နမော တဿ ဘဂဝတော အရဟတော သမ္မာသမ္ဗုဒ္ဓဿ
ပဇ္ဇမဓု
အာနန္ဒ ရည ရတနာဒိ မဟာ ယတိန္ဒ,နိစ္စပ္ပဗုဒ္ဓ ပဒုမပ္ပိယ သေဝိနင်္ဂီ;
ဗုဒ္ဓပ္ပိယေန ဃန ဗုဒ္ဓ ဂုဏပ္ပိယေန,ထေရာလိနာ ရစိတ ပဇ္ဇမဓုံ ပိဗန္တု.
၁.
ဥဏ္ဏာပပုဏ္ဏသသိမဏ္ဒလတော ဂလိတွာ,ပါဒမ္ဗုဇင်္ဂုလိ ဒလဋ္ဌ သုဓာ လဝါနံ;
ပန္တီဝ သတ္ထု နခပန္တိ ပဇာဝိသေသံ,ပီဏေတု သုဒ္ဓ သုခိတမ္မဏ တုဏ္ဍပီတာ.
၂.
ခိတ္တာယ မာရရိပုနာ ပရိဝတျ သတ္ထု,ပါဒဿယာ ဇိတ ဒိသာယ သိတတ္တလာယ;
ယာ ဇေတိ ကဉ္စန သရာဝလိယာ သိရိံ သာ,ဒေတန္ဂိနံ ရဏဇယင်္ဂုလိပန္တိကန္တာ.
၃.
သောဝဏ္ဏ ဝဏ္ဏ သုခုမစ္ဆဝိ သောမ္မ ကုမ္မ,ပိဋ္ဌီဝ ပိဋ္ဌိ ကမတုန္နတိ ဘာတိ ယေသံ;
တေသုပ္ပတိဋ္ဌိတသုကောမလဒီဃပဏှိ,ပါဒါ ဇိနဿ ပဒဒန္တု ပဒံ ဇနဿ.
၄.
အစ္ဆေရ ပင်္ကဇသိရံ သိရိယာ သကာယ,ယေ မဒ္ဒိနော ဝိယ စရန္တိ သရောဇ သီသေ;
သဉ္စုမ္ဗိတာ ဝိယ စ တာနိ ပရာဂ ရာဂါ,တေ နီရဇာ မုနိပဒါ ပဒဒန္တု လက္ခိံ.
၅.
အဂါမိ ကာလ ဇန မင်္ဂလ ဘတ္တု ဘာဝံ,ဝျာကတ္တုမတြ ကုသလေနိဝ နိမ္မိတာနိ;
ယာတြာသုမဋ္ဌသတမင်္ဂလက္ခဏာနိ,သာဓေတု နံ ပဒယုဂံ ဇယမင်္ဂလာနိ.
၆.
သဿေဝိဇန္တုဝရသန္တိပုရပ္ပဝေသေ,နိစ္စံ သုသဇ္ဇ ဌပိတာနိဝ မင်္ဂလာယ;
ယေ တေ ဒဓန္တိ ကလမင်္ဂလလက္ခဏာနိ,ဝတ္တန္တု တေ ဇိနပဒါ ဇယမင်္ဂလာယ.
၇.
သဗ္ဗေဘိဘူယ သပဒေသု နိပါတနဿ,သညာဏကံ ဝိယ ယဒဿိတသဗ္ဗလောကော;
ပါဒါတျဓောကတတိလောကသိရောဝရာ ပိ,လောကံ ပုဏန္တု ဇယမင်္ဂလကာရဏာနိ.
၈.
လောကတ္တယေကသရဏတ္တဝိဘာဝနာယ,သဇ္ဇော ဝ တိဋ္ဌတိ ယဟိံ သုဝိဘတ္တလောကော;
တံ သဗ္ဗလောကပဋိဗိမ္ဗိတဒပ္ပဏာဘံ,ပါဒဒွယံ ဇနသုသဇ္ဇနဟေတု ဟောတု.
၉.
လောကုတ္တရာယ သိရိယာဓိဂမာယ သုဋ္ဌု,ရဇန္တိ ယတ္ထ ဒိဂုဏာနိဝ ပါတု ဘူတာ;
စက္ကာသနာဘိသဟနေမိသဟဿရာနိ,တျင်္ဃီ ဒိသန္တု သကလိဿရိယံ ဇနဿ.
၁၀.
ယတြုလ္လသန္တိ ဒုဝိဓာနိဝ ပါတူ ဘူတာ,ဓမ္မဿသဗ္ဗဘုဝနဿ စ ဣဿရတ္တေ;
စက္ကာနိ စက္ကသဒိသာနိ သုဒဿနဿ,တာနဇ္ဇ ဇန္တု သရဏာ စရဏာနိ ဟောန္တု.
၁၁.
သတ္တေသု ဝစ္ဆတု သိရီ သိရိဝစ္ဆကေန,သောဝတ္ထိ သောတ္ထိမနုတိဋ္ဌတု ပုဂ္ဂလေသု;
နန္ဒိံ ဇနာနမနုဝတ္တတု နန္ဒိဝတ္တီ,သီသာနလံကုရုတု ပါဒဝတံသကော ပိ.
၁၂.
ဘဒ္ဒါယ ပီဌမုပဂစ္ဆတု ဘဒ္ဒပီဌံ,ဝုဒ္ဓိံ ဇနာနမနုဝတ္တတု ဝဒ္ဓမာနံ;
ပုဏ္ဏတ္တမင်္ဂိမနုကုဗ္ဗတု ပုဏ္ဏကုမ္ဘော,ပါတိ စ ပါတု သတတံ ဇနတံ အပါယာ.
