နမော တဿ ဘဂဝတော အရဟတော သမ္မာသမ္ဗုဒ္ဓဿ

ကဝိဒပ္ပဏနီတိ

မာတိကာ

ယထာဓမ္မိကရာဇူနံ, အမစ္စာ စ ပုရောဟိတာ;

နီတိသတ္ထံ သုနိဿာယ, နိစ္ဆယန္တိ ဝိနိစ္ဆယံ.

အင်္ဂါနိ ဝေဒါ စတ္တာရော, မီမံသာနျာယ ဝိတ္ထာရော;

ဓမ္မသတ္ထံ ပုရာဏဉ္စ, ဝိဇ္ဇာ ဟေတာ စတုဒ္ဒသ.

အာယုဗ္ဗေဒေါ မနုဗ္ဗေဒေါ, ဂန္ဓဗ္ဗော စေတိ တေ တယော;

အတ္ထသတ္ထံ စတုတ္ထဉ္စ, ဝိဇ္ဇာဟျာဋ္ဌရသ မတာ.

သုတိသမုတိသင်္ချာ စ, ရောဂါနီတိ ဝိသေသကာ;

ဂန္ဓဗ္ဗာ ဂဏိကာ စေဝ, ဓနုဗ္ဗေဒါ စ ပူရဏာ.

တိကိစ္ဆာ ဣတိဟာသော စ, ဇောတိမာယာ စ ဆန္ဒတိ;

ကေတုမန္တာ စ သဒ္ဒါ စ, သိပ္ပာဋ္ဌာရသကာ ဣမေ.

ဒမော ဒဏ္ဍော ဣတိချာတော, တဋ္ဌာဒဏ္ဍော မဟီပတိ;

တဿ နီတိ ဒဏ္ဍနီတိ, နယနာနီတိ ဝုစ္စတိ.

ဒဏ္ဍေန နီယတေ စေဒံ, ဒဏ္ဍံ နယတိ ဝါ ပုန;

ဒဏ္ဍနီတိ ဣတိချာတော, တိလောကာ နတိ ဝတ္တတေ.

နာနာသတ္ထောဒ္ဓတံ ဝက္ခေ, ရာဇနီတိ သမုစ္စယံ;

သဗ္ဗဗီဇမိဒုံ သတ္ထံ, စာဏကျ သာရသင်္ဂဟံ.

မူလသုတ္တံ ပဝက္ခာမိ, စာဏကျေန ယထောဒိတံ;

ယဿံ ဝိညာတမတ္တေန, မူဠှော ဘဝတိ ပဏ္ဍိတော.

မိတ္တလာဘော သုဟဒဘေဒေါ, ဝိဂ္ဂဟော သန္ဓိရေဝ စ;

ပဉ္စတန္ဒြာ တထာညသ္မာ, ဂန္ထာ ကဿိယလိချတေ.

လောကနီတိမှာ –

(၁) ပဏ္ဍိတကဏ္ဍ. (၂) သုဇနကဏ္ဍ. (၃) ဗာလဒုဇ္ဇန ကဏ္ဍ. (၄) မိတ္တကဏ္ဍ. (၅) ဣတ္ထိကဏ္ဍ. (၆) ရာဇကဏ္ဍ. (၇) ပကိဏ္ဏက ကဏ္ဍ-

လောကနီတိ –

ပဏ္ဍိတော သုဇနော ကဏ္ဍော, ဒုဇ္ဇနော မိတ္တဣတ္ထီ စ;

ရာဇပကိဏ္ဏကော စာတိ, သတ္တကဏ္ဍေ ဝိဘူသိနော.

စက္ကိန္ဒာဘိသိရိနာယံ, သောဓိတော ကာသိကေ သာကေ;

ဆနောတျံ ဒုတိယာသဠှေ, ကာဠသတ္တမ အာဒိဟေ.

လောကနီတိံ ပဝက္ခာမိ, နာနာသတ္ထသမုဒ္ဓဋံ;

မာဂဓေနေဝ သင်္ခေပံ, ဝန္ဒိတွာ ရတနတ္တယံ.

နီတိ လောကေ ပုရိသဿ သာရော,မာတာ ပိတာ အာစရိယော မိတ္တော;

တသ္မာ ဟိ နီတိံ ပုရိသော ဝိဇညာ,ဉာဏီမဟာ ဟောတိ ဗဟုဿုတော.

မဟာရဟနီတိ –

(၁) ပဏ္ဍိတကထာ. (၂) သမ္ဘေဒကထာ. (၃) မိတ္တကထာ. (၄) နာယက ကထာ. (၅) ဣတ္ထိကထာ

မဟာရဟ ရဟံသကျ-မုနိံ နီဝရဏာ တဏှာ;

မုတ္တံ မုတ္တံ သုဒဿနံ, ဝန္ဒေ ဗောဓိဝရံ ဝရံ.

နီတိဓ ဇန္တူနံ သာရော, မိတ္တာစရိယာ စ ပိတရော;

နီတိမာ သုဗုဒ္ဓိဗျတ္တော, သုတဝါ အတ္ထဒဿိမာ.

ဓမ္မနီတိ –

(၁) အာစရိယကထာ (၂) သိပ္ပကထာ (၃) ပညာကထာ (၄) သုတကထာ (၅) ကထာနကထာ (၆) ဓနကထာ (၇) ဒေသကထာ (၈) နိဿယကထာ (၉) မိတ္တကထာ (၁၀) ဒုဇ္ဇနကထာ (၁၁) သုဇနကထာ (၁၂) ဗလကထာ (၁၃) ဣတ္ထိကထာ (၁၄) ယုတ္တကထာ (၁၅) ဒါသကထာ (၁၆) ဃရာဝါသကထာ (၁၇) ကာတဗ္ဗကထာ (၁၈) အကာတဗ္ဗကထာ (၁၉) ဉာတဗ္ဗကထာ (၂၀) အလင်္ကာရကထာ (၂၁) ရာဇဓမ္မကထာ (၂၂) ဥပသေဝကကထာ (၂၃) ဒုက္ခာဒိမိဿကကထာ (၂၄) ပကိဏ္ဏကကထာ

စက္ကာတိစက္ကစက္ကိန္ဒော, ဒေဝါတိဒေဝါဒေဝိန္ဒော,ဗြဟ္မာတိ ဗြဟ္မဗြဟ္မိန္ဒော, ဇိနော ပူရေတု မေ ဘာဝံ.

စိရံ တိဋ္ဌတု လောကမှိ, ဓံသကံ သဗ္ဗပါဏိနံ;

မဟာမောဟတမံ ဇယံ, ဇောတန္တံ ဇိနသာသနံ.

ဝန္ဒိတွာ ရတနံ သေဋ္ဌံ, နိဿာယ ပုဗ္ဗကေ ဂရု;

နီတိဓမ္မံ ပဝက္ခာမိ, သဗ္ဗလောက သုခါဝဟံ.

အာစရိယော စ သိပ္ပဉ္စ, ပညာသုတကထာဓနံ;

ဒေသဉ္စ နိဿယော မိတ္တံ, ဒုဇ္ဇနော သုဇနော ဗလံ.

ဣတ္ထီ ပုတ္တော စ ဒါသော စ, ဃရာဝါသော ကတာကတော;

ဉာတဗ္ဗော စ အလင်္ကာရော, ရာဇဓမ္မာ ပသေဝကော;

ဒုက္ခာဒိမိဿကော စေဝ, ပကိဏ္ဏကာတိ မာတိကာ.

ရာဇနီတိ –

သီဟာ ဧကံ ဗကာ ဧကံ, သိက္ခေ စတ္တာရိ ကုက္ကုဋာ;

ပဉ္စ ကာကာ ရာဇာ နာမ, ဆ သုနက္ခာ တီဏိ ဂဒြဘာ.

၁.

မဟာကမ္မံ ခုဒ္ဒကံ ဝါ, ယံ ကမ္မံ ကာတုမိစ္ဆတိ;

သဗ္ဗာရမ္ဘေန ကာတဗ္ဗံ, သီဟာ ဧကံ တဒါ ဘဝေ.

၂.

ဣန္ဒြိယာနိ သုသံယမ, ဗကောဝ ပဏ္ဍိတော ဘဝေ;

ဒေသက လောမပန္နာနိ, သဗ္ဗကမ္မာနိ သာဓယေ.

၃.

ပုဗ္ဗဋ္ဌာနဉ္စ ယုဒ္ဓဉ္စ, သံဝိဘာဂဉ္စ ဗန္ဓု ဟိ;

ထိယာ အက္ကမ္မ ဘုတ္တဉ္စ, သိက္ခေ စတ္တာရိ ကုက္ကုဋော.

၄.

ဂုယှေ မေထုနံ ပေက္ခိတွာ, ဘောဇနံ ဉာတိသင်္ဂဟော;

ဝိလောကာ ပေက္ခနာလသျံ, ပဉ္စ သိက္ခေယျ ဝါယသာ.

၅.

အနာလဿံတိသဝန္တာသော, သုနိဒ္ဓါ သုပ္ပဗောဓနာ;

ဒဠှဘတ္တိ စ သူရဉ္စ, ဆ ဧတေသွာနတော ဂုဏော.

၆.

ခိန္နောဝ ဝဟတေ ဘာရံ, သီတုဏှဉ္စ န စိန္တယီ;

သန္တုဋ္ဌော စ ဘဝေ နိစ္စံ, တီဏိ သိက္ခေယျ ဂဒြဘာ.

၇.

ဝီသတိ တာနိ ဂုဏာနိ, စရေယျ ဣဟ ပဏ္ဍိတော;

ဝိဇေယျ ရိပူ သဗ္ဗေပိ, တေဇဿီ သော ဘဝိဿတိ.

(၁) ပဏ္ဍိတကဏ္ဍ (၂) သုဇနကဏ္ဍ (၃) ဗာလဒုဇ္ဇနကဏ္ဍ (၄) မိတ္တကဏ္ဍ (၅) ရာဇကဏ္ဍ (၆) နာယကကဏ္ဍ (၇) ပုတ္တကဏ္ဍ (၈) ဝေဇ္ဇာစရိယကဏ္ဍ (၉) ဒါသကကဏ္ဍ (၁၀) ဣတ္ထိကဏ္ဍ (၁၁) ပကိဏ္ဏကကဏ္ဍ

ကဝိဒပ္ပဏနီတိံယော, ဝါစုဂ္ဂတံ ကရောတိ စေ;

ဘုဝနမဇ္ဈေ ဧသော ဟိ, ဝိညူ ပဏ္ဍိတဇာတိကော.

ကဝိဒပ္ပဏနီတိ

နမော တဿ ဘဂဝတော အရဟတော သမ္မာသမ္ဗုဒ္ဓဿ

ရတနတ္တယပဏာမ

၁.

မဟာကဝိဝရံ [Pg.1] ဗုဒ္ဓံ, ဓမ္မဉ္စ တေန သေဝိတံ;

သံဃံ နိရင်္ဂဏဉ္စာပိ, ဝန္ဒာမိ သိရသာ ဒရံ.

၂.

ကရိဿာမိ သမာသေန, နာနာသတ္ထ သမုဒ္ဓဋံ;

ဟိတာယ ကဝိနံ နီတိံ, ကဝိဒပ္ပဏနာမကံ.

ပဏ္ဍိတကဏ္ဍ

၃.

နီတိ [Pg.2] သာရော မနုဿာနံ, မိတ္တော အာစရိယောပိ စ;

မာတာ ပိတာ စ နီတိမာ, သုတဝါ ဂန္ထကာရကော.

၄.

အလသဿ [Pg.3] ကုတော သိပ္ပံ, အသိပ္ပဿ ကုတော ဓနံ;

အဓနဿ ကုတော မိတ္တံ, အမိတ္တဿ ကုတော သုခံ;

အသုခဿ ကုတော ပုညံ, အပုညဿ ကုတော ဝရံ.

၅.

သုစိန္တိတစိန္တီ [Pg.4] စေဝ, သုဘာသိတဘာသီပိ စ;

သုကတကမ္မကာရီ စ, ပဏ္ဍိတော သာဓုမာနုသော.

၆.

ကဝိဟေရညကာ [Pg.5] ကတွာ, ဥတ္တတ္တံ သတ္ထကဉ္စနံ;

ဘူသနံ ဂဇ္ဇပဇ္ဇာဒိံ, ကရောန္တိ စ မနောဟရံ.

၇.

ဗဟုံ [Pg.6] လဟုဉ္စ ဂဟဏံ, သမ္မူပဓာရဏမ္ပိ စ;

ဂဟိတ အသမ္မုဿနံ, ဧတံ သုဝိညုလက္ခဏံ.

၈.

အဇရာမရံဝ ပညော, ဝိဇ္ဇမတ္ထဉ္စ စိန္တယေ;

ဂဟိတော ဣဝ ကေသေသု, မစ္စုနာ ဓမ္မမာစရေ.

၉.

သိပ္ပသမံ [Pg.7] ဓနံ နတ္ထိ, သိပ္ပံ စောရာ န ဂဏှရေ;

ဣဓ လောကေ သိပ္ပံ မိတ္တံ, ပရလောကေ သုခါဝဟံ.

၁၀.

ဘုဉ္ဇနတ္ထံ [Pg.8] ကထနတ္ထံ, မုခံ ဟောတီတိ နော ဝဒေ;

ယံ ဝါတံ ဝါ မုခါရုဠှံ, ဝစနံ ပဏ္ဍိတော နရော.

၁၁.

ဒုမ္မေဓေဟိ ပသံသာ စ, ဝိညူဟိ ဂရဟာ စ ယာ;

ဂရဟာဝ သေယျော ဝိညူဟိ, ယဉ္စေ ဗာလပ္ပသံသနာ.

၁၂.

အစိန္တိယေ [Pg.9] သာဋ္ဌကထေ, ပဏ္ဍိတော ဇိနဘာသိတေ;

ဥပဒေသံ သဒါ ဂဏှေ, ဂရုံ သမ္မာ ဥပဋ္ဌဟံ.

တသ္မာ သာဋ္ဌကထေ ဓီရော, ဂမ္ဘီရေ ဇိနဘာသိတေ;

ဥပဒေသံ သဒါ ဂဏှေ, ဂရုံ သမ္မာ ဥပဋ္ဌဟံ.

၁၃.

ဂရူပဒေသဟီနော [Pg.10] ဟိ, အတ္ထသာရံ န ဝိန္ဒတိ;

အတ္ထသာရဝိဟီနော သော, သဒ္ဓမ္မာ ပရိဟာယတိ.

၁၄.

ဂရူပဒေသလာဘီ စ, အတ္ထသာရသမာယုတော;

သဒ္ဓမ္မံ ပရိပါလေန္တော, သဒ္ဓမ္မသ္မာ န ဟာယတိ.

၁၅.

သဗ္ဗဒဗ္ဗေသု [Pg.11] ဝိဇ္ဇေဝ, ဒဗ္ဗမာဟု အနုတ္တရံ;

အဟာရတ္တာ အနဂ္ဃတ္တာ, အက္ခယတ္တာ စ သဗ္ဗဒါ.

၁၆.

အပ္ပကေနပိ မေဓာဝီ, ပါဘတေန ဝိစက္ခဏော;

သမုဋ္ဌာပေတိ အတ္တာနံ, အဏုံ အဂ္ဂိံဝ သန္ဓမံ.

၁၇.

ပဏ္ဍိတေ [Pg.12] စ ဂုဏာ သဗ္ဗေ, မူဠှေ ဒေါသာ ဟိ ကေဝလံ;

တသ္မာ မူဠှသဟဿေသု, ပညော ဧကော ဝိသေသိယတေ.

၁၈.

