นโม ตสฺส ภควโต อรหโต สมฺมาสมฺพุทฺธสฺส
กมลาญฺชลิ
๑.
กมลาสน กมลาปติ ปมถาธิป วชิรา,ยุธทานว มนุโชรค ภุชคาสน ปตินํ;
มกุฏาหิต มนิทีธิติ ภมราวลิ ภชิตํ,ปณมา’มหํ อนฆํ มุนิ จรณามล กมลํ.
๒.
กมลาลย สทิ’สงฺกิต กลมงฺคล รุจิรํ,ชุติรญฺชิตํ อภินิชฺชิต สุภกญฺจน นลินํ;
ชนิตา จิร สมเย นิช ปิตุ ภูปติ นมิตํ,ปณมา’มหํ อนฆํ มุนิ จรณามล กมลํ.
๓.
สรณาคต รชนีปติ ทินเสขร นมิตํ,ภชิตาขิล ชนปาวนํ อภิกงฺขิต สุขทํ;
วสุธาตล สยมุคฺคต สรสีรุห มหิตํ,ปณมา’มหํ อนฆํ มุนิ จรณามล กมลํ.
๔.
ทิรทาสน ตรุปนฺติก ฆฏิตาสนํ อภยํ,วิชยาสน สมธิฏฺฐิต จตุรงฺคิก วิริยํ;
ธรมานก สุริเยหนิ วิชิตนฺตก ธชินึ,ปณมา’มหํ อภิปาติต นมุจิทฺธช วิภวํ.
๕.
สทโยทิต ปิยภารติ วิชิตนฺตก สมรํ,ทสปารมิ พลกมฺปิต สธราธร ธรนึ;
คิริเมขล วรวารน สิรสานต จรณํ,ปณมา’มหํ อภินนฺทิต สนรามร ภุวนํ.
๖.
นิขิลาสว วิคเม’นติวิมลีกต หทยํ,ตทนนฺตร วิทิตาขิล มติโคจร วิสยํ;
วิสยีกต ภุวนตฺตยํ อติโลกิย จริตํ,ปณมา’มหํ อปราชิตํ อรหํ มุนึ อสมํ.
๗.
มุทุภารติ มธุปาสิต นลิโนปม วทนํ,รุจิรายต นลินีทล นิภ โลจน ยุคลํ;
อุทโยทิต รวิมณฺฑล ชลิตามล นิฏิลํ,ปณมา’มห อกุโตภยํ อนฆํ มุนิ ปมุขํ.
๘.
อสิตมฺพุท รุจิกุญฺจิต มุทุ กุนฺตล ลลิตํ,ภุวโนทร วิตตามิต ชุติสญฺจย ชลิตํ;
มทโมทิต ทิรโทปม คติวิพฺภม รุจิรํ,ปณมา’มหํ อมตนฺทท มุนิปุงฺควํ อสมํ.
๙.
กรุณารส ปริภาวิต สวณามต วจนํ,วิรุทาวลิ สตโฆสิต ยสปูริต ภุวนํ;
สุมโนหร วรลกฺขณ สิริสญฺจย สทนํ,ปณมา’มหํ อุทิตามล สสิมณฺฑล วทนํ.
๑๐.
วินยารห ชนมานส กุมุทากร สสินํ,ตสินาปค ปริโสสน สตทีธิติ ตุลิตํ;
ตมนาสว มุนิเสวิตํ อปโลกิต สุขทํ,ปณมา’มหํ อนิเกตนํ อขิลาคติ วิคตํ.
๑๑.
สหิตาขิล ภยเภรวํ อภยาคต สรนํ,อชรามร สุขทายกํ อนิรากต กรุณํ;
ตมุปาสก ชนเสวิต สุปติฏฺฐิต จรณํ,ปณมา’มหํ อหิตาปหํ อนฆุตฺตม จรณํ.
๑๒.
กรุณามต รสปุริต วีมลาขิล หทยํ,วิหิตามิต ชนตาหิตํ อนุกมฺปิต ภุวนํ;
ภุวเน สุตํ อวนีปติ สต เสวิต จรณํ,ปณมา’มหํ อนฆํ มุนึ อฆนาสน จตุรํ.
๑๓.