၁၃.
သေတာတပတ္တမပနေတမဃာတပေ တံ,ခဂ္ဂေါ ဝိဆိန္ဒတု သဒါ ဒုရိတာရိဝဂ္ဂေ;
သံက္လေသဒါဟမပနေတု သတာလဝဏ္ဋ,သံဝီဇနီ ကုမတိမက္ခိကမောရဟတ္ထော.
၁၄.
အာကဍ္ဎနော ဇနဝိလောစနမတ္တနိန္နံ,ဝါရေတု သဗ္ဗဂတိဝါရနမင်္ကုသော သော;
ပါဒမ္ဗုဇဿိရိဝိလာသနိကေတနံ ဝ,ပါသာဒလခဏမုပေတု မနောပသာဒံ.
၁၅.
ပါဏီနမတ္တဘဇတံ ဝရပုဏ္ဏပတ္တံ,သမ္မာ ဒဒါတု ပဒနိဿိတပုဏ္ဏပတ္တော;
ပါဒေသု ဇန္တု မနဗန္ဓနဒါမဘူတံ,ဒါမံ ဒမေတု ဝိမလံ ဇနတမ္မနာနိ.
၁၆.
ဥဏှီသကုပ္ပလမဏီပဒုမေဟိ ပါဒါ,သဿေဝိဇန္တုကရဏာနိ ဝိဘူသယန္တု;
သန္နေတ္တနာဝုပဂတာနမနဂ္ဃကာနိ,ဗောဇ္ဈင်္ဂသတ္တရတနာနိ ဒဒေ သမုဒ္ဒေါ.
၁၇.
ဥတ္တုင်္ဂ နိစ္စလဂုငါ ဇိတတာယ နိစ္စံ,သေဝီဝ ပါဒသိရိ နိစ္စ သမုဗ္ဗဟံ ဝ;
အတြာပိ သက္ကဘဝနုဗ္ဗဟဏေ နိယုတ္တော,ပါဒဋ္ဌမေရု ဘဝတံ ဘဝတံ ဝိဘူတျာ.
၁၈.
သော စက္ကဝါဠသိခရီ ပျဝတံ သမန္တာ,သဗ္ဗူပသဂ္ဂဝိသရာဇနတံ သမဂ္ဂံ;
ဒီပါ ပုထူပိ စတုရော ဒွိသဟဿ ခုဒ္ဒါ,ဓာရေန္တွပါယပတမာနမဒတွ ဇန္တုံ.
၁၉.
သူရော ပဗောဓယတု ဇန္တု သရောရုဟာနိ,စန္ဒော ပသာဒ ကုမုဒါနိ မနောဒဟေသု;
နက္ခတ္တဇာတမခိလံ သုဘတာယ ဟောတု,စက္ကံ ဓဇံ ရိပုဇယာယ ဇယဒ္ဓဇာယ.
၂၀.
ဇေတုံ သသံသဒ-သုဒဿန-စက္ကဝတ္တိ,စက္ကာနုဂန္တလလိတံ ယဟိမာဝဟေယျ;
စက္ကာဏုဝတ္တိ ပရိသာဝတ-စက္ကဝတ္တိ,နံဝတ္တတံ ပဒယုဂံ ဇနတာ ဟိတာယ.
၂၁.
ပုဇေတုမာဂတ ဝတာ ဝဇိရာသနဋ္ဌ,မိန္ဒေန ဆဍ္ဍိတ မဟာဝိဇယုတ္တရာချံ;
သံခံ ပဝိဋ္ဌမိဝ မာရဘယာ ပဒါဓော,ပါဒဋ္ဌသံခမိဟ ဝတ္တတု သန္တိယာ ဝေါ.
၂၂.
သောဝဏ္ဏမစ္ဆယုဂလံ သိဝဘတ္တ ဘောဂေ,ဣစ္ဆာ ဗဟူပကရဏံ ဘဝတံ ဇနာနံ;
ကုမ္ဘီလဓိဂ္ဂဟိတတော ဝ ပဒုတ္ထစိတ္တာ,ပါဒမ္ဗုဇာကရ ဝိဂါဟိ တု နောပဟောန္တု.
၂၃.
သတ္တာပဂါ ဇနမနောဇ မလေ ဇဟန္တု,သံက္လေသဒါဟမပနေန္တု ဒဟာ စ သတ္တ;
သေလာ စ သတ္တ ဝိဒဓန္တု ဇနဿ တာနံ,လောကပ္ပသိဒ္ဓိဇနနေ ဘဝတံ ပတာကာ.
၂၄.
ပါဋင်္ကိ သန္တိ ဂမနေ ဘဝတူပကာရာ,ဒါဟေတ္တနေသု ဇဟတံ ပဒစာမရံ တံ;
သလ္လောကလောစနမဟုဿဝ-ဥဿိတံ ဝ,ဝတ္တေယျ တောရဏမနုတ္တရမင်္ဂလာယ.
၂၅.
ယသ္မိံ မိဂိန္ဒ ဂတ ဘီတိ ဗလာဝ ဒဍ္ဎ,ဒါနာ နတာ သိရဝိဒါရဏ ပီဠိတာဝ;
နာလာဂိရီ ကရိဝရော ဂိရိမေခလော စ,တံ သီဟဝိက္ကမပဒံ ဟနတာ ဃဒန္တိံ.
၂၆.
ပါပါဟိနော ဟနတု ပါဒသုဝဏ္ဏရာဇာ,ဝျဂ္ဃာဓိပေါ ကလိဇနေ အဒတံ အသေသံ;
ဝါလာဟ-အဿပတိ သမ္ပတိတုံ အဒတွာ,ပါယေသု ပါပယတု သန္တိပုရမ္ပဇာယော.