ဗာလာ [Pg.13] ဣဿန္တိ ဒုမ္မေဓာ, ဂုဏီ နိဒ္ဒေါသကာရိနော;

ဂရုကော ပဏ္ဍိတော ဧတသ-မိဿံ တေဟျဝိဒွါ သမော.

၁၉.

မနုညမေဝ [Pg.14] ဘာသေယျ, နာမနုညံ ကုဒါစနံ;

မနုညံ ဘာသမာနဿ, ဂရုံ ဘာရံ ဥဒဒ္ဓရိ;

ဓနဉ္စ နံ အလာဘေသိ, တေန စတ္တမနော အဟု.

၂၀.

ဝိဇ္ဇာ [Pg.15] ဒဒါတိ ဝိနယံ, ဝိနယာ ယာတိ ပတ္တတံ;

ပတ္တတ္တာ ဓနံ ပပ္ပောတိ, ဓနာ ဓမ္မံ တတော သုခံ.

၂၁.

ယေ ဝုဍ္ဎမပစယန္တိ, နရာ ဓမ္မဿ ကောဝိဒါ;

ဒိဋ္ဌေဝ ဓမ္မေ ပါသံသာ, သမ္ပရာယေ စ သုဂ္ဂတိံ.

၂၂.

မာတရိဝ [Pg.16] ပရဒါရေသု, ပရဒဗ္ဗေသု လေဒ္ဒုံဝ;

အတ္တနီဝ သဗ္ဗဘူတေသု, ယော ပဿတိ သော ပဏ္ဍိတော.

၂၃.

အာသီသေထေဝ [Pg.17] ပုရိသော, န နိဗ္ဗိန္ဒေယျ ပဏ္ဍိတော;

အနဝဇ္ဇေသု ကမ္မေသု, ပသံသိတေသု သာဓုဘိ.

အာသီသေထေဝ [Pg.18] ပုရိသော, န နိဗ္ဗိန္ဒေယျ ပဏ္ဍိတော;

ပဿာမိ ဝေါဟံ အတ္တာနံ, ယထာ ဣစ္ဆိံ တထာ အဟု.

၂၄.

ဝါယမေထေဝ ပုရိသော, န နိဗ္ဗိန္ဒေယျ ပဏ္ဍိတော;

ပုညကြိယဝတ္ထူသု, ပသံသိတေသု ဝိညုဘိ.

၂၅.

လောကေ [Pg.19] ဥဿာဟဝန္တာနံ, ဇနာနံ ကိမသာဓိယံ;

သာဂရေပိ မဟာသေတုံ, ကပိယူထေဟိ ဗန္ဓတိ.

၂၆.

ကိံ ကုလေန ဝိသာလေန, ဂုဏဟီနော တု ယော နရော;

အကုလိနောပိ သတ္ထညော, ဒေဝတာဟိပိ ပုဇ္ဇတေ.

၂၇.

ဥက္ကဋ္ဌေ [Pg.20] သူရမိစ္ဆန္တိ, မန္တီသု အကုတူဟလံ;

ပိယဉ္စ အန္နပါနမှိ, အတ္ထေ ဇာတေ စ ပဏ္ဍိတံ.

၂၈.

ရူပယောဗ္ဗန္နသမ္ပန္နာ[Pg.21], ဝိသာလကုလသမ္ဘဝါ;

ဝိဇ္ဇာဟီနာ န သောဘန္တေ, နိဂ္ဂန္ဓာ ဣဝ ကိံ သုကာ.

၂၉.

ဝုတျံ [Pg.22] ဝိသဒဉာဏဿ, ဉာတော အတ္ထော တရဿန;

သူရပ္ပဘာယ အာဒါသော, ဆာယံ ဒိဿေ န မာကရေ.

၃၀.

အဝေယျာကရဏော တွန္ဓော, ဗဓိရော ကောသဝဇ္ဇိတော;

သာဟိစ္စရဟိတော ပင်္ဂု, မူဂေါ တက္ကဝိဝဇ္ဇိတော.

၃၁.

ဓီရော [Pg.23] စ ဝိဝိဓာနညူ, ပရေသံ ဝိဝရာနုဂူ;

သဗ္ဗာမိတ္တေ ဝသီကတွာ, ကောသိယောဝ သုခီ သိယာ.

၃၂.

မဟာတေဇောပိ [Pg.24] တေဇောယံ, မတ္တိကံ န မုဒုံ ကရေ;

အာပေါ အာပေသိ မုဒုကံ, သာဓုဝါစာဝ ကက္ခဠံ.

၃၃.

ကောတ္ထော ပုတ္တေန ဇာတေန, ယော န ဝိဒူ န ဓမ္မိကော;

ကာဏေန စက္ခုနာ ကိံ ဝါ, စက္ခု ပီဠေဝ ကေဝလံ.

၃၄.

မုဒုနာဝ [Pg.25] ရိပုံ ဇေတိ, မုဒုနာ ဇေတိ ဒါရုဏံ;

နော န သိဒ္ဓံ မုဒု ကိဉ္စိ, တတော စ မုဒုနာ ဇယေ.

၃၅.

သဇာတော ယေန ဇာတေန, ယာတိ ဝံသော သမုန္နတိံ;

ပရိဝတ္တိနိသံသာရေ, မတော ကော ဝါ န ဇာယတေ.

၃၆.

ဒါနေ [Pg.26] တပသိ သူရေ စ, ယဿ န ပတ္ထိတော ယသော;

ဝိဇ္ဇာယ မတ္ထလာဘေ စ, ကေဝလံ အဓိကောဝသော.

၃၇.

ဝရော ဧကော ဂုဏီ ပုတ္တော, န စ မူဠှသတာနျပိ;

ဧကော စန္ဒော တမော ဟနတိ, န စ တာရာဂဏော တထာ.

၃၈.

ပုညတိတ္ထကတော ယေန, တပေါ ကွာပိ သုဒုက္ကရော;

တဿ ပုတ္တော ဘဝေ ဝဿော, သမိဒ္ဓေါ ဓမ္မိကော သုဒ္ဓေ.

၃၉.

လာလယေ ပဉ္စဝဿာနိ, ဒသဝဿာနိ တာလယေ;

ပတ္တေတု သောဠသေ ဝဿေ, ပုတ္တံ မိတ္တံဝ အာစရေ.

၄၀.

လာလနေ [Pg.28] ဗဟဝေါ ဒေါသာ, တာလနေ ဗဟဝေါ ဂုဏာ;

တသ္မာ ပုတ္တဉ္စ သိဿဉ္စ, တာလယေ န တု လာလယေ.

၄၁.

မာဂဓာ ပါကတာ စေဝ, သက္ကတဝေါဟာရောပိ စ;

ဧတေသု ကောဝိဒေါ ပညော, ဓီရော ပါဠိံ ဝိသောဓယေ.

၄၂.

သက္ကတံ [Pg.29] ပါကတဉ္စေဝ-ပဘံသော စ ပိသာစိကီ;

မာဂဓီ သောရသေနီဝ, ဆ ဘာသာ ပရိကိတ္တိတာ.

၄၃.

စန္ဒနံ [Pg.30] သီတလံ လောကေ, စန္ဒိကာ သီတလာ တတော;

စန္ဒန စန္ဒိကာတောပိ, ဝါကျံ သာဓု သုဘာသိတံ.

၄၄.

ပတ္တကာလောဒိတံ အပ္ပံ, ဝါကျံ သုဘာသိတံ ဘဝေ;

ခုဒိတဿ ကဒန္နမ္ပိ, ဘုတ္တံ သာဒုရသံ သိယာ.

၄၅.

သတ္ထကာပိ [Pg.31] ဗဟူဝါစာ, နာဒရာ ဗဟုဘာဏိနော;

သောပကာရမုဒါသိနာ, နနု ဒိဋ္ဌံ နဒီဇလံ.

၄၆.

ပါသာဏဆတ္တံ ဂရုကံ, တတော ဒေဝါနာစိက္ခနာ;

တတော ဝုဍ္ဎာနမောဝါဒေါ, တတော ဗုဒ္ဓဿ သာသနံ.

၄၇.

တူလံ [Pg.32] သလ္လဟုကံ လောကေ, တတော စပလဇာတိကော;

တတောနောသာဝကော တတော, ယတိ ဓမ္မပမာဒကော.

၄၈.

ပဏ္ဍိတဿ ပသံသာယ, ဒဏ္ဍော ဗာလေန ဒီယတေ;

ပဏ္ဍိတော ပဏ္ဍိတေနေဝ, ဝဏ္ဏိတောဝ သုဝဏ္ဏိတော.

၄၉.

သတေသု ဇာယတေ သူရော, သဟဿေသု စ ပဏ္ဍိတော;

ဝုတ္တာ သတသဟဿေသု, ဒါတာ ဘဝတိ ဝါ န ဝါ.

၅၀.

ဝိဒွတ္တဉ္စ ရာဇတ္တဉ္စ, နေဝ တုလျံ ကဒါစိပိ;

သဒေသေ ပူဇိတော ရာဇာ, ဝိဒွါ သဗ္ဗတ္ထ ပူဇိတော.

၅၁.

သတံ [Pg.34] ဒီဃာယုကံ သဗ္ဗ-သတ္တာနံ သုခကာရဏံ;

အသတံ ပန သဗ္ဗေသံ, ဒုက္ခဟေတု န သံသယော.

၅၂.

ပဏ္ဍိတေ သုဇနေ သန္တေ, သဗ္ဗေပိ သုဇနာ ဇနာ;

ဇာတေကသ္မိံ သာရဂန္ဓေ, သဗ္ဗေ ဂန္ဓမယာ ဒုမာ.

၅၃.

အတ္တာဝ ယဒိ ဝိနီတော, နိဇဿိတာ မဟာဇနာ;

ဝိနီတံ ယန္တိ သဗ္ဗေပိ, ကော တံ နာသေယျ ပဏ္ဍိတော.

၅၄.

သရီရဿ ဂုဏာနဉ္စ, ဒူရမစ္စန္တမန္တရံ;

သရီရံ ခဏဝိဒ္ဓံသီ, ကပ္ပန္တဋ္ဌာယိနော ဂုဏာ.

၅၅.

အမ္ဗုံ ပိဝန္တိ နော နဇ္ဇော, ရုက္ခော ခါဒတိ နော ဖလံ;

မေဃော ကွစိပိ နော သဿံ, ပရတ္ထာယ သတံ ဓနံ.

၅၆.

သစ္စံ ပုနပိ သစ္စန္တိ, ဘုဇမုက္ခိပ္ပ မုစ္စတေ;

သကတ္ထော နတ္ထိ နတ္ထေဝ, ပရဿတ္ထ မကုဗ္ဗတော.

၅၇.

သတံ [Pg.37] ဖရုသဝါစာဟိ, န ယာတိ ဝိကတိံ မနော;

တိဏုက္ကာဟိ န သက္ကာဝ, တာပေတုံ သာဂရေ ဇလံ.

၅၈.

သေလော ယထာ ဧကဃနော, ဝါတေန န သမီရတိ;

ဧဝံ နိန္ဒာပသံသာသု, န သမိဉ္ဇန္တိ ပဏ္ဍိတာ.

၅၉.

ဓမ္မတ္ထကာမမောက္ခာနံ[Pg.38], ယဿေကောပိ န ဝိဇ္ဇတိ;

အဇဂလထနဿေဝ, တဿ ဇာတိ နိရတ္ထကာ.

၆၀.

န ကမ္မမပိ စိန္တေတွာ, စဇေ ဥယျောဂမတ္တနော;

အနုယျောဂေန တေလာနိ, တိလေဟိ န သက္ကာ လဒ္ဓုံ.

၆၁.

ယထာ [Pg.39] ဟျေကေန စက္ကေန, န ရထဿ ပတိ ဘဝေ;

ဧဝံ ပုရိသကာရေန, ဝိနာ ကမ္မံ န သိဇ္ဈတိ.

၆၂.

ဥယျာမေန ဟိ သိဇ္ဈန္တိ, ကာရိယာနိ န မနောရထံ;

န ဟိ သုတ္တဿ သီဟဿ, ပဝိသန္တိ မိဂါမုခေ.

၆၃.

မာတာပိတု [Pg.40] ကတာဘျာသော, ဂုဏိတမေတိ ဗာလကော;

န ဂဗ္ဘဇာတိမတ္တေန, ပုတ္တော ဘဝတိ ပဏ္ဍိတော.

၆၄.

မာတာ သတ္တု ပိတာ ဝေရီ, ယေန ဗာလော န ပါဌိတော;

န သောဘတေ သဘာမဇ္ဈေ, ဟံသမဇ္ဈေ ဗကော ယထာ.

၆၅.

ကာစော [Pg.41] ကဉ္စနသံသဂ္ဂေါ, ဓတ္တေ မရကတိံ ဇုတိံ;

တထာ သဗ္ဘိသန္နိဓာနာ, မူဠှော ယာတိ ပဝီဏတံ.

၆၆.

တသ္မာ အက္ခရကောသလ္လံ, သမ္မာဒေယျ ဟိတတ္ထိကော;

ဥပဋ္ဌဟံ ဂရုံ သမ္မာ, ဥဋ္ဌာနာဒီဟိ ပဉ္စဟိ.

၆၇.

ဥဋ္ဌာနာ [Pg.42] ဥပဋ္ဌာနာ, စ, သုဿူသာ ပါရိစရီယာ;

သက္ကစ္စံ သိပ္ပုဂ္ဂဟဏာ, ဂရုံ အာရာဓယေ ဗုဓော.

၆၈.

ကာဗျသတ္ထ [Pg.43] ဝိနောဒေန, ကာလော ဂစ္ဆတိ ဓီမတံ;

ဗျသနေန စ မူဠှာနံ, နိဒါယ ကလဟေန ဝါ.

၆၉.

ဆ ဒေါသာ ပုရိသေနေဟ, ဟာတဗ္ဗာ ဘူတိမိစ္ဆတာ;

နိဒ္ဒါတန္ဒီ ဘယံ ကောဓော, အာလသျံ ဒီဃသုတ္တတာ.

နိဒ္ဒါသီလီ [Pg.44] သဘာသီလီ, အနုဋ္ဌာတာ စ ယော နရော;

အလသော ကောဓပညာဏော, တံ ပရာဘဝတော မုခံ.

၇၀.

နိဂ္ဂုဏေသုပိ သတ္တေသု, ဒယာ ကုဗ္ဗန္တိ သာဓဝေါ;

န ဟိ သံဟရတေ ဇုတိံ, စန္ဒော စဏ္ဍာလဝေသ္မေ.

၇၁.

ယတြ [Pg.45] ဝိဒွဇ္ဇနော နတ္ထိ, သီလာဃျော တတြ အပ္ပဓိပိ;

နိရတ္ထပါဒမေ ဒေသေ, ဧရဏ္ဍောပိ ဒုမာယတေ.

၇၂.

ဌာနဘဋ္ဌာ န သောဘန္တေ, ဒန္တာ ကေသာ နခါ နရာ;

ဣတိဝိညာယ မတိမာ, သဋ္ဌာနံ န ပရိစ္စဇေ.

၇၃.

ပရောပဒေသေ [Pg.46] ပဏ္ဍိစ္စံ, သဗ္ဗေသံ သုကရဉှိ ခေါ;

ဓမ္မေ သယမနုဋ္ဌာနံ, ကဿစိသုမဟတ္တနော.

၇၄.

အပ္ပမာဒံ ပသံသန္တိ, ပုညကိရိယာသု ပဏ္ဍိတာ;

အပ္ပမတ္တော ဥဘော အတ္ထေ, အဓိဂ္ဂဏှာတိ ပဏ္ဍိတော.

၇၅.

