္ဓံ သဘာယံ ဘာသိတုံ;

အသတ္ထာ ဂန္တု မိစ္ဆန္တိ,မုဠှာ တေစတုရောဇနာ.

၁၄၂.

အဟိတာ ပဋိသေဓောစ,ဟိတေသုစ ပယောဇနံ;

ဗျသနေသွ ပရိစ္စာဂေါ,သင်္ခေပါ မိတ္တလက္ခဏံ.

၁၄၃.

အာတုရေ ဗျသနေပတ္တေ,ဒုဗ္ဘိက္ခေ သတ္တု ဝိဂ္ဂဟေ;

ရာဇဒွါရေ သုသာနေစ,ယော တိဋ္ဌတိ သဗန္ဓဝေါ.

၁၄၄.

သော [Pg.64] ဗန္ဓု ယော ဟိတေယုတ္တော,သော ပိတာ ယော တု ပေါသကော;

သော ဉာတိ ယတြ ဝိသာသော,သာ ဘရိယာ ယတြ နိဗ္ဗူတိ.

၁၄၅.

ဟိတေသိနော သုမိတ္တောစ,ဝိညူစ ဒုလ္လဘာ ဇနာ;

ယထော သဓံစ သာဒုံစ,ရောဂဟာရီစ သုဇနော.

၁၄၆.

အဂရုကော [Pg.65] အနာလဿော,အသဋ္ဌောစ သစ္စဝါ သုစိ;

အလုဒ္ဓေါ အတ္ထကာမောစ,ဧဒိသော သုဟဒုတ္တမော.

၁၄၇.

ယော ဓုဝါနိ ပရိစ္စဇ္ဇ,အဓူဝါနျုပသေဝတိ;

ဓုဝါပိ တဿ နဿန္တိ,အဓုဝေသု ကထာဝကာ.

၁၄၈.

လုဒ္ဓမတ္ထေနဂဏှေယျ[Pg.66],ထဒ္ဓ မဉ္ဇလိကမ္မုနာ;

ဆန္ဒာနုဝတ္တိယာ မုဠှံ,ယထာဘူတေန ပဏ္ဍိတံ.

၁၄၉.

ဥတ္တမံ ပါဏိပါတေန,သူရံ ဘေဒေန ဝိဇယေ;

နိစံ ဒဗ္ဗပဒါနေန,ဝိက္ကမေန သမံ ဇယေ.

၁၅၀.

ယဿယဿ ဟိ ယောဘာဝေါ,တေနတေန ဟိ တံနရံ;

အနုပဝိဿ မေဓာဝီ,ခိပ္ပမတ္တဝသံ နယေ.

၁၅၁.

ယေန [Pg.67] ဣစ္ဆတိ သမ္ဗန္ဓံ,တေန တီဏိ နကာရယေ;

ဝိဝါဒ မတ္ထသမ္ဗန္ဓံ,ပရောက္ခေ ဒါရဒဿနံ.

၁၅၂.

အစ္စာဘိက္ခဏသံသဂ္ဂါ,အသမ္မောသရဏေနစ;

ဧတေန မိတ္တာ ဇီရန္တိ,အကာလေ ယာစနာယစ.

၁၅၃.

တသ္မာ [Pg.68] နာဘိက္ခဏံ ဂစ္ဆေ,နစဂစ္ဆေ စိရာစိရံ;

ကာလေန ယာစံ ယာစေယျ,ဧဝံ မိတ္တာ နဇီရယေ.

၁၅၄.

ဧတေ ဘိယျော သမံ ယန္တိ,သန္ဓိ တေသံ နဇီရတိ;

ယော အဓိပ္ပန္နံ သဟတိ,ယောစ ဇာနာတိ ဒေသနံ.

၁၅၅.

သစေ သန္တာ ဝိဝါဒန္တိ,ခိပ္ပံ သန္ဓိရယေ ပုန;

ဗာလာ ပတ္တာဝ ဘိဇ္ဇန္တိ,န တေ သမထမဇ္ဈဂုံ.

၁၅၆.