၂၇.
ဆဒ္ဒန္တ ဒန္တိ လလိတံ ဂလိတံ ရုသမှာ,လုဒ္ဒေတ္တ ဒုဗ္ဘိနိ ဒိသေ အစလံ ဒဓာနော;
ပါဒဋ္ဌဟတ္ထိပတိ သမ္ပတိ ဇန္တုတာသေ,တာသေတု ဟာသမပရန္ဒိသတံ သတာနံ.
၂၈.
သဗ္ဗင်္ဂိနော စရဏုပေါသထ ဟတ္ထိရာဇာ,ပါပေတု သဗ္ဗစတုဒီပိကရဇ္ဇလက္ခိံ;
ကိတ္တီဝ ပါဒပရိစာရိကတာ နိယုတ္တာ,ကေလသသေလပဋိမာ ဟိတမာစရေယျ.
၂၉.
သာမိဿ ဟံသသမယေ ဒဟပါသဗဒ္ဓ,မာသီန ဝေသဂမကော ဝိယ ပါဒဟံသော;
နိဂ္ဃောသ ဂန္တိဇိတတော ဝိယ မူဂပက္ခော,ယာရေတု သဗ္ဗ ဇနတာ ဘဝဂန္တုကတ္တံ.
၃၀.
ဩဟာယ ဒိဗ္ဗသရသိံ ခိလလောက သဗ္ဗ,ရမ္မင်္ဃိဝါပိမဝဂါဟိတဝါဝ ပါဒေ;
ဧရာဝဏော ကရိဝရော မနသာဘိရုဠှေ,ဇန္တုံ ပုရိန္ဒဒပုရံ နယတံ ဝ သီဃံ.
၃၁.
ဟိတွာ သကမ္ဘဝနမင်္ဃိနိသေဝနတ္ထ,မာဂမ္မ ရမ္မ တရတာယိဟ နိဿိတော ဝ;
ပါလေတွ မူနိ ပဒဝါပိတရင်္ဂဘင်္ဂိ,မန္ဂီ ကရောန္တတနုဝါသုကိ နာဂရာဇာ.
၃၂.
နာထဿ ကဉ္စနသိခါဝလဇာတိလီလ,မာဝိကရံ ဝ ပဒနိဿိတမောရရာဇာ;
တံ ဓမ္မဒေသနရဝေနိဝ လုဒ္ဒကဿ,လောကဿ ပါပဖဏိနော ဟနတံ အသေသံ.
၃၃.
သံသာရသာဂရဂတေ သဓနေ ဇနေ တေ,နေတမ္ပဒေ ကလစတုမ္မုခဟေမနာဝါ;
နိဗ္ဗာဏပဋ္ဋနဝရံ ဘရုကစ္ဆကန္တံ,သုပ္ပာရပဏ္ဍိတ ဂတာ ဝိယ အာသုနာဝါ.
၃၄.
သမ္ဗောဓိ ဉာဏ ပရိပါစယတော မုနိဿ,ဘတ္တော ယထာ ဟိမဝတဒ္ဒိ သမာဓိဟေတု;
ဧဝမ္မနေန ဘဇတံ ဟိမဝဒ္ဒိပါဒေ,သမ္ဗောဓိဉာဏ ပရိပါစနဟေတု ဟောတု.
၃၅.
ဒဠှံ ပရာဇိတတယာ မုနိနာ သရေန,သုညဿရောပဂတ ပဉ္ဇရ ဗန္ဓနောဝ;
သော ပါဒပဉ္ဇရဂတော ကရဝီကပက္ခီ,သဗ္ဗေသမပ္ပီယာဝစဉ္ဇဟတာ ဘဝန္တံ.
၃၆.
တေ စက္ကဝါက မကရာ အပိ ကောဉ္စ ဇီဝံ,ဇီဝါဒိ ပက္ခိဝိသရာ သရသီဝ ဘုတ္တံ;
ဝေဿန္တရေန စရဏမ္ဗုဇိ နိဗ္ဘဇန္တာ,ဇန္တု တဟိံ ဝိယ ပဒေ သုရမေန္တု နိစ္စံ.
၃၇.
တံ စန္ဒကိန္နရဂတိံဝ ဂတဿ ဗောဓိ,သတ္တဿ တဿ သပဇာပတိကဿ ဘာဝံ;
သံသူစယန္တ ပဒ ကိန္နရ ကိန္နရီ ဝေ,သာမဂ္ဂိမဂ္ဂ ပဋိ ပတ္တိသု ပါပယန္တု.
၃၈.
သံရာဇဓာနိမုသဘော ဝဟတဂ္ဂ ဘာရံ,ပီတိပ္ပယော ပဇနယေယျ သဝစ္ဆဓေနု;
သဿေဝိနော အဘိရမေန္တု ဆကာမသဂ္ဂါ,ဓာရေန္တု ဈာယိမိဟ သောဠသ ဓာတုဓာမာ.
၃၉.
သုတွာ ဇိနဿ ကရဝီက သရမ္မနုညံ,အညောည ဘီတိရဟိတာ အပိ ပစ္စနီကာ;
ဟိတွာ ဂတိံ ဝိယ ဌိတာ ပဒသတ္တရူပါ,သဗ္ဗံ ဘဝဿိတ ဇနာနဂတိံ ဟနန္တု.
၄၀.
သောဝဏ္ဏ ကာဟဠ ယုဂေါ ပမမိန္ဒိရာယ,သန္နီရပုပ္ဖ မုကုလောပမမုဿဝါယ;
နိစ္စံ သုသဇ္ဇ ဌပိတံ မုနိ တိဋ္ဌတန္တေ,ဇင်္ဃာဒွယံ ဇနဝိလောစန မင်္ဂလာယ.