နိဓီနံဝ [Pg.47] ပဝတ္တာရံ, ယံ ပဿေ ဝဇ္ဇဒဿိနံ;

နိဂ္ဂယှဝါဒိံ မေဓာဝိံ, တာဒိသံ ပဏ္ဍိတံ ဘဇေ;

တာဒိသံ ဘဇမာနဿ, သေယျော ဟောတိ န ပါပိယော.

၇၆.

မုဟုတ္တမပိ [Pg.48] စေ ဝိညူ, ပဏ္ဍိတံ ပယိရုပါသတိ;

ခိပ္ပံ ဓမ္မံ ဝိဇာနာတိ, ဇိဝှာ သူပရသံ ယထာ.

၇၇.

ဒုလ္လဘော ပုရိသာဇညော, န သော သဗ္ဗတ္ထ ဇာယတိ;

ယတ္ထ သော ဇာယတီ ဓီရော, တံ ကုလံ သုခ မေဓတိ.

၇၈.

တဂရဉ္စ [Pg.49] ပလာသေန, ယော နရော ဥပနယှတိ;

ပတ္တာပိ သုရတိ ဝါယန္တိ, ဧဝံ ဓီရူပသေဝနာ.

၇၉.

နိပုဏေ သုတမေသေယျ, ဝိစိနိတွာ သုတတ္ထိကော;

ဘတ္တံ ဥက္ခလိယံ ပက္ကံ, ဘာဇနေပိ တထာ ဘဝေ.

၈၀.

အပ္ပကံ [Pg.50] နာတိမညေယျ, စိတ္တေ သုတံ နိဓာပယေ;

ဝမ္မိကောဒကဗိန္ဒူဝ, စိရေန ပရိပူရတိ.

၈၁.

ဂစ္ဆံ [Pg.51] ကိပိလ္လိကော ယာတိ, ယောဇနာနံ သတာနိပိ;

အဂစ္ဆံ ဝေနယျောအပိ, ပဒမေကံ န ဂစ္ဆတိ.

၈၂.

သေလေ သေလေ န မဏိကံ, ဂဇေ ဂဇေ န မုတ္တိကံ;

ဝနေ ဝနေ န စန္ဒနံ, ဌာနေ ဌာနေ န ပဏ္ဍိတော.

၈၃.

ပဏ္ဍိတော [Pg.52] သုတသမ္ပန္နော, ယတ္ထ အတ္ထီတိ စေ သုတော;

မဟုဿာဟေန တံ ဌာနံ, ဂန္တဗ္ဗံဝ သုတေသိနာ.

၈၄.

ပေါတ္ထကေသု စ ယံ သိပ္ပံ, ပရဟတ္ထေသု ယံ ဓနံ;

ယထာကိစ္စေ သမုပ္ပန္နေ, န တံ သိပ္ပံ န တံ ဓနံ.

၈၅.

ဥပ္ပလေန [Pg.53] ဇလံ ဇညာ, ကိရိယာယ ကုလံ နရော;

ဗျတ္တိပ္ပမာဏ ဝါစာယ, ဇညာ တိဏေန မေဒနိံ.

ဇလပ္ပမာဏံ ကုမုဒမာလံ,ကုလပ္ပမာဏံ ဝိနယောပမာဏံ;

ဗျတ္တိပ္ပမာဏံ ကထိတဝါကျံ,ပထဝိယာ ပမာဏံ တိဏမိလာတံ –

၈၆.

အပ္ပဿုတော [Pg.54] သုတံ အပ္ပံ, ဗဟုံ မညတိ မာနဝါ;

သိန္ဓုဒကမပဿန္တော, ကူပေ တောယံဝ မဏ္ဍုကော.

၈၇.

ပဌမေ သိပ္ပံ ဂဏှေယျ, ဧသေယျ ဒုတိယေ ဓနံ;

စရေယျ တတိယေ ဓမ္မံ, ဧသာ ဇနာန ဓမ္မတာ.

၈၈.

သုဿူသာ [Pg.55] သုတ္တဝဒ္ဓနီ, သုတံ ပညာယ ဝဒ္ဓနံ;

ပညာယ အတ္ထံ ဇာနာတိ, အတ္ထော ဉာတော သုခါဝဟော.

၈၉.

နတ္ထိ [Pg.56] ဝိဇ္ဇာသမံ မိတ္တံ, န စ ဗျာဓိသမော ရိပု;

န စ အတ္ထသမံ ပေမံ, န စ ကမ္မသမံ ဗလံ.

၉၀.

ဝိနာ သတ္ထံ န ဂစ္ဆေယျ, သူရော သင်္ဂါမဘူမိယံ;

ပဏ္ဍိတွဒ္ဓဂူ ဝါဏိဇော, ဝိဒေသဂမနော တထာ.

၉၁.

ဓနနာသံ [Pg.57] မနောတာပံ, ဃရေ ဒုစ္စရိတာနိ စ;

ဝဉ္စနဉ္စ အဝမာနံ, ပဏ္ဍိတော န ပကာသယေ.

၉၂.

အနဝှာယံ ဂမယန္တော, အပုစ္ဆာ ဗဟုဘာသကော;

အတ္တဂုဏံ ပကာသန္တော, တိဝိဓော ဟီနပုဂ္ဂလော.

၉၃.

ဟံသော [Pg.58] မဇ္ဈေ န ကာကာနံ, သီဟော ဂုန္နံ န သောဘတေ;

ဂဒြဘမဇ္ဈေ တုရင်္ဂေါ, ဗာလမဇ္ဈေဝ ပဏ္ဍိတော.

၉၄.

ပတ္တာနုရူပကံ ဝါကျံ, သဘာဝါနုရူပံ ပိယံ;

အတ္တာနုရူပကံ ကောဓံ, ယော ဇာနာတိ သ ပဏ္ဍိတော.

၉၅.

အပ္ပရူပေါ [Pg.59] ဗဟုံဘာသော, အပ္ပပညော ပကာသကော;

အပ္ပပူရော ဃဋော ခေါဘေ, အပ္ပခီရာ ဂါဝီ စလေ.

၉၆.

န တိတ္တိ ရာဇာ ဓနမှိ, ပဏ္ဍိတောပိ သုဘာသိတေ;

စက္ခုပိ ပိယဒဿနေ, န တိတ္တိ သာဂရော ဇလေ.

၉၇.

ဟီနပုတ္တော [Pg.60] ရာဇမစ္စော, ဗာလပုတ္တော စ ပဏ္ဍိတော;

အဓနဿ ဓနံဗဟု, ပုရိသာနံ န မညထ.

၉၈.

ယော [Pg.61] သိဿော သိပ္ပလောဘေန, ဗဟုံ ဂဏှာတိ တံ သိပ္ပံ;

မူဂေါဝ သုပိနံ ပဿံ, ကထေတုမ္ပိ န ဥဿဟေ.

၉၉.

န ဘိဇ္ဇေတုံ ကုမ္ဘကာရော, သောဘေတုံ ကုမ္ဘ ဃဋတိ;

န ခိပိတုံ အပါယေသု, သိဿာနံ ဝုဍ္ဎိကာရဏာ.

၁၀၀.

အဓနဿ [Pg.62] ရသံခါဒေါ, အဗလဿ ဟတော နရော;

အပ္ပညဿ ဝါကျကရော, ဥမ္မတ္တက သမာဟိခေါ.

၁၀၁.

ဧကေနာပိ သုရုက္ခေန, ပုပ္ဖိတေန သုဂန္ဓိနာ;

ဝါသိတံ ကာနနံ သဗ္ဗံ, သုပုတ္တေန ကုလံ ယထာ.

၁၀၂.

ဣဏကတ္တာ [Pg.63] ပိတာ သတ္တု, မာတာ စ ဗျဘိစာရိနီ;

ဘရိယာ ရူပဝတီ သတ္တု, ပုတ္တော သတ္တု အပဏ္ဍိတော.

၁၀၃.

ဂုဏဒေါသမသတ္ထညူ, ဇနော ဝိဘဇတေ ကထံ;

အဓိကာရော ကိမန္ဓဿ, ရူပဘေဒေါပလဒ္ဓိယံ.

၁၀၄.

သဗ္ဗတ္ထ [Pg.64] သတ္ထတောယေဝ, ဂုဏဒေါသဝိစေစနံ;

ယံ ကရောတိ ဝိနာသတ္ထံ, သာဟသံ ကိမတောဓိကံ.

၁၀၅.

နိဟီယတိ [Pg.65] ပုရိသော နိဟီနသေဝီ,န စ ဟာယေထ ကဒါစိ တုလျသေဝီ;

သေဋ္ဌမုပနမံ ဥဒေတိ ခိပ္ပံ,တသ္မာ အတ္တနော ဥတ္တရိံ ဘဇေ.

၁၀၆.

ပစ္စုပ္ပန္နဉ္စ [Pg.66] ယော ဓမ္မံ, တတ္ထ တတ္ထ ဝိပဿတိ;

အသံဟီရံ အသံကုပ္ပံ, တံ ဝိဒွါ မနုဗြူဟယေ.

၁၀၇.

ဆန္ဒာ ဒေါသာ ဘယာ မောဟာ, ယော ဓမ္မံ နာတိဝတ္တတိ;

အာပူရတိ တဿ ယသော, သုက္ကပက္ခေဝ စန္ဒိမာ.

၁၀၈.

ပဏ္ဍိတော [Pg.67] သီလသမ္ပန္နော, သဏှော စ ပဋိဘာနဝါ;

နိဝါတဝုတ္တိ အထဒ္ဓေါ, တာဒိသော လဘတေ ယသံ.

၁၀၉.

ဒုလ္လဘံ [Pg.68] ပါကတိကံ ဝါကျံ, ဒုလ္လဘော ခေမကရော သုတော;

ဒုလ္လဘာ သဒိသီ ဇာယာ, ဒုလ္လဘော သဇနော ပိယော.

၁၁၀.

အတ္ထံ မဟန္တမာပဇ္ဇ, ဝိဇ္ဇံ သမ္ပတ္တိမေဝ စ;

စရေယျာမာနထဒ္ဓေါ ယော, ပဏ္ဍိတော သော ပဝုစ္စတိ.

၁၁၁.

သုတသန္နိစ္စယာ [Pg.69] ဓီရာ, တုဏှီဘူတာ အပုစ္ဆိတာ;

ပုဏ္ဏာသုဘာသိတေနာပိ, ဃဏ္ဋာဒီ ဃဋ္ဋိတာ ယထာ.

၁၁၂.

အပုဋ္ဌော ပဏ္ဍိတော ဘေရီ, ပဇ္ဇုန္နော ဟောတိ ပုစ္ဆိတော;

ဗာလော ပုဋ္ဌော အပုဋ္ဌော စ, ဗဟုံ ဝိကတ္ထတေ သဒါ.

၁၁၃.

ပရူပဝါဒေ [Pg.70] ဗဓိရော, ပရဝဇ္ဇေ အလောစနော;

ပင်္ဂုလော အညနာရီသု, ဒုဿတက္ကေ အစေတနော.

စက္ခုမာဿ ယထာ အန္ဓော, သောတဝါ ဗဓိရော ယထာ;

ပညဝါဿ ယထာမူဂေါ, ဗလဝါ ဒုဗ္ဗလောရိဝ;

အထ အတ္ထေ သမုပ္ပန္နေ, သယေထ မတသာယိတံ.

၁၁၄.

ပါပမိတ္တေ [Pg.71] ဝိဝဇ္ဇေတွာ, ဘဇေယျုတ္တမပုဂ္ဂလံ;

ဩဝါဒေ စဿ တိဋ္ဌေယျ, ပတ္ထေန္တော အစလံ သုခံ.

၁၁၅.

အတိသီတံ အတိဥဏှံ, အတိသာယမိဒံ အဟု;

ဣတိ ဝိဿဋ္ဌကမ္မန္တေ, အတ္ထာ အစ္စေန္တိ မာဏဝေ.

၁၁၆.

ယော [Pg.72] စ သီတဉ္စ ဥဏှဉ္စ, တိဏာဘိယျော န မညတိ;

ကရံ ပုရိသကိစ္စာနိ, သော သုခံ န ဝိဟာယတိ.

၁၁၇.

ယသ္မိံဒေသေ [Pg.73] န သမ္မာနော, န ပိယော န စ ဗန္ဓဝေါ;

န စ ဝိဇ္ဇာဂမော ကောစိ, န တတ္ထ ဒိဝသံ ဝသေ.

၁၁၈.

ဓနဝါ သုတဝါ ရာဇာ, နဒီ ဝဇ္ဇော ဣမေ ပဉ္စ;

ယတ္ထ ဒေသေ န ဝိဇ္ဇန္တိ, န တတ္ထ ဒိဝသံ ဝသေ.

၁၁၉.

နဘဿ [Pg.74] ဘူသနံ စန္ဒော, နာရီနံ ဘူသနံ ပတိ;

ဆမာယ ဘူသနံ ရာဇာ, ဝိဇ္ဇာ သဗ္ဗဿ ဘူသနံ.

၁၂၀.

သုခတ္ထိကော သစေ ဝိဇ္ဇံ, ဝိဇ္ဇတ္ထိကော စဇေ သုခံ;

သုခတ္ထိနော ကုတော ဝိဇ္ဇာ, ကုတော ဝိဇ္ဇတ္ထိနော သုခံ.

၁၂၁.

ခဏေန [Pg.75] ကဏေန စေဝ, ဝိဇ္ဇာမတ္ထဉ္စ သာဓယေ;

ခဏစာဂေ ကုတော ဝိဇ္ဇာ, ကဏစာဂေ ကတော ဓနံ.

၁၂၂.

အာစရိယာ ပါဒမာဒတ္တေ, ပါဒံ သိဿော သဇာနနာ;

ပါဒံ သဗြဟ္မစာရီဟိ, ပါဒံ ကာလက္ကမေန စ.

၁၂၃.

ဓမ္မော [Pg.76] ဇယေ နော အဓမ္မော, သစ္စံ ဇယတိ နာသစ္စံ;

ခမာ ဇယတိ နော ကောဓော, ဒေဝေါ ဇယတိ နာသူရော.

၁၂၄.

ဟတ္ထဿ ဘူသနံ ဒါနံ, သစ္စံ ကဏ္ဌဿ ဘူသနံ;

သောတဿ ဘူသနံ သတ္ထံ, ဘူသနေ ကိံ ပယောဇနံ.

၁၂၅.

ဝိဒေသေတု [Pg.77] ဓနံ ဝိဇ္ဇာ, ဗျသနေသု ဓနံ မတိ;

ပရလောကေ ဓနံ ဓမ္မော, သီလံ သဗ္ဗတ္ထ ဝေ ဓနံ.

၁၂၆.

ပဒေါသေ [Pg.78] ဒီပကော စန္ဒော, ပဘာတေ ဒီပကော ရဝိ;

တိလောကေ ဒီပကော ဓမ္မော, သုပုတ္တော ကုလဒီပကော.

၁၂၇.

ဝိဒွါ ဧဝ ဝိဇာနာတိ, ဝိဒွဇ္ဇနပရိဿမံ;

န ဟိ ဝဉ္ဈာ ဝိဇာနာတိ, ဂုရုံ ပသဝဝေဒနံ.

၁၂၈.

ယဿ [Pg.79] နတ္ထိ သယံ ပညာ, သတ္ထံ တဿ ကရောတိ ကိံ;

လောစနေဟိ ဝိဟီနဿ, ဒပ္ပဏော ကိံ ကရိဿတိ.

၁၂၉.

ကိံ ကရိဿန္တိ ဝတ္တာရော, သောတံ ယတ္ထ န ဝိဇ္ဇတေ;

နဂ္ဂကပဏကေ ဒေသေ, ရဇကော ကိံ ကရိဿတိ.