อรตีรติ ปริปีลิต ยติมานส ทมนํ,นิชสาสน วินิวาริต ปุถุติตฺถิย สมณํ;
ปรวาทิก ชนตากต ปริภาสิต ขมนํ,ปณมา’มหํ อติเทวต วร โคตม สมณํ.
๑๔.
สรณาคต ภยนาสน วชิราลย ปณิภํ,ภวสาคร ปติตามิต ชนตารน นิรตํ;
สิรสาวหํ อมลญฺชลิ ปุฏปงฺกช มกุลํ,ปณมา’มหํ อขิลลาย วิคตํ มุนึ อตุลํ.
๑๕.
วิมลีกต ชนมานส วิคตาสว ภควํ,ภวปารค วิภวามต สุขทายก สตตํ;
ปรมาทร ครุคารว วินตํ ชิน ปยตํ,ปทปงฺกช รชสา มม สมลงฺกุรุ สิรสํ.
๑๖.
ปวนาหต ทุมปลฺลวํ อิว นารต จปลํ,ภวลาลส มลินีกตํ อชิตินฺทฺริย นิวหํ;
จิร สญฺจิต ทุริตาหตํ อนิวาริต ติมิสํ,วิมลีกุรุ กรุณาภร สุตรํ มม หทยํ.
๑๗.
อทเย ทยํ อนเย นยํ อปิ โย คุณํ อคุเณ,อหิเต หิตํ อกโร กฺวจิท อปิ เกนจิ นกตํ;
สทเย ชิน สุนเย คุณสทเน ตยิ นิตรํ,สุหิเต หิตจริเต’นฆ รมเต มม หทยํ.
๑๘.
ภวสงฺกฏ ปติเตนปิ ภวตา จิร จริตํ,วิสเม สม จรณํ ขลุ ทสปารมิ ภรณํ;
สรโต’หนิ สรโต นิสิ สุปิเนนปิ สตตํ,รมเต ชิน สุมเต ตฺวยิ สทยํ มม หทยํ.
๑๙.
อติทุทฺททํ อทที ภวํ อติทุกฺกรํ อกรี;
อติทุกฺขมํ อขมี วต กรุณานิธิ’รสโม,อิติ เต คุณํ อนฆํ มุนิ สรโต มม หทยํ,รมเต’หนิ รมเต นิสิ รมเต ตฺวยิ สตตํ.
๒๐.
อติทุจฺจรํ อจรี ภวํ อติทุทฺทมํ อทมี,อติทุทฺทยํ อทยี วต สทยาปร หทโย;
อิติ เต คุณํ อนฆํ มุนิ สรโต มม หทยํ,รมเต’หนิ รมเต นิสิ รมเต ตฺวยิ สตตํ.
๒๑.
อติทุคฺคมํ อคมี ภวํ อติทุชฺชยํ อชยี,อติทุสฺสหํ อสหี วต สมุเปกฺขิต มนโส;
อิติ เต คุณํ อนฆํ มุนิ สรโต มม หทยํ,รมเต’หนิ รมเต นิสิ รมเต ตฺวยิ สตตํ.
๒๒.
อติทารุน ปลยานล สทิสานล ชลิเต,นิรเย วินิปติโต จิรํ อฆตาปิต มนโส;
น สรึ สกิท อปิ เต ปิต ภชิตุํ ปทนลินํ,ขม โคตม นรสารถิ ตมิทํ มม ขลิตํ.
๒๓.
ติริยคฺคต-คติยํ จิรํ อนวฏฺฐิต จริโต,อตินิฏฺฐุร วธตชฺชิต ภยกมฺปิต หทโย;
น สรึ สกิทปิ เต ปิต ภชิตุํ ปทนลินํ,ขม โคตม ปุริสุตฺตม ตมิทํ มม ขลิตํ.
๒๔.
ปริเทวน นิรโต จิรํ อถ เปตฺติย วิสเย,สุชิฆจฺฉิต สุปิปาสิต ปริโสสิต ชฐเร;
น สรึ สกิทปิ เต ปิต ภชิตุํ ปทนลินํ,ขม โคตม ทิปทุตฺตม ตมิทํ มม ขลิตํ.
๒๕.