၄၁.
လချာ ဝိလာသ မုကုရဒွယ သန္နိကာသံ,တာဍင်္က မဏ္ဍန ဝိဍမ္ဗကမံသု သဏ္ဍံ;
ဇာနုဒွယံ လဠိတ သာဂရ ဗုဗ္ဗလာဘံ,ဟောတံ ဇဂတ္တယ နိဇတ္တ ဝိဘူသိတုန္တေ.
၄၂.
ဆဒ္ဒန္တိ ဒိန္န ဝရဒန္တ ယုဂေါပမာနာ,တံ ဟတ္ထိ သောဏ္ဍ ကမ ပုဏ္ဏ ဂုဏာ တဝေါရူ;
လီလ ပယောဓိ သိရိ ကေဠိ သုဝဏ္ဏရမ္ဘာ,ခန္ဓာဝ ဒေန္တု ပရိပုဏ္ဏ ဂုနေ ဇနာနာံ.
၄၃.
ဇင်္ဃက္ခ ကဒွျ သမပ္ပိတ စိတ္တပါဒ,စက္ကဒွယီ မနမနောဇဟယော မုနေ တေ;
သောနီ ရထော သိရိဝဟော မနသာ ဘိရုဠှံ,လောကတ္တယံ သိဝပုရံ လဟု ပါပယာတု.
၄၄.
ရမ္မောရ ပါကဋ တဋာက တဋာ သဝန္တ,ရောမာဝလီ ဇလ ပနာလိက ကောဋိကဋ္ဌာ;
နာဘီ ဂဘီရ သရသီ သိရိ ကေဠိတာ တေ,သဿေဝိနံ ဝျသန ဃမ္မမလံ သမေတု.
၄၅.
ကန္တိစ္ဆဋာ လုဠိတ ရူပ ပယောဓိ နာဘိ,အာဝဋ္ဋ ဝဋ္ဋိတ နိမုဇ္ဇိတ သဗ္ဗလောကော;
သောဘဂ္ဂ တောယ နိဝဟံ ဝိသသော ပိဝိတွာ,လောကုတ္တရာဒိ သုခ မုစ္ဆိတတံ ပယာတု.
၄၆.
ဂမ္ဘီရ စိတ္တရဟဒံ ပရိပူရယိတွာ,တံ သန္ဒမာန ကရုဏမ္ဗု ပဝါဟ တုလျာ;
ရောမာလိဝလ္လိဟရိ နာဘိ သုဘာလဝါလာ,ဒေတံ လဟုံ သိဝဖလံ ဘဇတံ မုနေ တေ.
၄၇.
စာရူရ သာရိဖလကော ကုဋိလဂ္ဂ လောမ,ပန္တီ ဝိဘတ္တိ သဟိတော သိရိ ကေဠိ သဇ္ဇော;
သဂ္ဂါပဝဂ္ဂ သုခ ဇူတက ကေဠိ ဟေတု,ဟောတံ တိလောက သုခ ဇူတက သောဏ္ဍကာနံ.
၄၈.
ဂမ္ဘီရ စိတ္တ ရဟဒေါ ဒရ ဂါဟမာန,မေတ္တာဒယာ ကရိ ဝဓူ ကရ သန္နိ ကာသာ;
သဗ္ဗင်္ဂိနံ သိဝဖလံ တနု ဒေဝ ရုက္ခေ,သာခါ သခါ တဝ ဘုဇာ ဘဇတံ ဒဒန္တု.
၄၉.
နိဟာရ ဗိန္ဒု သဟိတဂ္ဂဒလောပ သောဘိ,ဗျာလမ္ဗ ရတ္တ ပဒုမဒွယ ဘင်္ဂိ ဘာဇာ;
ပါပါရိသီသလုနတေနိဝ ရတ္တ ရတ္တာ,ရတ္တာ ကရာ တဝ ဘဝုမ္ဘုဝိ မင်္ဂလာယ.
၅၀.
ရုပဿိရီ စရိတ စင်္ကမ ဝိဗ္ဘမာ တေ,ပိဋ္ဌီ ယထာ ကလလ မုဒ္ဓနိ သေတု ဘူတာ;
ဧဝံ ဘဝဏ္ဏဝ သမုတ္တရဏာယ သေတု,ဟောတမ္မဟာကနက သံကမ သန္နိကာသာ.
၅၁.
သဒ္ဓမ္မ ဒေသန မနောဟရ ဘေရိနာဒ,သံစာရဏေ သိဝပုရံ ဝိသိတုံ ဇနာနံ;
ဂီဝါ သုဝဏ္ဏမယ စာရု မုတိင်္ဂ ဘေရိ,ဘာဝမ္ဘဇာ ဘဝတု ဘူတ ဝိဘူတိယာ တေ.
၅၂.
လခီ နိဝါသ ဝဒနမ္ဗုဇ မတ္တ နိန္န,မာကဍ္ဎယံ ဇန ဝိလောစန စဉ္စရီကေ;
သောရဗ္ဘ ဓမ္မ မကရန္ဒ နိသန္ဒမာနံ,ပိဏေတု တေန သရသေန သဘာ ဇနေ တေ.
၅၃.
လခီ သမာရုဟိတ ဝတ္တရထေ ရထင်္ဂ,ဒွန္ဒာနု ကာရိ မိဂ ရာဇ ကပေါလ လီလံ;
တာဒင်္က မဏ္ဍလယုဂံ ဝိယ ကဏ္ဏဘာဇံ,ဂဏ္ဍတ္ထလဒွျမလံကုရုတံ ဇနတ္တေ.