ယေနမိတ္တေန [Pg.69] သံသဂ္ဂေါ,ယောဂက္ခေမော ဝိဟီယတိ;

ပုဗ္ဗေဝ ဇ္ဈာဘဝန္တဿ,ရက္ခေ အက္ခိဝ ပဏ္ဍိတော.

၁၅၇.

ယေနမိတ္တေန သံသဂ္ဂါ,ယောဂက္ခေမော ပဝဍ္ဎတိ;

ကရေယျတ္တသမံ ဝုတ္တိ,သဗ္ဗကိစ္စေသု ပဏ္ဍိတော.

၁၅၈.

ဂုဏော [Pg.70] သဗ္ဗညုတုလျောပိ,သီဒတေ ကော အနိဿယော;

အနဂ္ဃ မပိမာဏိက္ကံ,ဟေမံ နိဿာယ သောဘတေ.

၁၅၉.

ပဗ္ဗေပဗ္ဗေ ကမေနုစ္ဆု,ဝိသေသရသိဝဂ္ဂတော;

တထာ သုမိတ္တိကော သာဓု,ဝိပရိတောဝ ဒုဇ္ဇနော.

၁၆၀.

တေနေဝ မုနိနာ ဝုတ္တံ,ယေကေစိလောကိယာဓမ္မာ;

တထာ နိဗ္ဗာနဂါမီနော,သန္တိ လောကုတ္တရာဓမ္မာ.

၁၆၁.

ကလျာဏမိတ္တ [Pg.71]၁ မာဂမ္မ,သဗ္ဗေ တေ ဟောန္တိ ပါဏိနံ;

တသ္မာ ကလျာဏမိတ္တေသု,ကာတဗ္ဗော အာဒရော သဒါ.

၁၆၂.

ယော ဝေ ကတညူ ကတဝေဒိကော ဓိရော,ကလျာဏမိတ္တော ဒဠှဘတ္တိစ ဟောတိ;

ဒုက္ခိတဿ သက္ကစ္စံ ကရေတိ ကိစ္စံ,တထာဝိဓံ သပ္ပုရိသာတိ ဝဒန္တိ.

၁၆၃.

ယဿဟိ [Pg.72] ဓမ္မံ ပုရိသော ဝိဇညာ,ယေစဿ ကင်္ခံ ဝိနယန္တိ သန္တော;

တဉှိဿ ဒီပဉ္စ ပရာယနဉ္စ,န တေန မိတ္တံ ဇိရယေထ ပညော.

နာယကကထာ

၁၆၄.

ကဿကော [Pg.73] ဝါဏိဇောမစ္စော,သမဏော သုတသီလဝါ;

တေသု ဝိပုလဇာတေသု,ရဋ္ဌံပိ ဝိပုလံ သိယာ.

၁၆၅.

တေသု ဒုဗ္ဗလဇာတေသု,ရဋ္ဌံပိ ဒုဗ္ဗလံ သိယာ;

တသ္မာ ရဋ္ဌံပိ ဝိပုလံ,ဓာရယေ ရဋ္ဌသာရဝါ.

၁၆၆.

မဟာရုက္ခဿ [Pg.74] ဖလိနော,အာမံ ဆိန္ဒတိ ယော ဖလံ;

ရသဉ္စဿ နဇာနာတိ,ဗီဇဉ္စဿ ဝိနဿတိ.

၁၆၇.

မဟာရုက္ခုပမံ ရဋ္ဌံ,ယော အဓမ္မေန သာသတိ;

ရသဉ္စဿ နဇာနာတိ,ရဋ္ဌဉ္စာပိ ဝိနဿတိ.

၁၆၈.

မဟာရုက္ခဿ ဖလိနော,ပက္ကံ ဆိန္ဒတိ ယော ဖလံ;

ရသဉ္စဿ ဝိဇာနာတိ,ဗီဇဉ္စဿ နနဿတိ.

၁၆၉.