၁၃၀.

မူဠှသိဓဿာပဒေသေန, [Pg.80] ကုနာရီဘရဏေန စ;

ခလသတ္တူဟိ သံယောဂါ, ပဏ္ဍိတောပျာဝသီဒတိ.

၁၃၁.

နတ္ထိ အတ္တသမံ ပေမံ, နတ္ထိ ဓညသမံ ဓနံ;

နတ္ထိ ပညာသမာ အာဘာ, ဝုဋ္ဌိ ဝေ ပရမာ သရာ.

၁၃၂.

ဘုဇင်္ဂမံ [Pg.81] ပါဝကဉ္စ ခတ္တိယဉ္စ ယသဿိနံ;

ဘိက္ခုဉ္စ သီလသမ္ပန္နံ, သမ္မဒေဝ သမာစရေ.

၁၃၃.

တသ္မာ ဟိ ပဏ္ဍိတော ပေါသော, သမ္ပဿံ အတ္ထမတ္တနော;

ဗုဒ္ဓေ ဓမ္မေ စ သံဃေ စ, ဓီရော သဒ္ဓံ နိဝေသယေ.

၁၃၄.

ဂုဏော [Pg.82] သေဋ္ဌင်္ဂတံ ယာတိ, န ဥစ္စေ သယနေ ဝသေ;

ပါသာဒသိခရေ ဝါသော, ကာကော ကိံ ဂရုဠော သိယာ.

၁၃၅.

အနာဂတံ ဘယံ ဒိသွာ, ဒူရတော ပရိဝဇ္ဇယေ;

အာဂတဉ္စ ဘယံ ဒိသွာ, အဘီတော ဟောတိ ပဏ္ဍိတော.

၁၃၆.

အသဇ္ဇာယ မလာမန္တာ, အနုဋ္ဌာနမလာ ဃရာ;

မလံ ဝဏ္ဏဿ ကောသဇ္ဇံ, ပမာဒေါ ရက္ခတော မလံ.

၁၃၇.

အနုပုဗ္ဗေန [Pg.83] မေဓာဝီ, ထောကံ ထောကံ ခဏေ ခဏေ;

ကမ္မာရော ရဇတဿေဝ, နိဒ္ဓမေ မလမတ္တနော.

၁၃၈.

ယဉှိ [Pg.84] ကယိရာ တဉှိ ဝဒေ, ယံ န ကယိရာ န တံ ဝဒေ;

အကရောန္တံ ဘာသမာနံ, ပရိဇာနန္တိ ပဏ္ဍိတာ.

၁၃၉.

ဝိသမံ သဘယံ အတိဝါတော, ပဋိစ္ဆန္နံ ဒေဝနိဿိတံ;

ပန္ထော စ သင်္ဂါမော တိတ္ထံ, အဋ္ဌေတေ ပရိဝဇ္ဇိယာ.

၁၄၀.

ရတ္တောဒုဋ္ဌော [Pg.85] စ မုဠှော စ, မာနီ လုဒ္ဓေါ တထာလသော;

ဧကစိန္တီ စ ဗာလော စ, ဧတေ အတ္ထဝိနာသကာ.

၁၄၁.

ရတ္တော ဒုဋ္ဌော စ မူဠှော စ, ဘီရု အာမိသဂရုကော;

ဣတ္ထီ သောဏ္ဍော ပဏ္ဍကော စ, နဝမော ဒါရကောပိ စ.

၁၄၂.

နဝတေ ပုဂ္ဂလာ လောကေ, ဣတ္တရာ စလိတာ စလာ;

ဧတေဟိ မန္တိတံ ဂုယှံ, ခိပ္ပံ ဘဝတိ ပါကဋံ.

၁၄၃.

ယော [Pg.86] နိရုတ္တိံ န သိက္ခေယျ, သိက္ခန္တော ပိဋကတ္တယံ;

ပဒေ ပဒေ ဝိကင်္ခေယျ, ဝနေ အန္ဓဂဇော ယထာ.

၁၄၄.

သုတ္တံ [Pg.87] ဓာတု ဂဏောဏွာဒိ, နာမလိင်္ဂါနုသာသနံ;

ယဿ တိဋ္ဌတိ ဇိဝှဂ္ဂေ, သဗျာကရဏကေသရီ.

၁၄၅.

သဒ္ဒတ္ထလက္ခဏေ ဘေဒီ, ယော ယော နိစ္ဆိတလက္ခဏေ;

သော သော ဉာတုမကိစ္ဆေန, ပဟောတိ ပိဋကတ္တယေ.

၁၄၆.

ယော [Pg.88] သဒ္ဒသတ္ထကုသလော ကုသလော နိဃဏ္ဍု,ဆန္ဒော အလင်္ကတိသု နိစ္စကတာဘိယောဂေါ;

သော ယံ ကဝိတ္တဝိကလောပိ ကဝီသု သင်္ချံ,မောဂ္ဂယှ ဝိန္ဒတိ ဟိ ကိတ္တိ’ မမန္ဒရူပံ.

၁၄၇.

သုက္ခောပိ [Pg.89] စန္ဒနတရု န ဇဟာတိ ဂန္ဓံ,နာဂေါ ဂတော နရမုခေ န ဇဟာတိ လီဠံ;

ယန္တဂတော မဓုရသံ န ဇဟာတိ ဥစ္ဆု,ဒုက္ခောပိ ပဏ္ဍိတဇနော န ဇဟာတိ ဓမ္မံ.

၁၄၈.

ဓနဓညပ္ပယောဂေသု, တထာ ဝိဇ္ဇာဂမေသု စ;

အာဟာရေ ဗျဝဟာရေ စ, စတ္တလဇ္ဇော သဒါ ဘဝေ.

၁၄၉.

သာဘာဝိကီ [Pg.90] စ ပဋိဘာ, သုတဉ္စ ဗဟုနိမ္မလံ;

အမန္ဒော စာဘိယောဂေါယံ, ဟေတု ဟောတိဟ ဗန္ဓနေ.

၁၅၀.

ဇဟေယျ [Pg.91] ပါပကေ မိတ္တေ, ဘဇေယျ ပဏ္ဍိတေ ဇနေ;

သာဓဝေါ အဘိသေဝေယျ, သုဏေယျ ဓမ္မမုတ္တမံ.

၁၅၁.

ကလျာဏကာရီ ကလျာဏံ, ပါပကာရီ စ ပါပကံ;

ယာဒိသံ ဝပ္ပတေ ဗီဇံ, တာဒိသံ ဟရတေ ဖလံ.

၁၅၂.

ဆန္ဒော [Pg.92] နိဒါနံ ဂါထာနံ, အက္ခရာ တာသံ ဝိယဉ္ဇနံ;

နာမသန္နိဿိတာ ဂါထာ, ကဝိ ဂါထာနမာသယော.

၁၅၃.

တသ္မာ [Pg.93] ဟိ ပဏ္ဍိတော ပေါသော, သမ္ပဿံ ဟိတမတ္တနော;

ပညဝန္တံဘိပူဇေယျ, စေတိယံ ဝိယ သာဒရော.

၁၅၄.

ဓီရံ ပဿေ သုဏေ ဓီရံ, ဓီရေန သဟသံဝသေ;

ဓီရေနလ္လာပသလ္လာပံ, တံ ကရေ တဉ္စ ရောစယေ.

၁၅၅.

နယံ [Pg.94] နယတိ မေဓာဝီ, အဓုရာယံ န ယုဉ္ဇတိ;

သုနယော သေယျသော ဟောတိ, သမ္မာ ဝုတ္တော န ကုပ္ပတိ;

ဝိနယံ သော ပဇာနာတိ, သာဓု တေန သမာဂမော.

၁၅၆.

သစေ လဘေထ နိပကံ သဟာယံ,သဒ္ဓိံ စရံ သာဓုဝိဟာရိ ဓီရံ;

အဘိဘုယျ သဗ္ဗာနိ ပရိဿယာနိ,စရေယျ တေနတ္တမနော သတိမာ.

၁၅၇.

နော [Pg.95] စေ လဘေထ နိပကံ သဟာယံ,သဒ္ဓိံ စရံ သာဓုဝိဟာရိ ဓီရံ;

ရာဇာဝ ရဋ္ဌံ ဝိဇိတံ ပဟာယ,ဧကော စရေ မာတင်္ဂရညေဝ နာဂေါ.

၁၅၈.

သောကဋ္ဌာနသဟဿာနိ[Pg.96], ဘယဋ္ဌာနသတာနိ စ;

ဒိဝသေ ဒိဝသေ မူဠှ-မာဝိသန္တိ န ပဏ္ဍိတံ.

၁၅၉.

ဇလဗိန္ဒုနိပါတေန, စိရေန ပူရတေ ဃဋော;

တထာ သကလဝိဇ္ဇာနံ, ဓမ္မဿ စ ဓနဿ စ.

၁၆၀.

ပဏ္ဍိတာ [Pg.97] ဒုက္ခံ ပတွာန, န ဘဝန္တိ ဝိသာဒိနော;

ပဝိဿ ရာဟုနော မုခံ, ကိံ နော ဒေတိ ပုန သသီ.

၁၆၁.

ဇဝေန အဿံ ဇာနန္တိ, ဝါဟေန စ ဗလိဗဒ္ဓံ;

ဒုဟေန ဓေနုံ ဇာနန္တိ, ဘာသမာနေန ပဏ္ဍိတံ.

၁၆၂.

မနသာ [Pg.98] စိန္တိတံ ကမ္မံ, ဝစသာ န ပကာသယေ;

အညလက္ခိတကာရိယဿ, ယတော သိဒ္ဓိ န ဇာယတေ.

၁၆၃.

အနဘျာသေ ဝိသံ ဝိဇ္ဇာ, အဇိဏ္ဏေ ဘောဇနံ ဝိသံ;

ဝိသံ သဘာ ဒလိဒ္ဒဿ, ဝုဒ္ဓဿ တရုဏီ ဝိသံ.

စတ္တာရော ပဉ္စ အာလောပေ, အာဘုတွာ ဥဒကံ ပိဝေ;

အလံ ဖာသုဝိဟာရာယ, ပဟိတတ္တဿ ဘိက္ခုနော.

၁၆၄.

ယဿ ဧသော ပသုတောပိ, ဂုဏဝါ ပုဇ္ဇတေ နရော;

ဓနု ဝံသဝိသုဒ္ဓေါပိ, နိဂ္ဂုဏော ကိံ ကရိဿတိ.

၁၆၅.

ဣဿီ [Pg.100] ဒယီ အသံတုဋ္ဌော, ကောဓနော နိစ္စသင်္ကီတော;

ပရဘာဂျောပဇီဝီ စ, ဆဠေတေ ဒုက္ခဘာဂိနော.

၁၆၆.

သုမဟန္တာနိ သတ္တာနီ, ဓာရယန္တာ ဗဟုဿုတာ;

ဆေတ္တာရော သံသယာနဉ္စ, ကလိံ ယန္တိ လောဘမောဟိတာ.

၁၆၇.

နဒီတီရေ [Pg.101] ခတေ ကူပေ, အရဏီတာလဝဏ္ဋကေ;

န ဝဒေ ဒကာဒီ နတ္ထီတိ, မုခေ စ ဝစနံ တထာ.

၁၆၈.

သဗ္ဗံ သုဏာတိ သောတေန, သဗ္ဗံ ပဿတိ စက္ခုနာ;

န စ ဒိဋ္ဌံ သုတံ ဓီရော, သဗ္ဗံ ဥစ္စိတု မရဟတိ.

၁၆၉.

ဗာလာဒပိ [Pg.102] ဂဟေတဗ္ဗံ, ယုတ္တမုတ္တမနီသိဘိ;

ရဝိဿာဝိသယေ ကိံ န, ပဒီပဿ ပကာသနံ.

၁၇၀.

တသ္မာ [Pg.103] ဟိ ပဏ္ဍိတော ပေါသော, သမ္ပဿံ အတ္တမတ္တနော;

ယောနိသော ဝိစိနေ ဓမ္မံ, ဧဝံ တတ္ထ ဝိသုဇ္ဈတိ.

၁၇၁.

ကိံ တေန ဇာတုဇာတေန, မာတုယောဗ္ဗန္နဟာရိနာ;

အာရောဟတိ န ယော သက-ဝံသအဂ္ဂေ ဓဇော ယထာ.

၁၇၂.

သမ္မာ ဥပပရိက္ခိတွာ, အက္ခရေသု ပဒေသု စ;

စောရဃာတော သိယာ သိဿော, ဂုရု စောရဋ္ဋကာရကော.

၁၇၃.

အဒန္တဒမနံ [Pg.104] သတ္ထံ, ခလာနံ ကုရုတေ မဒံ;

စက္ခုသင်္ခါရကံ တေဇံ, ဥလူကာနံမိဝန္ဓကံ.

၁၇၄.

နရတ္တံ ဒုလ္လဘံ လောကေ, ဝိဇ္ဇာ တတြ သုဒုလ္လဘာ;

ကဝိတ္တံ ဒုလ္လဘံ တတြ, သတ္တိ တတြ သုဒုလ္လဘာ.

၁၇၅.

ယေဘုယျေန [Pg.105] ဟိ သတ္တာနံ, ဝိနာသေ ပစ္စုပဋ္ဌိတေ;

အနယော နယရူပေန, ဗုဒ္ဓိမာဂမ္မ တိဋ္ဌတိ.

သုဇနကဏ္ဍ

၁၇၆.

သဒ္ဓါသီလာဒိဓမ္မေဟိ, [Pg.106] သပ္ပန္နော သေဋ္ဌမာနုသော;

ဝုတ္တော ဗုဒ္ဓါဒိသန္တေဟိ, သာဓုသပ္ပုရိသော ဣတိ.

သဒ္ဒါဓနံ သီလဓနံ, ဟိရီဩတ္တပ္ပိယံ ဓနံ;

သုတဓနဉ္စ စာဂေါ စ, ပညာ ဝေ သတ္တမံ ဓနံ.

ယဿ ဧတေ ဓနာ အတ္ထိ, ဣတ္ထိယာ ပုရိသဿ ဝါ;

အဒလိဒ္ဒေါတိ တံ အာဟု, အမောဃံ တဿ ဇီဝိတံ.

တသ္မာ သဒ္ဓဉ္စ သီလဉ္စ, ပသာဒံ ဓမ္မဒဿနံ;

အနုယုဉ္ဇေထ မေဓာဝီ, သရံ ဗုဒ္ဓါနသာသနံ.

၁၇၇.

သဗ္ဘိရေဝ [Pg.107] သမာသေထ, သဗ္ဘိ ကုဗ္ဗေထ သန္ထဝံ;

သတံ သဒ္ဓမ္မမညာယ, သေယျော ဟောတိ န ပါပိယော.

၁၇၈.

စဇ ဒုဇ္ဇနသံသဂ္ဂံ, ဘဇ သာဓုသမာဂမံ;

ကရ ပုညမဟောရတ္တံ, သရ နိစ္စမနိစ္စတံ.

၁၇၉.

ယော [Pg.108] ဝေ ကတညူ ကတဝေဒီ ဓီရော,ကလျာဏမိတ္တော ဒဠှဘတ္တိ စ ဟောတိ;

ဒုက္ခိတဿ သက္ကစ္စ ကရောတိ ကိစ္စံ,တထာဝိဓံ သပ္ပုရိသံ ဝဒန္တိ.

၁၈၀.

မာတာပေတ္တိဘရံ [Pg.109] ဇန္တုံ, ကုလေ ဇေဋ္ဌာပစာယိနံ;

သဏှံ သခိလသမ္ဘာသံ, ပေသုဏေယျပ္ပဟာယိနံ.