၅၄.
လာဝဏ္ဏ မဏ္ဏဝ ပဝါဠ လတာ ဒွယာဘံ,တန္ဒေဟ ဒေဝ တရု ပလ္လဝ ကန္တေ မန္တံ;
ဝတ္တာရဝိန္ဒ မကရန္ဒ ပရာဇိသောဘံ,ရတ္တာဓရဒွယမဓော ကုရုတံ ဇနာဃံ.
၅၅.
ဥဏ္ဏာ သကုန္တိဂတ မတ္ထက နတ္ထု ကူပ,သုဗ္ဘူ လကာရ သဟိတောဋ္ဌ ပဝါဠ နာဝါ;
ဂတ္တုတ္တရရဏ္ဏဝ ဂတာ တဝ ဇန္တုကာနံ,ဟောတံ ဘဝဏ္ဏဝ သမုတ္တရနယ နာထ.
၅၆.
ဣသံ ဝိကာသ ပဒုမောဒရ ကေသရာလိ,လီလာ ဝိနဒ္ဓ ရုစိရာ တဝ ဒန္တ ပန္တိ;
ဝါနီ ဝဓူ ဓရိတ မာလတိ မာလျ တုလျာ,တဿံ ဇာနဿ မနရဉ္ဇန မာစရေယျ.
၅၇.
သဒ္ဓမ္မ နိဇ္ဈရ သုရတ္တ သိလာတလာဘာ,ဇိဝှာ ဝစီ နဋ ဝဓူ ကလ ရင်္ဂ ဘူတာ;
သဒ္ဓမ္မ သေဋ္ဌ တရဏီ နိဟိတပ္ပိယာ တေ,သံသာရ သာဂရ သမုတ္တရဏာယ ဟောတု.
၅၈.
ဒန္တံသု ကဉ္စုကီတ ရတ္တဓရော ပဓာနေ,ဇိဝှာ သုရတ္တ သယနေ မုခ မန္ဒိရဋ္ဌေ;
အာမောက္ခ မုတ္တိ ဝဓုယာ သယိတာယ တုယှံ,ကုဗ္ဗန္တု သံဂမ မလံ ဇန သောတု ကာမိ.
၅၉.
ဥဏ္ဏာ တထာဘိနဝ ပတ္တ ဝရာဘိ ရာမာ,လီလောလ္လသန္တ ဘမုကဒွယ နီလ ပတ္တာ;
ဃာနောရု စာရု ကဒလီ ဝဒနာ လဝါလာ,တုယှံ ပဝတ္တတု စိရံ ဇန မင်္ဂလာယ.
၆၀.
ဗာလတ္ထလီ ဟရိ သိလာတလ ပိဋ္ဌိကဋ္ဌ,ဘူဝလ္လရိဒွယ မယူရ ယုဂဿ တုယှံ;
ပဉ္စပ္ပဘာ ရုစိရ ပိစ္ဆ ယုဂဿိရီကံ,နေတ္တဒွယံ မနသိ ပုဉ္ဆတု ပါပဓူလိံ.
၆၁.
ဣန္ဒီဝရာန္တဂတ ဘိင်္ဂိက ပန္တိ ဘင်္ဂိ,ပဉမ္ဗုဇဿရတတေ ဝိယ ဂစ္ဆပန္တီ;
နေတ္တမ္ဗုဇဿိရိ တိရောကရဏီဝ တုယှံ,ပမှာဝလီ သိရိဂတေဟ တိရော ကရောန္တု.
၆၂.
ဝတ္တုလ္လသမ္ဗုဇ ဝိလောစန ဟံသ တုဏ္ဍ,ကဉ္ဇံသု ပိဉ္ဇရ မုလာလ လတာ ဒွျာဘံ;
ဒေါလာဒွယံဝ သဝဏဒွျမတ္တ လက္ချာ,ဟောတံ တဝဇ္ဇ ဇနတာ မတိစာရဟေတု.
၆၃.
ဝမ္မီက မတ္ထက သယာနက ဘူရိဒတ္တ,ဘောဂိန္ဒ ဘောဂဝလိ ဝိဗ္ဘမမာ ဝဟန္တိ;
ဃာနောပရိဋ္ဌိတမုနေ တဝ တုဏ္ဏမုဏ္ဏာ,တဂ္ဂါဟိနော ဝိယ ဇနဿ ဒဒါတု ဝိတ္တံ.
၆၄.
ရူပိန္ဒိရာယ ဝိဇယေ ခိလ လောက ရူပံ,ဃာဏောရု စာရု ပရိဃောပရိ ဗဒ္ဓ သိဒ္ဓါ;
နီလာဘ ဝါတ ဝိလုထန္တ ဝယဒ္ဓဇာဘာ,တိဋ္ဌန္တု သဇ္ဇ ဒုရိတာရိ ဇယာယ တေ ဘူ.
၆၅.
ဥဏ္ဏဿိတောပလ နိဝေသိတ ဗုန္ဒ သန္ဓိ,ဃာဏောရု ပိဏ္ဍကမဃာ တပ ရုန္ဓိတုန္တေ;
ဟောတမ္မုခမ္ဗုဇ သိရီ သိရသုဿိတာဘံ,ဘူ နီလ ပဋ္ဋိက လလာတ သုဝဏ္ဏ ဆတ္တံ.
၆၆.
ရုပင်္က ဝေဒန ဝိလောစန ဗာန ဒိဋ္ဌီ,ဓာရာ နိသာန မဏိဝဋ္ဋ သိရီ သိရော တေ;
သိဒ္ဓါ မတောသဓ ကတဉ္ဇန ပုဉ္ဇ လက္ခီ,ဟောတံ ဇနဿ နယနာမယ နာသနာယ.