မဟာရုက္ခုပမံ [Pg.75] ရဋ္ဌံ,ဓမ္မေန ယော ပသာသတိ;

ရသဉ္စဿ ဝိဇာနာတိ,ရဋ္ဌဉ္စာပိ နနဿတိ.

၁၇၀.

ဇနပ္ပဒဉ္စ ယောရာဇာ,အဓမ္မေန ပသာသတိ;

သဗ္ဗော သဓိဟိ သောရာဇာ,ဝိရုဒ္ဓေါ ဟောတိ ခတ္တိယော.

၁၇၁.

တထေဝ [Pg.76] နိဂမေ ဟိံသံ,ယေ ယုတ္တာ ကယဝိက္ကယေ;

သုင်္ကဒါနဗလီကာရေ,သ ကောသေန ဝိရုဇ္ဈတိ.

၁၇၂.

မဟာရဝရခေတ္တေသု,သင်္ဂ, မေ ကတနိဿမေ;

ဥဿိတေ ဟိံသယံ ရာဇာ,သဗလေန ဝိရုဇ္ဈတိ.

၁၇၃.

တထေဝ ဣသယော ဟိံသော,သံယမေ ဗြဟ္မစာရိယော;

အဓမ္မစာရိ ခတ္တီယော,သော သဂ္ဂေန ဝိရုဇ္ဈတိ.

၁၇၄.

သယံကတာ [Pg.77] နပရေန,မဟာနဇ္ဇော ဇုဝကတာ;

ဣဿရေန တထာ ရညာ,သရဋ္ဌေ အဓိပစ္စတာ.

၁၇၅.

ပါပံဝါပိ ဟိ ပုညံဝါ,ပဓာနော ယံ ကရောတိစေ;

လောကောပေဝံ ကရောတျေဝ,တံ ဝိဇာနေယျ ပဏ္ဍိတော.

၁၇၆.

ကစ္ဆပီနဉ္စ [Pg.78] မစ္ဆီနံ,ကုက္ကုဋီနဉ္စ ဓေနူနံ;

ပုတ္တပေါသာ ယထာဟောတိ,တထာ မစ္စေသု ရာဇူနံ.

၁၇၇.

အနာယကာ ဝိနဿန္တိ,နဿန္တိ ဗဟုနာယကာ;

ထီနာယကာ ဝိနဿန္တိ,နဿန္တိ သုသုနာယကာ.

၁၇၈.

ဗဟုဝေါ [Pg.79] ယတ္ထ နေတာရော,သဗ္ဗေ ပဏ္ဍိတမာနိနော;

သဗ္ဗေ မဟတ္တမိစ္ဆန္တိ,ကတံ နေသံ ဝိနဿတိ.

၁၇၉.

နောဒယာယ ဝိနာသာယ,ဗဟုနာယကတာ ဘူသံ;

နောမိလန္တိ ဝိနဿန္တိ,ပဒ္မာ နျက္ကေဟိသတ္တဟိ.

၁၈၀.

အသန္တုဋ္ဌော ယတီ နဋ္ဌော,သန္တုဋ္ဌောစ မဟီပတိ;

သလဇ္ဇာ ဂဏိကာ နဋ္ဌာ,နိလဇ္ဇာတု ကုလင်္ဂနာ.

၁၈၁.

န [Pg.80] ဂဏဿ ဂ္ဂတော ဂစ္ဆေ,သိဒ္ဓေ ကမ္မေ သမံဖလံ;

ကမ္မဝိပ္ပတ္တိ စေဟောတိ,မုခရော တတြ ဟညတေ.

၁၈၂.

ပဓိရော စ တပဿီနိ,သူရော ရဏဝဏော တထာ;

မဇ္ဇပေါ ပတိထီ ရာဇာ,ဧတေ နသဒ္ဒဟာမဟံ.

၁၈၃.

ဇာနေယျ [Pg.81] ပေသနေ ဘစ္စံ,ဗန္ဓဝါပိ ဘယာဂတေ;

အာပဒါသု တထာ မိတ္တံ,ဒါရဉ္စ ဝိဘဝက္ခယေ.

၁၈၄.