၁၈၁.

မစ္ဆေရဝိနယေ ယုတ္တံ, သစ္စံ ကောဓာဘိဘုံ နရံ;

တံ ဝေ ဒေဝါ တာဝတိံသာ, အာဟု ‘‘သပ္ပုရိသော’’ဣတိ.

၁၈၂.

ကုလဇာတော ကုလပုတ္တော, ကုလဝံသသုရက္ခတော;

အတ္တနာ ဒုက္ခပ္ပတ္တောပိ, ဟီနကမ္မံ န ကာရယေ.

၁၈၃.

ဥဒေယျ [Pg.110] ဘာဏု ပစ္ဆိမေ, နမေယျ မေရုအဒ္ဒိပိ;

သီတလံ ယဒိ နရဂ္ဂိ, ပဗ္ဗတဂ္ဂေ စ ဥပ္ပလံ;

ဝိကသေ န ဝိပရိတာ, သာဓုဝါစာ ကုဒါစနံ.

၁၈၄.

သုခါ ရုက္ခဿ ဆာယာဝ, တတော ဉာတိမာတာပိတု;

တတော အာစေရဿ ရညော, တတော ဗုဒ္ဓဿနေကဓာ.

၁၈၅.

ဘမရာ [Pg.111] ပုပ္ဖမိစ္ဆန္တိ, ဂုဏမိစ္ဆန္တိ သဇ္ဇနာ;

မက္ခိကာ ပူတိမိစ္ဆန္တိ, ဒေါသမိစ္ဆန္တိ ဒုဇ္ဇနာ.

၁၈၆.

မာတုဟီနော [Pg.112] ဒုဗ္ဘာသော ဟိ, ပိတုဟီနော ဒုက္ကိရိယော;

ဥဘော မာတုပိတုဟီနာ, ဒုဗ္ဘာသာ စ ဒုက္ကိရိယာ.

၁၈၇.

မာတုသေဋ္ဌော သုဘာသော ဟိ, ပိတုသေဋ္ဌော သုကိရိယော;

ဥဘောမာတု ပိတုသေဋ္ဌာ, သုဘာသာ စ သုကိရိယာ.

၁၈၈.

သုနခေါ [Pg.113] သုနခံ ဒိသွာ, ဒန္တံ ဒဿေတိ ဟိံသိတုံ;

ဒုဇ္ဇနော သုဇနံ ဒိသွာ, ရောသယံ ဟိံသမိစ္ဆတိ.

၁၈၉.

န စ ဝေဂေန ကိစ္စာနိ, ကတ္တဗ္ဗာနိ ကုဒါစနံ;

သဟသာ ကာရိတံ ကမ္မံ, ဗာလော ပစ္ဆာနုတပ္ပတိ.

၁၉၀.

ကောဓံ [Pg.114] ဝဓိတွာ န ကဒါစိ သောစတိ,မက္ခပ္ပဟာနံ ဣသယော ဝဏ္ဏယန္တိ;

သဗ္ဗေသံ ဝုတ္တံ ဖရုသံ ခမေထ,ဧတံ ခန္တိံ ဥတ္တမမာဟု သန္တော.

၁၉၁.

ဒုက္ခော နိဝါသော သမ္ဗာဓေ, ဌာနေ အသုစီသင်္ကတေ;

တတော အရိမှိ အပ္ပိယေ, တတောပိ အကတညုနာ.

၁၉၂.

ဩဝဒေယျာ’နုသာသေယျ[Pg.115], အသဗ္ဘာ စ နိဝါရယေ;

သတဉှိ သော ပိယော ဟောတိ, အသတံ ဟောတိအပ္ပိယော.

၁၉၃.

ဥတ္တမတ္တနိဝါတေန, ကက္ခဠံ မုဒုနာ ဇယေ;

နီစံ အပ္ပကဒါနေန, ဝါယာမေန သမံ ဇယေ.

၁၉၄.

န [Pg.116] ဝိသံ ဝိသမိစ္စာဟ, ဓနံ သံဃဿ ဥစ္စတေ;

ဝိသံ ဧကံဝ ဟနတိ, ဟနတိ သံဃဿ သဗ္ဗံ.

၁၉၅.

ဓနမပ္ပမ္ပိ [Pg.117] သာဓူနံ, ကူပေ ဝါရိဝ နိဿယော;

ဗဟုံအပိ အသာဓူနံ, န စ ဝါရိဝ အဏ္ဏဝေ.

၁၉၆.

အပတ္ထေယျံ န ပတ္ထေယျ, အစိန္တေယျံ န စိန္တယေ;

ဓမ္မမေဝ သုစိန္တေယျ, ကာလံ မောဃံ န ဣစ္ဆယေ.

၁၉၇.

အစိန္တိတမ္ပိ [Pg.118] ဘဝတိ, စိန္တိတမ္ပိ ဝိနဿတိ;

န ဟိ စိန္တာမယာ ဘောဂါ, ဣတ္ထိယာ ပုရိသဿ ဝါ.

၁၉၈.

အသန္တဿ ပိယော ဟောတိ, သန္တေ န ကုရုတေ ပိယံ;

အသတံ ဓမ္မံ ရောစေတိ, တံ ပရာဘဝတော မုခံ.

၁၉၉.

ဂုဏာ [Pg.119] ကုဗ္ဗန္တိ ဒူတတ္တံ, ဒူရေပိ ဝသတံ သတံ;

ကေတကေ ဂန္ဓံ ဃာယိတွာ, ဂစ္ဆန္တိ ဘမရာ သယံ.

၂၀၀.

ပုဗ္ဗဇာတိကတံ ကမ္မံ, တံ ကမ္မမီတိ ကထျတေ;

တသ္မာ ပုရိသာကာရေနံ, ယတံ ကရေ အတန္ဒိတော.

၂၀၁.

မတ္တိကပိဏ္ဍတော ကတ္တာ, ကုရုတေ ယံ ယဒိစ္ဆတိ;

ဧဝမတ္တကတံ ကမ္မံ, မာဏဝေါ ပဋိပဇ္ဇတေ.

၂၀၂.

ဥဋ္ဌာယောဋ္ဌာယ [Pg.121] ဗောဓေယျံ, မဟဗ္ဘယ မုပဋ္ဌိတံ;

မရဏဗျာဓိသောကာနံ, ကိမဇ္ဇ နိပတိဿတိ.

၂၀၃.

ပါဏာ ယထာတ္တနောဘိဋ္ဌာ, ဘူတာနမပိ တေ တထာ;

အတ္တောပမေန ဘူတေသု, ဒယံ ကုဗ္ဗန္တိ သာဓဝေါ.

သဗ္ဗေ [Pg.122] တသန္တိ ဒဏ္ဍဿ, သဗ္ဗေ ဘာယန္တိ မစ္စုနော;

အတ္တာနံ ဥပမံ ကတွာ, န ဟနေယျ န ဃာတယေ.

၂၀၄.

ဗာလော ဝါ ယဒိ ဝါ ဝုဒ္ဓေါ, ယုဝါ ဝါ ဂေဟမာဂတော;

တဿ ပူဇာ ဝိဓာတဗ္ဗာ, သဗ္ဗဿာဘျာဂတော ဂရု.

၂၀၅.

အာကိဏ္ဏောပိ အသန္တေဟိ, အသံသဋ္ဌောဝ ဘဒ္ဒကော;

ဗဟုနာ သန္နဇာတေန, ဂစ္ဆေန ဥဗ္ဗတ္တေနိဓ.

ဗာလဒုဇ္ဇနကဏ္ဍ

၂၀၆.

ကာယဒုစ္စရိတာဒီဟိ[Pg.124], သမ္ပန္နော ပါပမာနုဇော;

ဗာလောတိ လောကနာထေန, ကိတ္တိတော ဓမ္မသာမိနာ.

၂၀၇.

ဒုစိန္တိတစိန္တီ စေဝ, ဒုဗ္ဘာသိတဘာသီပိ စ;

ဒုက္ကဋကမ္မကာရီ စ, ပါပကော ဗာလမာနုဇော.

၂၀၈.

အတိပိယော [Pg.125] န ကာတဗ္ဗော, ခလော ကောတုဟလံ ကရော;

သိရသာ ဝဟမာနောပိ, အဍ္ဎပူရော ဃဋော ယထာ.

၂၀၉.

သပ္ပော ဒုဋ္ဌော ခလော ဒုဋ္ဌော, သပ္ပာ ဒုဋ္ဌတရော ခလော;

မန္တောသဓေဟိ တံ သပ္ပံ, ခလံ ကေနုပသမ္မတိ.

၂၁၀.

ယော [Pg.126] ဗာလော မညတိ ဗာလျံ, ပဏ္ဍိတော ဝါပိ တေနသော;

ဗာလော စ ပဏ္ဍိတမာနီ, သ ဝေ ဗာလောတိ ဝုစ္စတိ.

၂၁၁.

မဓူဝ မညတိ ဗာလော, ယာဝ ပါပံ န ပစ္စတိ;

ယဒါ စ ပစ္စတိ ပါပံ, အထ ဒုက္ခံ နိဂစ္ဆတိ.

၂၁၂.

န [Pg.127] သာဓု ဗလဝါ ဗာလော, သာဟသာ ဝိန္ဒတေ ဓနံ;

ကာယဿ ဘေဒါ ဒုပ္ပညော, နိရယံ သောပပဇ္ဇတိ.

၂၁၃.

ဃရေ [Pg.128] ဒုဋ္ဌော မူသိကော စ, ဝနေ ဒုဋ္ဌော စ ဝါနရော;

သကုဏေ စ ဒုဋ္ဌော ကာကော, နရေဒုဋ္ဌော စ ဗြာဟ္မဏော.

၂၁၄.

ဒီဃာ ဇာဂရတော ရတ္တိ, ဒီဃံ သန္တဿ ယောဇနံ;

ဒီဃော ဗာလာနသံသာရော, သဒ္ဓမ္မံ အဝိဇာနတံ.

၂၁၅.

တိလမတ္တံ [Pg.129] ပရေသဉ္စ, အပ္ပဒေါသဉ္စ ပဿတိ;

နာဠိကေရမ္ပိ သဒေါသံ, ခလဇာတော န ပဿတိ.

၂၁၆.

နတ္တဒေါသံ ပရေ ဇညာ, ဇညာ ဒေါသံ ပရဿတု;

ဂုယှော ကုမ္မာဝ အင်္ဂါနိ, ပရဒေါသဉ္စ လက္ခယေ.

၂၁၇.

လုဒ္ဓံ [Pg.130] အတ္ထေန ဂဏှေယျ, ထဒ္ဓံ အဉ္ဇလိကမ္မုနာ;

ဆန္ဒာနုဝတ္တိယာ မူဠှံ, ယထာဘူတေန ပဏ္ဍိတံ.

၂၁၈.

ယထာ ဥဒုမ္ဗရပက္ကာ, ဗဟိ ရတ္တကာ ဧဝ စ;

အန္တောကိမိလ သမ္ပုဏ္ဏာ, ဧဝံ ဒုဇ္ဇနဟဒယာ.

၂၁၉.

ယာဝဇီဝမ္ပိ [Pg.131] စေ ဗာလော, ပဏ္ဍိတံ ပယိရုပါသတိ;

န သော ဓမ္မံ ဝိဇာနာတိ, ဒဗ္ဗီ သူပရသံ ယထာ.

၂၂၀.

စရဉ္စေ နာဓိဂစ္ဆေယျ, သေယျံ သဒိသမတ္တနော;

ဧကစရိယံ ဒဠှံ ကယိရာ, နတ္ထိ ဗာလေ သဟာယတာ.

၂၂၁.

အဇာတမတမူဠှာနံ[Pg.132], ဝရမာဒယော န စန္တိမော;

သကိံ ဒုက္ခကရာဝါဒ-ယောန္တိမော တု ပဒေ ပဒေ.

၂၂၂.

ဒုဇ္ဇနေန [Pg.133] သမံ ဝေရံ, သချဉ္စာပိ န ကာရယေ;

ဥဏှော ဒဟတိ စင်္ဂါရော, သီတော ကဏှာယတေ ကရံ.

၂၂၃.

ဒုဇ္ဇနော ပိယဝါဒီ စ, နေတံ ဝိဿာသကာရဏံ;

မဓု တိဋ္ဌတိ ဇိဝှဂ္ဂေ, ဟဒယေ ဟလာဟလံ ဝိသံ.

၂၂၄.

ဒုဇ္ဇနော [Pg.134] ပရိဟာတဗ္ဗော, ဝိဇ္ဇာယာလင်္ကတောပိ စ;

မဏိနာ ဘူသိတော သပ္ပော, ကိမေသော န ဘယင်္ကရော.

၂၂၅.

နာဠိကေရသမာကာရာ, ဒိဿန္တေပိ ဟိ သဇ္ဇနာ;

အညေ ဗဒရိကာကာရာ, ဗဟိရေဝ မနောဟရာ.

ယထာပိ [Pg.135] ပန သပက္ကာ, ဗဟိ ကဏ္ဋကမေဝ စ;

အန္တော အမတသမ္ပုဏ္ဏာ, ဧဝံ သုဇနဟဒယာ.

ယထာ ဥဒုမ္ဗရပက္ကာ, ဗဟိ ရတ္တကမေဝ စ;

ဧဝံ ကိမိလသမ္ပုဏာ, ဧဝံ ဒုဇ္ဇနဟဒယာ.

၂၂၆.

ဒေါသဘီတော အနာရမ္ဘော, တံ ကာ ပုရိသလက္ခဏံ;

ကောဟျဇိဏ္ဏဘယာ နနု, ဘောဇနံ ပရိဟီယတေ.

၂၂၇.

ပယောပါနံ ဘုဇင်္ဂါနံ, ကေဝလံ ဝိသဝဍ္ဎနံ;

ဥပဒေသော ဟိ မူဠှာနံ, ပကောပါယ န သန္တိယာ.

၂၂၈.

န [Pg.136] ဌာတဗ္ဗံ န ဂန္တဗ္ဗံ, ဒုဇ္ဇနေန သမံ ကွစိ;

ဒုဇ္ဇနော ဟိ ဒုက္ခံ ဒေတိ, န သော သုခံ ကဒါစိပိ.

၂၂၉.

အဗဒ္ဓါ တတ္ထ ဗဇ္ဈန္တိ, ယတ္ထ ဗာလာ ပဘာသရေ;

ဗဒ္ဓါပိ တတ္ထ မုစ္စန္တိ, ယတ္ထ ဓီရာ ပဘာသရေ.

၂၃၀.

ပရိတ္တံ [Pg.137] ဒါရုမာရုယှ, ယထာ သီဒေ မဟဏ္ဏဝေ;

ဧဝံ ကုသိတမာဂမ္မ, သာဓု ဇီဝိပိ သီဒတိ;

တသ္မာ တံ ပရိဝဇ္ဇေယျ, ကုသီတံ ဟီနဝီရိယံ.

၂၃၁.

သဒ္ဓါသီလာဒိသမ္ပန္နော[Pg.138], သုမိတ္တော သာဓုမာနုသော;

တာဒိသံ မိတ္တံ သေဝေယျ, ဝုဒ္ဓိကာမော ဝိစက္ခဏော.

၂၃၂.

ဒါနာဒိဂုဏသေဋ္ဌေဟိ, မိဒိတဗ္ဗော မိတ္တော ဟိ ခေါ;

တာဒိသံ အဝင်္ကေနေဝ, မနသာ ဘဇေယျ သုဓီ.

၃၃၃.