၆၇.
သက္ခန္ဓ ဗာဟုယုဂ တောရန မဇ္ဈ ဂီဝါ,ဓရပ္ပိတဿိရိဃတော ပရိ မုဿဝါယ;
နီလုပ္ပလာဝ ဌပိတာ သဝိဘတ္တိ ကန္တေ,ကေသာ ဘဝန္တု ဘုဝနတ္တယ မင်္ဂလာယ.
၆၈.
ဟေမဂ္ဃိယေ ဌပိတ နီလ သိလာ ကပါလေ,ပဇ္ဇောတ ဇာလ လလိတံ မုနိ သာရယန္တီ;
ရူပဿိရီ သိရသိ ဘူသိတ ဟေမ မာလာ,ကာရာ ကရောတု သုဘဂံ တဝ ကေတု မာလာ.
၆၉.
ဘျာမပ္ပဘာလိ တဝ ကဉ္စန မောရ ကာလေ,သုရောဒယေ ဝိတတ စန္ဒက စက္ကလက္ခီ;
မေဃာဝနဒ္ဓ သိခရုန္နတ ဟေမ သေလာ,ယန္တိန္ဒစာပ ဝိကတီဝ ဒဒါတု သောဘံ.
၇၀.
ပဋ္ဌာယ တေ ပဏိဓိတော သုစိ ဒါန သီလ,နေက္ခမ္မ ပည ဝိရိယက္ခမ သစ္စဓိဋ္ဌာ;
မေတ္တာ ဥပေက္ခိတိ ဣမေ ဒသ ပူရတောဝ,ပူရေန္တု ပါရမိ ဂုဏာ ဇနတာနမတ္တေ.
၇၁.
ပတ္တုတ္တရုတ္တရဒသာ ပဏိဓာန ဗီဇာ,စေတောရဓရာယ ကရုဏာ ဇလ သေခ ဝုဒ္ဓါ;
သဗ္ဗညု ဉာဏ ဖလဒါ သတိ ဝါဋ ဂုတ္တာ,တံ သမ္ဖလန္ဒိသတု ပါရမိတာ လတာ တေ.
၇၂.
အာဗောဓိ ပုဏ္ဏမိ ပဒိဋ္ဌ ဒိနာဒိတော တေ,သမ္ဘာရ ကာလ သိတ ပက္ခ ကမာဘိ ဝုဒ္ဓေါ;
သမ္ပုဏ္ဏ ပါရမိ ဂုဏာမတရံသိ တံဝ,သဗ္ဗင်္ဂိ ကုန္ဒ ကုမုဒါနိ ပဗောဓယေယျ.
၇၃.
အာပစ္ဆိမဗ္ဘဝ သိဝပ္ဖလ လာဘ ဒါနာ,ဒါနပ္ပဗန္ဓမပိဒါန ဖလပ္ပဘန္ဒံ;
သံဝဍ္ဎယိ တွံ အဘိပတ္ထနတော ယထေဝံ,ဇန္တုတ္တရုတ္တရ ဖလံ ခလု သမ္ဘုနန္တု.
၇၄.
အာရမ္ဘတောပ္ပဘုတိ ယာဝ တဝဂ္ဂမဂ္ဂါ,ဝိက္ခာလိတ ဃကလုသံ သုစိ သီလ တောယံ;
မေတ္တာ ဒယာ မဓုရ သီတလတာယုပေတံ,သောဓေတု တွံဝ ဘဝ နိဿိတ ဇန္တု မေတံ.
၇၅.
အာပစ္စိမတ္တမဘိနိက္ခမနာဘိယောဂါ,ပဋ္ဌာယ တမ္ပဘဝတော ပရိပုဏ္ဏ ဂေဟာ;
တွံ သဗ္ဗ ဇာတိ ဂဟတော အပိ နိက္ခမိတ္ထော,ဧဝံ ဇနာ ဘဝ ဒုခါ ခလု နိက္ခမန္တု.
၇၆.
ဧကဂ္ဂတော ပလ တလေ နိသိတာ စိရန္ဓိ,ဓာရာ သုစိတ္တု သုတလေ သတိ ဒဏ္ဍ ဗဒ္ဓေ;
နိဗ္ဗိဇ္ဈိ လက္ခဏ ဓနုဋ္ဌိတိ သန္တိ လက္ခံ,ခိတ္တာ တယောနမနု ဝိဇ္ဈတု ဇန္တု ခိတ္တာ.
၇၇.
တွံ ပါရမီ ဇလ နိဓိံ စတုရိဟ ဗာဟု,သတ္တီဟိ သုတ္တရိ စိရံ ဇနကောဝ သိန္ဓုံ;
သမ္ပန္န ဝိက္ကမ ဖလောသိ ယထာ စသောဝ,ဧဝံ ဇနာ ဝိရိယတပ္ဖလမေ ဓယန္တု.
၇၈.
သတ္တ ပရဓ ဒဟနေသု စိရံ သုဓန္တံ,ခန္တီ သုဝဏ္ဏ ကတ ရူပ သမန္တိမတ္တာ;
သဗ္ဗာ ပရာဓမသဟိ တွံအသယှမေဝံ,သဗ္ဗေ ဇနာပိ ခမနေန ဘဇန္တု သန္တိံ.
၇၉.