วิวโส ภุสํ อฆทูสิต มนสาสุร วิสเย,ชนิโต ฆนติมิเร จิรํ อติทุกฺขิต หทโย;
น สรึ สกิทปิ เต ปิต ภชิตุํ ปทนลินํ,ขม โคตม วสิสตฺตม ตมิทํ มม ขลิตํ.
๒๖.
มนสา จิร วิหิตํ สรํ อติกิพฺพิส จริตํ,สมเถนถ สุวิราชิย ตํ อสญฺญิตํ อุปโค;
น สรึ สกิท อปิ เต ปิต ภชิตุํ ปท นลินํ,ขม โคตม วสิปุงฺคว ตมิทํ มม ขลิตํ.
๒๗.
วิชิคุจฺฉิย ทุริตํ นิช วปุสา กตํ อมิตํ,ตนุ วชฺชิตํ อุปโค ภวํ อิห ภาวิต สมโถ;
น สรึ สกิทปิ เต ปิต ภชิตุํ ปทนลินํ,ขม โคตม ยติกุญฺชร ตมิทํ มม ขลิตํ.
๒๘.
รตนตฺตย รหิเต ภุส พหุลีกต ทุริเต,ชนิโต ปรวิสเย พุธชน นินฺทิย จริเต;
น สรึ สกิทปิ เต ปิต ภชิตุํ ปทนลินํ,ขม โคตม กรุณานิธิ ตมิทํ มม ขลิตํ.
๒๙.
ชนิโต ยทิ มนุเชสุปิ วิกลินฺทฺริย นิวโห,ตนุนา กรจรณาทิหิ วิกเต’นิห ทุขิโต;
น สรึ สกิทปิ เต ปิต ภชิตุํ ปทนลินํ,ขม โคตม มติสาคร ตมิทํ มม ขลิตํ.
๓๐.
วิธินาหิต มติภาวน รหิโต ตมปิหิโต,วิสเทสุปิ กุสลาทิสุ ตถทสฺสน วิมุโข;
น สรึ สกิทปิ เต ปิต ภชิตุํ ปทนลินํ,ขม โคตม นรเกสริ ตมิทํ มม ขลิตํ.
๓๑.
สุจิเรนปิ ภุวิ ทุลฺลภํ อสมํ ขณํ อลภํ,สนรามร ชนตาหิต สุขทํ มุนิ ชนนํ;
น สรึ สกิทปิ เต ปิต ภชิตุํ ปทนลินํ,ขม โคตม วทตํวร ตมิทํ มม ขลิตํ.
๓๒.
นิสิตายุธ วธสชฺชิต ขฬนิทฺทย หทโย,ปรหึสน รุจิ ภึสน ยมโสทร สทิโส;
น สรึ สกิทปิ เต ปิต ภชิตุํ ปทนลินํ,ขม โคตม มุนิสตฺตม ตมิทํ มม ขลิตํ.
๓๓.
ปรสนฺตก หรเณ กตมติ พญฺจน พหุโล,ฆรสนฺธิก ปริปนฺถิก สหสากติ นิรโต;
น สรึ สกิทปิ เต ปิต ภชิตุํ ปทนลินํ,ขม โคตม มุนิปุงฺคว ตมิทํ มม ขลิตํ.
๓๔.
นวโยพฺพน มทคพฺพิต ปริมุจฺฉิต หทโย,สุจิสชฺชน วิชิคุจฺฉิย ปรทาริก นิรโต;
น สรึ สกิทปิ เต ปิต ภชิตุํ ปทนลินํ,ขม โคตม กรุณาภร ตมิทํ มม ขลิตํ.
๓๕.
มทิราสวรต นาครชน สนฺตต ภชิโต,ครุคารว หิริทูริต ติริยคฺคต จริโต;
น สรึ สกิทปิ เต ปิต ภชิตุํ ปทนลินํ,ขม โคตม วิหตาสว ตมิทํ มม ขลิตํ.
๓๖.
สปิตามห ปปิตามห นิจิตํ ธนํ อมิตํ,ปิตุสญฺจิตมปิ นาสิย กิตโว หตวิภโว;
น สรึ สกิทปิ เต ปิต ภชิตุํ ปทนลินํ,ขม โคตม วิชิตนฺตก ตมิทํ มม ขลิตํ.