ရဏာ ပစ္စာဂတံ သူရံ,ဓနဉ္စ ဃရမာဂတံ;

ဇိဏ္ဏ မန္နံ ပသံသေယျ,ဒါရဉ္စ ဂတယောဗ္ဗနံ.

၁၈၅.

သဒ္ဓါပေမေသု သန္တေသု,နဂဏေ မာသကံ သတံ;

သဒ္ဓါဝေမေသွ သန္တေသု,မာသကံပိ သတံ ဂဏေ.

၁၈၆.

အဒန္တဒမနံ [Pg.82] ဒါနံ,ဒါနံ သဗ္ဗတ္ထသာဓကံ;

ဒါနေန ပိယဝါစေန,ဥန္နမန္တိ နမန္တိစ.

၁၈၇.

ဒါနံ သိနေဟဘေသဇ္ဇံ,မစ္ဆေရံ ဒုဿနောသဓံ;

ဒါနံ ယသဿဘောသဇ္ဇံ,မစ္ဆေရံ ကပ္ပနောသဓံ.

၁၈၈.

ဒုဗ္ဘိက္ခေ [Pg.83] အန္နဒါတံစ,သုဘိက္ခေစ ဟိရညဒံ;

ဘယေစာဘယတာဒါနံ,သဂ္ဂေပိ ဗဟု မညတေ.

၁၈၉.

သတံစက္ခု သတံကဏ္ဏာ,နာယကဿ သုတာ သဒါ;

တထာပိ အန္ဓပဓီရော;

ဧသာ နာယကဓမ္မတာ.

၁၉၀.

ခမာ ဇာဂရိယု ဋ္ဌာနံ,သံဝိဘာဂေါ ဒယိက္ခဏာ;

နာယကဿ ဂုဏာဧတေ,ဣစ္ဆိတဗ္ဗာ ဟိတတ္ထိနာ.

၁၉၁.

ပရိဘူတော [Pg.84] မုဒူ ဟောတိ,အတိတိက္ခောစ ဝေရဝါ;

ဧတဉ္စဥဘယံ ဉတွာ,အနုမဇ္ဈံ သမာစရေ.

၁၉၂.

နေကန္တမုဒုနာ သက္ကာ,ဧကန္တတိခိဏေနဝါ;

အတ္တံ မဟန္တေ ဌပေတုံ,တသ္မာ ဥဘယ မာစရေ.

၁၉၃.

ပိဋ္ဌိတော [Pg.85] က္ကံ နိသေဝေယျ,ကုစ္ဆိနာတု ဟုတာသနံ;

သာမိကံ သဗ္ဗဘာဝေန,ပရလောကံ အမာယာယ.

၁၉၄.

နသေဝေ ဖရုသံသာမိံ,တံပိ သေဝေန မစ္ဆရိံ;

တတော ပဂ္ဂဏှကံသေဝေ,သေဝေ နိဂ္ဂဏှကံ တတော;

၁၉၅.

န သာ ရာဇာ ယော အဇေယျံ ဇိနာတိ,န သော သခါယော သခါရံ ဇိနာတိ;

န သာ ဘရိယာ ပတိနော ဝိရောဓတိ,န တေ ဝုတ္တာ ယေ နဘရန္တိ ဇိဏ္ဏကံ.

၁၉၆.

န [Pg.86] သာ သဘာ ယတ္ထ နသန္တိ သန္တော,န တေ သန္တော ယေ နဝဒန္တိ ဓမ္မံ;

ရာဂဉ္စ ဒေါသဉ္စ ပဟာယ မောဟံ,ဓမ္မံ ဘဏန္တာဝ ဘဝန္တိ သန္တော.

၁၉၇.

သုတဿ ရက္ခာ သတတာဘိယောဂေါ;

ကုလဿ ဝတ္တံ ပုရိသဿ ဝိဇ္ဇာ;

ရညော ပမာဒေါ ပသမောဓနဿ,ထီနန္တု ဇာနာမိ န ဇာတု ရက္ခံ.

ဣတ္ထိကထာ

၁၉၈.