လက္ခာဓိကံ စတုရ သံခိယ ကပ္ပ ကာလံ,သစ္စေန သုဋ္ဌု ပရိဘာဝိတ ဝါစိနော တေ;
ဝါစာယ သစ္စ ဖုသိတာယ သမေန္တိ ဇန္တု,ဧဝံ ဝိသုဒ္ဓ ဝစနာ ဇနတာ ဘဝန္တု.
၈၀.
အာဒိန္န ဓမ္မ မဟိယတ္ထိရ သုပ္ပတိဋ္ဌာ,ဓိဋ္ဌာန ပါရမိ မဟာ ဝဇိရဒ္ဒိ တုယှံ;
သတ္တေန ကေန ပိ ယထာဟိ အဘေဇ္ဇ နေဇ္ဇော,ဧဝံ ဇနာပိ ကုသလေသု အဓိဋ္ဌ ဟန္တု.
၈၁.
တွံ သဗ္ဗ သတ္တ စိရဘာဝိတ မေတ္တ စိတ္တ,တောယေဟိ သံသမိတ ကောဓ မဟာ ဟုတာသော;
လောကုတ္တရံ တဒိတရံ ဟိတမာဝဟိတ္ထော,ဧဝံ ဇနေသု ဇနတာ ဟိတမာဝဟန္တူ.
၈၂.
မိတ္တောပကာရ ပဋိပက္ခ ဇနာပကာရေ,တွံ နိဗ္ဗိကာရ မနသော စိရဘာဝနာယ;
ပတ္တောသိလာဘ ပဘုတဋ္ဋုသု နိဗ္ဗိကာရံ,ဧဝံ ဇနာနုနယ ကောပ နုဒါ ဘဝန္တု.
၈၃.
သမ္ပန္န ဟေတု ဝိဘဝေါ တုသိတေ ဝိမာနံ,ယုတ္တံ ဂုဏေဟိ နဝဘိပ္ပဒဝီ ဝိမာနံ;
တွံ ဝါဓိပရမိဓိရောဟိနိယာ တိလောကော,အာရောဟတု ဘယ သုခံ ပဒဝီ ဝိမာနံ.
၈၄.
တွံဝေရဟံသိ သမဗုဇ္ဈိ ယထာစ သမ္မာ,သမ္ပန္န ဝိဇ္ဇ စရဏော သုဂတောသိ ဟောန္တု;
လောကံ ဝိဒေါ ပုရိသဒမ္မသုသာရထီ သိ,သတ္ထာသိ ဗုဇ္ဈိ ဘဂဝါ သိ တထေဝ ဇန္တု.
၈၅.
သစ္စိတ္တ ဘူ နိဒဟိတံ ဇနတာယ တုယှံ,ကလျာဏဝဏ္ဏရတနဏ္ဏဝဇာတိဘိန္နံ;
ဒုက္ခဂ္ဂိ စောရ ဇလုပဒ္ဒုတဇာတိ ဂေဟေ,တဿာ သုခံ ဘဝတု ဇီဝိတုမာပဒါယ.
၈၆.
ဝါစာ ဝိစိတ္တ ဝရ တန္တု ဂတင်္ဂိ ကဏ္ဌေ,သွာ မုတ္တ သဂ္ဂုဏ မဟာ ရတနာ ဝလီ တေ;
ဝေဝဏ္ဏိ ယတ္တနိ ဘဝံ သကလမ္ပဟာယ,ဟောတဉ္ဇနဿ သိရိ သင်္ဂမ မင်္ဂလာယ.
၈၇.
တံ သဂ္ဂုဏတ္ထဝ ဒဟဋ္ဌ သုတိပ္ပနာလိ,နိဿန္ဒမာန ဂုဏနီရ နိပါန တိန္တေ;
ခေတ္တေတ္တ သညိနိ ဇနာ ကတ လောမ ဟံသ,ဗီဇင်္ကုရီ ကုသလ သဿ ဖလံ လဘန္တု.
၈၈.
အာပါယိကပ္ပဘုတိ ဒုက္ခ နိဒါဃ ကာလ,သန္တာပိတာ နိခိလ လောက မနော ကဒမ္ဗာ;
တံ ဝင်္ဏ မေဃ ဖုသနာ ဟသနင်္ကုရေဟိ,ဣဒ္ဓါ ဘဝန္တု မတိ ဝလ္လရိ ဝေလ္လီတာ တေ.
၈၉.
ဟေတုဒ္ဒသာ ဖလဒသာ သမဝဋ္ဌိတံ တံ,သဗ္ဗတ္ထ သတ္တ ဟိတမာဝဟဏေန သိဒ္ဓံ;
စိန္တာပထာတိဂနုဘာဝ ဝိဘာဝနန္တေ,ဘူတာနမတ္ထု စရိတဗ္ဘုတမတ္ထ သိဓျာ.
၉၀.
အင်္ဂါရကာသုမဘိလင်္ဃိယ ဒါန ကာလေ,ဘတ္တတ္တနော ပဒ ပဋိစ္ဆက ပင်္ကဇာ စ;
ယာတက္ခဏေ တဝ ပဒေ ဓဋမုဋ္ဌဟိတွာ,ပင်္ကေရုဟာံ သိဝ မဓုံ သရတံ ဒဒန္တု.
၉၁.
သစ္စေန မစ္ဆ ပတိ ဝဿိတ ဝဿဓာရာ,သတ္တေ ဒယာယ တဝ ဝဿိတ ဝဿဓာရာ;
ဂိမှေ ဇနဿ သမယိံသု ယထာ တထာတာ,ဓမမ္ဗုဝုဋ္ဌိဝ သမေန္တု ကိလေသ ဒါဟေ.
၉၂.