ဟိတက္ကရော [Pg.139] ပရော ဗန္ဓု, ဗန္ဓုပိ အဟိတော ပရော;

အဟိတော ဒေဟဇော ဗျာဓိ, ဟိတံ အရညမောသဓံ.

၂၃၄.

ပရောက္ခေ [Pg.140] ကိစ္စဟန္တာရံ, ပစ္စက္ခေ ပိယဝါဒိနံ;

ဝဇ္ဇယေ တာဒိသံ မိတ္တံ, ဝိသကုမ္ဘံ ပယောမုခံ.

၁၃၅.

ဓနဟီနေ စဇေ မိတ္တော, ပုတ္တဒါရာ သဟောဒရာ;

ဓနဝန္တေဝ သေဝန္တိ, ဓနံ လောကေ မဟာသခါ.

၂၃၆.

ဇာနိယာ [Pg.141] ပေသနေ ဘစ္စေ, ဗန္ဓဝေ ဗျသနာဂမေ;

မိတ္တဉ္စ အာပဒိကာလေ, ဘရိယဉ္စ ဝိဘဝက္ခယေ.

၂၃၇.

ဥဿဝေ ဗျသနေ စေဝ, ဒုဗ္ဘိက္ခေ သတ္တုဝိဂ္ဂဟေ;

ရာဇဒွါရေ သုသာနေ စ, ယော တိဋ္ဌတိ သော ဗန္ဓဝါ.

၂၃၈.

န [Pg.142]၂ ဝိဿသေ အမိတ္တဿ, မိတ္တဉ္စာပိ န ဝိဿသေ;

ကဒါစိ ကုပိတေ မိတ္တေ, သဗ္ဗဒေါသံ ပကာသတိ.

၂၃၉.

မာတာ မိတ္တံ ပိတာ စေတိ, သဘာဝါ တံ တယံ ဟိတံ;

ကမ္မကရဏတော စညေ, ဘဝန္တိ ဟိတဗုဒ္ဓိယော.

၂၄၀.

အာပဒါသု [Pg.143] မိတ္တံ ဇညာ, ယုဒ္ဓေ သူရံ ဣဏေ သုစိံ;

ဘရိယံ ခီဏေသု ဝိတ္တေသု, ဗျသနေသု စ ဗန္ဓဝံ.

၂၄၁.

သကိံ ဒုဋ္ဌဉ္စ ယော မိတ္တံ, ပုန သန္ဓာတုမိစ္ဆတိ;

သ မစ္စုမုပဂဏှာတိ, ဂဗ္ဘံ အဿတရီ ယထာ.

၂၄၂.

ဣဏသေသော [Pg.144] အဂ္ဂိသေသော, ရောဂသေသော တထေဝ စ;

ပုနပ္ပုနံ ဝိဝဍ္ဎန္တိ, တသ္မာ သေသံ န ကာရယေ.

၂၄၃.

ပဒုမံဝ မုခံ ယဿ, ဝါစာ စန္ဒနသီတလာ;

တာဒိသံ နော ပသေဝေယျ, ဟဒယေ တု ဟလာဟလံ.

၂၄၄.

န [Pg.145] သေဝေ ဖရုသံ သာမိံ, န စ သေဝေယျ မစ္ဆရိံ;

တတော အပဂ္ဂဏှ သာမိံ, နေဝ နိဂ္ဂဟိတံ တတော.

၂၄၅.

ကုဒေသဉ္စ [Pg.146] ကုမိတ္တဉ္စ, ကုကုလဉ္စ ကုဗန္ဓဝံ;

ကုဒါရဉ္စ ကုဒါသဉ္စ, ဒူရတော ပရိဝဇ္ဇယေ.

၂၄၆.

သီတဝါစော ဗဟုမိတ္တော, ဖရုသော အပ္ပမိတ္တကော;

ဥပမာ ဧတ္ထ ဉာတဗ္ဗာ, သူရိယစန္ဒရာဇူနံ.

၂၄၇.

အဟိတာ ပဋိသေဓော စ, ဟိတေသု စ ပယောဇနံ;

ဗျသနေ အပရိစ္စာဂေါ, ဣတိဒံ မိတ္တလက္ခဏံ.

၂၄၈.

ပိယော [Pg.147] ဂရု ဘာဝနီယော, ဝတ္တာ စ ဝစနက္ခမော;

ဂမ္ဘီရဉ္စ ကထံ ကတ္တာ, နော စဋ္ဌာနေ နိယောဇကော;

တာဒိသံ မိတ္တံ သေဝေယျ, ဘူတိကာမော ဝိစက္ခဏော.

ပိယော [Pg.148] ဂရု ဘာဝ နီယော, ဝတ္တာ စ ဝစနက္ခမော;

ဂမ္ဘိရဉ္စ ကထံ ကတ္တာ, နော စဋ္ဌာနေ နိယောဇကော.

ယမှိ ဧတာနိ ဌာနာနိ, သံဝိဇ္ဇန္တိဓ ပုဂ္ဂလေ;

သော မိတ္တော မိတ္တကာမေန, အတ္ထကာမာနုကမ္ပတော;

အပိ နာသိယမာနေန, ဘဇိတဗ္ဗော တထာဝိဓော.

၂၄၉.

ဩရသံ ကတသမ္ဗန္ဓံ, တထာ ဝံသက္ကမာဂတံ;

ရက္ခကော ဗျသနေဟိ, မိတ္တံ ဉေယျံ စတုဗ္ဗိဓံ.

၂၅၀.

ပိယော ဂရု ဘာဝနိယော, ဝတ္တာ စ ဝစနက္ခမော;

ဂမ္ဘိရဉ္စ ကထံ ကတ္တာ, န စဋ္ဌာနေ နိယောဇကော;

တံ မိတ္တံ မိတ္တကာမေန, ယာဝဇီဝမ္ပိ သေဝိယံ.

ပိယော ဂရု ဘာဝနီယော, ဝတ္တာ စ ဝစနက္ခမော;

ဂမ္ဘိရဉ္စ ကထံ ကတ္တာ, နော စဋ္ဌာနေ နိယောဇကော;

တာဒိသံ မိတ္တံ သေဝေယျ, ဘူတိကာမော ဝိစက္ခဏော.

ရာဇကဏ္ဍ

၂၅၁.

မဟာဇနံ [Pg.150] ယော ရဉ္ဇေတိ, စတူဟိပိ ဝတ္ထူဟိ ဝါ;

ရာဇာတိ ဝုစ္စတေ လောကေ, ဣတိ သလ္လက္ခယေ ဝိဒွါ.

၂၅၂.

ဒါနဉ္စ အတ္ထစရိယာ, ပိယဝါစာ အတ္တသမံ;

သင်္ဂဟာ စတုရော ဣမေ, မုနိန္ဒေန ပကာသိတာ.

ဒါနမ္ပိ [Pg.151] အတ္ထစရိယတဉ္စ, ပိယဝါဒိတဉ္စ သမာနတ္တတဉ္စ;

ကရိယစရိယသုသင်္ဂဟံ ဗဟူနံ, အနဝမတေန ဂုဏေန ယာတိ သဂ္ဂံ;

ဒါနဉ္စ ပေယျဝဇ္ဇဉ္စ, အတ္ထစရိယာ စ ယာ ဣဓ;

သမာနတ္တတာ စ ဓမ္မေသု, တတ္ထ တတ္ထ ယထာရဟံ;

ဧတေ ခေါ သင်္ဂဟာ လောကေ, ရထဿာဏီဝ ယာယတော.

၂၅၃.

ဒါနံ သီလံ ပရိစ္စာဂံ, အဇ္ဇဝံ မဒ္ဒဝံ တပံ;

အက္ကောဓံ အဝိဟိံသဉ္စ, ခန္တီ စ အဝိရောဓနံ;

ဒသေတေ ဓမ္မေ ရာဇာနော, အပ္ပမတ္တေန ဓာရယျုံ.

၂၅၄.

ဧကယာမံ [Pg.152] သယေ ရာဇာ, ဒွိယာ မညေဝ ပဏ္ဍိတော;

ဃရာဝါသော တိယာမောဝ, စတုယာမော တု ယာစကော.

၂၅၅.

အပုတ္တကံ ဃရံ သုညံ, ရဋ္ဌံ သုညံ အရာဇကံ;

အသိပ္ပဿ မုခံ သုညံ, သဗ္ဗသုညံ ဒလိဒ္ဒတ္တံ.

၂၅၆.

ဓနမိစ္ဆေ [Pg.153] ဝါဏိဇေယျ, ဝိဇ္ဇမိစ္ဆေ ဘဇေ သုတံ;

ပုတ္တမိစ္ဆေ တရုဏိတ္ထိံ, ရာဇာမစ္စံ ဣစ္ဆာဂတေ.

၂၅၇.

ပက္ခီနံ ဗလမာကာသော, မစ္ဆာနမုဒကံ ဗလံ;

ဒုဗ္ဗလဿ ဗလံ ရာဇာ, ကုမာရာနံ ရုဒံ ဗလံ.

၂၅၈.

ခမာ [Pg.154] ဇာဂရိယုဋ္ဌာနံ, သံဝိဘာဂေါ ဒယိက္ခဏာ;

နာယကဿ ဂုဏာ ဧတေ, ဣစ္ဆိတဗ္ဗာ သတံ သဒါ.

၂၅၉.

သကိံ ဝဒန္တိ ရာဇာနော, သကိံ သမဏဗြာဟ္မဏာ;

သကိံ သပ္ပုရိသာ လောကေ, ဧသ ဓမ္မော သနန္တနော.

၂၆၀.

အလသော ဂီဟိ ကာမဘောဂီ န သာဓု,အသညတော ပဗ္ဗဇိတော န သာဓု;

ရာဇာ န သာဓု အနိသမ္မကာရီ,ယော ပဏ္ဍိတော ကောဓနော တံ န သာဓု.

၂၆၁.

အာယံ ခယံ သယံ ဇညာ, ကတာကတံ သယံ ဇညာ;

နိဂ္ဂဟေ နိဂ္ဂဟာရဟံ, ပဂ္ဂဟေ ပဂ္ဂဟာရဟံ.

၂၆၂.

မာတာ [Pg.156] ပုတ္တကတံ ပါပံ, သိဿကတံ ဂုရု တထာ;

ရာဇာ ရဋ္ဌကတံ ပါပံ, ရာဇကတံ ပုရောဟိတော.

၂၆၃.

အက္ကောဓေန ဇိနေ ကောဓံ, အသာဓုံ သာဓုနာ ဇိနေ;

ဇိနေ ကဒရိယံ ဒါနေန, သစ္စေနာလိကဝါဒိနံ.

၂၆၄.

အဒန္တဒမနံ [Pg.157] ဒါနံ, ဒါနံ သဗ္ဗတ္ထသာဓကံ;

ဒါနေန ပိယဝါစာယ, ဥန္နမန္တိ နမန္တိ စ.

အဒန္တဒမနံ [Pg.158] ဒါနံ, အဒါနံ ဒန္တဒူသကံ;

ဒါနေန ပိယဝါစာယ, ဥန္နမန္တိ နမန္တိ စ.

၂၆၅.

ဒါနံ သိနေဟဘေသဇ္ဇံ, မစ္ဆေရံ ဒေါသနောသဓံ;

ဒါနံ ယသဿီဘေသဇ္ဇံ, မစ္ဆေရံ ကပဏောသဓံ.

၂၆၆.

န ရညာ သမကံ ဘုဉ္ဇေ, ကာမဘောဂံ ကုဒါစနံ;

အာကပ္ပံ ရသဘုတ္တံ ဝါ, မာလာဂန္ဓဝိလေပနံ;

ဝတ္ထသဗ္ဗမလင်္ကာရံ, န ရညာ သဒိသံ ကရေ.

၂၆၇.

န [Pg.159] မေ ရာဇာ သခါ ဟောတိ, န ရာဇာ ဟောတိ သမကော;

ဧသော သာမိကော မယှန္တိ, စိတ္တေ နိဋ္ဌံ သဏ္ဌာပယေ.

၂၆၈.

နာတိဒူရေ ဘဇေ ရညော, နစ္စာသန္နေ ပဝါတကေ;

ဥဇုကေ နာတိနိန္နေ စ, န ဘဇေ ဥစ္စမာသနေ;

ဆ ဒေါသေ ဝဇ္ဇေ သေဝကော, အဂ္ဂီဝ သံယတော တိဋ္ဌေ.

န [Pg.160] ပစ္ဆတော န ပုရတော, နာပိ အာသန္နဒူရတော;

န ကစ္ဆေ နောပိ ပဋိဝါတေ, န စာပိ ဩဏတုဏ္ဏတေ;

ဣမေ ဒေါသေ ဝိဝဇ္ဇေတွာ, ဧကမန္တံ ဌိတာ အဟု –

၂၆၉.

ဇပ္ပေန မန္တေန သုဘာသိတေန,အနုပ္ပဒါနေန ပဝေဏိယာ ဝါ;

ယထာ ယထာ ယတ္ထ လဘေထ အတ္ထံ,တထာ တထာ တတ္ထ ပရက္ကမေယျ.

၂၇၀.

ကဿကော [Pg.161] ဝါဏိဇော မစ္စော, သမဏော သုတသီလ ဝါ;

တေသု ဝိပုလဇာတေသု, ရဋ္ဌမ္ပိ ဝိပုလံ သိယာ.

၂၇၁.

တေသု [Pg.162] ဒုဗ္ဗလဇာတေသု, ရဋ္ဌမ္ပိ ဒုဗ္ဗလံ သိယာ;

တသ္မာ သရဋ္ဌံ ဝိပုလံ, ဓာရယေ ရဋ္ဌဘာရဝါ.

၂၇၂.

မဟာရုက္ခဿ [Pg.163] ဖလိနော, အာမံ ဆိန္ဒတိ ယော ဖလံ;

ရသဉ္စဿ န ဇာနာတိ, ဗီဇဉ္စဿ ဝိနဿတိ.

၂၇၃.

မဟာရုက္ခူပမံ ရဋ္ဌံ, အဓမ္မေန ပသာသတိ;

ရသဉ္စဿ န ဇာနာတိ, ရဋ္ဌဉ္စဿ ဝိနဿတိ.

၂၇၄.

မဟာရုက္ခဿ ဖလိနော, ပက္ကံ ဆိန္ဒတိ ယော ဖလံ;

ရသဉ္စဿ ဝိဇာနာတိ, ဗီဇဉ္ဇဿ န နဿတိ.

၂၇၅.

မဟာရုက္ခူပမံ [Pg.164] ရဋ္ဌံ, ဓမ္မေန ယော ပသာသတိ;

ရသဉ္စဿ ဝိဇာနာတိ, ရဋ္ဌဉ္စဿ န နဿတိ.

နာယက ကဏ္ဍ

၂၇၆.

အနာယကာ [Pg.165] ဝိနဿန္တိ, နဿန္တိ ဗဟုနာယကာ;

ထီနာယကာ ဝိနဿန္တိ, နဿန္တိ သုသုနာယကာ.

၂၇၇.

ဂဝံ [Pg.166] စေ တရမာနာနံ, ဥဇုံ ဂစ္ဆတိ ပုင်္ဂဝေါ;

သဗ္ဗာ ဂါဝီ ဥဇုံ ယန္တိ, နေတ္တေ ဥဇုံ ဂတေ သတိ.

၂၇၈.

ဧဝမေဝ မနုဿေသု, ယော ဟောတိ သေဋ္ဌသမ္မတော;

သော သစေ ဓမ္မံ စရတိ, ပဂေဝ ဣတရာ ပဇာ.ဂဝံ စေ တရမာနာနံ, ဥဇုံ ဂစ္ဆတိ ပုင်္ဂဝေါ;

သဗ္ဗာ ဂါဝီ ဥဇုံယန္တိ, နေတ္တေ ဥဇုံ ဂတေ သတိ.