နမာတရာ [Pg.89] ဓီတုယာ ဝါပိ,ဘဂီနိယာ ဝိစက္ခဏော;

နဝိဝိတ္တာသနေ မန္တေ,နာရီ မာယာဝိနီနနု.

၁၉၉.

ဝိဇ္ဇုတာနဉ္စ လောလတ္တံ,သတ္ထာနဉ္စတိတိက္ခဏံ;

သီဃတံ ဝါယုတေဇာနံ,အနုကုဗ္ဗန္တိ နာရိယော.

၂၀၀.

ဒွိဂုဏော ထီန မာဟာရော,ဗုဒ္ဓိစာပိ စတုဂ္ဂုဏော;

ဆဂုဏော ဟောတိ ဝါယာမော,ကာမောတွ ဋ္ဌ ဂုဏောဘဝေ.

၂၀၁.

ဧကမေကာယဣတ္ထီယာ,အဋ္ဌဋ္ဌပတိနော သိယုံ;

သူရာစ ဗလဝန္တောစ,သဗ္ဗာကာမရသာဟရာ;

ကရေယျ နဝမေ ဆန္ဒံ,ဥန္နတ္တာ ဟိ နပူရတိ.

၂၀၂.

လပန္တိ [Pg.90] သဒ္ဓိမညေန,ပဿန္တညံ သဝိဗ္ဘမာ;

စိတ္တကံ စိန္တယန္တညံ,နာရီနံနာမ ကော ပိယော.

၂၀၃.

ဇိဝှာသဟဿိကော ယော ဟိ,ဇီဝေ ဝဿသတံ နရော;

တေန နိကမ္မုနော ဝုတ္တော,ထီဒေါသော ကိံခယံဂတော.

၂၀၄.

အဂ္ဂိ အာပေါ ထိယော မုဠှော,သပ္ပော ရာဇကုလာနိစ;

ပယတနာပဂန္တဗ္ဗော,မစ္စုပါဏဟရာနိတိ.

၂၀၅.

ဣတ္ထီနံ [Pg.91] ဒုဇ္ဇနာ နဉ္စ,ဝိသာသောနောပပဇ္ဇတေ;

ဝီသဿ သိင်္ဂိနော ရောဂ,နဒီရာဇကုလဿစ.

၂၀၆.

သတ္ထံ သုနိစ္ဆိတမတီပိ ဝိစိန္တနီယံ,သွာရာဓိတောပျ ဝနိပေါ ပရိသင်္ကနီယော;

ဟတ္ထင်္ဂတာပိ ယုဝတီပရိရက္ခနီယာ,သတ္ထာဝနီပယုဝတီသု ကုတောဝသိတ္ထံ.

၂၀၇.

အယုတ္တကမ္မာရဒ္ဓနံ ဝိရောဓော,သံဃဿ ယုဒ္ဓဉ္စ မဟာဗလေဟိ;

ဝိဿာသကမ္မံ ပမာဒါသု နိစ္စံ,ဒွါရာနိမစ္စုဿ ဝဒန္တိ ပညာ.

၂၀၈.

ဝါတံ ဇာလေန နရော ပရာမသေ,ဩသိဉ္စေ သာဂရံ ဧကပါဏိနာ;

သကေနတာလေန ဇနေယျ ဃောသံ,ယော သဗ္ဗဘာဝံ ပမဒါသု ဩသဇေ.

၂၀၉.

ဣတ္ထီပိ [Pg.93] ဟိ ဧကစ္စိယာ,သေယျာ ဝုတ္တာဝ မုနိနာ;

ဘဏ္ဍာန မုတ္တမံ ဣတ္ထီ,အဂ္ဂုပဋ္ဌာယိကာတိစ.

၂၁၀.

ယော နံ ဘရတိ သဗ္ဗဒါ,နိစ္စံ အာတာပိ ဥဿုကော;

သဗ္ဗကာမဟရံ ပေါသံ,ဘတ္တာရံ နာတိမညတိ.

၂၁၁.