ဆဒ္ဒန္တ နာဂ ပတိနာ ခမတာ ပရာဓံ,ဆေတွာ ကရေ ဌပိတ ဒန္တဝရာဝ လုဒ္ဒံ;
လောကေ ဟိတာယ ဌပိတာ တဝ ဒန္တ ဓာတု,သေဋ္ဌာ ဇနံ သိဝ ပုရံ လဟု ပါပယန္တု.
၉၃.
တံ တေမိယာချ ယတိနောဿမ မာလကမှိ,ဩကိဏ္ဏ မုတ္တ ကနကာ ဝုဇ ဝိပ္ပကိဏ္ဏာ;
ကာရုည ဝါရိဒ စုတော ဒက ဗိန္ဒု ဗန္ဓူ,ဓာတု သမေန္တု တဝ ဇန္တုသု ဒုက္ခဒါဟေ.
၉၄.
ရဋ္ဌဿ အတ္ထ စရဏာယ အသမ္မုခဿ,ရာမေန ဒိန္န တိဏ သံခတ ပါဒုကာဝ;
ဘုတ္တာ တယာ စိရမသမ္မုခ နာဂတဿ,လောကဿ အတ္ထမနု တိဋ္ဌတု ပတ္တ ဓာတု.
၉၅.
ဝုတ္တော ဇနာနမုပဒိဿ ဝရာဟ ရညာ,သတ္ထိံ သဟဿ သရဒံ ဝိယ ဉာယ ဓမ္မော;
အာဒေယျ ဟေယျမုပဒိဿ တယာ ပဝုတ္တော,ဓမ္မော ပဝတ္တတု စိရံ ဇနတာ ဟိတာယ.
၉၆.
မာရာရိ မဒ္ဒန ဟိတာဓိဂမံ ကရောတာ,ဘတ္တော တယာ ဝရ မဟာ ဇယ ဗောဓိ ရာဇာ;
သဂ္ဂါ ပဝဝဂ္ဂ ဟိတဟေတု ဇနဿ ဟန္တွာ,သဗ္ဗန္တရာယမိဟ တိဋ္ဌတု သုဋ္ဌု သဇ္ဇော.
၉၇.
သာမောဒ ဝဏ္ဏ ဘဇနီ ဂုဏ မဉ္ဇရီယံ,စရိယာ လတာ ဝိကသိတာ တဝ သပ္ဖလင်္ဂံ;
ဩကိဏ္ဏ စိတ္တ မဓုပေ ရသ ပီဏယန္တိ,သမ္ဘာဝိတာ ဘုဝိ ပဝတ္တတု မတ္ထကေဟိ.
၉၈.
သမ္ဗုဒ္ဓ သေလဝလယန္တရ ဇာနနဝှာ,နောတ္တတ္တတော တိပထဂါ ယတိ သာဂရဋ္ဌာ;
ဓမ္မာ ပဂါ သုတိ ဝသေ တရိတေ ပုဏန္တိ,သမ္ဘာရ သဿမိဟ ဝတ္တတု ပစယန္တိ.
၉၉.
ပညာဏ ကူပ သိတ ပဂ္ဂဟ ဝါယု ဂါဟီ,သဒ္ဓါ လကာရ သဟိတာ သတိ ပေါတ ဝါဟာ;
သမ္ပာပယာတု ဘဝ သာဂရ ပါရ တီရ,သပ္ပတ္တနံ ဝရဓနေ ပတိ ပတ္တိ နာဝါ.
၁၀၀.
ဗောဇ္ဈင်္ဂ သတ္တ ရတနာကရ ဓမ္မ ခန္ဓ,ဂမ္ဘီရ နီရ စယ သာသန သာဂရော သံ;
သော သီလျနန္တ တနု ဝေဋိထ ဉာဏ မန္ထ,သေလေန မန္ထိတဝတံ ဒိသတာ မတံ ဝေ.
၁၀၁.
ဝုတ္တေန တေန ဝိဓိနာ ဝိဓိနာ တတော တံ,လဒ္ဓါ နုဘူတမမတံ ခိလ ဒေါသ နာသံ;
အစ္စန္တ ရောဂ ဇရတာ မရဏာ ဘိ ဘူတံ,ဘူတံ ကရောတု အမရံ အဇရံ အရောဂံ.
၁၀၂.
သဒ္ဓမ္မ ရာဇ ရဝိနိဂ္ဂတ ဓမ္မရံသိ,ဖုလ္လော ဓုတင်္ဂဒလ သံဝရ ကေသရာလိ;
သံဃာရဝိန္ဒ နိကရော သမဓုံ သမာဓိ,သက္ကိဏ္ဏိကော ဒိသတု သာသန ဝါပိ ဇတော.
၁၀၃.
အာနန္ဒ ရည ရတနာဒိ မဟာ ယတိန္ဒ,နိစ္စပ္ပဗုဒ္ဓ ပဒုမပ္ပိယ သေဝိနင်္ဂီ;
ဗုဒ္ဓပ္ပိယေန ဃန ဗုဒ္ဓ ဂုဏပ္ပိယေန,ထေရာလိနာ ရစိတ ပဇ္ဇမဓုံ ပိဗန္တု.
၁၀၄.
ဣတ္ထံ ရူပ ဂုဏာနုကိတ္တနဝသာ တံ တံ ဟိတာ သိံ သတော,ဝတ္ထာနုဿတိ ဝတ္တိတ ဣဟ ယထာ သတ္တေသု မေတ္တာ စ မေ;
ဧဝံ တာဘိ ဘဝန္တ ရုတ္တရ တရာ ဝတ္တန္တု တာ ဗောဓိ မေ,သံယောဂေါစ ဓနေဟိ သန္တိဟိ ဘဝေ ကလျာန မိတ္တေဟိ စ.