ဧဝမေဝ [Pg.167] မနုဿေသု, ယော ဟောတိ သေဋ္ဌသမ္မတော;

သော သစေ ဓမ္မံ စရတိ, ပဂေဝ ဣတရာ ပဇာ;

သဗ္ဗံ ရဋ္ဌံ သုခံ သေတိ, ရာဇာ စေ ဟောတိ ဓမ္မိကော.

၂၇၉.

နောဒယာဟ ဝိနာသာယ, ဗဟုနာယကတာ ဘုသံ;

မိလာယန္တိ ဝိနဿန္တိ, ပဒ္မာနျက္ကေဟိ သတ္တဟိ.

၂၈၀.

သုတာရက္ခော အဘိယောဂေါ, ကုလာရက္ခော ဝတ္တံ ဘဝေ;

ဝိဇ္ဇာ ဟိ ကုလပုတ္တဿ, နာယကဿာပမာဒကော.

ပုတ္တကဏ္ဍ

၂၈၁.

အဘိဇာတံ [Pg.168] အနုဇာတံ, ပုတ္တမိစ္ဆန္တိ ပဏ္ဍိတာ;

အဝဇာတံ န ဣစ္ဆန္တိ, ယော ဟောတိ ကုလဂန္ဓနော.

၂၈၂.

ပဉ္စဋ္ဌာနာနိ [Pg.170] သမ္ပဿံ, ပုတ္တမိစ္ဆန္တိ ပဏ္ဍိတာ;

ဘတော ဝါ နော ဘရိဿတိ, ကိစ္စံ ဝါ နော ကရိဿတိ.

၂၈၃.

ကုလဝံသော စိရံ တိဋ္ဌေ, ဒါယဇ္ဇံ ပဋိပဇ္ဇတိ;

အထ ဝါ ပန ပေတာနံ, ဒက္ခိနံ အနုပဒဿတိ.

၂၈၄.

ဗဟုပုတ္တေ [Pg.171] ပိတာ ဧကော, အဝဿံ ပေါသေတိ သဒါ;

ဗဟုပုတ္တာ န သက္ကောန္တိ, ပေါသေတုံ ပိတရေကကံ.

၂၈၅.

ပုတ္တံ ဝါ ဘာတရံ ဒုဋ္ဌု, အနုသာသေယျ နော ဇဟေ;

ကိန္နု ဆေဇ္ဇံ ကရံ ပါဒံ, လိတ္တံ အသုစိနာ သိယာ.

ဝေဇ္ဇာစရိယ ကဏ္ဍ

၂၈၆.

အာယုဗေဒကတာဘျာသော[Pg.173], သဗ္ဗေသံ ပိယဒဿနော;

အရိယသီလဂုဏောပေတော, ဧသ ဝေဇ္ဇော ဝိဓီယတေ.

၂၈၇.

နာနာဂန္ထဇာနနဉ္စ, သုဒိဋ္ဌကမ္မသမ္ပဒါ;

ဒက္ခတာ ဟတ္ထသီဃတာ, ပသာဒသူရသတ္တိတာ.

၂၈၈.

သာဘာဝိကတင်္ခဏိက-ဉာဏသုဘာသိတာပိ စ;

ဥဿာဟော ဒဗ္ဗော သဗ္ဗတာ, ဝေဇ္ဇာစေရဿ လက္ခဏံ;

၂၈၉.

ကိလိဋ္ဌဝတ္ထံ [Pg.174] ကောဓော စ, အတိမာနဉ္စ ဂမ္မတာ;

အနိမန္တိတဂမနံ, ဧတေ ပဉ္စ ဝိဝဇ္ဇိယာ.

၂၉၀.

ဒိဋ္ဌကမ္မတာ [Pg.175] သောစဉ္စ, ဒက္ခတာ ဝိဒိတာဂမော;

စတ္တာရော သုဘိသက္ကဿ, သုဂုဏာ ဝိညုနာ မတာ.

၂၉၁.

ရုဇာယ ဇယလက္ခဏံ, ရသော စ ဘေသဇ္ဇမ္ပိ စ;

တိလက္ခဏဘေဒေါ စေဝ, ဝိညေယျော ဘိသက္ကေန ဝေ.

ဒါသက ကဏ္ဍ

၂၉၂.

အန္တောဇာတော [Pg.176] ဓနက္ကီတော, ဒါသဗျောပဂတော သယံ;

ဒါသာကရမရာနီတော-စ္စေဝံ တေ စတုဓာ သိယုံ.

၂၉၃.

ပုဗ္ဗုဋ္ဌာ ပစ္ဆာနိပါတီ, ဒိန္နဿ အာဒါယီပိ စ;

သုကတကမ္မကရော စ, ကိတ္တိဝဏ္ဏဟရောပိ စ.

၂၉၄.

ဒါသာ ၀.၀၁၇၇ ပဉ္စေဝ စောရယျ-သခါဉာတျတ္တသာဒိသာ;

တထာ ဝိညူဟိ ဝိညေယျာ, မိတ္တဒါရာ စ ဗန္ဓဝါ.

ဣတ္ထိကဏ္ဍ

၂၉၅.

အာသာ [Pg.178] လောကိတ္ထိယော နာမ, ဝေလာ တာသံ န ဝိဇ္ဇတိ;

သာရတ္တာ စ ပဂဗ္ဘာ စ, သိခီ သဗ္ဗဃသော ယထာ;

တသ္မာ တာယော ဟိတွာန, ဗြူဟေယျ ဝိဝေကံ သုဓီ.

အာသာ [Pg.179] လောကိတ္ထိယော နာမ, ဝေလာ တာသံ န ဝိဇ္ဇတိ;

သာရတ္ထာ စ ပဂဗ္ဘာ စ, သိခီ သဗ္ဗဃသော ယထာ;

တာ ဟိတွာ ပဗ္ဗဇိဿာမိ, ဝိဝေကမနုဗြူဟယံ.

၂၉၆.

လောကေ ဟိ အင်္ဂနာ နာမ, ကောဓနာ မိတ္တဘေဒိကာ;

ပိသုကာ အကတညူ စ ဒူရတော ပရိဝဇ္ဇယေ.

၂၉၇.

ယထာ နဒီ စ ပန္ထော စ, ပါနာဂါရံ သဘာ ပပါ;

ဧဝံ လောကိတ္ထိယော နာမ, နာသံ ကုဇ္ဈန္တိ ပဏ္ဍိတာ.

၂၉၈.

သဗ္ဗာ [Pg.180] နဒီ ဝင်္ကဂတီ, သဗ္ဗေ ကဋ္ဌမယာ ဝနာ;

သဗ္ဗိတ္ထိယော ကရေ ပါပံ, လဘမာနေ နိဝါတကေ.

၂၉၉.

ဃဋကုမ္ဘသမာ [Pg.181] နာရီ, တတ္ထင်္ဂါရသမော ပုမာ;

တသ္မာ ဃတဉ္စ အဂ္ဂိဉ္စ, နေကတြ ဌပယေ ဗုဓော.

၃၀၀.

ဣတ္ထီနဉ္စ ဓနံ ရူပံ, ပုရိသာနံ ဝိဇ္ဇာ ဓနံ;

ဘိက္ခူနဉ္စ ဓနံ သီလံ, ရာဇာနဉ္စ ဓနံ ဗလံ.

၃၀၁.

ပဉ္စာရတျာ [Pg.182] သုဂန္ဓဗ္ဗာ, သတ္တာရတျာ ဓနုဂ္ဂဟာ;

ဧကမာသာ သုဘရိယာ, အဍ္ဎမာသာ သိဿာ မလာ.

၃၀၂.

ဇိဏ္ဏေ အန္နံ ပသံသေယျ, ဒါရဉ္စ ဂတယောဗ္ဗနေ;

ရဏပုနာဂတေ သူရံ, သဿဉ္စ ဂေဟမာဂတေ.

၃၀၃.

ဒွိတိပတိ [Pg.183] နာရီ စေဝ, ဝိဟာရဒွိတိ ဘိက္ခု စ;

သကုဏော ဒွိတိပါတော စ, ကတမာယာဗဟုတရာ.

၃၀၄.

ရတ္တိ ဝိနာ န စန္ဒိမာ, ဝီစိဝိနာ စ သာဂရော;

ဟံသဝိနာ ပေါက္ခရဏီ, ပတိဝိနာ ကညာ သောဘေ.

၃၀၅.

အသန္တုဋ္ဌာ [Pg.184] ယတီ နဋ္ဌာ, သန္တုဋ္ဌာပိ စ ပတ္ထိ ဝါ;

သလဇ္ဇာ ဂဏိကာ နဋ္ဌာ, နိလ္လဇ္ဇာ စ ကုလိတ္ထိယော.

၃၀၆.

စောရီနံ ဗဟုဗုဒ္ဓီနံ, ယာသု သစ္စံ သုဒုလ္လဘံ;

ထီနံ ဘာဝေါ ဒုရာဇာနော, မစ္ဆဿေဝေါ’ဒကေ ဂတံ.

၃၀၇.

အနလာ [Pg.185] မုဒုသမ္ဘာသာ, ဒုပ္ပူရာ တာ နဒီသမာ;

သီဒန္တိ နံ ဝိဒိတွာန, အာရကာ ပရိဝဇ္ဇယေ.

၃၀၈.

အာဝဋ္ဋနီ မဟာမာယာ, ဗြဟ္မစရိယဝိကောပနာ;

သီဒန္တိ နံ ဝိဒိတွာန, အာရကာ ပရိဝဇ္ဇယေ.

၃၀၉.

ဣတ္ထီပိ [Pg.186] ဟိ ဧကစ္စိယာ, သေယျာ ပေါသ ဇနာဓိပ;

မေဓာဝိနီ သီလဝတီ, သဿုဒေဝါ ပတိဗ္ဗတာ;

၃၁၀.

တဿာ ယော ဇာယတိ ပေါသော,သူရော ဟောသ ဒိသမ္ပတိ;

တာဒိသာ သုဘဂိယာ ပုတ္တော,ရဇ္ဇမ္ပိ အနုသာသတိ.

၃၁၁.

သလ္လပေ [Pg.187] အသိဟတ္ထေန, ပိသာစေနာပိ သလ္လပေ;

အာသီဝိသမ္ပိ အာသီဒေ, ယေန ဒဋ္ဌော န ဇီဝတိ;

န တွေဝ ဧကော ဧကာယ, မာတုဂါမေန သလ္လပေ.

၃၁၂.

န [Pg.188] ဟိ သဗ္ဗေသု ဌာနေသု, ပုရိသော ဟောတိ ပဏ္ဍိတော;

ဣတ္ထီပိ ပဏ္ဍိတာ ဟောတိ, တတ္ထ တတ္ထ ဝိစက္ခဏာ.

၃၁၃.

န ဟိ သဗ္ဗေသု ဌာနေသု, ပုရိသော ဟောတိ ပဏ္ဍိတော;

ဣတ္ထီပိ ပဏ္ဍိတာ ဟောတိ, လဟုံ အတ္ထဝိစိန္တိကာ.

၃၁၄.

ကူပေါဒကံ [Pg.189] ဝဋစ္ဆာယာ, သာမာထီ ဣဋ္ဌကာလယံ;

သီတကာလေ ဘဝေ ဥဏှံ, ဥဏှကာလေ စ သီတလံ.

၃၁၅.

ဣတ္ထိယော ဧကစ္စိယာပိ, သေယျာ ဝုတ္တာဝ မုနိနာ;

ဘဏ္ဍာနံ ဥတ္တမာ ဣတ္ထီ, အဂ္ဂူပဋ္ဌာယိကာ ဣတိ.

ပကိဏ္ဏကကဏ္ဍ

၃၁၆.

ကုလသီလဂုဏောပေတော[Pg.191], သဗ္ဗဓမ္မပရာယဏော;

ပဝီဏော ပေသနာဇ္ဈက္ခော, ဓမ္မဇ္ဈက္ခော ဝိဓီယတေ.

၃၁၇.

ဝေဒဝေဒင်္ဂတတွညော, ဇပ္ပဟောမပရာယဏော;

အာသီဝါဒဝစောယုတ္တော, ဧသ ရာဇပုရောဟိတော.

ကပ္ပော [Pg.192] ဗျာကရဏံ ဇောတိ – သတ္ထံ သိက္ခာ နိရုတ္တိ စ;

ဆန္ဒောဝိစိတိ စေတာနိ, ဝေဒင်္ဂါနိ ဝဒန္တိ ဆ.

၃၁၈.

သကိံ ဝုတ္တဂဟိတတ္တော, လဟုဟတ္ထော ဇိတက္ခရော;

သဗ္ဗသတ္ထသမာလောကီ, ပကဋ္ဌော နာမ လေခကော.

၃၁၉.

သမတ္တနီတိသတ္ထညော[Pg.193], ဝါဟနေ ပူရိတဿမော;

သူရဝီရဂုဏောပေတော, သေနာဈက္ခော ဝိဓီယတေ.

၃၂၀.

သုဓီ ဝါကျပဋု, ပညော, ပရစိတ္တောပလက္ခဏော;

ဓီရော ယထာတ္ထဝါဒီ စ, ဧသ ဒူတော ဝိဓီယတေ.

၃၂၁.

ပုတ္တနတ္တဂုဏောပေတော, သတ္ထညော ရသပါစကော;

သူရော စ ကထိနော စေဝ, သူပကာရော သ ဝုစ္စတေ.

၃၂၂.

ဣင်္ဂိတာကာရတတ္တညော, ဗလဝါပိယဒဿနော;

အပ္ပမာဒီ သဒါ ဒက္ခော, ပတီဟာရော သ ဥစ္စတေ.

၃၂၃.

ဣတ္ထိမိဿေ ကုတော သီလံ, မံသဘက္ခေ ကုတော ဒယာ;

သုရာပါနေ ကုတော သစ္စံ, မဟာလောဘေ ကုတော လဇ္ဇာ;

မဟာတန္ဒေ ကုတော သိပ္ပံ, မဟာကောဓေ ကုတော ဓနံ.

၃၂၄.

သုရာယောဂေါ ဝေလာလော စ, သမဇ္ဇစရဏင်္ဂတော;

ခိဍ္ဍာ ဓုတ္တော ပါပမိတ္တော, အလသော ဘောဂနာသကာ.

၃၂၅.

ဇီဝန္တာပိ [Pg.196] မတာ ပဉ္စ, ဗျာသေန ပရိကိတ္တိတာ;

ဒုက္ခိတော ဗျာဓိတိ မူဠှော, ဣဏဝါ နိစ္စသေဝကော.

၃၂၆.

နိဒ္ဒါလုကော [Pg.197] ပမာဒေါ စ, သုခိတော ရောဂဝါလသော;

ကာမုကော ကမ္မာရာမော စ, သတ္တေတေ သတ္ထဝဇ္ဇိတာ.

၃၂၇.

ဂေါဏာဟိ သဗ္ဗဂိဟီနံ, ပေါသကာ ဘောဂဒါယကော;

တသ္မာ ဟိ မာတာပိတူဝ, မာနယေ သက္ကရေယျ စ.

၃၂၈.

ယထာ [Pg.198] မာတာ ပိတာ ဘာတာ, အညေဝါပိ စ ဉာတကာ;

ဂါဝေါ နော ပရမာ မိတ္တာ, ယာသု ဇာယန္တိ ဩသဓာ.

၃၂၉.

အန္နဒါ [Pg.199] ဗလဒါ စေတာ, ဝဏ္ဏဒါ သုခဒါ တထာ;

ဧတမတ္ထဝသံ ဉတွာ, နာသု ဂါဝေါ ဟနိံသု တေ.