နာစာပိ [Pg.94] သောတ္ထိ ဘတ္တာရံ,ဣဿာစာရေန ရောသယေ;

ဘတ္တုစ ဂရုနောသဗ္ဗေ,ပဋိပူဇေတိ ပဏ္ဍိတော.

၂၁၂.

ဥဋ္ဌာယိကာ အနာလာသာ,သင်္ဂဟိတပရိဇ္ဇနာ;

ဘတ္တု မနာပံ စရတိ,ဘတ္တကံ အနုရက္ခတိ.

၂၁၃.

ဧဝံ ဝတ္တတိ ယာနာရီ,ဘတ္တုဆန္ဒဝသာနုဂါ;

မနာပါနာမ တေဒေဝါ,ယတ္ထ သာ ဥပပဇ္ဇတိ.

၂၁၄.

ကောကိလာနံ [Pg.95] သရော ရူပံ,နာရီရူပံ ပတိဗ္ဗတံ;

ဝိဇ္ဇာ ရူပ မရူပါနံ,ခမာ ရူပံ တပဿီနံ.

၂၁၅.

အာနေယ ကုလဇံ ပညော,ဝိရူပမပိ ကညကံ;

ဟီနာယပိ သုရူပါယ,ဝိဝါဟံသဒိသံ ကရေ.

၂၁၆.

ဝိသမှာမတမာဒေယျ[Pg.96],အမဇ္ဇမှာပိကဉ္စနံ;

နိစမှာပျုတ္တမာဝိဇ္ဇာ,ရတနိတ္ထီပိဒုကုလာ.

၂၁၇.

ဗာလိတ္ထီ မက္ခိကာတုဏ္ဍံ,ဣသီနဉ္စ ကမဏ္ဍလုံ;

သေတမ္ဗု ဖလံ တမ္ဗုလံ,နောစ္ဆိဋ္ဌမုပဇာယတေ.

၂၁၈.

ဗာလက္ကော ပဏ္ဏဓူမောစ,ဝုဒ္ဓိတ္ထီ ပလ္လလောဒကံ;

အာယုက္ခယကရံ နိစ္စံ,ရတ္တောစ ဒဓိဘောဇနံ.

၂၁၉.

ထိယော [Pg.97] သေဝေယျ နစ္စန္တံ,သာဒုံ ဘုဉ္ဇေယျနာဟိတံ;

ပူဇယေ မာနယေ ဝုဒ္ဓေ,ဂုရုံ မာယာယ နောဘဇေ.

၂၂၀.

အာစာရော ကုလ မာချာတိ,ဒေသ မာချာတိ ဘာသိတံ;

သမ္ဘဝေါ ပေမ မာချာတိ,ဒေဟ မာချာတိဘောဇနံ.

၂၂၁.

ဒေဟီတိဝစနာဒွါရာ[Pg.98],ဒေဟဋ္ဌာပဉ္စဒေဝတာ;

သဇ္ဇ နိယန္တိ ဓီ ကိတ္တိ,ဟိရီ သိရီ မတီပိစ.

၂၂၂.

ဒေဟီတိဝစနံ ဒုက္ခံ,နတ္ထီတိဝစနံ တထာ;

ဝါကျံဒေဟီတိနတ္ထီတိ,မာဘဝေယျ ဘဝေဘဝေ.

၂၂၃.

ဗောဓယန္တိ နယာစန္တိ,ဒေဟီတိ ပစ္ဆိမာဇနာ;

ပဿ ဝတ္ထုမဒါနဿ,မာဘဝတူတိ ဤဒိသော.

၂၂၄.

မဟာ [Pg.99] အတျပ္ပကံ ယာတိ,နိဂုဏေ ဂုဏဝါပိဟ;

အဋ္ဌာနဋ္ဌေယျဘာဝေန,ဂဇိန္ဒောဣဝ ဒဗ္ဗကေ.

၂၂၅.

မဟန္တံ နိဿယံကတွာ,ခုဒ္ဒေါပျတိမဟာ ဘဝေ;

ဟေမပဗ္ဗတမာပဇ္ဇ,သောဝဏ္ဏာကိရ ပက္ခိနော.