๓๗.
วิตถาลิก วจโน ปรปิยสุญฺญต กรโณ,ผรุสํ ภณํ อตินิปฺผล พหุภาสน นิปุโณ;
น สรึ สกิทปิ เต ปิต ภชิตุํ ปทนลินํ,ขม โคตม ภุวเนสุต ตมิทํ มม ขลิตํ.
๓๘.
ปรสมฺปทํ อภิฌายน นิรนฺตร ทุขิโต,นภิรชฺฌน ปรโม กฺวจิ ผลทสฺสน รหิโต;
น สรึ สกิทปิ เต ปิต ภชิตุํ ปทนลินํ,ขม โคตม คุณสาคร ตมิทํ มม ขลิตํ.
๓๙.
ภวโต ภวํ อปราปรํ อยตาจิรํ อิติ เม,วปุสา อถ วจสาปิ จ มนสา กตํ อมิตํ;
ขม โคตม ทุริตาปห ทุริตํ พหุวิหิตํ,ทท เม สิวปทํ อจฺจุตํ อมตํ ภววิคตํ.
๔๐.
ติมิราวุต กุณปากุล วิชิคุจฺฉิย ปวเน,ชนิกาสุจิ ชฐเร พหุ กิมิสนฺตติ สทเน;
อสยึ ภวคหเณ จรํ อหํ อปฺปฏิสรเณ,สรนํ ภว ภควํ มม ภวนีรธิ ตรเณ.
๔๑.
พหิ นิกฺขมํ อสกึ ภคติริยํ ปถ ปติโต,อคทงฺกร กต สลฺลก สตขณฺฑิต กรโณ;
อมรึ ภวคหเณ จรํ อหํ อปฺปฏิสรเณ,สรณํ ภว ภควํ มม ภวนีรธิ ตรเน.
๔๒.
ปติโต พหิ รติปิลฺลก ตนุรามย มถิโต,วทิตุํ กิมุ วิทิตุมฺปิ จ น สหํ มติรหิโต;
อมรึ ภวคหเณ จรํ อหํ อปฺปฏิสรเณ,สรณํ ภว ภควํ มม ภวนีรธิ ตรเณ.
๔๓.
ชนิโต ยทิ สุขิโต ชนทยิโต ปิยชนโก,ปุถุโก พหุวิธ-กีลนนิรโต คทคหิโต;
อมรึ ภวคหเณ จรํ อหํ อปฺปฏิสรเณ,สรณํ ภว ภควํ มม ภวนีรธิ ตรเณ.
๔๔.
ตรุโนปิ หิ ฆรพนฺธน คถิโตมิต วิภโว,สหสา คทคหิโต ปิยภริยาสุต วิยุโต;
อมรึ ภวคหเณ จรํ อหํ อปฺปฏิสรเณ,สรณํ ภว ภควํ มม ภวนีรธิ ตรเณ.
๔๕.
อชรํ ตนุํ อภิมญฺญิย นวโยพฺพน วสิโก,ชรสา ปริมถิโต ปรํ อนนุฏฺฐิต กุสโล;
อมรึ ภวคหเณ จรํ อหํ อปฺปฏิสรเณ,สรณํ ภว ภควํ มม ภวนีรธิ ตรเณ.
๔๖.
นิรุโช ธุวํ อรุชํ ตนุํ อภิมญฺญิย สมโท,กุสลาสย วิมุโข ภุสํ อวโส คทนิหโต;
อมรึ ภวคหเณ จรํ อหํ อปฺปฏิสรเณ,สรณํ ภว ภควํ มม ภวนีรธิ ตรเณ.
๔๗.
ปวิจินฺติย สกชีวิตํ อมรํ ธุวํ อนิฆํ,อิติ ชีวิตมทคพฺพิต มติรุชฺฌิต กุสโล;
อมรึ ภวคหเณ จรํ อหํ อปฺปฏิสรเณ,สรณํ ภว ภควํ มม ภวนีรธิ ตรเณ.
๔๘.
ปรหึสน ธนโมสน ปรทาริก นิรโต,ธรนีปติ คหิโต พหุ วธพนฺธน นิหโต;
อมรึ ภวคหเณ จรํ อหํ อปฺปฏิสรเณ,สรณํ ภว ภควํ มม ภวนีรธิ ตรเณ.