၃၃၀.

ယေ စ ခါဒန္တိ ဂေါမံသံ, မာတုမံသံဝ ခါဒရေ;

မတေသု တေသု ဂိဇ္ဈာနံ, ဒဒေ သောတေ စ ဝါဟယေ.

၃၃၁.

ဒွိဂုဏော [Pg.200] ထီနမာဟာရော, ဗုဒ္ဓိစာပိ စတုဂ္ဂုဏော;

ဆဂ္ဂုဏော ဟောတိ ဝါယာမော, ကာမောတွဋ္ဌဂုဏော ဘဝေ.

၃၃၂.

န [Pg.201] လောကေ သောဘတေ မူဠှော, ကေဝလတ္တပသံသကော;

အပိ သမ္ပိဟိတေ ကူပေ, ကတဝိဇ္ဇော ပကာသတေ.

၃၃၃.

ကောသဇ္ဇံ ဘယတော ဒိသွာ, ဝီရိယာရမ္ဘဉ္စ ခေမတော;

အာရဒ္ဓဝီရိယာ ဟောထ, ဧသာ ဗုဒ္ဓါနုသာသနီ.

၃၃၄.

ဝိဝါဒံ [Pg.202] ဘယတော ဒိသွာ, အဝိဝါဒဉ္စ ခေမတော;

သမဂ္ဂါ သခိလာ ဟောထ, ဧသာ ဗုဒ္ဓါနုသာသနီ.

၃၃၅.

ပမာဒံ ဘယတော ဒိသွာ, အပ္ပမာဒဉ္စ ခေမတော;

ဘာဝေထဋ္ဌင်္ဂိကံ မဂ္ဂံ, ဧသာ ဗုဒ္ဓါနုသာသနီ.

၃၃၆.

ဂရဟာ [Pg.203] စ ပသံသာ စ, အနိစ္စာ တာဝကာလိကာ;

အပ္ပကာစေကဒေသာဝ, န တာ ဣက္ခေယျ ပဏ္ဍိတော;

ဓမ္မာဓမ္မံဝ ဣက္ခေယျ, အတ္ထာနတ္ထံ ဟိတာဟိတံ.

ကဝိဒပ္ပဏနီတိ

၁.

ပခုက္ကူပုရသေဋ္ဌဿ[Pg.204], ပစ္ဆိမေ အာသိ ဝိဿုတော;

စတုဂါဝုတဒေသမှီ, ကနရယဂါမော သုသောဘနော.

၂.

ဒွိနော [Pg.205] ဒွိဝေက သာကမှိ, တမှိ ဇာတေန ဇာတိယာ;

လင်္ကာဘာရတအာဒီသု, ဝုဋ္ဌပုဗ္ဗ သုတေသိနာ.

၃.

ဝိသုတာရာမ သီဟာနံ, သိက္ခိတေန တိပေဋကံ;

သန္တိကေ နဝဝဿာနိ, သံဂီတိကိစ္စကာရိနာ.

၄.

ဒက္ခိဏာရာမ ဝါသီနံ, သန္တိကေပိ သုဝိညုနံ;

သိက္ခိတေန သတ္တဝီသ-ဝဿိတွာန ယသဿိနာ.

၅.

သုန္ဒရေ [Pg.206] ပုရသေဋ္ဌမှိ, သုန္ဒရေ ဝိသုတေ သုဘေ;

သုန္ဒရေ ဇောတိပါလမှိ, ဝသတာ ဂဏဝါစိနာ.

၆.

နိဿာယ ပေဋကေ စေဝ, အနေကနီတိ ပေါတ္ထကေ;

ဗဟုလေ ဂန္ထသေဋ္ဌေပိ, ကတောယံ ဝိဓုမာနိတော.

၇.

တိဋ္ဌတံ [Pg.207] အယံ မေ ဂန္ထော, သုသာရော ယာဝ သာသနံ;

တိဋ္ဌတေဝ သုတေသီနံ, သုသာရံ သုပကာသယံ.

၈.

အနေန သုဝိသိဋ္ဌေန, ပုညေနညေန ကမ္မုနာ;

မနိသိဘိဂုရူဟေဝ, ဂစ္ဆေယျံ အမတံ သိဝံ.

‘‘အင်္ဂါရိနော [Pg.210] ဒါနိ ဒုမာ ဘဒန္တေ’’

‘‘ယထာပိ ရမ္မကော မာသော, ဂိမှာနံ ဟောတိ ဗြာဟ္မဏ;

အတေ‘ဝ’ညေဟိ မာသေဟိ, ဒုမပုမ္ဖေဟိ သောဘတိ’’.

‘‘ဝနပ္ပဂုမ္ဗေ [Pg.211] ယထဖုဿိတဂ္ဂေ,ဂိမှာန မာသေ ပဌမသ္မိံ ဂိမှေ’’ –

နမော တဿ ဘဂဝတော အရဟတော သမ္ဗာသမ္ဗုဒ္ဓဿ

ပဏာမ ပဋိညာ

ဝတ္ထုတ္တယံ [Pg.212] နမသိတွာ, အာစေရေ ကဝိပုင်္ဂဝေ;

ကဿံ ဒွါဒသမာသာနံ, ဗန္ဓံ တမ္မာသဝသိကံ.

၁.

စိတ္တသမ္မတမာသော [Pg.213] ဟိ, အတေဝညေဟိ သောဘတိ;

ရမ္မကမာသော ရမ္မမာသော, တေနေဝ ဝေါဟာရော ဘဝိ.

၂.

တသ္မိံ သုစိတ္တမာသမှိ, နာဂဒုမာ သုပုပ္ဖရေ;

ပုပ္ဖန္တိ အသနဒုမာ, ဝါယန္တိ ကာနနေ ဟိ ဝေ.

၃.

သင်္ကန္တ မဟုဿဝေါပိ, တမှိ မာသမှိ ဝတ္တတေ;

ဂန္ဓောဒကေဟိ အညောညံ, သိဉ္စမာနာ သုမောဒရေ.

ယထာပိ [Pg.214] ရမ္မကော မာသော, ဂိမှာနံ ဟောတိ ဗြာဟ္မဏ;

အတေ‘ဝ’ညေဟိ မာသေဟိ, ဒုမပုပ္ဖေဟိ သောဘတိ.

သမ္ဗုဒ္ဓေါ စိတ္တမာသဿ, ကာဠပက္ခေ ဥပေါသထေ;

ပါတောယေဝ သမာဒါယ, ပဝရံ ပတ္တစီဝရံ;

အနုကမ္ပာယ နာဂါနံ, နာဂဒီပမုပါဂမိ.

၄.

ဝေသာခဝှယမာသော တု, သုဝိသိဋ္ဌော သုပါကဋော;

လောကဂ္ဂနာထံ ပဋိစ္စ, သန္တေဟိ အဘိလက္ခိတော.

၅.

တမှိ [Pg.215] ဝေသာခမာသမှိ, စမ္ပကာပိ သုပုပ္ဖရေ;

ဗောဓိံ ဒကေဟိ သိဉ္စိတွာ, သဇ္ဇနာ သမ္ပမောဒရေ.

၆.

ဝနေသုဝ ပေါတကာပိ, ပက္ခန္ဒန္တိ ဒိသောဒိသံ;

ဝိကူဇန္တာ သဘာသာယ, ဇနသောတရသာယနံ.

ဒုတိယေ [Pg.216] ဒိဝသေ ဘတ္တ-ကာလေ အာရောစိတေ ဇိနော;

ရမ္မေ ဝေသာခမာသမှိ, ပုဏ္ဏာမာယံ မုနိဿရော.

၇.

ဇေဋ္ဌသမ္မတမာသောပိ, သောဂတဇနဗ္ဘန္တရေ;

ဝိချာတော လက္ခညော စေဝ, ဇေဋ္ဌေန သံယုတော ဟိ ဝေ.

၈.

တသ္မိံဟိ ဇေဋ္ဌမာသမှိ, သုမနာ ဝနမလ္လိကာ;

ပုပ္ဖန္တိ စ ပဝါယန္တိ, သဗ္ဗဇနမနောဟရာ.

၉.

ပရိက္ခဏာသုသဘာပိ, အဘဝိ မြနမာမဏ္ဍလေ;

ခေတလေ ဇေဋ္ဌဇောတိပိ, ပဇ္ဇလိ တသ္မိဉှိ ဝေ.

၁၀.

အာသာဠှော နာမ မာသောပိ, အတီဝ ဝိသိဋ္ဌော ဘဝိ;

ပဋိသန္ဓိံ ဂဏှိ ဗုဒ္ဓေါ, တသ္မိဉှိ မုနိ သုဓီ.

၁၁.

နိက္ခမိပိ စ သမ္ဗုဒ္ဓေါ, ဓမ္မစက္ကံ ပဝတ္တယိ;

ဥပသမ္ပဒကမ္မမ္ပိ, ကရောန္တိ တသ္မိံပိ ဟိ.

၁၂.

ပုန္နာဂဒုမာ ပုပ္ဖန္တိ, ပဝါယန္တိ ဒိသောဒိသံ;

အာဒိစ္စော တိဋ္ဌတိ တမှိ, ဥတ္တရာယာနကောဋိယံ.

၁၃.

သီဟေ [Pg.219] သာဝဏမာသမှိ, သလာကဒါနမုတ္တမံ;

ဒေန္တိ သာဓဝေါ မာနုသာ, သဒ္ဒဟန္တာ ဝတ္ထုတ္တယံ.

၁၄.

ပုပ္ဖန္တိ ကဋေရုဟာပိ, တမှိ သာဝဏမာသကေ;

ခေ သဝဏနက္ခတ္တမ္ပိ, အတီဝ ဇောတယီ ဟိ ဝေ.

၁၅.

ဝဿဗ္ဘန္တရဘူတေ စ, သမဏာ သုဂတောရသာ;

မာသေ ဝါစနဥဂ္ဂဏှ-ကမ္မံကံသု သုခါသယာ.

၁၆.

ကညာရာသိသမ္မတေဟိ[Pg.221], ပေါဋ္ဌပါဒသုမာသကေ;

နဒီသု ဒကပူရိတာ, ကဋပတ္ထတသာဒိသာ.

၁၇.

နာဝါမဟာဥဿဝမ္ပိ, ကရောန္တိ မာနုဇာ တဒါ;

ကီဠန္တိ သမ္ပမောဒန္တိ, ဝိဇိတေ နရ နာရိယော.

၁၈.

ကဉ္စနယမဒုမာပိ, ဝိကသန္တိ တဒါ ဟိ ဝေ;

မေဃော ထောကံ ထောကံ ဟိမံ, ဝဿတိ ပတတိပိ စ.

၁၉.

ဝဿိကေ [Pg.222] အဿယုဇိမှိ, ဝိကသန္တိ အနေကဓာ;

ပဒုမာဒိဒကဇာနိ, ပုပ္ဖာနိ မနုညာနိ ဝေ.

၂၀.

မဟာပဒီပပန္တီဟိ, သကလမြနမာဘူတလေ;

ပူဇေန္တိ လောကဂ္ဂနာထံ, သာဓဝေါ သောဂတာဇနာ.

၂၁.

တပေါဓနာ ဝိစရန္တိ, ဝဿံဝုဋ္ဌာ ဒိသောဒိသံ;

သာဓဝေါ ဒါနသောဏ္ဍာဝ, သီတာယန္တိ သုခန္တိ စ.

၂၂.

ကတ္တိကမာသသေဋ္ဌေပိ[Pg.223], သမ္ပမောဒန္တိ မာနုဇာ;

ကောသီတကီပုပ္ဖာနိ စ, ဝိကသန္တိ ဝါယန္တိ စ.

၂၃.

ကထိနမဟာဒါနမ္ပိ, ဒဒန္တိ သာဓဝေါ ဇနာ;

တဒါ စန္ဒကိရဏောပိ, အတီဝ ပဇ္ဇောတော အဟု.

၂၄.

အဟောသိ ဟိမပါတော စ, ဥတ္တရဝါတော ပဝါယတိ;

ကတ္တိကဇောတိဆဏောပိ, အဟောသိ တသ္မိဉှိ ဝေ.

၂၅.

ဓနုရာသီမာဂသိရ[Pg.224], မာသေ ဟေမန္တသမ္မတေ;

သတ္တိဓရသုပူဇာဝှ, သဘာပိ သမ္ပဝတ္တိတာ.

၂၆.

ဒေဝသမ္မတပုပ္ဖာနိ, မနုညရုစိရာနိပိ;

ပုပ္ဖန္တိ တမှိ မာသမှိ, ဟိမပါတော အဟောသိ စ.

၂၇.

ဝီဟယော ဟောန္တိ ပက္ကာ စ, ခေတ္တေသု မြနမာဘူတလေ;

မိဂသိရနက္ခတ္တမ္ပိ, ဇောတေတိ အာကာသင်္ဂဏေ.

၂၈.

မကာရေ [Pg.225] ဖုဿမာသေပိ, ပုပ္ဖန္တိ ပဝါယန္တိ စ;

သုနီလဝလ္လိပုပ္ဖာနိ, ဇနမနောဟရာနိပိ.

၂၉.

သေနာဗျူဟမ္ပိ [Pg.226] ကရောန္တိ, ဘူပါလာ မြနမာရဋ္ဌိကာ;

သပရိသာ ဥဒိက္ခန္တိ, ဟတ္ထိအဿာဒိအာဒယော.

၃၀.

တမှိသီ အတိသီတလမ္ပိ, ဒက္ခိဏာယနကောဋိယံ;

အဋ္ဌာပုဏ္ဏမဒိနမှိ, သူရိယော လောကမာနိတော.

ဗောဓိတော နဝမေ မာသေ, ဖုဿပုဏ္ဏမိယံ ဇိနော;

လံကာဒီပံ ဝိသောဓေတုံ, လင်္ကာဒီပမုပါဂမိ.

၃၁.

ကုမ္ဘေသု [Pg.227] မာဃမာသေဟိ, တူလဒုမာ သုပုပ္ဖရေ;

ပုမ္တာလာ မဓုရရသံ, မာနုဇာနံ ဒဒန္တိ စ.

၃၂.

ယာဂုမဟာဥဿဝေါပိ, ပါကဋော မြနမာဘူတလေ;

အဝသေသသု မေဃောပိ, ထနယံ အဘိဝဿတိ.

၃၃.

နရနာရီ မနုညာနိ, ပဒရာနိ ပဏ္ဍာနိ စ;

ပုစိမန္ဒဒုမာ နဝ-ပတ္တာနိ ဓာရေန္တိပိ စ.

၃၄.

မိနေ [Pg.228] ဖဂ္ဂုဏမာသမှိ, သုရဘိဂန္ဓိကာ သုဘာ;

ပုပ္ဖန္တိ ဝနမှိ ဒုမာ, နဝပတ္တေဟိ သောဘရေ.

၃၅.

ဒက္ခိဏဒေသတော တမှိ, ဝါတော ပဝါယတိ ဟိ ဝေ;

ဝါဠုကပိဋ္ဌေ ဝါလုက-ထူပေ ကတွာန ပူဇယျုံ.

၃၆.

ပထမဂိမှ မာသမှိ, နာနာဒုမာတိ ပုပ္ဖရေ;

တေန သဗ္ဗမ္ပိ ဝိပိနံ, ဝိစိတ္တံ ဒဿနိယဉှိ ဝေ.

ဝိသုတေ ဇောတိပါလမှိ, ဝိသုတမှိ နိကေတနေ;

ဝသတာ နေကဂန္ထာနံ, လေခကေန ကတော အယံ.