၂၂၆.

ဗဟူန [Pg.100] မပ္ပသာရာနံ,ဧကိဘာဝေါ ဟိဒုဇ္ဇယော;

တိဏေန ဝဋ္ဋတေ ရဇ္ဇု,တာယ နာဂေါပိ ဗန္ဓတေ.

၂၂၇.

အသဟာယော သမတ္ထောပိ,တေဇသိ ကိံ ကရိဿတိ;

နိဝါတသဏ္ဌိတော အဂ္ဂိ,သယမေဝူပသမ္မတိ.

၂၂၈.

ခန္တုံ တပနဇောတေဇော,သက္ကာဟောတိ န ဝဏ္ဏဇော;

ဘူပါဒီဟိ ကတောဒဏ္ဍော,သက္ကာဟောတိ န ဘစ္စဇော.

၂၂၉.

ထီသံသဂ္ဂေ [Pg.101] ကုတောသုဒ္ဓေါ,မံသဘက္ခေ ကုတောဒယာ;

သုရာပါဏေ ကုတောသစ္စံ,ပကောဓမှိ ကုတောတပေါ.

၂၃၀.

ထီယာ ဂုယှံ နသံသေယျ,အမိတ္တဿစ ပဏ္ဍိတော;

ယောစာ မိဿေန သံဟီရော,ဟဒယတ္ထေနော ယောနရော.

၂၃၁.

ဂုယှမတ္ထ [Pg.102]သမ္ဗောဓယတိ ယောနရော;

မန္တဘေဒဘယာ တဿ,ဒါသဘူတော တိတိက္ခတိ.

၂၃၂.

ဝဟေ အမိတ္တ ခန္ဓေန,ယာဝကာလေ အနာဂတေ;

တမှေဝ စာဂတေ ကာလေ,ဘိန္ဒေ ဃဋမိ ဝုပ္ပလေ.

၂၃၃.

ခလံ [Pg.103] သာလံ ပသုံ ခေတ္တံ,ဂန္တွာစဿ အဘိက္ခဏံ;

မိတံ ဓညံ နိဓာပေယျ,မိတဉ္စ ပါစယေ ဃရေ.

၂၃၄.

ကောဓံ လောဘံ မဒံ မာနံ,တန္ဒိံ မိဿံ ပမတ္တကံ;

သောဏ္ဌံနိဒ္ဓါလုကံ မက္ခံ,မစ္ဆေရဉ္စ ဇဟေ ဗုဓော.

၂၃၅.

ကောဓော [Pg.104] အဗ္ဘန္တရေ ဇာတော,ဓူဝံ နာသေတိ ကောဓနံ;

ဝတ္ထာလင်္ကာရပုဏ္ဏာယံ,မဉ္ဇူသာယံ သိခီယထာ.

၂၃၆.

ဥပ္ပဇ္ဇတေ သစေ ကောဓော;

အာဝဇ္ဇေ ကကစူပမံ;

ဥပ္ပဇ္ဇေ စေ ရသေ တဏှာ,ပုတ္တမံသူပမံ သရေ.

၂၃၇.

ဂုဏ မဒ္ဓိသမံ မက္ခေ,ပရေန ကလဟေ သတိ;

အဒ္ဓိသမံ ပကာသေတိ,အဏုမတ္တံဝဝဇ္ဇကံ.

၂၃၈.

တဿေဝ [Pg.105] တေန ပါပီယော,ယော ကုဒ္ဓံ ပဋိကုဇ္ဈတိ;

ကုဒ္ဓ မပဋိကုဇ္ဈန္တော,သင်္ဂါမံ ဇေတိ ဒုဇ္ဇယံ.

၂၃၉.

ရာဂေါနာမ မနောသလ္လံ,ဂုဏတ္ထဝရတက္ကရော;

ရာဟု ဝိဇ္ဇာသသင်္ကဿ,တပေါဓနဟုတာသနော.

၂၄၀.