๔๙.
นรโกทก ปติโต คิริตรุมตฺถก คลิโต,มิควาฬก คหิโต วิสธร ชาติหิ ฑสิโต;
อมรึ ภวคหเณ จรํ อหํ อปฺปฏิสรเณ,สรณํ ภว ภควํ มม ภวนีรธิ ตรเณ.
๕๐.
อภิจารก วิธิโกปิต นิสิจารก คหิโต,สวิโสทน สหสาทน ปภุตีหิ จ ขลิโต;
อมรึ ภวคหเณ จรํ อหํ อปฺปฏิสรเณ,สรณํ ภว ภควํ มม ภวนีรธิ ตรเณ.
๕๑.
สยเมวจ สชโนปริ กุปิโต มติวิยุโต,สวิสาทน คลกนฺตน ปภุตามิต ขลิโต;
อมรึ ภวคหเณ จรํ อหํ อปฺปฏิสรเณ,สรณํ ภว ภควํ มม ภวนีรธิ ตรเณ.
๕๒.
ปิตุปูชน นิรตาสย สุขิโต ปิตุทยิโต,มรเณนจ ปิตุโน ภุสํ อนุโสจน นิรโต;
ปรุทึ จิรํ อติทุสฺสห กสิเร ภวคหเณ,สรณํ ภว ภควํ มม ภวนีรธิ ตรเณ.
๕๓.
สมุปฏฺฐิย ชนิกํ นิชํ อภิวาทน ปรโม,มรเณนจ ชนิกายนุสริตา คุณมหิมํ;
ปรุทึ จิรํ อติทุสฺสห กสิเร ภวคหเณ,สรณํ ภว ภควํ มม ภวนีรธิ ตรเณ.
๕๔.
คุรุเทวต ปติมานน ปรโม ปิยสุวโจ,สมุปาสิตจรโณ คุรุมรเณนติทุขิโต;
ปรุทึ จิรํ อติทุสฺสห กสิเร ภวคหเณ,สรณํ ภว ภควํ มม ภวนีรธิ ตรเณ.
๕๕.
ฆรเมธิตํ อุปโคมิตวิภโว รติพหุโล,มรเณ ปิยภริยาสุตทุหิตู’นติกรุณํ;
ปรุทึ จิรํ อติทุสฺสห กสิเร ภวคหเณ,สรณํ ภว ภควํ มม ภวนีรธิ ตรเณ.
๕๖.
ปิยปุพฺพช สหชานุช ภคิณิทฺวย มรเณ,นิช พนฺธว-สข-สิสฺสก มรเณ ปฺยติกรุณํ;
ปรุทึ จิรํ อติทุสฺสห กสิเร ภวคหเณ,สรณํ ภว ภควํ มม ภวนีรธิ ตรเณ.
๕๗.
ชคตีปติ คหณา ริปุชนตกฺกร หรณา,สริโตทก วหณา ปุถุชลิตานล ทหณา;
ปรุทึ หตวิภโว จิรมิห ทุคฺคติคหเณ,สรณํ ภว ภควํ มม ภวนีรธิ ตรเณ.
๕๘.
อติทุคฺคม วิสมากุล ภวสงฺกฏ ปติเต,พฺยสนํ จิรมิติ ทุสฺสหํ อนุภูยปิ วิมิตํ;
น ชเห สุขลววญฺจิตหทโย ภวตสินํ,ตมปากุรุ กรุณานิธิ ตสินํ มม กสิณํ.
๕๙.
ชนนาวธิ มรณํ วิย มรณาวธิ ชนนํ,อุภเยนปิ ภยเมวหิ ภวโต มม นิยตํ;
สิวเมวจ ชนนาวธิ มรณาวธิ รหิตํ,ทท เม สิวํ อมตนฺทท ตํ อนาสว ภควํ.
๖๐.
จิรทิกฺขิตมปิ เม มนํ อนิวาริต ตสินํ,ภวโต ภว รติปีลิตํ อหโห กลิฆฏิตํ!ตมโต ปิต ภยโต มมมว เม ภว สรณํ,ภควํ ปฏิสรณํ มม ภวนีรธิ ตรณํ.