ပမာဒေါ [Pg.106] ဇာယတေ မဒါ,ပမာဒါ ဇာယတေ ခယော;

ခယာ ပဒေါသာ ဇာယန္တိ,မဒံ ကိံ နဇဟေ ဗုဓော.

၂၄၁.

နမန္တိ ဖလိနောရုက္ခာ,နမန္တိ ဝိဗုဓာဇနာ;

သုက္ခကဋ္ဌဉ္စ မုဠှောစ,ဘိဇ္ဇတေဝ နနမန္တိ.

၂၄၂.

ဌာနေ [Pg.107] ဝုဒ္ဓါန မောကာသံ,ဒဒေ ဝုဒ္ဓါပစာယိကော;

နနု တာလော အဇီဝေါပိ,သမီပ ညေ ပရောနတော.

၂၄၃.

ဂရုကာတဗ္ဗပေါသေသု,နိစ္စဝုတ္တိံ ကရောတိ ယော;

နိစတ္တံ သော ပဟန္တာန,ဥတ္တမတ္တေ ပတိဋ္ဌတိ.

၂၄၄.

ယတ္ထ ပေါသံ နဇာနန္တိ,ဇာတိယာ ဝိနယေန ဝါ;

န တတ္ထ မာနံ ကရိယာ,ဝသ မညာတကေဇနေ.

၂၄၅.

အညာတဝါသံ [Pg.108] ဝသတာ,ဇာတဝေဒသမေနာပိ;

ခမိတဗ္ဗံ သပညေန,အပိ ဒါသဿ တဇ္ဇိတံ.

၂၄၆.

ဓနဓညာပယောဂေသု,တထာ ဝိဇ္ဇာဂမေသုစ;

ဒူတေစ ဗျဝဟာရေစ,စတ္တလဇ္ဇော သဒါ ဘဝေ.

၂၄၇.

နဟိ [Pg.109] ကောစိ ကတေ ကိစ္စေ,ကတ္တာရံ သမ္မပေက္ခတေ;

တသ္မာ သဗ္ဗာနိကမ္မာနိ,သာဝသေသာနိ ကာရယေ.

၂၄၈.

ဣဏသေသော အဂ္ဂိသေသော,သတ္တုသေသော တယောဣမေ;

ပုနပ္ပုနံပိ ဝဍ္ဎန္တိ,တသ္မာ သေသံ နကာရယေ.

၂၄၉.

နတ္ထိ ဝိဇ္ဇာသမံ ဝိတ္တံ,နတ္ထိ ဗျာဓိသမော ရိပု;

နတ္ထိ အတ္တသမံ ပေမံ,နတ္ထိ ကမ္မပရံ ဗလံ.

၂၅၀.

အတ္တနာ [Pg.110] ကုရုတေ လက္ခီ,အလက္ခီစာပိ အတ္တနာ;

နဟိ လက္ခီ အလက္ခီစ,အညော အညဿ ကုရုတေ.

၂၅၁.

သယံ အာယံ ဝယံ ရညာ,သယံ ဇညာ ကတာကတံ;

အတ္တနာဝ ဘဝက္ခေယျ,ကတာနိ အကတာနိစ.

၂၅၂.

ဥပကာရံ [Pg.111] ဟိတေနေဝ,သတ္တုနာ သတ္တု မုဒ္ဓရေ;

ပါဒလဂ္ဂံ ကရဋ္ဌေန,ကဏ္ဋကေန ကဏ္ဋကံ.

၂၅၃.

နမေ နမန္တဿ ဘဇေ ဘဇန္တံ,ကိစ္စာနိ ကြုပဿ ကရေယျ ကိစ္စံ;

နာ နတ္ထကာမဿ ကရေယျ အတ္ထံ,အသမ္ဘဇန္တံပိ နသမ္ဘဇေယျ.

၂၅၄.

စဇေ [Pg.112] စဇန္တံ နဝတံ ကရိယာ,အပေတစိတ္တေန နသမ္ဘဇေယျ;

ဒိဇော ဒုမံ ခီဏဖလ မဉတွာ,အညံ သပေက္ခေယျ မဟာတိ လောကော.